ယိၤၡူ
၂၃ ယဟိဝၤယွၤ ဒုးအိၣ် ပှၤအံၣ်စရ့လးဖိ မုာ်မုာ်ခုၣ်ခုၣ်+ ခီဖျိလၢ အမၤပူၤဖျဲး အဝဲသ့ၣ်လၢ အဒုၣ်အဒါလၢ အအိၣ်ဝးတရံးအီၤတဖၣ် အစုပူၤန့ၣ် အိၣ်ဖးယံာ်လံ ဒီးစီၤယိၤၡူ အသးပှၢ်ထီၣ် ဒီးဘူးထီၣ်လၢ အကသံလံ.+ ၂ ဒီးစီၤယိၤၡူ ကိးဖှိၣ်ဝဲ ပှၤအံၣ်စရ့လးဖိခဲလၢာ်,+ ပှၤသူၣ်က့သးပှၢ်, ပှၤခိၣ်ပှၤနၢ်, စံၣ်ညီၣ်ကွီၢ် ဒီးပဒိၣ်တဖၣ်+ ဒီးတဲဘၣ်အဝဲသ့ၣ်လၢ “ယသးပှၢ်ထီၣ် ဒီးယကသံ ဘူးထီၣ်လံ. ၃ သုကစၢ် ယဟိဝၤယွၤန့ၣ် မ့ၢ်ပှၤလၢအဒုးတၢ်လၢသုဂီၢ် အဃိ သုကစၢ် ယဟိဝၤယွၤ မၤဝဲ ပှၤကလုာ်ခဲလၢာ် ဒ်လဲၣ်န့ၣ် သုထံၣ်ဘၣ်လၢ သုနီၢ်ကစၢ်လီၤ.+ ၄ ဒ်တၢ်ဖးလီၤဘၣ်ဝဲအသိး ယနီၤလီၤန့ၢ်သု+ ပှၤကလုာ်လၢ အအိၣ်တ့ၢ်တဖၣ် အထံအကီၢ် ဒ်သုဒူၣ်တဖၣ် အတၢ်န့ၢ်သါအသိး ဝံၤလံ.+ ပှၤကလုာ်ခဲလၢာ်လၢ ယမၤဟးဂီၤအီၤတဖၣ်+ အထံအကီၢ် စးထီၣ်လၢ ထံကျိယၢ်ဒ့ၣ် တုၤလၢ ပီၣ်လဲၣ်ဖးဒိၣ် လၢမုၢ်နုာ်တခီစ့ၢ်ကီး ယနီၤလီၤန့ၢ်သုဝံၤလံ. ၅ ဒီးသုကစၢ် ယဟိဝၤယွၤ မ့ၢ်ပှၤလၢ ဆီၣ်ဖျိးထီၣ်ကွံာ် အဝဲသ့ၣ် လၢသုမဲာ်ညါ+ ဒီးနီဟးထီၣ်ကွံာ် အဝဲသ့ၣ်လၢ သုဂီၢ်လီၤ. ဒီးသုမၤန့ၢ် အဝဲသ့ၣ် အထံအကီၢ် ဒ်သုကစၢ် ယဟိဝၤယွၤ အၢၣ်လီၤပာ်စၢၤသု အသိးလီၤ.+
၆ “ဒ်သိးသုကတိၢ်န့ၢ်ဖံးဃာ် ဒီးမၤထွဲ ကယဲၢ်တၢ်ကွဲးအသးခဲလၢာ်လၢ စီၤမိၤၡ့ အတၢ်သိၣ်တၢ်သီ အလံာ်ပူၤအဂီၢ်+ သုကဘၣ်အိၣ်ဒီး တၢ်သးဒူသပှၢ်တၢၢ်လီၤ. ဒီးသုတဘၣ်ဃၣ်ကွံာ် သုသးလၢအီၤ လၢစုစ့ၣ်မ့ၢ်ဂ့ၤ စုထွဲမ့ၢ်ဂ့ၤ နီတစဲးတဂ့ၤ.+ ၇ ပှၤကလုာ်လၢ အအိၣ်တ့ၢ်ဒီးသုတဖၣ်အံၤ သုတဘၣ်ကျဲၣ်ကျီ လိာ်သုသးဒီး အဝဲသ့ၣ် နီတဘျီတဂ့ၤ.+ သုတဘၣ်ယၢၤထီၣ် အဝဲသ့ၣ်အယွၤတဖၣ် အမံၤတဂ့ၤ.+ ဒီးတဘၣ်မၤတၢ်အၢၣ်လီၤလၢ ယွၤတဖၣ်အံၤ အမံၤပူၤတဂ့ၤ. သုတဘၣ် ဘါယွၤတဖၣ်အံၤ မ့တမ့ၢ် မၤအတၢ် နီတဘျီတဂ့ၤ.+ ၈ သုကဘၣ်ဆဲးတီဒီး သုကစၢ် ယဟိဝၤယွၤ+ ဒ်သုတီဒီးအီၤ တုၤလၢမုၢ်မဆါတနံၤအံၤ အသိးလီၤ. ၉ တုၤလၢ မုၢ်မဆါတနံၤအံၤန့ၣ် ပှၤမၤသုတနၢၤ နီတဂၤဘၣ်.