၂ ကွဲးနီၣ်တၢ်
၃၄ ဖဲစီၤယိၤၡံယၤ+ ကဲထီၣ်စီၤပၤအခါ အသးနံၣ်အိၣ်ဝဲ ဃိးနံၣ်လီၤ. ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ ၃၁ နံၣ်လီၤ.+ ၂ စီၤယိၤၡံယၤ မၤတၢ်လၢ ယဟိဝၤယွၤ ထံၣ်ဝဲလၢအဂ့ၤ ဒီးအဝဲအိၣ်မူပိာ်ထွဲ ဒ်အဖုဖးဒိၣ် စီၤဒၤဝံးအသိးလၢ တၢ်ခဲလၢာ်အပူၤ ဒီးအဝဲတလဲၤလၢ ကျဲလၢအကမၣ် နီတဘိဘၣ်.
၃ ဖဲစီၤယိၤၡံယၤ ပၢတၢ်ဃိးနံၣ်တနံၣ်န့ၣ် အသးစၢ်ဒံးသနာ်က့ အဝဲစးထီၣ်ဃု အဖုဖးဒိၣ်စီၤဒၤဝံး အကစၢ်ယွၤလီၤ.+ ဖဲအပၢတၢ် ၁၂ နံၣ်တနံၣ်န့ၣ် အဝဲစးထီၣ် မၤကဆှီထီၣ်က့ၤ ယူဒၤဘီမုၢ် ဒီးဝ့ၢ်ယရူၤၡလ့ၣ်+ ဒီးမၤဟးဂီၤကွံာ် တၢ်လီၢ်ထီၣ်ထီတဖၣ်,+ တၢ်စီဆှံအထူၣ်တဖၣ်,* တၢ်ဂီၤတၢ်ဖှီၣ်လၢ ပှၤစိးပျၤအီၤတဖၣ်+ ဒီးတၢ်ဂီၤတၢ်ဖှီၣ်ထးတဖၣ်လီၤ. ၄ တကးဒံးဘၣ် အဝဲသ့ၣ် မၤလီၤပှီၢ်ကွံာ် ဘဧၤလး အတၢ်လုၢ်လီၢ်တဖၣ်လၢ စီၤယိၤၡံယၤအမဲာ်ညါ ဒီးစီၤယိၤၡံယၤ မၤဟးဂီၤကွံာ် တၢ်လုၢ်တၢ်နၢမူ အလီၢ်တဖၣ်လၢ အအိၣ်ဝဲလၢ တၢ်လုၢ်လီၢ်တဖၣ်အံၤ အဖီခိၣ်လီၤ. အဝဲမၤလီၤကလဲကွံာ် တၢ်စီဆှံအထူၣ်တဖၣ်, တၢ်ဂီၤတၢ်ဖှီၣ်လၢ ပှၤစိးပျၤအီၤတဖၣ် ဒီးတၢ်ဂီၤတၢ်ဖှီၣ်ထးတဖၣ်လီၤ. ဝံၤဒီးအဝဲ မၤလီၤကမူၣ်ဝဲ ဒီးဖှံလီၤဝဲလၢ ပှၤလၢအလုၢ်ထီၣ်တ့ၢ်တၢ်လၢ တၢ်သ့ၣ်တဖၣ်န့ၣ် အအိၣ်န့ၣ် အသွၣ်ခိၣ်တဖၣ် အဖီခိၣ်လီၤ.+ ၅ ဒီးအဝဲဒွဲၣ်အူထီၣ် ပှၤလုၢ်တၢ်ဒိၣ်တဖၣ်အဃံလၢ အဝဲသ့ၣ် အတၢ်လုၢ်လီၢ်တဖၣ် အဖီခိၣ်လီၤ.+ အဝဲမၤကဆှီထီၣ်က့ၤ ယူဒၤဒီး ဝ့ၢ်ယရူၤၡလ့ၣ်ဒ်န့ၣ်လီၤ.
