၁ ၡမူၤအ့လး
၉ ပှၤဘံၣ်ယၤမံၣ်ဖိ+ လၢအမံၤမ့ၢ် စီၤကံၣ် အိၣ်ဝဲတဂၤ ဒီးအဝဲမ့ၢ် ပှၤလၢအကဲဒိၣ် ဒိၣ်မးလီၤ. စီၤကံၣ်န့ၣ်+ ဟဲလီၤစၢၤလီၤသွဲၣ်လၢ စီၤအဘံၤအ့လး, စီၤစရိၢ်, စီၤဘကိရး ဒီးစီၤအဖံၤလီၤ. ၂ စီၤကံၣ်န့ၣ် အိၣ်ဒီးအဖိခွါ တဂၤ လၢအမံၤမ့ၢ် စီၤစီလူး+ ဒီးအမ့ၢ်ဝဲ ပှၤသးစၢ်လၢ အဒိၣ်တၢ်ဂ့ၤ တဂၤလီၤ. လၢပှၤအံၣ်စရ့လးဖိ အကျါန့ၣ် ပှၤလၢအဒိၣ်တၢ်ဂ့ၤန့ၢ်အီၤ တအိၣ်နီတဂၤဘၣ်. အနီၢ်ထီန့ၢ်ဒံး ပှၤခဲလၢာ် ဒီးပှၤတုၤန့ၢ်အီၤ ဖဲအဖံဘၣ်ခိၣ်လီၤ.
၃ ဖဲစီၤစီလူး အပၢ်စီၤကံၣ် အကသ့ၣ်ယီၤတဖၣ်* လီၤမၢ်အခါ စီၤကံၣ် တဲဘၣ်အဖိခွါ စီၤစီလူးလၢ “ဝံသးစူၤ ကိးန့ၢ် ပှၤမၤစၢၤတၢ်တဂၤ ဒီးလဲၤဃု ကသ့ၣ်ယီၤတဖၣ်တက့ၢ်.” ၄ အဝဲသ့ၣ် လဲၤဃုဝဲလၢ အ့ဖရဲၣ် အကစၢၢ်ကလိကျါ ဒီးလၢၡလံၡၤ အတၢ်လီၢ်တၢ်ကျဲ ဘၣ်ဆၣ် အဝဲသ့ၣ် တထံၣ်ဝဲဘၣ်. ဒီးအဝဲသ့ၣ် လဲၤဃုဝဲလၢ ၡၤလံၣ် အတၢ်လီၢ်တၢ်ကျဲ ဘၣ်ဆၣ် ကသ့ၣ်ယီၤတဖၣ် တအိၣ်ဖဲန့ၣ်ဘၣ်. အဝဲသ့ၣ် လဲၤဃုစ့ၢ်ကီးဝဲလၢ ပှၤဘံၣ်ယၤမံၣ်ဖိ အတၢ်လီၢ်တၢ်ကျဲဝးဝး ဘၣ်ဆၣ် အဝဲသ့ၣ် တထံၣ်ဝဲဘၣ်.
၅ အဝဲသ့ၣ် လဲၤတုၤလၢ ကီၢ်စူာ် ဒီးစီၤစီလူး တဲဘၣ် အပှၤမၤစၢၤတၢ်တဂၤလၢ “လၢယပၢ် ကဘၣ်ယိၣ်တၢ်လၢ ကသ့ၣ်ယီၤတဖၣ်အလီၢ် အဝဲကဘၣ်ယိၣ်ဘၣ်ဖုး တၢ်လၢပဂီၢ် အဃိ ပကဘၣ်က့ၤလီၤ.”+ ၆ ဘၣ်ဆၣ် အပှၤမၤစၢၤတၢ်တဂၤ တဲဆၢက့ၤအီၤလၢ “ကနၣ်လၢအံၤ, လၢဝ့ၢ်လၢန့ၣ်တဖျၢၣ်အပူၤန့ၣ် ယွၤအခ့အပှၤလၢ ပှၤပာ်ကဲအီၤဒိၣ်မး အိၣ်ဝဲတဂၤလီၤ. တၢ်လၢအတဲဝဲ ကိးမံၤဒဲးန့ၣ် ကဟဲလၢထီၣ်ပှဲၤထီၣ် သပှၢ်တၢၢ်လီၤ.+ ခဲအံၤ ပကလဲၤဖဲန့ၣ်မီၤ. ဒီးပကဘၣ် ဆဲးလဲၤကျဲဖဲလဲၣ်န့ၣ် ဘၣ်သ့ၣ်သ့ၣ် အဝဲတဲပှၤကဘၣ်.” ၇ ဒီးစီၤစီလူး တဲဘၣ် အပှၤမၤစၢၤတၢ်တဂၤလၢ “ပမ့ၢ်လဲၤန့ၣ် ပကဘၣ် လဲၤစိာ်န့ၢ် ယွၤလၢအမ့ၢ်အတီ အခ့အပှၤတဂၤလၢ မနုၤလဲၣ်. လၢပထၢၣ်ပူၤန့ၣ် ကိၣ်တအိၣ် နီတလိၣ်ဘၣ်. ပကလဲၤစိာ်န့ၢ်အီၤ တၢ်ဟ့ၣ်အဂီၢ် တၢ်မနုၤအိၣ်လဲၣ်.” ၈ အပှၤမၤစၢၤတၢ်တဂၤန့ၣ် တဲဆၢအီၤလၢ “ယစ့ညၣ်* အိၣ်ဝဲတနီၤလီၤ. ယကဟ့ၣ်လီၤ ယွၤလၢအမ့ၢ်အတီတဂၤ အခ့အပှၤ ဒီးအဝဲ ကတဲဘၣ်ပှၤလၢ ပကဘၣ် ဆဲးလဲၤကျဲ ဖဲလဲၣ်န့ၣ်လီၤ.” ၉ (လၢပျၢၤ လၢကီၢ်အံၣ်စရ့လး အပူၤန့ၣ် ပှၤတဂၤ မ့ၢ်လဲၤသံကွၢ်တၢ်လၢ ကစၢ်ယွၤန့ၣ် အဝဲကတဲဒ်အံၤ, “ဟဲမီၤ, ပကလဲၤသကိးလၢ ပှၤထံၣ်တၢ်တဂၤ အအိၣ်လီၤ.”+ မုၢ်မဆါတနံၤအံၤ ပှၤလၢ ပှၤကိးအီၤလၢဝံန့ၣ် လၢပျၢၤ ပှၤကိးအီၤလၢ ပှၤထံၣ်တၢ်လီၤ.)* ၁၀ ဒီးစီၤစီလူး တဲဘၣ် အပှၤမၤစၢၤတၢ်တဂၤန့ၣ်လၢ “နတဲတၢ်န့ၣ် ဖးဂ့ၤညါ. ပလဲၤဟီ.” အဃိ အဝဲသ့ၣ် လဲၤလၢဝ့ၢ် ဖဲယွၤလၢအမ့ၢ်အတီတဂၤ အခ့အပှၤ အိၣ်ဝဲန့ၣ်လီၤ.
၁၁ ဖဲအဝဲသ့ၣ် လဲၤထီၣ်လၢဝ့ၢ်အခါ အဝဲသ့ၣ် ထံၣ်လိာ်သးဒီး ပိာ်မုၣ်တဖၣ်လၢ အဟဲဒၢၣ်ထံလီၤ. ဒီးအဝဲသ့ၣ် သံကွၢ် ပိာ်မုၣ်တဖၣ်လၢ “တၢ်လီၢ်တတီၤအံၤ ပှၤထံၣ်တၢ်+ အိၣ်ဧါ.” ၁၂ ပိာ်မုၣ်တဖၣ် တဲဆၢဝဲလၢ “အိၣ်ဝဲ. အဝဲအိၣ်လၢ သုမဲာ်ညါ တစဲးဖိလီၤ. လဲၤမ့ၢ်ချ့. မ့ၢ်လၢ တနံၤအံၤ ပှၤကလုၢ်ထီၣ်တၢ်လၢ+ တၢ်လီၢ်ထီၣ်ထီ*+ အဃိ တနံၤအံၤ အဝဲဟဲလၢဝ့ၢ်ပူၤလီၤ. ၁၃ ဖဲသုလဲၤနုာ်လၢ ဝ့ၢ်ပူၤတဘျီဃီန့ၣ် သုကထံၣ်အီၤလီၤ. အဃိ တချုးလၢ အဝဲလဲၤထီၣ်လၢ တၢ်လီၢ်ထီၣ်ထီ ဒ်သိးကအီၣ်တၢ် အဂီၢ်ဒံးဘၣ်န့ၣ် လဲၤမ့ၢ်ချ့. အဝဲမ့ၢ်ပှၤလၢ အဆိၣ်ဂ့ၤ တၢ်လုၢ်တၢ်ပာ်အဃိ တချုးလၢ အဝဲလဲၤတုၤဒံးဘၣ်န့ၣ် ပှၤတအီၣ်တၢ်ဘၣ်. အဝဲမၤဝဲဒ်န့ၣ် မ့ၢ်ဝံၤမး ပှၤလၢအဘၣ် တၢ်ကွဲမုာ်အီၤတဖၣ်န့ၣ် အီၣ်တၢ်သ့လီၤ.” ၁၄ အဃိ အဝဲသ့ၣ် လဲၤထီၣ်လၢ ဝ့ၢ်ပူၤလီၤ. ဖဲအဝဲသ့ၣ်လဲၤလၢ ဝ့ၢ်အခၢၣ်သးအခါ စီၤၡမူၤအ့လး ဟဲထီၣ်ဝဲ ဒ်သိး ကထံၣ်လိာ်သးဒီး အဝဲသ့ၣ် ဒီးကလဲၤထီၣ်သကိးလၢ တၢ်လီၢ်ထီၣ်ထီ အဂီၢ်လီၤ.
