၁၉ ပှၤထံဂၤကီၢ်ဂၤဖိမ့ၢ်ဂ့ၤ, ပှၤလၢအအိၣ်ဖျဲၣ်ထီၣ်​ ဒ်ပှၤအံၣ်စရ့လးဖိ အသိးမ့ၢ်ဂ့ၤ,+ ပှၤတဂၤဂ့ၤ တဂၤဂ့ၤ လၢအအီၣ်တၢ်လၢ အပၣ်ဃုာ်ဒီး ကိၣ်မံၣ်န့ၣ်​ အဝဲကဘၣ်​ တၢ်မၤသံအီၤ ဒ်သိး တၢ်ကထုးထီၣ်ကွံာ်အီၤလၢ ပှၤအံၣ်စရ့လးဖိ အကျါလီၤ.+ အဃိ ဖဲနွံသီအတီၢ်ပူၤန့ၣ်​ ကိၣ်မံၣ်​ တဘၣ်အိၣ်လၢ သုဟံၣ်ပူၤဘၣ်.

၄၈ ပှၤထံဂၤကီၢ်ဂၤဖိတဂၤ မ့ၢ်အိၣ်ဝဲဆိးဝဲ လၢသုကျါ ဒီးအဝဲမ့ၢ်အဲၣ်ဒိး မၤဘူၣ်လဲၤကပာ်လၢ ယဟိဝၤယွၤအဂီၢ်န့ၣ်​ ပိာ်ခွါလၢ အအိၣ်လၢ အဟံၣ်ပူၤ ကိးဂၤဒဲး ကဘၣ်ဒိးတၢ်ကူးတရံးလီၤ. အမၤဝဲဒ်န့ၣ်​ မ့ၢ်ဝံၤဒီး တၢ်ကပာ်အီၤဒ်သိးဒီး ပှၤတဂၤလၢ အအိၣ်ဖျဲၣ်ထီၣ်​ ဒ်ပှၤအံၣ်စရ့လးဖိအသိးလီၤ. မ့မ့ၢ်ပှၤလၢ အတဒိး တၢ်ကူးတရံးဘၣ်န့ၣ်​ တဘၣ်အီၣ်​ ဘူၣ်လဲၤကပာ် နီတဂၤဘၣ်.+