၁ ၡမူၤအ့လး
၁၀ စီၤၡမူၤအ့လး ဟံးန့ၢ်သိတကိ ဒီးလူလီၤသိလၢ စီၤစီလူး အခိၣ်လိၤလီၤ.+ စီၤၡမူၤအ့လး နၢမူအီၤဒီး တဲအီၤလၢ “ယဟိဝၤယွၤ ဒိးဖှူနၤ လၢနကတီခိၣ်ရိၤမဲ+ အပှၤဂီၢ်မုၢ်*+ တမ့ၢ်ဧီၤ. ၂ တနံၤအံၤ ဖဲနဟးထီၣ်လၢ ယအိၣ် ဝံၤအလီၢ်ခံ နကထံၣ်လိာ်သးဒီး ပှၤပိာ်ခွါ ခံဂၤ ဘူးဒီး နီၢ်ရၤဃ့လး+ အသွၣ်ခိၣ် လၢအအိၣ်လၢ ဘံၣ်ယၤမံၣ် အဟီၣ်ကဝီၤ ဖဲစ့လစၤလီၤ. ဒီးအဝဲသ့ၣ် ကတဲနၤလၢ ‘ကသ့ၣ်ယီၤတဖၣ် လၢနဟးဃုအီၤန့ၣ် ပှၤထံၣ်န့ၢ်က့ၤလံ. နပၢ်သးပ့ၤနီၣ်ကွံာ် ကသ့ၣ်ယီၤတဖၣ်န့ၣ်လံ.+ ဘၣ်ဆၣ် ခဲအံၤ အသးကိၢ်တၢ်လၢ နဂီၢ်လီၤ. နပၢ်တဲဝဲလၢ “ယဖိခွါ တဟဲက့ၤဒံးဘၣ်, ယကဘၣ်မၤဒ်လဲၣ်.”’ ၃ ဖဲန့ၣ်န့ၣ် ဆဲးလဲၤတၢ် တုၤနလဲၤတုၤလၢ သ့ၣ်ဖးဒိၣ်တထူၣ် လၢအအိၣ်လၢ တၤဘိၢ် ဒီးဖဲန့ၣ် နကထံၣ်လိာ်သးဒီး ပှၤပိာ်ခွါသၢဂၤ လၢအကလဲၤထီၣ် လၢဝ့ၢ်ဘ့ၤသ့လး+ ဒ်သိး အဝဲသ့ၣ် ကဘူၣ်ထီၣ်ဘါထီၣ် ယွၤလၢအမ့ၢ်အတီတဂၤ အဂီၢ်လီၤ. ပိာ်ခွါတဂၤန့ၣ် စိာ်ဝဲ မဲာ်တဲးလဲးဖိ သၢဒု, အဂၤတဂၤန့ၣ် စိာ်ဝဲ ကိၣ်သၢလိၣ် ဒီးလၢအဂၤတဂၤန့ၣ် စိာ်ဝဲ စပံးထံဖးဒိၣ် တကိလီၤ. ၄ အဝဲသ့ၣ် ကသံကွၢ်နၤလၢ မ့ၢ်နအိၣ်ဆူၣ်အိၣ်ချ့ဧါ ဒီးကဟ့ၣ်နၤ ကိၣ်ခံလိၣ်လီၤ. ဒီးနကဘၣ် ဟံးန့ၢ်ကိၣ်တဖၣ်န့ၣ် လၢအဝဲသ့ၣ် အအိၣ်လီၤ. ၅ ဝံၤဒီး နကလဲၤတုၤလၢ ယွၤလၢအမ့ၢ်အတီတဂၤ အတၢ်လူၢ်ခိၣ် ဒီးဖဲန့ၣ် ပှၤဖလ့ၡသးဖိ အသုးဖိ ဆီလီၤအသး တဒူၣ်လီၤ. ဖဲနလဲၤတုၤလၢ ဝ့ၢ်လၢအအိၣ်ဖဲန့ၣ် တဖျၢၣ်အခါ နကထံၣ်လိာ်သးဒီး ဝံတဒူၣ်လၢ အဟဲက့ၤလီၤလၢ တၢ်လီၢ်ထီၣ်ထီလီၤ. ဒီးဖဲအဝဲသ့ၣ် တဲတၢ်ဒ်ဝံအသိးအခါ ပှၤလၢ အအိၣ်လၢ အဝဲသ့ၣ်အမဲာ်ညါန့ၣ် ကဒ့ဝဲအူဝဲ သီတူၢ်, တၢ်ခြ့ခြ့, ပံ ဒီးတနၢ်လီၤ. ၆ ယဟိဝၤယွၤ အသးစီဆှံ ကဟ့ၣ်စိဟ့ၣ်ကမီၤနၤ+ ဒီးနကတဲတၢ်ဒ်ဝံအသိး ဃုာ်ဒီးအဝဲသ့ၣ် ဒီးကလီၤဂာ်ဒ်သိး နဆီတလဲသးလၢ ပှၤအဂၤတဂၤလီၤ.+ ၇ ဖဲတၢ်ပနီၣ်တဖၣ်န့ၣ် ဟဲကဲထီၣ်အသးဝံၤ မ့ၢ်လၢ ယွၤလၢအမ့ၢ်အတီတဂၤ အိၣ်ဒီးနၤအဃိ တၢ်လၢနမၤသ့န့ၣ် မၤအီၤတက့ၢ်. ၈ ဝံၤဒီး လဲၤလီၤဆိလၢ ယမဲာ်ညါလၢ ဝ့ၢ်ကံးလကၤလးတက့ၢ်.+ ယကလဲၤလီၤ လၢနအိၣ်ဖဲန့ၣ် ဒီးလုၢ်ထီၣ် တၢ်လုၢ်ဒွဲၣ်အူ ဒီးတၢ်လုၢ်အိၣ်ဃူအိၣ်ဖိးတဖၣ်လီၤ. နကဘၣ် အိၣ်ခိးဖဲန့ၣ်နွံသီ တုၤလၢ ယဟဲတုၤလၢနအိၣ် ဒီးနကဘၣ်မၤ မနုၤလဲၣ်န့ၣ် ယကတဲဘၣ်နၤလီၤ.”
၉ ဖဲစီၤစီလူး ဃၣ်အသး ဒ်သိး အကဟးထီၣ်လၢ စီၤၡမူၤအ့လး အအိၣ်အခါ ကစၢ်ယွၤ ဆီတလဲ အတၢ်ပာ်သူၣ်ပာ်သး ဒ်သိး အကကဲထီၣ် ဒ်ပှၤအဂၤတဂၤ အသိးလီၤ. ဒီးတၢ်တနံၤန့ၣ် တၢ်ပနီၣ်တဖၣ်န့ၣ် ဟဲကဲထီၣ်အသး ခဲလၢာ်လီၤ. ၁၀ အဃိ အဝဲသ့ၣ်* ဟးထီၣ်ဖဲန့ၣ် ဒီးလဲၤဝဲလၢ တၢ်လူၢ်ခိၣ် ဒီးဝံတဒူၣ် ထံၣ်လိာ်သးဒီးအီၤလီၤ. တဘျီဃီန့ၣ် ကစၢ်ယွၤ အသးစီဆှံ ဟ့ၣ်စိဟ့ၣ်ကမီၤအီၤ+ ဒီးအဝဲ တဲတၢ်ဒ်ဝံအသိး+ လၢဝံတဒူၣ်န့ၣ် အကျါလီၤ. ၁၁ ဖဲပှၤလၢ အသ့ၣ်ညါအီၤလၢညါတဖၣ် ထံၣ်ဝဲလၢ အတဲတၢ်ဒ်ဝံအသိး ဃုာ်ဒီး ဝံတဖၣ်အခါ အဝဲသ့ၣ် တဲလိာ်အသးလၢ “တၢ်ကဲထီၣ်အသးဒီး စီၤကံၣ်အဖိခွါ ဒ်လဲၣ်. မ့ၢ်စီၤစီလူး ပၣ်ဃုာ်လၢ ဝံတဖၣ် အကျါစ့ၢ်ကီးဧါ.” ၁၂ ဒီးပိာ်ခွါဖဲန့ၣ်တဂၤ တဲဝဲလၢ “ဝံအဂၤတဖၣ်အံၤမီၤ, အဝဲသ့ၣ်အပၢ်န့ၣ် မ့ၢ်မတၤလဲၣ်.” လၢတၢ်န့ၣ်အဃိ တၢ်ကတိၤဒိ ဟဲအိၣ်ထီၣ်တခါလၢ “မ့ၢ်စီၤစီလူး ပၣ်ဃုာ်လၢ ဝံတဖၣ် အကျါစ့ၢ်ကီးဧါ.”+
