၁ ၡမူၤအ့လး
၂၄ ဖဲစီၤစီလူး လဲၤဒုးပှၤဖလ့ၡသးဖိဝံၤဒီး အဟဲက့ၤကဒါက့ၤ အခါ ပှၤတဲဘၣ်အီၤလၢ “စီၤဒၤဝံး အိၣ်လၢ ဧ့ၣ်က့ဒံၤ အပှၢ်မုၢ်ကနၢလီၤ.”+
၂ အဃိ စီၤစီလူး ကိးဃုာ်ဒီး ပှၤလၢအဘၣ်တၢ်ဃုထၢအီၤလၢ ပှၤအံၣ်စရ့လးဖိ ခဲလၢာ်အကျါ အဂၤ ၃,၀၀၀ ဒီးဟးဃုဝဲ စီၤဒၤဝံးဒီးအပှၤတဖၣ် လၢလ့တဖၣ်လၢ မဲာ်တဲးလဲးမံၤတဖၣ် အိၣ်ဝဲအလိၤလီၤ. ၃ စီၤစီလူး လဲၤတုၤဃီၤဝဲလၢ သိအကရၢတဖၣ်* လၢအအိၣ်ဝဲလၢ ကျဲကပၤလီၤ. ဒီးဖဲန့ၣ် လ့ကိပူၤအိၣ်ဝဲတဖျၢၣ် ဒီးအဝဲလဲၤနုာ်လီၤဖဲန့ၣ် ဒ်သိးအကအ့ၣ်ဆါဆံၣ်ဆါအဂီၢ်လီၤ. ဖဲန့ၣ်အခါ စီၤဒၤဝံး ဒီးအပှၤတဖၣ် ဆ့ၣ်နီၤဝဲလၢ လ့ကိပူၤအကတၢၢ်လၢ တၢ်သဒၢအလီၢ်လီၤ.+ ၄ စီၤဒၤဝံး အပှၤတဖၣ် တဲအီၤလၢ “တနံၤအံၤန့ၣ် မ့ၢ်ဝဲမုၢ်နံၤလၢ ယဟိဝၤယွၤ တဲဘၣ်နၤလၢ ‘ကနၣ်လၢအံၤ, ယဟ့ၣ်လီၤ နဒုၣ်နဒါ လၢနစုပူၤလံ+ ဒီးကွၢ်ဖဲနအဲၣ်ဒိးမၤအီၤန့ၣ် မၤဟီ.’” အဃိ စီၤဒၤဝံး ဂဲၤဆၢထၢၣ်ဝဲ ကစုဒု ဒီးကူးတဲာ်ဝဲ စီၤစီလူး အဆ့ကၤလၢ အစုဒုၣ်တအိၣ်ဘၣ်တဘ့ၣ် အကနူၤထံးလီၤ. ၅ ဘၣ်ဆၣ် လၢခံန့ၣ် စီၤဒၤဝံး အသးသိၣ်ဃီၣ်အီၤ+ ခီဖျိလၢ အဝဲကူးတဲာ် စီၤစီလူး အဆ့ကၤလၢ အစုဒုၣ်တအိၣ်ဘၣ်တဘ့ၣ် အကနူၤထံးအဃိလီၤ. ၆ ဒီးအဝဲတဲဘၣ် အပှၤတဖၣ်လၢ “ယကစၢ်တဂၤအံၤ မ့ၢ်ယဟိဝၤယွၤ အပှၤဒိးဖှူသးတဂၤအဃိ ယတကြၢး မၤဒ်န့ၣ်ဘၣ်. အဝဲမ့ၢ် ယဟိဝၤယွၤ အပှၤဒိးဖှူသးတဂၤအဃိ ယမ့ၢ်မၤဘၣ်ဒိအီၤဒ်န့ၣ်ဒု လ့ၤတက့ၤ ယဟိဝၤယွၤ တဘၣ်သးဘၣ်.”+ ၇ စီၤဒၤဝံး တြီဝဲ အပှၤတဖၣ် ခီဖျိလၢ အတၢ်ကတိၤတဖၣ်န့ၣ် ဒီးအဝဲတဟ့ၣ်အခွဲးလၢ အဝဲသ့ၣ် ကမၤဘၣ်ဒိ စီၤစီလူးဘၣ်. ဒီးစီၤစီလူး ဟးထီၣ်လၢ လ့ကိပူၤ ဒီးဆဲးလဲၤတၢ်လီၤ.