+ ဒီးယဟိဝၤယွၤ ကနီဟးထီၣ်ကွံာ် ပှၤကလုာ်လၢအဒိၣ် ဒီးအဂံၢ်ဆူၣ်ဘါဆူၣ်တဖၣ်လၢ သုမဲာ်ညါလီၤ.+ ၁၀ ဒ်သုကစၢ်ယဟိဝၤယွၤ အၢၣ်လီၤဝဲအသိး+ အဝဲကဒုးတၢ်လၢ သုဂီၢ်အဃိ+ သုဝဲတဂၤ ကလူၤမၤနၢၤဝဲ ပှၤအဂၤတကထိလီၤ.+ ၁၁ သုကဘၣ်အဲၣ်သုကစၢ် ယဟိဝၤယွၤအဃိ+ ပလီၢ်သုသး ထီဘိတက့ၢ်.+
၁၂ “ဘၣ်ဆၣ် သုမ့ၢ်ပာ်တ့ၢ်ကွံာ်အီၤ ဒီးသုမ့ၢ်တီဒီး ပှၤကလုာ်လၢ အအိၣ်တ့ၢ်လၢ+ သုကျါ ဒီးသုမ့ၢ်ဆီဟံၣ်ဆီဃီဒီး အဝဲသ့ၣ်+ ဒီးရ့လိာ်သးဒီး အဝဲသ့ၣ်န့ၣ် ၁၃ သုကဘၣ်သ့ၣ်ညါ သပှၢ်ကတၢၢ်လၢ ယဟိဝၤယွၤ တနီဟးထီၣ်ကွံာ်န့ၢ်သု ပှၤကလုာ်တဖၣ်အံၤလၢၤဘၣ်.+ အဝဲသ့ၣ်ကကဲထီၣ် ထု, ပျံၤသကွီၤ, နီၣ်ဖျ့ လၢသုပျိၢ်အဂီၢ်+ ဒီးတၤဆှုၣ်တၤမဲ လၢသုမဲာ်ချံအပူၤ တုၤလၢသုဟးဂီၤကွံာ်လၢ ထံကီၢ်လၢအဂ့ၤ လၢသုကစၢ်ယဟိဝၤယွၤ ဟ့ၣ်လီၤသုအံၤ အပူၤလီၤ.
၁၄ “တယံာ်လၢၤဘၣ်ဒု ယကသံလီၤ. သုသ့ၣ်ညါဂ့ၤဂ့ၤလၢ* တၢ်အၢၣ်လီၤအီလီၤလၢအဂ့ၤ လၢသုကစၢ်ယဟိဝၤယွၤ အၢၣ်လီၤသုလၢ အတဟဲ လၢထီၣ်ပှဲၤထီၣ်ဘၣ်န့ၣ် တအိၣ်နီတထံၣ်ဘၣ်. အတၢ်အၢၣ်လီၤတဖၣ် ဟဲလၢထီၣ်ပှဲၤထီၣ်ဝဲလၢ သုဂီၢ်ကိးထံၣ်ဒဲးလီၤ. အတၢ်ကတိၤလၢ အတဟဲ လၢထီၣ်ပှဲၤထီၣ်ဘၣ်န့ၣ် တအိၣ်နီတထံၣ်ဘၣ်.+ ၁၅ ဘၣ်ဆၣ် ဒ်တၢ်အၢၣ်လီၤလၢ အဂ့ၤခဲလၢာ် လၢသုကစၢ် ယဟိဝၤယွၤ အၢၣ်လီၤပာ်စၢၤသု ဟဲလၢထီၣ်ပှဲၤထီၣ် လၢသုဂီၢ်အသိး+ တၢ်နးတၢ်ဖှီၣ်ခဲလၢာ် လၢယဟိဝၤယွၤ အၢၣ်လီၤပာ်စၢၤဝဲန့ၣ် လီၤဘၣ်လၢ သုလိၤသ့လီၤ. ဒီးသုကဘၣ် တၢ်မၤဟးဂီၤကွံာ်သုလၢ ထံကီၢ်လၢအဂ့ၤ လၢသုကစၢ် ယဟိဝၤယွၤ ဟ့ၣ်လီၤသုအံၤအပူၤလီၤ.+ ၁၆ သုကစၢ်ယဟိဝၤယွၤ မၤလိာ်သုလၢ သုကဘၣ်မၤထွဲ အတၢ်အၢၣ်လီၤအီလီၤအဃိ သုမ့ၢ်မၤဟးဂီၤ အတၢ်အၢၣ်လီၤအီလီၤ ဒီးသုမ့ၢ်လဲၤဘါ ယွၤလၢအဂၤတဖၣ် ဒီးမၤအဝဲသ့ၣ်အတၢ်န့ၣ် ယဟိဝၤယွၤ ကသးပှံၢ်ထီၣ်သုလီၤ.+ ဒီးသုကသံကွံာ်ချ့ချ့လၢ ထံကီၢ်လၢအဂ့ၤလၢ အဝဲဟ့ၣ်လီၤပာ်စၢၤသုန့ၣ်အပူၤလီၤ.”+