၁၃ ဖဲစီၤစီလူး တဲတၢ်ဒ်ဝံအသိး ဝံၤအခါ အဝဲလဲၤဝဲလၢ တၢ်လီၢ်ထီၣ်ထီ န့ၣ်လီၤ. ၁၄ လၢခံ စီၤစီလူးအပၢ် အဒီပုၢ်ဝဲၢ်ခွါ သံကွၢ်စီၤစီလူး ဒီးအပှၤမၤစၢၤတၢ်တဂၤလၢ “သုလဲၤဖဲလဲၣ်.” ဒီးစီၤစီလူး တဲဝဲလၢ “ပဟးဃု ကသ့ၣ်ယီၤတဖၣ်+ ဘၣ်ဆၣ် ပတထံၣ်ဘၣ် အဃိ ပလဲၤလၢ စီၤၡမူၤအ့လး အအိၣ်လီၤ.” ၁၅ စီၤစီလူး အတံ သံကွၢ်ဝဲလၢ “စီၤၡမူၤအ့လး တဲဘၣ်သု မနုၤလဲၣ်. ဝံသးစူၤ တဲဘၣ်ယၤမီၤ.” ၁၆ စီၤစီလူး တဲဆၢအတံလၢ “အဝဲတဲပှၤလၢ ပှၤထံၣ်န့ၢ်က့ၤ ကသ့ၣ်ယီၤတဖၣ်လံ.” ဘၣ်ဆၣ် တၢ်လၢ စီၤၡမူၤအ့လးတဲအီၤ ဘၣ်ဃးဒီး အဝဲကကဲထီၣ် စီၤပၤအဂ့ၢ်န့ၣ် အဝဲ တတဲဘၣ် အတံဘၣ်.
၁၇ ဒီးစီၤၡမူၤအ့လး ကိးဖှိၣ်ပှၤဂီၢ်မုၢ်လၢ ယဟိဝၤယွၤအအိၣ် ဖဲဝ့ၢ်မံးစပၤ+ ၁၈ ဒီးတဲဘၣ် ပှၤအံၣ်စရ့လးဖိလၢ “အံၣ်စရ့လးအကစၢ် ယဟိဝၤယွၤ တဲဝဲဒ်အံၤ ‘ပှၤလၢအမၤထူၣ်ဖျဲးထီၣ် ပှၤအံၣ်စရ့လးဖိ လၢကီၢ်အဲၤကူပတူးအပူၤ ဒီးမၤပူၤဖျဲးသုလၢ ပှၤအဲၤကူပတူးဖိ+ ဒီးဘီမုၢ်ခဲလၢာ် လၢအဆီၣ်တံၢ်မၤနၢၤသု အစုပူၤန့ၣ် မ့ၢ်ယၤလီၤ. ၁၉ ဘၣ်ဆၣ် တနံၤအံၤ သုပာ်တ့ၢ်ကွံာ် သုကစၢ်ယွၤ+ လၢအမ့ၢ် ပှၤလၢအအုၣ်က့ၤခီၣ်က့ၤ သုလၢ သုတၢ်ကီတၢ်ခဲ ဒီးသုတၢ်ကိၢ်တၢ်ဂီၤ ခဲလၢာ်လီၤ. ဒီးသုတဲယၤလၢ “ပာ်ထီၣ် စီၤပၤတဂၤလၢ ပဖီခိၣ်တက့ၢ်.” အဃိ ခဲအံၤန့ၣ် အိၣ်ဆၢထၢၣ် ဒ်သုဒူၣ်တဖၣ် ဒီးသုဒူၣ်ဖိထၢဖိတဖၣ်* အိၣ်ဝဲအသိး လၢယဟိဝၤယွၤ အမဲာ်ညါတက့ၢ်.’”