၈ ဒီးစီၤဒၤဝံး ဟးထီၣ်ကွံာ်လၢ လ့ကိပူၤ ဒီးကိးပသူထီၣ် ဒီးတဲဝဲ စီၤစီလူးလၢ “ကစၢ်စီၤပၤဧၢ.”+ ဖဲစီၤစီလူး ကွၢ်လီၤလၢအလီၢ်ခံအခါ စီၤဒၤဝံး ထိၣ်လီၤပှီၤအသး လၢဟီၣ်ခိၣ်လိၤလီၤ. ၉ စီၤဒၤဝံး တဲဘၣ် စီၤစီလူးလၢ “ပှၤဂၤတဖၣ် လၢအတဲဝဲလၢ ‘ကွၢ်ထံၣ်, စီၤဒၤဝံး အဲၣ်ဒိး မၤဆါနၤ’ န့ၣ်ဘၣ်မနုၤအဃိ နဒိကနၣ် အဝဲသ့ၣ်လဲၣ်.+ ၁၀ တနံၤညါအံၤ နထံၣ်လၢ နနီၢ်ကစၢ်အမဲာ် လၢယဟိဝၤယွၤ ဟ့ၣ်လီၤနၤလၢ ယစုပူၤ ဖဲလ့ကိပူၤလီၤ. ဘၣ်ဆၣ် ဖဲပှၤတဂၤ မၢယမၤသံနၤအခါ+ ယသးကညီၤနၤ ဒီးယတဲလၢ ‘အဝဲမ့ၢ် ယဟိဝၤယွၤ အပှၤဒိးဖှူအသးတဂၤအဃိ ယတမၤဘၣ်ဒိအီၤဘၣ်.’+ ၁၁ ပၢ်ဧၢ, ကွၢ်လၢအံၤ. နဆ့ကၤလၢ အစုဒုၣ်တအိၣ်ဘၣ်တဘ့ၣ် အကနူၤထံးန့ၣ် အိၣ်လၢယစုပူၤလီၤ. ဖဲယကူးတဲာ် နဆ့ကၤလၢ အစုဒုၣ်တအိၣ်ဘၣ်တဘ့ၣ် အကနူၤထံးအခါ ယတမၤသံနၤဘၣ်. ယတအဲၣ်ဒိး မၤဘၣ်ဒိနၤဘၣ် ဒီးယတအဲၣ်ဒိး ထီဒါကဒါက့ၤနၤဘၣ်န့ၣ် ခဲအံၤ နထံၣ်ဒီးနသ့ၣ်ညါလံ. ဒီးနလူၤဃုယၤ ဒ်သိး နကမၤသံယၤအဂီၢ်+ ဘၣ်ဆၣ် မ့မ့ၢ်ယၤန့ၣ် ယတမၤကမၣ်ဘၣ်နၤဘၣ်.+ ၁၂ မ်ယဟိဝၤယွၤ စံၣ်ညီၣ်န့ၢ်တၢ်လၢ နၤဒီးယၤ အဘၢၣ်စၢၤတက့ၢ်.+ ဒီးမ်ယဟိဝၤယွၤ ဟ့ၣ်ကၣ်က့ၤနၤ လၢယဂီၢ်တက့ၢ်.+ ဘၣ်ဆၣ် မ့မ့ၢ် ယနီၢ်ကစၢ်န့ၣ် ယတမၤဘၣ်ဒိနၤဘၣ်.+ ၁၃ ဒ်တၢ်ကတိၤဒိ လၢပျၢၤ တဲဝဲအသိး ‘တၢ်အၢတၢ်သီန့ၣ် ဟဲထီၣ်လၢ ပှၤအၢပှၤသီအအိၣ်လီၤ.’ အဃိ ယတမၤဘၣ်ဒိနၤဘၣ်. ၁၄ အံၣ်စရ့လးအစီၤပၤ ဟဲဃု မတဂၤလဲၣ်. နဟးလူၤ ပှၤဒ်လဲၣ်တဂၤလဲၣ်. ထွံၣ်သံတဒုတမ့ၢ်ဧီၤ. ကျံတဘ့ၣ်တမ့ၢ်ဧီၤ.+ ၁၅ မ်ယဟိဝၤယွၤ ကဲစံၣ်ညီၣ်ကွီၢ်တက့ၢ်. အဝဲကစံၣ်ညီၣ်န့ၢ်တၢ်လၢ နၤဒီးယၤအဘၢၣ်စၢၤ ဒီးအဝဲကပာ်သူၣ်ပာ်သးဝဲ, ကအိၣ်ဃူယၤ+ ဒီးကသမံသမိးယၤ ဒီးကမၤပူၤဖျဲးယၤလၢ နစုပူၤလီၤ.”