၁၅ တချုးလၢ စီၤစီလူး ဟဲဒံးဘၣ် တနံၤန့ၣ် ယဟိဝၤယွၤ တဲဘၣ် စီၤၡမူၤအ့လးလၢ ၁၆ “ခဲမုၢ်ဆ့ၣ် အဆၢကတီၢ်ဒ်အံၤန့ၣ် ယကဆှၢလီၤ ပှၤပိာ်ခွါတဂၤ လၢအဟဲလၢ ဘံၣ်ယၤမံၣ် အတၢ်လီၢ်တၢ်ကျဲလီၤ.+ နကဘၣ် ဒိးဖှူအီၤ ဒ်သိး အကတီခိၣ်ရိၤမဲတၢ်လၢ ယပှၤဂီၢ်မုၢ် အံၣ်စရ့လးဖိ အဖီခိၣ်+ ဒီးအဝဲက မၤထူၣ်ဖျဲး ယပှၤဂီၢ်မုၢ်လၢ ပှၤဖလ့ၡသးဖိ အစုပူၤလီၤ. ယပှၤဂီၢ်မုၢ် အတၢ်နးတၢ်ဖှီၣ်န့ၣ် ယထံၣ်ဘၣ်လံ ဒီးအဝဲသ့ၣ် အတၢ်ကိးပသူထီၣ်န့ၣ် ဟူထီၣ် တုၤလၢ ယအိၣ်လံ.”+ ၁၇ ဖဲစီၤၡမူၤအ့လး ထံၣ်ဝဲ စီၤစီလူး အခါ ယဟိဝၤယွၤ တဲစီၤၡမူၤအ့လးလၢ “ပှၤတဂၤလၢ ယတဲနၤလၢ အကပၢယပှၤဂီၢ်မုၢ်န့ၣ် အကဲအီၤလီၤ.”+
၁၈ ဖဲစီၤစီလူး လဲၤလၢ စီၤၡမူၤအ့လးအအိၣ် လၢဝ့ၢ်အတြဲၤခိၣ်ထိး အခါ စီၤစီလူး တဲဝဲလၢ “ပှၤထံၣ်တၢ်တဂၤ အဟံၣ်အိၣ်ဖဲလဲၣ်. ဝံသးစူၤ တဲဘၣ်ယၤမီၤ.” ၁၉ စီၤၡမူၤအ့လး တဲဘၣ် စီၤစီလူးလၢ “ယကဲ ပှၤထံၣ်တၢ် တဂၤလီၤ. လဲၤလၢ ယမဲာ်ညါ ဆူတၢ်လီၢ်ထီၣ်ထီ ဒီးတနံၤအံၤ နကအီၣ်တၢ် ဒီးယၤလီၤ.+ လၢဂီၤခီန့ၣ် ယကတဲဘၣ်နၤ တၢ်လၢ နအဲၣ်ဒိးသ့ၣ်ညါ ခဲလၢာ် ဒီးယကပျဲက့ၤနၤလီၤ. ၂၀ မ့မ့ၢ် ကသ့ၣ်ယီၤတဖၣ်လၢ အလီၤမၢ်ဝဲလၢ အပူၤကွံာ် သၢသီန့ၣ်+ ပှၤထံၣ်န့ၢ်က့ၤအီၤလံ အဃိ တဘၣ်ကိၢ်တၢ်လၢ ကသ့ၣ်ယီၤ အဃိတဂ့ၤ. တၢ်ခဲလၢာ်လၢ ပှၤလီကီအီၤလၢ အအိၣ်လၢ အံၣ်စရ့လးအပူၤန့ၣ် မ့ၢ်မတဂၤ အတၢ်လဲၣ်. အကဲနတၢ် ဒီးနပၢ်အဒူၣ်ဖိထၢဖိခဲလၢာ် အတၢ်တမ့ၢ်ဧီၤ.”+ ၂၁ ဒီးစီၤစီလူး တဲဆၢဝဲလၢ “ယကဲပှၤဘံၣ်ယၤမံၣ်ဖိလၢ အမ့ၢ် ပှၤအဆံးကတၢၢ် တဒူၣ်လၢ အံၣ်စရ့လးအဒူၣ်တဖၣ် အကျါတမ့ၢ်ဧီၤ.+ ဒီးယဒူၣ်ဖိထၢဖိ မ့ၢ်ဝဲ ဒူၣ်ဖိထၢဖိလၢ အရ့တဒိၣ်ဘၣ်တဒူၣ် လၢဘံၣ်ယၤမံၣ် အဒူၣ်အကျါ တမ့ၢ်ဧီၤ. ဘၣ်မနုၤအဃိ နတဲယၤ ဒ်အံၤလဲၣ်.”