၆ တကးဒံးဘၣ် လၢဝ့ၢ်တဖၣ်လၢ အအိၣ်လၢမနၤၡ့ၤ, အ့ဖရဲၣ်+ ဒီးစူၤမ့းအိၣ်အဒူၣ် အဟီၣ်ကဝီၤပူၤ ဒီးတုၤလၢ နးသၤလံအဒူၣ်အဟီၣ်ကဝီၤ ဒီးလၢတၢ်လီၢ်လၢ ပှၤမၤဟးဂီၤတ့ၢ်ဝဲ လၢအအိၣ်လၢဝ့ၢ်တဖၣ်အံၤ အကပိာ်ကပၤန့ၣ် အဝဲမၤဒ်န့ၣ်စ့ၢ်ကီးလီၤ. ၇ အဝဲမၤလီၤပှီၢ်ကွံာ် တၢ်လုၢ်လီၢ်တဖၣ် ဒီးမၤဟးဂီၤကွံာ် တၢ်စီဆှံအထူၣ်တဖၣ် ဒီးတၢ်ဂီၤတၢ်ဖှီၣ်လၢ ပှၤစိးပျၤအီၤတဖၣ်+ ဝံၤဒီးမၤလီၤကမူၣ်ဝဲလီၤ. ဒီးအဝဲမၤဟးဂီၤကွံာ် တၢ်လုၢ်တၢ်နၢမူ အလီၢ်တဖၣ် လၢအံၣ်စရ့လး အတၢ်လီၢ်ကိးတီၤဒဲး+ ဝံၤဒီးအဝဲက့ၤကဒါက့ၤလၢ ဝ့ၢ်ယရူၤၡလ့ၣ်လီၤ.
၈ ဖဲစီၤယိၤၡံယၤ ပၢတၢ် ၁၈ နံၣ်တနံၣ်, ဖဲအဝဲ မၤကဆှီထီၣ်က့ၤ ကီၢ်ပူၤ ဒီးတၢ်လုၢ်ဟံၣ် ဝံၤအလီၢ်ခံ အမၢလီၤဝဲ စီၤအစါလံယၤ အဖိခွါ စီၤၡၤဖၣ်,+ စီၤမၤစ့ယၤ လၢအမ့ၢ် ဝ့ၢ်ခိၣ် ဒီးစီၤယဟါအါဃး အဖိခွါ စီၤယိၤအၤ လၢအမ့ၢ် ပှၤကွဲးနီၣ်တၢ် ဒ်သိး ကဘှီဂ့ၤထီၣ်က့ၤ အကစၢ် ယဟိဝၤယွၤ အဟံၣ်အဂီၢ်လီၤ.+ ၉ အဝဲသ့ၣ်လဲၤလၢ ပှၤလုၢ်တၢ်ခိၣ် အဒိၣ်ကတၢၢ် စီၤဃံးလကံယၤ အအိၣ် ဒီးဟ့ၣ်လီၤအီၤ ကျိၣ်စ့လၢ ပှၤဟဲစိာ်ဝဲလၢ ကစၢ်ယွၤ အဟံၣ်ပူၤလီၤ. ဒီးကျိၣ်စ့တဖၣ်အံၤ ပှၤလ့ၤဝံဖိ လၢအမ့ၢ် ပှၤခိးတြဲၤဖိတဖၣ် ထၢဖှိၣ်ပာ်စၢၤဝဲလၢ အ့ဖရဲၣ် ဒီးမနၤၡ့ၤအဒူၣ် အအိၣ် ဒီးပှၤအဂၤတဖၣ်လၢ အံၣ်စရ့လးဘီမုၢ်အပူၤအအိၣ်+ ဒီးလၢယူဒၤအဒူၣ်, ဘံၣ်ယၤမံၣ်အဒူၣ် ဒီးဝ့ၢ်ယရူၤၡလ့ၣ် အပှၤဂီၢ်မုၢ် အအိၣ်လီၤ. ၁၀ အဝဲသ့ၣ် ဟ့ၣ်လီၤဝဲလၢ ပှၤလၢအဘၣ် တၢ်ဃုထၢအီၤလၢ ကတီခိၣ်ရိၤမဲ ယဟိဝၤယွၤ အဟံၣ်အတၢ်မၤလီၤ. ဝံၤဒီး ပှၤမၤတၢ်ဖိတဖၣ် လၢအမၤတၢ်လၢ ယဟိဝၤယွၤ အဟံၣ်န့ၣ် သူဝဲ ကျိၣ်စ့န့ၣ် လၢကဘှီဂ့ၤထီၣ်က့ၤ ဟံၣ်အဂီၢ်လီၤ. ၁၁ အဝဲသ့ၣ် ဟ့ၣ်လီၤဝဲ ပှၤစုသ့ဖိတဖၣ် ဒီးပှၤလၢအတ့တၢ်ဘှီတၢ်တဖၣ် ဒ်သိးကပှ့ၤဝဲ လၢၢ်လၢ အဘၣ်တၢ်ပျၤန့ၢ်အီၤတဖၣ် ဒီးသ့ၣ်ဘၣ် လၢကမၤကျၢၤထီၣ်က့ၤတၢ်အဂီၢ် ဒီးကျူတဖၣ် ဒ်သိးကတ့ကျၢၤထီၣ်က့ၤ ဟံၣ်တဖၣ်လၢ ယူဒၤအစီၤပၤတဖၣ် ပာ်ဟးဂီၤဝဲန့ၣ်လီၤ.+
၁၂ ဒီးပှၤမၤဝဲ တၢ်မၤတဖၣ်အံၤ တီတီလိၤလိၤလီၤ.+ ဒီးပှၤကွၢ်ထွဲတၢ်တဖၣ်လၢ ပှၤပာ်ထီၣ်လၢ အဝဲသ့ၣ်အဖီခိၣ်န့ၣ် မ့ၢ်ဝဲပှၤလ့ၤဝံဖိတဖၣ် လၢအမ့ၢ်ဝဲ စီၤယၤဃးဒီး စီၤဧိၤဘါဒယၤလၢ အဟဲလီၤစၢၤလီၤသွဲၣ်လၢ စီၤမရၤရံၤ+ ဒီးစီၤစကၤရယၤ ဒီးစီၤမၡူလၣ်လၢ အဟဲလီၤစၢၤလီၤသွဲၣ်လၢ စီၤကဃးလီၤ.+ ဒီးပှၤလ့ၤဝံဖိတဖၣ်လၢ အဖၠဲးလၢတၢ်ဒ့တၢ်အူ တကပၤန့ၣ်+ ၁၃ တီခိၣ်ရိၤမဲဝဲ ပှၤလၢအဝံတၢ်ယိးတၢ်ဃၢတဖၣ် ဒီးကွၢ်ထွဲဝဲ ပှၤကိးဂၤဒဲးလၢ အမၤတၢ်မၤ အကလုာ်ကလုာ်လီၤ. ပှၤလ့ၤဝံဖိတနီၤန့ၣ် မ့ၢ်ဝဲ နဲၣ်ရွဲၣ်တဖၣ်, ပှၤခိၣ်ပှၤနၢ်တဖၣ် ဒီးပှၤခိးတြဲၤဖိတဖၣ်လီၤ.+
၁၄ ဖဲအဝဲသ့ၣ် ထုးထီၣ် ကျိၣ်စ့လၢ ပှၤဟဲစိာ်ဝဲလၢ ယဟိဝၤယွၤ အဟံၣ်အခါ+ ပှၤလုၢ်တၢ်ဒိၣ် စီၤဃံးလကံယၤ ထံၣ်န့ၢ်ဝဲ ယဟိဝၤယွၤ အလံာ် တၢ်သိၣ်တၢ်သီတဘ့ၣ်လၢ+ အဟ့ၣ်လီၤဝဲ ခီဖျိလၢ စီၤမိၤၡ့လီၤ.+ ၁၅ အဃိ စီၤဃံးလကံယၤ တဲဘၣ် နဲၣ်ရွဲၣ်စီၤၡၤဖၣ်လၢ “ယထံၣ်န့ၢ် လံာ်တၢ်သိၣ်တၢ်သီတဘ့ၣ် လၢယဟိဝၤယွၤ အဟံၣ်ပူၤလီၤ.” ဒီးစီၤဃံးလကံယၤ ဟ့ၣ်လီၤဝဲ လံာ်တဘ့ၣ်န့ၣ်လၢ စီၤၡၤဖၣ်အအိၣ်လီၤ. ၁၆ ဝံၤဒီး စီၤၡၤဖၣ် လဲၤစိာ်ဝဲ လံာ်န့ၣ်လၢ စီၤပၤအအိၣ် ဒီးတဲအီၤလၢ “နခ့နပှၤတဖၣ် မၤဝဲတၢ်လၢ အဘၣ်တၢ်မၤလိာ် အဝဲသ့ၣ် ကိးမံၤဒဲးလီၤ. ၁၇ အဝဲသ့ၣ် ထၢဖှိၣ်* ဝဲကျိၣ်စ့လၢ အဝဲသ့ၣ် ထံၣ်ဝဲလၢ ယဟိဝၤယွၤ အဟံၣ်ပူၤ ဒီးအဝဲသ့ၣ် ဟ့ၣ်လီၤဝဲလၢ ပှၤလၢအတီခိၣ်ရိၤမဲတၢ်တဖၣ် ဒီးပှၤလၢအမၤတၢ်တဖၣ် အအိၣ်လီၤ.” ၁၈ ဒီးနဲၣ်ရွဲၣ် စီၤၡၤဖၣ် တဲစ့ၢ်ကီး စီၤပၤလၢ “ပှၤလုၢ်တၢ်ဒိၣ် စီၤဃံးလကံယၤ ဟ့ၣ်လီၤယၤ လံာ်တဘ့ၣ်လီၤ.”+ ဝံၤဒီး စီၤၡၤဖၣ် ဖးထီၣ်ဝဲ လံာ်တဘ့ၣ်န့ၣ် လၢစီၤပၤ အမဲာ်ညါလီၤ.+
၁၉ ဖဲစီၤပၤနၢ်ဟူဘၣ် တၢ်ကွဲးအသးလၢ စီၤမိၤၡ့ အတၢ်သိၣ်တၢ်သီ အပူၤအခါ အဝဲ ဖှီညာ်အဆ့ကၤလီၤ.+ ၂၀ ဒီးစီၤပၤ မၤလိာ် စီၤဃံးလကံယၤ, စီၤၡၤဖၣ် အဖိခွါ စီၤအဃံကၣ်,+ စီၤမံၤကါ အဖိခွါ စီၤဧၤဘဒိၣ်, နဲၣ်ရွဲၣ် စီၤၡၤဖၣ် ဒီးစီၤပၤအခ့အပှၤ စီၤဧစါယၤလၢ ၂၁ “မ့ၢ်လၢ ပမိၢ်ပၢ်ဖံဖု လၢပျၢၤတဖၣ် တမၤပိာ်ထွဲ ယဟိဝၤယွၤ အတၢ်ကတိၤ ဒီးတမၤထွဲတၢ်လၢ အဘၣ်တၢ်ကွဲးအီၤလၢ လံာ်တဘ့ၣ်အံၤ အပူၤဘၣ်အဃိ ယဟိဝၤယွၤ သးပှံၢ်ထီၣ်ပှၤဒိၣ်မးလံ. ဘၣ်ဃးဒီး တၢ်ကွဲးအသးလၢ လံာ်လၢ ပှၤထံၣ်န့ၢ်အီၤ တဘ့ၣ်အံၤအပူၤန့ၣ် လဲၤသံကွၢ်တၢ်လၢ ယဟိဝၤယွၤအအိၣ် လၢယဂီၢ် ဒီးလၢကယဲၢ် ပှၤလၢအအိၣ်တ့ၢ်လၢ အံၣ်စရ့လးဒီး ယူဒၤဘီမုၢ်အပူၤ အဂီၢ်တက့ၢ်.”+
၂၂ အဃိ စီၤဃံးလကံယၤ ဒီးပှၤတဖၣ်လၢ စီၤပၤမၢလီၤဝဲန့ၣ် လဲၤဝဲလၢ စီၤၡၤလူၣ်အမါ လၢအမ့ၢ် ဝံမုၣ်+ နီၢ်ဃူးလဒါ အအိၣ်လီၤ. စီၤၡၤလူၣ်န့ၣ် မ့ၢ်ဝဲပှၤကွၢ်ထွဲ တၢ်ကူတၢ်သိး ဒီးအမ့ၢ်ဝဲ စီၤတံးကဝၤ အဖိခွါလီၤ. စီၤတံးကဝၤ အပၢ်မ့ၢ်ဝဲ စီၤဃၢ်ဃၣ်လီၤ. ဒီးနီၢ်ဃူးလဒါန့ၣ် အိၣ်ဝဲလၢ ဝ့ၢ်ယရူၤၡလ့ၣ် တၢ်လီၢ်ခံတီၤတတီၤအဃိ အဝဲသ့ၣ် လဲၤတဲတၢ်ဒီးအီၤဖဲန့ၣ်လီၤ.