၂၀ ဒီးစီၤၡမူၤအ့လး မၢအံၣ်စရ့လးအဒူၣ် ခဲလၢာ် ဟဲသုးဘူးအသး+ ဒီးဘံၣ်ယၤမံၣ်အဒူၣ်န့ၣ် ဘၣ်တၢ်ဃုထၢထီၣ်အီၤလီၤ.+ ၂၁ ဒီးစီၤၡမူၤအ့လး မၢဒူၣ်ဖိထၢဖိတဖၣ်လၢ ဘံၣ်ယၤမံၣ်အဒူၣ်ကျါ ဟဲသုးဘူးထီၣ်အသး ဒီးပှၤမၤတြံၤဖိ အဒူၣ်ဖိထၢဖိ ဘၣ်တၢ်ဃုထၢထီၣ်အီၤလီၤ. ဒီးလၢခံကတၢၢ်န့ၣ် စီၤကံၣ်အဖိခွါ စီၤစီလူး ဘၣ်တၢ်ဃုထၢထီၣ်အီၤလီၤ.+ ဘၣ်ဆၣ် ဖဲအဝဲသ့ၣ် ဟးဃုအီၤအခါ ပှၤဃုအီၤ တဘၣ်နီတပူၤဘၣ်. ၂၂ အဃိ အဝဲသ့ၣ် သံကွၢ် ယဟိဝၤယွၤလၢ+ “ပှၤပိာ်ခွါတဂၤန့ၣ် ဟဲဖဲအံၤလံဧါ.” ယဟိဝၤယွၤ တဲဆၢက့ၤလၢ “လၢန့ၣ်, အအိၣ်ခူသူၣ်လၢ တၢ်ဘိၣ်တဖၣ်အကျါလီၤ.” ၂၃ အဃိ အဝဲသ့ၣ်လဲၤဃ့ၢ်လၢအအိၣ် ဒီးဟဲကိးအီၤလီၤ. ဖဲအဆၢထၢၣ်လၢ ပှၤဂီၢ်မုၢ် အခၢၣ်သးအခါ အနီၢ်ထီန့ၢ်ဒံး ပှၤခဲလၢာ် ဒီးပှၤတုၤန့ၢ်အီၤ ဖဲအဖံဘၣ်ခိၣ်လီၤ.+ ၂၄ စီၤၡမူၤအ့လး တဲပှၤဂီၢ်မုၢ် ခဲလၢာ်လၢ “မ့ၢ်သုထံၣ်ဧါ, ပှၤလၢယဟိဝၤယွၤ ဃုထၢထီၣ်အီၤတဂၤန့ၣ်+ လၢပှၤဂီၢ်မုၢ်အကျါန့ၣ် ပှၤဒ်သိးဒီးအီၤ တအိၣ်နီတဂၤဘၣ်.” ဒီးပှၤဂီၢ်မုၢ် ခဲလၢာ် ကိးပသူထီၣ်ဝဲလၢ “မ်စီၤပၤ အိၣ်မူဘၣ် ယံာ်ယံာ်တက့ၢ်.”
၂၅ စီၤၡမူၤအ့လး တဲဘၣ် ပှၤဂီၢ်မုၢ် ဘၣ်ဃးဒီး စီၤပၤ အတၢ်ခွဲးတၢ်ယာ်လၢ+ ကဃ့တၢ်လၢ အဝဲသ့ၣ်အအိၣ်လီၤ. ဒီးအဝဲကွဲးလီၤဝဲ တၢ်ဂ့ၢ်တဖၣ်အံၤလၢ လံာ်တဘ့ၣ်အပူၤ ဒီးပာ်ဝဲလၢ ယဟိဝၤယွၤ အမဲာ်ညါလီၤ. ဝံၤဒီးအဝဲမၢ ပှၤကိးဂၤဒဲး က့ၤလၢ အနီၢ်ကစၢ်အဟံၣ်လီၤ. ၂၆ ဒီးစီၤစီလူး က့ၤစ့ၢ်ကီးဝဲလၢအဟံၣ် လၢဝ့ၢ်ကံဘဧၤအပူၤ ဒီးပှၤသုးဖိတဖၣ်လၢ ယဟိဝၤယွၤ ထိၣ်ဟူးထိၣ်ဂဲၤထီၣ်အသးန့ၣ် က့ၤဃုာ်ဒီးအီၤလီၤ. ၂၇ ဘၣ်ဆၣ် ပှၤပိာ်ခွါလၢ အအၢအသီတဖၣ် တဲဝဲလၢ “ပှၤတဂၤအံၤ ကမၤပူၤဖျဲးပှၤဒ်လဲၣ်.”+ အဃိ အဝဲသ့ၣ် တပာ်ကဲအီၤဘၣ် ဒီးအဝဲသ့ၣ် တဟဲစိာ်န့ၢ်အီၤ တၢ်ဟ့ၣ်နီတမံၤဘၣ်.+ ဘၣ်ဆၣ် စီၤစီလူး တတဲတၢ်နီတမံၤဘၣ်.