◼ Teleŋ Bɔŋaŋndo Kanduŋ Niŋndo. Fondaŋ bɔŋaŋndo cho biinɔŋndo cho wa o kumbiaŋ a 8:00 idiiyo. Palɛi yaa ve hei fau, nyɛchaa cho wa kandɔŋndo a 9:20. Le bɔŋaŋ naa kandɔɔ o nɛi lebɛɛ niŋ, o bɛnda te ŋ tuei dɔɔ pɛ nyɛchaa, ŋ kɔ chal. O Chimɛiyo choo a Ndaamaa, a 4:55 naŋ cho chondii mɛɛlɛi soli ni miŋ kinda a piɛileŋ kɛ o Kuɛɛndoo choo, a 3:50.
◼ Naa Kɛsiaa Nyɛm Nyaanaŋndoŋ. Teleŋ o teleŋ waŋnda mal chiɛila ndalaŋ pɛ, mi viiya a wanaa wɔɔŋaa cheleŋ kɛsi nda hɔlteŋ kɔɔli le nda chiimbuu wo. Lelaŋ, mɔmbil numndo wa o baŋaa teleŋ o teleŋ nduyɛ, mɛi nyɛ o kɛsiaa leniŋ kpendekele o tosa mi waŋndo del kɔl le dioo piɔulɔɔ mbo chua wo le.
◼ Naa chalaa Biyɔɔ. Idii o idii fondaŋ bɔŋaŋndo kumbiŋ pɛ, a yandii kua a lakil le naa chalaa ŋ hɛnaŋ nda biyɔɔ mɛɛ wana wa sɔŋga a chaaŋ num yɛ le. Sala naŋ soliŋ le yeemɛi acheleŋnda hivioo lachi wo chɔm ni kɛsɛ maa Kilisiɔŋaa tonyaa naŋ cho ni. Nduyɛ, hei tosa mi waŋnda saŋgala Mɛlɛka. (Chɔŋ 13:34, 35; Kɔl. Tasoo 13:4, 5; Pitɛ Tasoo 2:12) Bii naa chalaa kinɛi le wanaa nya cho chiɛiniŋnda, a nya hiŋ o mɔmbil numndo niŋnda, a pɛɛkula numndaŋ. Naa chalaa cho wa le bɛnduaa yuuwa a wanaa tiuba le nyɛ tosa a ba nda le wa. Mɛɛ fondaa hoo cho o bɔɔ le yɛ, wanaa ndaa malaa o pilɛ ɔɔ a ŋiiɔŋ kinɛi nɔ ni ma chal nda ikɛi.
◼ Teleŋ Pɛŋgi Pɔmbɔɔ. Yandii huŋ a nyɛdiaa o ba yɔŋii ŋ mal fondaŋ bɔŋaŋndo a teleŋ pɛŋgi pɔmbɔɔ ma kuɛ kela nyɛdiaa naa cheleŋ. Huŋ a nyɛdiaa o hɛŋgɛi kɛɛ sulɔɔ o kpeŋgbei ŋ cho wa ichali wo bɛŋgu le. Nduyɛ nyɛ o nyɛ cho nyɛ sani, huŋ a ndu o fondaŋ bɔŋaŋndo le.
◼ Toolulaŋ. Mɛɛ naŋ chɔm balika melaa le kɛɛsiaala bɔŋaŋndo yɛ cho ni, ooloo yɔŋgoo le yooŋgu kɛndɔɔ hivioo lachi a teleŋ bɔŋaŋndo. A ke “Watch Tower” yauwo le mbo kɔ chua nyɛ num sɔlaa o chiɛi nda kɛsi nyɛsɔlaa wo niŋ.
◼ Kooma Chiɔwaŋ. Te wana chiɔwaa chɔm num pɛ kooma ŋ nɔ le chuaa waŋ, yandii huŋ a maŋ o ba chalaŋ kanifuule, ma ve niŋ o fondaŋ bɔŋaŋndo le. Te a chii pɛ kpekoo soliŋ a siɛndima huawaŋ, wou maŋ o nyɛ nda kɛsi le billo dɔwɔɔ leniŋ o fondaŋ bɔŋaŋndo wo le. Kɔ viou maŋ naa wana yɔŋuluŋ te wa.
◼ Silaa le Yɔŋulɔŋndaŋ. Madaŋ yɔŋi ŋ siɛɛla ɔɔ ma boŋ o tosa ma yɔŋuluŋndo. Wɔsi o wɔsi, mi yɔŋulɔŋndaŋ la tosaŋ o bɔŋaŋndo. Nyɛ tosa keŋndo cho samtala helaalaŋ ni. Lelaŋ, o bɛnda miŋ wounuŋ samtala le tuula mala naa miŋ kuɛ nyɛkɛndɛi ŋ del te laŋ.
◼ Suɛi Nda Tuuliaa a Laba Ve. Le tɔnɔ wanaa tuii le wa, a cho sɔɔŋ bɔŋaŋndo wa hivioo o suɛi nda tuuliaa a laba ve niŋ. A cho o dɛɛniaa le ma veelu wanaa tuii le wa o yuŋgu numndo niŋ, chaaŋaa numnda, vɛlɛ a wanaa ŋ cho Baabuiyo pɛɛkoo wa le ma hiŋ o bɔŋaŋndo. Tuula cho le bɔŋaŋndo wo, kɛɛsiaa cho wa le ma chɔm nda viduei ndɔɔ.
◼ Soliŋ yau bɔmbɔɔ hoo Kpeku, Please Follow Up (S-43). Te a wa pɛ seeleŋ timbioo o baltaŋ niŋ a teleŋ bɔŋaŋndo mi waŋndo chɔm yeemɛi, soliŋ ndu kpeku ma poonyiaa diola ndɔlaŋ, fondaŋ ndɔɔ, a foŋ nɔmbɛi (nimbolo) ndɔɔ. Te a chii pɛ, a kɔ ke kunda cho le yaulaŋ o bɔŋaŋndo wo, ɔɔ a miiŋgu pɛ o kunda numndo niŋ, a ke wana poonyiaa.
◼ Yɔŋgɔŋndo le Wallo. Te a yeema le malaa pɛ, kɔ dimul kunda cho le wallo o bɔŋaŋndo wo. Chuaambuaa fuuluu wɔ wɔsiŋ 16 te wa bɛɛ tosa wali kɛndɔɔ o hɔlte wana velu nda wa bɛŋgu, wana cho nda mandaa wa, ɔɔ kaasoŋnɔ cheleŋ wanaa ndaa chɛllo.