Mi Isɔluɛiya o Sindɔɔ Niŋ Ndaa Kuɛ o Chɔuwo. Kɛ, Le Yɛɛ Naŋ Kue Hau o Chɔu Le?

“TE NYA o kɛ kɛ kɛɛ pɛ le sɔŋgaa a Filaŋsi ɔɔ Iŋkilaŋ, nya kpou cho piɔmndo sɔla!” Diomndaŋ ndaŋ wana bɛndu pilɛ le Nasi dimul Seiyaa Chɛhowaa a teleŋ Chɔu Chieeŋ Diiŋ Ndɔɔ ni. Mi che bɛɛ sovɛiya wa isisi puaapiliaa haa ikɛi a yekpaŋndaŋ, kɛ puaapiliaa naa opilɛ bɛɛ chue yikpandi le sɔŋgɔ le. Kɔl simulaa kpeekpeiyo nda chɔm hoo ni! Tamaseliiyo hoo mala naa le sinaa yiyaŋ naa Seiyaa Chɛhowaa kpou nɔ wo: Ŋ kue o chɔu le. Nduyɛ o yɔŋ bɛɛ ma kɔŋgɔlaŋ naa le naa diyɔɔ, ŋ wou laba o chɔulaba chieeŋndo niŋ te.

1. WANAA MƐLƐKAA KPOU, KAALEŊ LEPILƐ NDA WA NI

O sindɔɔ niŋ, wanaa Chɛhowaa kpou, kaaleŋ lepilɛ nda wa ni. Nduyɛ leŋ le wa kaaleŋ Isɔluɛi ni. Mbo dimi a Isɔluɛiya okɔɔ maa ‘waŋnda o chieeŋndo niŋ kpou, nda o hɛli ni mbo siiŋguu nda wanaa ndɔ.’ (Ɛsɔ. 19:​5-6) Nduyɛ mbo ke nda tandaa a ba nda. Lelaŋ, te Mɛlɛka ndoo dimul pɛ Isɔluɛiya le ma kɔ sɔŋga a lɛŋii cheleŋnde, o cho chaaŋaa ndaa laalaŋnda le ndaa diu le.a

Hau, Kilisiɔŋaa tonyaa “fula o lelɛŋ o lelɛŋ niŋ, a lekaa o lekaa, a waŋnda suu o suu, a isɔɔ o isɔɔ maŋgalaa.” (Sɔɔŋ. 7:​9) Lelaŋ, te wanaa Mɛlɛkaa luei pɛ balaŋ o chɔulaŋ niŋ, mɛɛ a cho wa chaaŋaa ndaa laalaŋnda chɔulabaa, nduyɛ ma wa diuwaŋndo.

2. MI CHƐHOWA DIMUL ISƆLUƐIYA LE MA WA KƆLAŊ O CHƆUWO

O sindɔɔ niŋ, Chɛhowa ndoo kɛɛsiaa le sabu Isɔluɛiya ndaa nɔ ma kuɛ o chɔuwo wo ni, nduyɛ a teleŋ ndaa nɔ ma kuɛ wo. Le tamaseliiyo, mbo dimul nda le ma kɔ chiŋalaŋ Kenanaitiiya le mɛɛ nda wa balaŋ o piɛile nyinaa wɔɔŋnda niŋ, kaala nɔɔlɛilaŋ, a o chuaambuaa salalaŋ solioo niŋ yɛ. Mbo dimul nda vɛlɛ le ma soli wanaa wa kaala nɔɔlɛilaŋ ndaŋ tosaa o lɛŋnde o chuel nda buŋgɛi leŋ niŋ. (Lɛvi. 18:​24, 25) Mɛɛ Isɔluɛiya luɛi o Lɛŋnde Mɛyaaleŋ niŋ, mi Mɛlɛka ndoo dimul nda lepum le ma sɔŋga a yaamɔɔwaa ndaa le lɛŋnde ndaleŋ mandaa. (2 Saam. 5:​17-25) Kɛ, pesiŋ bɛɛ o ke nda dioo le ma kɛɛsiaa a ba nda le ma kuɛ o chɔuwo le. Te ndaa tosa keŋ pɛ, ndaa sɔla fulamakɔɔli kɛndɛ le.—Nɔm. 14:​41-45; 2 Kolo. 35:​20-24.

