၁ ၡမူၤအ့လး
၈ ဖဲစီၤၡမူၤအ့လး သးပှၢ်ထီၣ်အခါ အဝဲပာ်ထီၣ်ဝဲ အဖိခွါတဖၣ် ဒ်သိးအဝဲသ့ၣ် ကမၤတၢ်ဒ် စံၣ်ညီၣ်ကွီၢ် လၢပှၤအံၣ်စရ့လးဖိ အဂီၢ်လီၤ. ၂ အဖိခွါ ဝဲၢ်ကိန့ၣ် အမံၤလၢ စီၤယိၤအ့လး ဒီးအဖိခွါ ခံဂၤတဂၤန့ၣ် အမံၤလၢ စီၤအဘံယၤလီၤ.+ လၢဝ့ၢ်ဘ့ၢ်ၡဘၤအပူၤန့ၣ် အဝဲသ့ၣ် မၤတၢ်ဒ် စံၣ်ညီၣ်ကွီၢ်အသိးလီၤ. ၃ ဘၣ်ဆၣ် အဖိခွါတဖၣ်န့ၣ် တမၤထွဲအပၢ် အဒိအတဲာ်ဘၣ်. အဝဲသ့ၣ် ဃုကျဲဒ်သိး အကန့ၢ်စ့လၢ တၢ်တတီတလိၤ အပူၤလီၤ.+ ဒီးအဝဲသ့ၣ် တူၢ်လိာ်ဝဲ တၢ်ထီးကျိၣ်ထီးစ့+ အဃိ အဝဲသ့ၣ် တစံၣ်ညီၣ်တၢ် တီတီလိၤလိၤဘၣ်.+
၄ လၢခံ အံၣ်စရ့လး အပှၤသူၣ်က့သးပှၢ် ခဲလၢာ် ပာ်ဖှိၣ်ထီၣ်အသး ဒီးလဲၤလၢ စီၤၡမူၤအ့လးအအိၣ် လၢဝ့ၢ်ရၤမါလီၤ. ၅ အဝဲသ့ၣ် တဲအီၤလၢ “နသးပှၢ်ထီၣ်လံ, ဘၣ်ဆၣ် နဖိခွါတဖၣ်န့ၣ် တမၤထွဲနဒိနတဲာ်ဘၣ်. ခဲအံၤ ဝံသးစူၤ ပာ်ထီၣ်န့ၢ်ပှၤ စီၤပၤတဂၤ ဒ်သိး အကစံၣ်ညီၣ်န့ၢ်တၢ်လၢပဂီၢ် ဒ်ပှၤကလုာ်အဂၤတဖၣ် မၤဝဲအသိးမီၤ.”+ ၆ ဘၣ်ဆၣ် ဖဲအဝဲသ့ၣ် တဲဝဲလၢ “ဟ့ၣ်ပှၤ စီၤပၤတဂၤ ဒ်သိး အကစံၣ်ညီၣ်န့ၢ်တၢ်လၢပဂီၢ်” အခါ စီၤၡမူၤအ့လး အသးတမုာ်ဘၣ်. အဃိ စီၤၡမူၤအ့လး ဃ့ဘါထုကဖၣ်လၢ ယဟိဝၤယွၤ အအိၣ်လီၤ. ၇ ဒီးယဟိဝၤယွၤ တဲစီၤၡမူၤအ့လးလၢ “ဒိကနၣ်တၢ်လၢ ပှၤဂီၢ်မုၢ် တဲဘၣ်နၤ ကိးမံၤဒဲးတက့ၢ်. နီၢ်ကီၢ်န့ၣ် တမ့ၢ်လၢ အဝဲသ့ၣ် စူးကွံာ်ညိကွံာ် နၤဘၣ်. ယမ့ၢ်ပှၤတဂၤလၢ အဝဲသ့ၣ် စူးကွံာ်ညိကွံာ် ဒ်အစီၤပၤ အသိးလီၤ.+ ၈ စးထီၣ် မုၢ်တနံၤလၢ ယဒုးဟးထီၣ် အဝဲသ့ၣ်လၢ ကီၢ်အဲၤကူပတူးအပူၤ တုၤခဲအံၤန့ၣ် အဝဲသ့ၣ် ပာ်တ့ၢ်ယၤ တဘျီဝံၤတဘျီ+ ဒီးဘူၣ်ထီၣ်ဘါထီၣ် ယွၤအဂၤတဖၣ်လီၤ.+ ခဲအံၤ အဝဲသ့ၣ် မၤကဒီးလံ ဒီးအဝဲသ့ၣ် မၤနၤ ဒ်အမၤတ့ၢ်ယၤအသိးလီၤ. ၉ ခဲအံၤ ဒိကနၣ်အဝဲသ့ၣ်အကလုၢ် တက့ၢ်. ဘၣ်ဆၣ် ဟ့ၣ်ပလီၢ်အဝဲသ့ၣ် သပှၢ်တၢၢ် ဒီးတဲအဝဲသ့ၣ်လၢ စီၤပၤလၢ ကပၢတၢ်လၢ အဝဲသ့ၣ် အဖီခိၣ်န့ၣ် ကအိၣ်ဒီးတၢ်ခွဲးတၢ်ယာ် မနုၤတဖၣ်လဲၣ်န့ၣ်တက့ၢ်.”
၁၀ အဃိ စီၤၡမူၤအ့လး တဲဘၣ်ပှၤဂီၢ်မုၢ်လၢ အဃ့ထီၣ်စီၤပၤလၢ အအိၣ်န့ၣ်လၢ ယဟိဝၤယွၤ အတၢ်ကတိၤ ခဲလၢာ်လီၤ. ၁၁ အဝဲတဲဝဲလၢ “စီၤပၤလၢ အကပၢဘၣ်သုန့ၣ် ကအိၣ်ဒီးတၢ်ခွဲးတၢ်ယာ် တဖၣ်အံၤလီၤ.+ အဝဲကမၢ သုဖိခွါတဖၣ်+ ကဲထီၣ် အလ့ၣ်ကဟၣ်သုး+ ဒီးအကသ့ၣ်သုးတဖၣ်+ ဒီးအဝဲသ့ၣ်တနီၤန့ၣ် ကဘၣ်ဃ့ၢ်လၢ အလ့ၣ်ကဟၣ်တဖၣ် အမဲာ်ညါလီၤ. ၁၂ ဒီးအကပာ်ထီၣ်ဝဲ သုးဖိတကထိအခိၣ်,+ သုးဖိယဲၢ်ဆံအခိၣ်,+ တနီၤန့ၣ် ကဘၣ်ထဲၣ်န့ၢ်အတၢ်,+ ကူးန့ၢ်အတၢ်+ ဒီးတ့န့ၢ် အတၢ်စုကဝဲၤတဖၣ် လၢတၢ်ဒုးအဂီၢ် ဒီးတၢ်ပီးတၢ်လီ လၢအလ့ၣ်ကဟၣ်တဖၣ် အဂီၢ်လီၤ.+ ၁၃ အဝဲကမၢ သုဖိမုၣ်တဖၣ် မၤတၢ်ဒ် ပှၤတ့သိနၢမူ, ပှၤဖီအီၣ်တၢ် ဒီးပှၤကုၢ်ကိၣ် လၢအဂီၢ်လီၤ.