+ ၂၃ နီၢ်ဃူးလဒါ တဲဘၣ်အဝဲသ့ၣ်လၢ “အံၣ်စရ့လးအကစၢ် ယဟိဝၤယွၤ တဲဝဲဒ်အံၤ, ‘တဲဘၣ် ပှၤပိာ်ခွါတဂၤ လၢအဆှၢလီၤသုလၢ ယအိၣ်န့ၣ်လၢ ၂၄ “ယဟိဝၤယွၤ တဲဝဲဒ်အံၤ, ‘ယကဒုးလီၤ တၢ်နးတၢ်ဖှီၣ် လၢတၢ်လီၢ်အံၤ ဒီးစံၣ်ညီၣ် ပှၤလၢအအိၣ်လၢ အပူၤတဖၣ်လီၤ.+ တၢ်ဆိၣ်အၢတဖၣ်လၢ အဘၣ်တၢ်ကွဲးလီၤအီၤလၢ လံာ်တဘ့ၣ်အံၤအပူၤ+ လၢအဝဲသ့ၣ် ဖးဝဲလၢ ယူဒၤဘီမုၢ်အစီၤပၤ အမဲာ်ညါန့ၣ် ကဟဲလၢထီၣ်ပှဲၤထီၣ် ခဲလၢာ်လီၤ. ၂၅ ဒီးမ့ၢ်လၢ အဝဲသ့ၣ် ပာ်တ့ၢ်ကွံာ်ယၤ+ ဒီးဒွဲၣ်ခုၣ်ထီၣ်တၢ်လုၢ်လၢ ယွၤအဂၤတဖၣ်အအိၣ် ဒ်သိးအဝဲသ့ၣ် ကမၤဆါယသးလၢ+ တၢ်လၢအဝဲသ့ၣ် မၤဝဲခဲလၢာ်အဃိ ယကသးပှံၢ်ထီၣ် တၢ်လီၢ်အံၤ ဒ်မ့ၣ်အူလၢ ပှၤမၤလီၤပံးအီၤ တန့ၢ်ဘၣ်အသိးလီၤ.’”+ ၂၆ ဘၣ်ဆၣ် မ့မ့ၢ် ယူဒၤဘီမုၢ် အစီၤပၤ လၢအဆှၢလီၤသု ဒ်သိးသုကသံကွၢ်တၢ်လၢ ယၤ, ယဟိဝၤယွၤ အအိၣ်န့ၣ် သုကဘၣ်တဲအီၤဒ်အံၤလီၤ. “အံၣ်စရ့လးအကစၢ် ယဟိဝၤယွၤ တဲဝဲလၢ ‘ခီဖျိလၢ တၢ်ကတိၤလၢ နနၢ်ဟူဘၣ်အီၤတဖၣ်န့ၣ်+ ၂၇ ထိၣ်ဟူးထိၣ်ဂဲၤထီၣ်နသး* ဒီးဖဲနနၢ်ဟူဘၣ် ယၤ, ကစၢ်ယွၤ အတၢ်ကတိၤတဖၣ် လၢအဘၣ်ဃးဒီး တၢ်လီၢ်အံၤ ဒီးပှၤလၢအအိၣ်ဖဲန့ၣ်တဖၣ်အခါ နဆီၣ်လီၤနသးလၢ ယမဲာ်ညါ, နဖှီညာ်နဆ့ကၤ ဒီးနဟီၣ်လၢ ယမဲာ်ညါအဃိ ယၤ, ယဟိဝၤယွၤ စ့ၢ်ကီး တဲနၤလၢ ယနၢ်ဟူ နတၢ်ထုကဖၣ်လံ.+ ၂၈ လၢတၢ်န့ၣ်အဃိ ယကပာ်ဖှိၣ်နၤ ဃုာ်ဒီးနမိၢ်ပၢ်ဖံဖု လၢပျၢၤတဖၣ်လီၤ.* ဒီးပှၤကခူၣ်လီၤကွံာ်နၤမုာ်မုာ် ဒီးနတထံၣ်ဘၣ် တၢ်နးတၢ်ဖှီၣ်လၢ ယကဒုးလီၤဘၣ်လၢ တၢ်လီၢ်အံၤ ဒီးပှၤလၢအအိၣ် ဖဲအံၤတဖၣ်ဘၣ်.’”’”+
