Yɛɛ Daaniɛɛ Ndoo Dimi yɛ a Hunɔɔ Mɛsaya wo Okɔɔ?

CHƆŊ a boondii Daaniɛɛ wa achal mbo huŋ bii a teleŋ nda velu Chiisu wo, suɛi wɔsila 500 laa hiou ni. Kɛ lɔɔpa mi Chiisu vialuŋ, mi Chɛhowa chɔm Daaniɛɛ nyɛ o nyɛ nɔ le yɔŋnɔŋndo a Chiisu okɔɔ. Mbo chɔm ndu boondii Chiisu nɔ mbo yuluŋ iso, okoŋ, mbo simnuŋ Mɛsaya, te koŋ te, Kiliti ve. Mbo dimul ndu aa, “I yeema num ma sina hei pɛŋgu maa, chɔŋ a teleŋ Mɛlɛka dimi le Chulusalɛm miŋgi taŋgullo wo, wɔsilaŋ la cho hiouwɔɔ bele-hiɔɔlu a la ŋɔmahiɔɔlu, nduyɛ mi wɔsilaŋ la hiou vɛlɛ kɛmɔɔ le hiɔɔlu a bele-yaa a la hiɔɔlu (434), malaŋ wana Mɛlɛka chua buŋgɛi maa o cho viomɔɔ le waŋnda piŋioo wo o huŋ.”—Daaniɛɛ 9:​25.

Le sinaa boondii Chiisu simnuŋ Kiliti ve, ŋ nɔ fɛŋ miŋ sina lɔɔ boondii keŋ i kanduŋnde. Daaniɛɛ dimi maa, “chɔŋ a teleŋ Mɛlɛka dimi le Chulusalɛm miŋgi taŋgullo wo.” A teleŋ kuɛɛ Mɛlɛka dimi yɛ diomndeŋ ndeŋ? A mɛɛ wana suaa le Mɛlɛka wo Nɛhimaya dimi yɛ, maa a teleŋ masaa dimi le kpakioo Chulusalɛm miŋgioo taŋgullo silɔ wo. O “wɔsila bidiiŋnda masaa Atasasi ndoo chua wɔ o masaleŋ choo laŋ” kinɛi diomndeŋ le yɔŋguŋ ni. (Nɛhimaya 2:​1, 5-8) Wanaa pɛɛku a sɔɔŋ paandoŋ okɔɔ wa dimi maa, o wɔsi 475 B.C.E. niŋ masaa Atasasi kandu masaleŋ ni. O dimi niŋ, chɔŋ a wɔsi 475 B.C.E. tei mbo huŋ bii a wɔsi 455 B.C.E., o chua wɔsilaŋ 20. Mɛɛ ŋ dimi niko maa, ŋ sina lɔɔ boondii Daaniɛɛ dimi keŋnde i kanduŋ ndo. Ndu cho yɛ wɔsi 455 B.C.E ni.

Mi Daaniɛɛ chɔm vɛlɛ mɛɛ kpɛ boondei i bandu niŋ yɛ lɔɔpa mi Mɛsaya hiŋ. Mbo dimi maa o nɔ mbo chua “lɔɔlaŋ la 7, vɛlɛ a lɔɔlaŋ 62”. Te a dɔu pɛ lɔɔlaŋ ndaŋ diompilɛ, o kuɛ lɔɔlaŋ 69. Vɛɛ kpɛ boondei hei bandu yɛ bu? Baabuila bɔɔbɔɔ la dimi maa, o cho lɔɔla naŋ nɔ palɛi i ŋɔmmɛu leniŋndaŋ te. Kɛ lɔɔlaŋ ndaŋ la sim le wɔsilaŋ. Ndu cho ni, lɔɔ kɛ kɛ fee sim le wɔsilaŋ la ŋɔmmɛu. Chuuwa ndaa sina lɔɔla wɔsila ŋɔmmɛulaŋ ndaŋ o sindɔɔ niŋ. Le tamaseliiyo, te wɔsilaŋ la hiou pɛ la ŋɔmpum, o wɔsi ŋɔmmɛu ndɔɔ niŋ, wɔsi pɛŋgiaa wa koŋ ni le Chuuwa. (Ɛsɔdɔɔ 23:​10, 11) Mɛɛ o lɔɔla 69 ndaŋ niŋ, lɔɔ kɛ kɛ fee sim le wɔsilaŋ la ŋɔmmɛu. Te o yɔŋ pɛ ma handu lɔɔla 69 ndaŋ lechoo bɛmbɔɔ le 7, a cho sɔla wɔsilaŋ 483.

Le miŋ bii suɛi hei bila nyɛkɛndɛi, mɛɛ miŋ chɔm. Te ŋ kandu pɛ chɔmndo o wɔsi 455 B.C.E., boondii wɔsila 483 ve cho naa yɔɔ o wɔsi 29 ve C.E.a Mɛɛ o wɔsi koŋ niŋ kpeekpei Chiisu yiŋ ni mbo simnuŋ Mɛsaya.b (Luku 3:​1, 2, 21, 22) Hei cho naa chɔmndo maa nyɛ Baabuiyo dimi pɛ o del lɛŋ te.