၁၆ ဖဲစီၤဒၤဝံး တဲဘၣ်စီၤစီလူး လၢတၢ်ကတိၤတဖၣ်န့ၣ် ဝံၤတဘျီဃီန့ၣ် စီၤစီလူး တဲအီၤလၢ “ဖိခွါ စီၤဒၤဝံးဧၢ, ပှၤတဲတၢ်န့ၣ် အကဲနၤဧါ.”+ ဒီးစီၤစီလူး ဟီၣ်ကိးပသူထီၣ်ဝဲ ဖးဒိၣ်လီၤ. ၁၇ စီၤစီလူး တဲဘၣ် စီၤဒၤဝံးလၢ “နတီဒိၣ်န့ၢ်ဒံး ယၤလီၤ. နမၤဂ့ၤယၤ ဘၣ်ဆၣ် ယမၤဆၢက့ၤနၤ လၢတၢ်အၢလီၤ.+ ၁၈ ယဟိဝၤယွၤ ဟ့ၣ်လီၤယၤလၢ နစုပူၤ ဘၣ်ဆၣ် တနံၤအံၤ နပာ်ဖျါထီၣ်လၢ နမၤဂ့ၤယၤ ခီဖျိ နတမၤသံယၤဘၣ်.+ ၁၉ ပှၤပိာ်ခွါလၢ အထံၣ်န့ၢ်အဒုၣ်အဒါ ဒီးပျဲပူၤက့ၤအီၤ မုာ်မုာ်ခုၣ်ခုၣ်န့ၣ် ကအိၣ်ဝဲတဂၤဂၤဧါ. တနံၤအံၤ ခီဖျိလၢ နမၤဂ့ၤယၤ ဒ်အံၤအဃိ ယဟိဝၤယွၤ ကမၤဂ့ၤနၤလီၤ.+ ၂၀ ကနၣ်လၢအံၤ, ယသ့ၣ်ညါလၢ နကပၢတၢ် ဒ်စီၤပၤတဂၤအသိး သပှၢ်တၢၢ်လီၤ.+ ဒီးအံၣ်စရ့လးအဘီအမုၢ် ကအိၣ်ဂၢၢ်ဆိးကျၢၤဝဲ လၢနစုပူၤလီၤ. ၂၁ ဒ်သိးနသုတမၤဟးဂီၤ ယစၢၤယသွဲၣ် လၢအကဟဲလၢ ယလီၢ်ခံတဖၣ်တဂ့ၤ ဒီးနသုတထုးထီၣ်ကွံာ် ယမံၤလၢ ယပၢ်အဒူၣ်ဖိထၢဖိ အကျါတဂ့ၤအဂီၢ်+ ခဲအံၤ အၢၣ်လီၤယၤလၢ ယဟိဝၤယွၤအမဲာ်ညါ တက့ၢ်.”+ ၂၂ အဃိ စီၤဒၤဝံး အၢၣ်လီၤ စီၤစီလူးဝံၤဒီး စီၤစီလူး က့ၤကဒါက့ၤ လၢအဟံၣ်လီၤ.+ မ့မ့ၢ် စီၤဒၤဝံးဒီးအပှၤတဖၣ်န့ၣ် က့ၤထီၣ်ဝဲလၢ တၢ်အိၣ်သဒၢအလီၢ်လီၤ.+