+ ၁၄ ဒီးသုစံာ်ပျီ, သုစပံးကျီး ဒီးသုသ့ၣ်စၤယံးကျီး+ လၢအဂ့ၤကတၢၢ်တဖၣ်န့ၣ် အကဟံးန့ၢ်ဝဲ ဒီးဟ့ၣ်လီၤဝဲလၢ အခ့အပှၤတဖၣ်လီၤ. ၁၅ ဒီးတၢ်လၢ အမဲထီၣ်သၣ်ထီၣ်လၢ သုစံာ်ပျီ ဒီးသုစပံးကျီးတဖၣ် အပူၤန့ၣ် အဝဲကဟံးန့ၢ် ဆံဆဲၣ်ပူတပူ ဒီးကဟ့ၣ်လီၤဝဲ အပဒိၣ်တဖၣ် ဒီးအခ့အပှၤ တဖၣ်လီၤ. ၁၆ ဒီးသုကုၢ်ပိာ်မုၣ် ဒီးသုကုၢ်ပိာ်ခွါတဖၣ်, သုကျီၢ်လၢအဂ့ၤကတၢၢ်တဖၣ် ဒီးသုကသ့ၣ်ယီၤတဖၣ်န့ၣ် အကဟံးန့ၢ်ဝဲ ဒီးကသူဝဲလၢ အတၢ်မၤ အဂီၢ်လီၤ.+ ၁၇ သုသိဒီးမဲာ်တဲးလဲး ဆံဆဲၣ်ပူတပူန့ၣ်+ အဝဲကဟံးန့ၢ်ဝဲ ဒီးသုကကဲထီၣ် အခ့အပှၤတဖၣ်လီၤ. ၁၈ ခီဖျိလၢ စီၤပၤလၢ သုဃုထၢအီၤလၢ သုနီၢ်ကစၢ် တဂၤအံၤအဃိ မုၢ်ကအိၣ်ဝဲတနံၤလၢ သုကကိးပသူထီၣ်လၢ တၢ်မၤစၢၤအဂီၢ်+ ဘၣ်ဆၣ် ယဟိဝၤယွၤ တစံးဆၢ သုဘၣ်.”
၁၉ ဘၣ်ဆၣ် ပှၤဂီၢ်မုၢ် တဒိကနၣ်တၢ်လၢ စီၤၡမူၤအ့လး တဲအဝဲသ့ၣ်ဘၣ်. ဒီးအဝဲသ့ၣ် တဲဝဲလၢ “ပပာ်လီၤပသး သပှၢ်တၢၢ်လၢ ပကအိၣ်ဒီး စီၤပၤတဂၤလၢ ပဖီခိၣ်လီၤ. ၂၀ အန့ၣ်မး ပကလီၤဂာ် ဒ်ပှၤကလုာ်အဂၤတဖၣ် ဒီးပစီၤပၤ ကစံၣ်ညီၣ်န့ၢ်တၢ်လၢပဂီၢ် ဒီးတီခိၣ်ရိၤမဲပှၤ ဒီးကဒုး ပဒုၣ်ပဒါတဖၣ်လီၤ.” ၂၁ စီၤၡမူၤအ့လး ကနၣ်တၢ်လၢ ပှၤဂီၢ်မုၢ်တဲဝဲ ကိးမံၤဒဲး ဝံၤဒီး အဝဲတဲကဒါက့ၤ တၢ်ကတိၤတဖၣ်အံၤလၢ ယဟိဝၤယွၤ အအိၣ်လီၤ. ၂၂ ဒီးယဟိဝၤယွၤ တဲဘၣ် စီၤၡမူၤအ့လးလၢ “ဒိကနၣ်အဝဲသ့ၣ် အကလုၢ် ဒီးပာ်ထီၣ်န့ၢ် စီၤပၤလၢ ကပၢတၢ်လၢ အဝဲသ့ၣ်အဖီခိၣ် တက့ၢ်.”+ ဝံၤဒီး စီၤၡမူၤအ့လး တဲဘၣ် ပှၤအံၣ်စရ့လးဖိလၢ “သုဝဲ တဂၤစုာ်စုာ်န့ၣ် ကဘၣ် က့ၤကဒါက့ၤလၢ သုနီၢ်ကစၢ်အဝ့ၢ်လီၤ.”