၃ ဘၣ်ဆၣ်​ ဖဲအဝဲသ့ၣ်​ လဲၤလၢ စီၤအဘံနဒာ် အဟံၣ်​ လၢအအိၣ်လၢ+ တၢ်လူၢ်ခိၣ်​ ဒ်သိးကဟံးန့ၢ် ယွၤလၢအမ့ၢ်အတီတဂၤ အတလါစီဆှံအခါ အဝဲသ့ၣ်​ ပာ်လီၤအီၤလၢ လ့ၣ်သီသီတခိၣ်အပူၤ+ ဒ်သိးကဆှၢထီၣ်အီၤအဂီၢ်လီၤ. ဒီးစီၤအဘံနဒာ် အဖိခွါတဖၣ်​ လၢအမ့ၢ် စီၤဧူးစၤ ဒီးစီၤအဃံယိၤ ဆှၢဝဲ လ့ၣ်တခိၣ်အံၤလီၤ.

၄ အဃိ အဝဲသ့ၣ်​ ဟံးထီၣ်က့ၤ ယွၤလၢအမ့ၢ်အတီတဂၤ အတလါစီဆှံ လၢစီၤအဘံနဒာ် အဟံၣ်​ လၢအအိၣ်လၢ တၢ်လူၢ်ခိၣ်န့ၣ်​ ဒီးစီၤအဃံယိၤ ဟးဝဲလၢ တလါစီဆှံ အမဲာ်ညါလီၤ. ၅ ဒီးစီၤဒၤဝံး ဒီးပှၤအံၣ်စရ့လးဖိတဖၣ်န့ၣ်​ အိၣ်ဒီး တၢ်ဒ့တၢ်အူ အကလုာ်ကလုာ် လၢအဘၣ်တၢ်တ့အီၤလၢ သ့ၣ်ကၠူနံးဖၢၤ ဒီးတနၢ်တဖၣ်, သီတူၢ်တဖၣ်,+ တၢ်ခြ့ခြ့တဖၣ်,+ နီၣ်တရုၤ ဒီးစှၢၣ်စှံးတဖၣ်+ ဒီးအဝဲသ့ၣ်​ မၤတၢ်သူၣ်ဖှံသးညီလၢ ယဟိဝၤယွၤ အမဲာ်ညါလီၤ. ၆ ဘၣ်ဆၣ်​ ဖဲအဝဲသ့ၣ်​ လဲၤတုၤလၢ စီၤနၤကိၣ်​ အကြဲၢ်ပူၤအခါ မ့ၢ်လၢကျီၢ်တဖၣ်​ ဘူးကမၤလီၤတကျၢၢ်လ့ၣ်အဃိ စီၤဧူးစၤ ယူာ်ဃီၤအစု ဒီးဖီၣ်ဃာ် ယွၤလၢအမ့ၢ်အတီတဂၤ အတလါစီဆှံလီၤ.+ ၇ ယဟိဝၤယွၤ သးဒိၣ်ထီၣ်​ စီၤဧူးစၤ ဒိၣ်မးလီၤ. ဒီးမ့ၢ်လၢ စီၤဧူးစၤ တပာ်ကဲ ကစၢ်ယွၤ အတၢ်သိၣ်တၢ်သီဘၣ်အဃိ+ ကစၢ်ယွၤ မၤသံကွံာ်အီၤ+ ဒီးအသံဝဲ ဖဲယွၤလၢအမ့ၢ်အတီတဂၤ အတလါစီဆှံ အကပၤလီၤ. ၈ ဒီးမ့ၢ်လၢ ယဟိဝၤယွၤ အတၢ်သးဒိၣ်​ ဖျိးထီၣ်လၢ စီၤဧူးစၤအလိၤအဃိ စီၤဒၤဝံး သးပှံၢ်ထီၣ်တၢ်လီၤ.* ဒီးပှၤကိး တၢ်လီၢ်တတီၤအံၤ အမံၤလၢ ဖ့ရ့းဧူးစၤ* တုၤလၢ မုၢ်မဆါတနံၤအံၤလီၤ.