Hau, Chɛhowa ke waŋnda chieeya di le ma kuɛ o chɔuwo le. Te lɛŋnde kuɛ pɛ o chɔuwo, o cho le yeemɛi Mɛlɛkɛi peeloo le nda kua le, kɛ le yeemɛi ndɛi peeloo. Ma kuɛ o chɔuwo le ma sɔla tandaa ɔɔ nyɛsɔlaa. Nduyɛ, mi waŋnda sɔŋga o lɛŋndeŋ niŋ le masaleŋ ɔɔ le mi sɔɔŋ siŋgaŋ. Kɛ mi waŋnda apum yiyaŋ maa, a nɔ ma kuɛ o chɔuwo le piɛile ndaleŋ mandaa ɔɔ le yaamɔɔwaa Mɛlɛkaa diyɔɔ. Nduyɛ maa, mi Mɛlɛka wa a nda latulu o chɔu waa lende niŋ. Kɛ ŋ nɔ miŋ sina maa, Chɛhowa cho wanaa cho ndu piɛiyo o laalaŋndo choo wa manda, nduyɛ mbo tɛɛmbuu yaamɔɔwaa nduaa o chilaŋ niŋ a teleŋ chɔu Amakɛdɔŋndo. (Sɔɔŋ. 16:​14, 16) Puaa kpaayaa bɛnduaa o choo choo niŋ Mɛlɛka cho soliŋ kpeku ni le chɔuwo hoo tosaa, o cho buɛiyaa nduaa o chieeŋndo choo le.—Sɔɔŋ. 19:​11-15.

3. ISƆLUƐIYA NDAA DII WANAA NDAA DUAU LAALAŊNDO O MƐLƐKA NIŊNDA O CHƆUWO LE

O sindɔɔ niŋ, te puaa chɔuwa Isɔluɛi ndaa kuɛ pɛ o chɔuwo, mi ndaa tuiinuŋ wanaa ndaa duau laalaŋndo o Mɛlɛka niŋnda inyiɛɛ. Kɛ mi ndaa diu wanaa Chɛhowa ndoo dimul nda le ma diu wa. Ŋ tofaŋndɔ tamaseliilaŋ latiɔɔŋ. Mi che bɛɛ mi Chɛhowa dimul puaa chɔuwa isɔluɛi le ma kɔ tɛɛmbuu Chɛliko, kɛ ma tuiinuŋ Luehabi a yuŋgu ndɔɔ inyiɛɛ le mɛɛ ndaa dɔu laalaŋndo o ndu niŋ yɛ. (Chɔɔ. 2:​9-16; 6:​16, 17) Okoŋ kɔɔli, mi Kibiɔnaitiiya kpou sɔla chindaa le mɛɛ ndaa nɔ siooŋii Mɛlɛkɛi yɛ.—Chɔɔ. 9:​3-9, 17-19.

Hau, wanaa kua o chɔuwo wa tuiinuŋ wanaa dɔu laalaŋndo o Mɛlɛka niŋnda inyiɛɛ le. Nduyɛ, ma diu wanaa sina pɛŋ a chɔuwo okɔɔ le wa.

4. ISƆLUƐIYA NDAA NƆ MA TOL SAWALA MƐLƐKALAŊ KƆƆLI LE KƆLAŊ O CHƆUWO

O sindɔɔ niŋ, Chɛhowa ndoo yeema mi sovɛiyaa Isɔluɛiya ndaa tol sawala ndɔlaŋ kɔɔli te ndaa kuɛ pɛ o chɔuwo. Le tamaseliiyo, mbo dimul nda le ma kɔ “suukiaŋ ndɔ fɛlɛŋ suukiaŋ kɔl nyuloo a” lɛŋnde nda wa kɔlaŋ delɔɔ choo leŋ. (Ditɔnɔ. 20:​10) Ndoo yeema vɛlɛ mi dɔɔŋgɔ sovɛiya Isɔluɛi ndoo wa o diandaa, nduyɛ mi ndapila ndaa wa a diandaa o dialloŋ niŋ a o kaalaŋ niŋ. (Ditɔnɔ. 23:​9-14) Mi che bɛɛ mi lɛŋii cheleŋnde ndii kpuwa waŋ laanduaa te ndaa kuɛ pɛ o chɔuwo, kɛ pesiŋ bɛɛ Chɛhowa ndoo yeema mi Isɔluɛiya ndaa tosa keŋ te. Nduyɛ pɛŋ, te ndaa bii pɛ wana lanɔɔ o chɔuwo, ndaa nɔ ma chua ndu o nɔɔ niŋ te haaa mɛɛ mi paŋgei ipilɛ ndii hiou.—Ditɔnɔ. 21:​10-13.

