၁၀ လၢခံ ပှၤဧၣ်မိၣ်ဖိ+ အစီၤပၤသံဝဲ ဒီးအဖိခွါ စီၤဃၤနူၣ်​ ထီၣ်စီၤပၤလၢ အလီၢ်လီၤ.+ ၂ ဒီးစီၤဒၤဝံး တဲဝဲလၢ “ယကပာ်ဖျါထီၣ်​ တၢ်အဲၣ်လၢ အတီလၢ စီၤနၤဃၣ်​ အဖိခွါ စီၤဃၤနူၣ်​ အဖီခိၣ်​ ဒ်အပၢ်ပာ်ဖျါထီၣ်တ့ၢ် တၢ်အဲၣ်လၢအတီလၢ ယဖီခိၣ်အသိးလီၤ.” အဃိ စီၤဒၤဝံး မၢအခ့အပှၤတဖၣ်​ လဲၤမၤမုာ်ထီၣ်က့ၤ စီၤဃၤနူၣ်အသး ခီဖျိလၢ အပၢ်သံအဃိလီၤ. ဘၣ်ဆၣ်​ ဖဲစီၤဒၤဝံး အခ့အပှၤတဖၣ်​ လဲၤနုာ်လီၤလၢ ပှၤဧၣ်မိၣ်ဖိ အကီၢ်ပူၤအခါ ၃ ပှၤဧၣ်မိၣ်ဖိ အခိၣ်အနၢ်တဖၣ်​ တဲဘၣ်​ အကစၢ် စီၤဃၤနူၣ်လၢ “မ့ၢ်နဆိကမိၣ်လၢ စီၤဒၤဝံး ဆှၢလီၤ အခ့အပှၤတဖၣ်အံၤ ခီဖျိလၢ အအဲၣ်ဒိး မၤလၤကပီၤ နပၢ်အနီၢ်ကီၢ်ဧါ. နီၢ်ကီၢ်န့ၣ်​ စီၤဒၤဝံး ဆှၢလီၤ အခ့အပှၤတဖၣ်​ လၢနအိၣ်​ ခီဖျိလၢ အဝဲအဲၣ်ဒိး ဃုသ့ၣ်ညါ ဝ့ၢ်အဂ့ၢ် ဒ်တၢ်မဲာ်ချံအသိး ဒီးမၤနၢၤဝ့ၢ်အဃိ, တမ့ၢ်ဧီၤ.” ၄ အဃိ စီၤဃၤနူၣ်​ ဖီၣ်န့ၢ် စီၤဒၤဝံး အခ့အပှၤတဖၣ်​ ဒီးလူၤကွံာ်ဝဲ အနိးဆူၣ်ခၣ်ဆူၣ်​ တကပၤ+ ဒီးကူးတဲာ်ဝဲ အဝဲသ့ၣ်​ အဆ့ကၤ စးထီၣ်လၢအခံကိၢ် ဒီးပျဲက့ၤအဝဲသ့ၣ်လီၤ. ၅ ဖဲပှၤတဲဘၣ်​ စီၤဒၤဝံး တၢ်ဂ့ၢ်အံၤအခါ တဘျီဃီန့ၣ်​ စီၤဒၤဝံး ဆှၢလီၤဝဲ ပိာ်ခွါတဖၣ်​ ဒ်သိးကလဲၤထံၣ်လိာ်သးဒီး အခ့အပှၤတဖၣ်, မ့ၢ်လၢ အခ့အပှၤတဖၣ်အံၤ ဘၣ်တၢ်မၤမဲာ်ဆှးအီၤ ဒိၣ်မးအဃိလီၤ. စီၤပၤတဲဘၣ်​ အခ့အပှၤတဖၣ်လၢ “အိၣ်လၢ ဝ့ၢ်ယရံၤဃိအပူၤ+ တုၤလၢ သုနိးဆူၣ်ခၣ်ဆူၣ်​ ထီၣ်ကဒါက့ၤမး ဟဲက့ၤတက့ၢ်.”