၂၂ ဒီးစီၤၡမူၤအ့လး လဲၤကိးဃုာ် စီၤစီလူး ဒီးအပှၤမၤစၢၤတၢ်တဂၤလၢ ပှၤအီၣ်တၢ်အဒၢးတဖျၢၣ်အပူၤ ဒီးဒုးဆ့ၣ်နီၤ အဝဲသ့ၣ်လၢ တၢ်လီၢ်လၢ အဂ့ၤကတၢၢ် လၢပှၤလၢ အဘၣ်တၢ်ကွဲမုာ်အီၤတဖၣ် အကျါလီၤ. ဖဲန့ၣ် ပှၤပိာ်ခွါအိၣ်ဝဲ အဂၤ ၃၀ လီၤ. ၂၃ စီၤၡမူၤအ့လး တဲဘၣ် ပှၤဖီအီၣ်တၢ်လၢ “တၢ်ညၣ်တလိၣ်လၢ ယဟ့ၣ်ပာ်စၢၤနၤ ဒီးတဲပာ်နၤလၢ ‘ပာ်ဃာ်အီၤ’ န့ၣ် ဟဲစိာ်တက့ၢ်.” ၂၄ အဃိ ပှၤဖီအီၣ်တၢ်တဂၤန့ၣ် ဟံးထီၣ် တၢ်အခီၣ် ဒီးတၢ်အိၣ်လၢ တၢ်အခီၣ်အလိၤ ဒီးပာ်လီၤဝဲလၢ စီၤစီလူး အမဲာ်ညါလီၤ. ဒီးစီၤၡမူၤအ့လး တဲဝဲလၢ “ယတဲပာ်စၢၤ အဝဲသ့ၣ်လၢ ‘ယကွဲမုာ် ပှၤတမှံၤလီၤ.’ အဃိ တၢ်လၢအဝဲသ့ၣ် ပာ်ဃာ်အီၤန့ၣ် ဘၣ်တၢ်ပာ်လီၤအီၤ လၢနမဲာ်ညါလံ. အဝဲသ့ၣ် ပာ်ဃာ်အီၤ လၢနဂီၢ်တဘျီအံၤ အဃိ အီၣ်မီၤ.” ဒီးတၢ်တနံၤန့ၣ် စီၤစီလူး အီၣ်သကိးတၢ်ဒီး စီၤၡမူၤအ့လးလီၤ. ၂၅ ဒီးအဝဲသ့ၣ် အိၣ်လၢ တၢ်ထီၣ်ထီအလီၢ်+ ဒီးဟဲက့ၤလီၤ ကဒါက့ၤလၢ ဝ့ၢ်ပူၤလီၤ. ဒီးစီၤၡမူၤအ့လး ဆဲးတဲသကိးတၢ်ဒီး စီၤစီလူး လၢဟံၣ်ခိၣ်လီၤ. ၂၆ အဝဲသ့ၣ် ဂဲၤထၢၣ်ဂီၤဂီၤ ဒီးဖဲမုၢ်ဝါထီၣ် ကယီကယီအခါ စီၤၡမူၤအ့လး ကိးဝဲစီၤစီလူး လၢအအိၣ်လၢ ဟံၣ်ခိၣ်န့ၣ် ဒီးတဲဝဲလၢ “ယကပျဲက့ၤနၤအဃိ ကတဲာ်ကတီၤထီၣ်နသးနီၤ.” အဃိ စီၤစီလူး ကတဲာ်ကတီၤထီၣ်အသး ဝံၤဒီးအဝဲ ဒီးစီၤၡမူၤအ့လး ခံဂၤလၢာ် ဟးထီၣ်လၢ တၢ်ချၢလီၤ. ၂၇ ဖဲအဝဲသ့ၣ် လဲၤလီၤလၢ ဝ့ၢ်အချၢအခါ စီၤၡမူၤအ့လး တဲဘၣ် စီၤစီလူးလၢ “တဲပှၤမၤစၢၤတၢ်+ တဂၤန့ၣ်လၢ ကလဲၤဆိလၢ ပမဲာ်ညါတက့ၢ်. မ့မ့ၢ်နၤန့ၣ် ဆၢထၢၣ်ဖဲအံၤ ဒီးယကဒုးနၢ်ဟူနၤလၢ ကစၢ်ယွၤ အတၢ်ကတိၤလီၤ.” အဃိ ပှၤမၤစၢၤတၢ်တဂၤန့ၣ် လဲၤဆိဝဲလၢညါလီၤ.