Hau, lɛŋii bɔɔbɔɔ tosa chɛlaŋndo le ma wa kɔlaŋ o chɔuwo, kɛ ma handu sawalaŋ lapum. Mi che bɛɛ le wanaa cho o lɛŋii keŋ niŋnda mandaa nda handu sawala laŋ ni, kɛ lepum ma tɛɛmbuu laŋ.

5. MI MƐLƐKA NDOO CHƆULABA LE WANAA NDUAA

O sindɔɔ niŋ, mi Chɛhowa ndoo chɔulaba le Isɔluɛiya. Nduyɛ mi ndaa yem yaamɔɔwaa ndaa o nɛi kɔndɔfili niŋ. Le tamaseliiyo, vɛɛ Chɛhowa mala yɛ Isɔluɛiya le ma yem Chɛliko? Mɛɛ Isɔluɛiya “hɔŋ bululaŋ yɔŋgeŋleŋ” mɛɛ Chɛhowa dimul nda yɛ, “mi saasa balu Chɛliko wo komba o lepilɛ niŋ kpou.” Mi hei tosa ndi tɛtɛlɛ le ma bii chioo. (Chɔɔ. 6:​20) Nduyɛ, vɛɛ nda looku yɛ Amɔluatiiya yomɔɔ? Baabuiyo dimi aa: “Mi Mɛlɛka Yaawɛɛ yɔŋ piɔɔ ŋkpuŋgba bɛndoo mbo wa nda delioo choo mbo wa nda diuwo. . . . Wanaa piɔɔ ŋkpuŋgba koŋ o diu wa nda aa hiou a wanaa Isɔluɛiya pila a diuwa.”—Chɔɔ. 10:​6-11.

WANAA TOSA MI KƆL NYULOO MIIŊGU WAŊNDA TƐƐŊNDA KILISIƆŊAA TONYAA CHO NI

A mɛɛ naŋ che niŋ yɛ, mɛɛ sɔɔŋ cho hau yɛ cho teŋgeŋ a mɛɛ ŋ wa a Isɔluɛiya o sindɔɔ niŋ yɛ. Kɛ o cho ko sɔɔŋ naŋ yaasiaa muŋ ndoŋ te tosa miŋ kɛɛ balaŋ lueiyo o chɔulaŋ niŋ te. Ŋ cheleŋ cho o muŋ kɔɔli. Le tamaseliiyo, mi Mɛlɛka dimi maa o palɛi mɛɛlɛi niŋ, wanaa nduaa ‘bɛɛndiaŋ lɛ niŋ le lakɔ o chɔu le.’ (Aisaya 2:​2-4) Le handɔɔ lechoo, mi Kiliti dimi maa, buɛiyaa nduaa “cho lɛ le chieendo le.” Hei sim ni maa, a wou niŋ laba o chɔulaba chieeŋndo niŋ te.—Chɔŋ 15:​19.

Mi Kiliti dimul vɛlɛ buɛiyaa nduaa le ma tosa mbo hiou bɛɛ lende. Mbo dimul nda maa, a nɔ ma fafaŋ sɔɔŋ nɛiyaŋndoŋ kɛsiŋndo o kɔl, kɔl tuuwo a chɔulaŋ. (Maa. 5:​21, 22) O fulawɔ okoŋ kɔɔli, mbo dimul nda vɛlɛ le ma wa “wanaa tosa mi kɔl nyuloo miiŋgu waŋnda tɛɛŋnda,” nduyɛ ma kaala yaamɔɔwaa ndaa.—Maa. 5:​9, 44.

Kɛ naa a pilɛŋ pilɛŋnda yɛ? Naapum, ŋ nɔ iyeema le lakɔ o chɔu le. Kɛ baa ŋ nɔ pa kaa heelaŋndo o tosa mi sɛɛŋgiaŋndo ɔɔ piɔuviaŋndo luɛi o kundaa niŋndo? Maa ŋ hiounuŋ lachi a wallo tosaa kalaŋ le yiyaŋnda waa nuaa soliŋndo o kɔl.—Chemi. 4:​1, 11.

Ŋ nɔ miŋ wou laba o chɔu kɛ kɛ niŋ te. Kɛ ŋ nɔ miŋ hiou lachi a kɔl nyulu cho naa tɛɛŋndo hivioo lachi, nduyɛ miŋ kaaliaŋ vellaa velle. (Chɔŋ 13:​34, 35) Maa ŋ kɛɛsiaŋ o kɔl le loo yuŋyeŋ, nduyɛ miŋ handu kɔllo o paale Chɛhowa faŋa niŋ chɔulaŋ kpou lefafɛɛŋ ndeŋ choo.—Sam 46:​9.