ဝံၤဒီးအဝဲသ့ၣ် ဟဲက့ၤတဲဘၣ် စီၤပၤလၢ တၢ်ဂ့ၢ်ခဲလၢာ်လီၤ. ၂၉ အဃိ စီၤပၤဆှၢလီၤ တၢ်ကလုၢ် ဒီးကိးဖှိၣ်ဝဲ ပှၤသူၣ်က့သးပှၢ်လၢ အအိၣ်လၢယူဒၤဘီမုၢ် ဒီးဝ့ၢ်ယရူၤၡလ့ၣ်အပူၤ ခဲလၢာ်လီၤ.+ ၃၀ ဝံၤဒီး စီၤပၤ လဲၤထီၣ်လၢ ယဟိဝၤယွၤ အဟံၣ် တပူၤဃီဒီး ယူဒၤအပှၤပိာ်ခွါခဲလၢာ်, ပှၤအိၣ်လၢ ဝ့ၢ်ယရူၤၡလ့ၣ်ခဲလၢာ်, ပှၤလုၢ်တၢ်ဒိၣ်တဖၣ်, ပှၤလ့ၤဝံဖိတဖၣ် ဒီးပှၤခဲလၢာ် စးထီၣ်လၢအဒိၣ် တုၤလၢအဆံးလီၤ. ဒီးတၢ်ကွဲးအသး လၢအအိၣ်လၢ လံာ်တၢ်အၢၣ်လီၤအီလီၤလၢ ပှၤထံၣ်န့ၢ်အီၤလၢ ယဟိဝၤယွၤ အဟံၣ်ပူၤန့ၣ် စီၤပၤဖးထီၣ်ဝဲ ခဲလၢာ်လၢ အကလုၢ်ဒိၣ်ဒိၣ် ဒ်သိး အဝဲသ့ၣ် ကနၢ်ဟူဝဲအဂီၢ်လီၤ.+ ၃၁ ဒီးစီၤပၤ ဆၢထၢၣ် လၢအလီၢ် ဒီးမၤဝဲ တၢ်အၢၣ်လီၤအီလီၤ*+ လၢယဟိဝၤယွၤ အမဲာ်ညါလီၤ. အဝဲအၢၣ်လီၤဝဲလၢ အကမၤထွဲ တၢ်အၢၣ်လီၤအီလီၤလၢ အကွဲးအသးလၢ လံာ်တဘ့ၣ်န့ၣ်အပူၤ+ ဒီးကဒိကနၣ် ယဟိဝၤယွၤ အကလုၢ် ဒီးမၤထွဲအတၢ်မၤလိာ်, အတၢ်ဒုးသ့ၣ်နီၣ်ထီၣ်တဖၣ် ဒီးအတၢ်ဘျၢတဖၣ် လၢအသးဒီဖျၢၣ်ဒီး လၢအတၢ်အိၣ်မူ ကိးသနၢၣ်ဒဲးအပူၤလီၤ.+ ၃၂ တကးဒံးဘၣ် အဝဲဟ့ၣ်ဂံၢ်ဟ့ၣ်ဘါ ပှၤလၢအအိၣ်လၢ ဝ့ၢ်ယရူၤၡလ့ၣ်အပူၤဒီး ဘံၣ်ယၤမံၣ် အဒူၣ်အဟီၣ်ကဝီၤလၢ အကမၤထွဲဝဲ တၢ်အၢၣ်လီၤအီလီၤအံၤလီၤ. ဒီးပှၤလၢအအိၣ်လၢ ဝ့ၢ်ယရူၤၡလ့ၣ်ခဲလၢာ် အိၣ်မူမၤထွဲဝဲ ဒ်အဝဲသ့ၣ် အမိၢ်ပၢ်ဖံဖု လၢပျၢၤတဖၣ် အကစၢ်ယွၤ အတၢ်အၢၣ်လီၤအီလီၤ အိၣ်ဝဲအသိးလီၤ.+ ၃၃ လၢကီၢ်အံၣ်စရ့လး အဟီၣ်ကဝီၤအပူၤန့ၣ် စီၤယိၤၡံယၤ ထုးထီၣ်ကွံာ် တၢ်လၢအလီၤသးဘၣ်အၢ* ခဲလၢာ်လီၤ.+ အဝဲမၤစၢၤဝဲ ပှၤလၢအအိၣ်လၢ အံၣ်စရ့လးအပူၤ ကိးဂၤဒဲးဒ်သိး အဝဲသ့ၣ်ကဘူၣ်ထီၣ်ဘါထီၣ် အဝဲသ့ၣ် အကစၢ် ယဟိဝၤယွၤလီၤ. ဒီးဖဲစီၤယိၤၡံယၤ အိၣ်မူဒံးအဆၢကတီၢ် အဝဲသ့ၣ် ဆဲးတီဒီး အမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤလီၤ.