၃၈ အဝဲတ့ထီၣ်​ တၢ်လုၢ်လီၢ်လၢ တၢ်လုၢ်ဒွဲၣ်အူအဂီၢ်လၢ သ့ၣ်ဖှ့ၡံးတၤလီၤ. ဒီးတၢ်လုၢ်လီၢ်န့ၣ်​ အလဲၢ်အိၣ်ဝဲ ယဲၢ်ပျၢ်,* အဒီၣ်ဃီၤအိၣ်ဝဲ ယဲၢ်ပျၢ် ဒီးအမ့ၢ် တၢ်လွံၢ်နၢၣ်​ လၢအကနူၤ ထဲသိးလိာ်အသး ဒီးအကစီၤထီၣ်ထီ အိၣ်ဝဲသၢပျၢ်လီၤ.+ ၂ ဒီးအဝဲ တ့ထီၣ်ဝဲ တၢ်လုၢ်လီၢ် အနၢၤတဖၣ်လၢ တၢ်လုၢ်လီၢ် အနၢၣ်လွံၢ်နၢၣ်​ အလိၤလီၤ. ဒီးအနၢၤတဖၣ်န့ၣ်​ အိၣ်တဆဲးဃီဒီး တၢ်လုၢ်လီၢ်လီၤ. ဝံၤဒီး အဝဲကျးတၢ်လုၢ်လီၢ်ဒီး တိၢ်ဘီကဘျၣ်တဖၣ်လီၤ.+ ၃ လၢခံ အဝဲတ့ထီၣ်​ တၢ်ပီးတၢ်လီတဖၣ်​ လၢတၢ်လုၢ်လီၢ် အဂီၢ်လီၤ. အဝဲတ့ထီၣ်​ ထံစဲၤတဖၣ်, နီၣ်တရီာ်တၢ်တဖၣ်, လီခီဖျၢၣ်တဖၣ်, နီၣ်ဆဲးတဖၣ်​ ဒီးမ့ၣ်အူအ့ၣ်​ အခွးတဖၣ်လီၤ. တၢ်ပီးတၢ်လီတဖၣ်အံၤ အဝဲတ့ထီၣ်ဝဲလၢ တိၢ်ဘီခဲလၢာ်လီၤ. ၄ ဒီးအဝဲတ့ထီၣ်စ့ၢ်ကီး နီၣ်ကၣ်တိၢ်ဘီတခါ လၢတၢ်လုၢ်လီၢ်အဂီၢ် ဝံၤဒီး ပာ်ဝဲနီၣ်ကၣ်တခါအံၤလၢ တၢ်လုၢ်လီၢ်အခိၣ်ဒူ အဖီလာ် ဒီးနီၣ်ကၣ်တခါအံၤ အိၣ်ဝဲလၢ တၢ်လုၢ်လီၢ် အခၢၣ်သးလီၤ. ၅ အဝဲတ့ထီၣ်​ တၢ်အကွီၤလွံၢ်ကွီၤ လၢတၢ်လုၢ်လီၢ် အနၢၣ်လွံၢ်နၢၣ်​ ဘူးဒီးနီၣ်ကၣ်တိၢ်ဘီလီၤ. ဒီးတၢ်အကွီၤလွံၢ်ကွီၤန့ၣ်​ မ့ၢ်ဒ်သိး ပှၤကဂိာ်နုာ် နီၣ်ယိးဘိတဖၣ်​ အဂီၢ်လီၤ. ၆ လၢခံ အဝဲတ့ထီၣ်​ နီၣ်ယိးဘိတဖၣ်လၢ သ့ၣ်ဖှ့ၡံးတၤ ဒီးအကျးဝဲဒီး တိၢ်ဘီကဘျၣ်လီၤ. ၇ ဒီးအဝဲဂိာ်လီၤ နီၣ်ယိးဘိတဖၣ်​ လၢတၢ်အကွီၤတဖၣ်အပူၤလၢ အအိၣ်လၢ တၢ်လုၢ်လီၢ် ခံကပၤလၢာ်အလိၤ ဒ်သိး ပှၤကယိး တၢ်လုၢ်လီၢ်အံၤ အဂီၢ်လီၤ. အဝဲတ့ထီၣ်​ တၢ်လုၢ်လီၢ်သ့ၣ်​ လၢအလီၤဂာ်ဒ် တလါတဖျၢၣ်​ လၢအအိၣ်ဒီး အကအိပူၤလီၤ.