၁၀ ဒီးအဝဲတ့ထီၣ်​ စီၢ်နီၤခိၣ်တဖျၢၣ်လၢ သ့ၣ်ဖှ့ၡံးတၤလီၤ.+ စီၢ်နီၤခိၣ်တဖျၢၣ်န့ၣ်​ အထီအိၣ်ဝဲ ခံပျၢ်, အလဲၢ်အိၣ်ဝဲတပျၢ် ဒီးအကစီၤထီၣ်ထီ အိၣ်ဝဲ တပျၢ်တထါလီၤ.+ ၁၁ ဒီးအဝဲကျးဝဲဒီး ထူစီကဘျၣ်တဖၣ်​ ဒီးအဝဲကျီၤဝးတရံး အကနူၤလၢ ထူလီၤ. ၁၂ လၢခံ တၢ်အကွီၤလၢ အလဲၢ်ဝဲ စုနၢလွံၢ်ဘိန့ၣ်* အဝဲထီထီၣ်​ ဝးတရံးဝဲ စီၢ်နီၤခိၣ်အဖီခိၣ်​ ဒီးအကျီၤဃာ်ဝဲ တၢ်ကွီၤအံၤအကနူၤ လၢထူလီၤ. ၁၃ တကးဒံးဘၣ်​ အဝဲတ့ထီၣ်​ ထူအကွီၤလွံၢ်ကွီၤ ဒီးပာ်ဝဲ ကွီၤတဖၣ်အံၤ လၢစီၢ်နီၤခိၣ်​ အနၢၣ်လွံၢ်နၢၣ်​ ဖဲစီၢ်နီၤခိၣ်​ အခီၣ်ဘုးတာ်လိာ်အသးဒီး စီၢ်နီၤခိၣ်အလီၢ်န့ၣ်လီၤ. ၁၄ ကွီၤတဖၣ်အံၤန့ၣ်​ အဝဲထီထီၣ်အီၤဘူးဒီး စီၢ်နီၤခိၣ်အကွီၤ ဒ်သိးကဖီၣ်ဃာ် နီၣ်ယိးဘိတဖၣ်​ ဒီးပှၤကယိးဝဲ စီၢ်နီၤခိၣ်အဂီၢ်လီၤ. ၁၅ ဒီးအဝဲတ့ထီၣ်​ နီၣ်ယိးဘိတဖၣ်လၢ သ့ၣ်ဖှ့ၡံးတၤ ဒီးအကျးဝဲဒီး ထူကဘျၣ်တဖၣ်​ ဒီးပှၤကသူအီၤ ဒ်သိးကယိး စီၢ်နီၤခိၣ်​ အဂီၢ်လီၤ.