၁ ၡမူၤအ့လး
၂၆ လၢခံ ပှၤပိာ်ခွါတဖၣ်လၢ အအိၣ်လၢ ဝ့ၢ်စံဖး+ လဲၤလၢ စီၤစီလူးအအိၣ် လၢဝ့ၢ်ကံဘဧၤ+ ဒီးတဲအီၤလၢ “စီၤဒၤဝံး အိၣ်ခူသူၣ် လၢဃကံလၤ အတၢ်လူၢ်ခိၣ် လၢအအိၣ်လၢ ယံးၡံမိၣ် အမဲာ်ညါလီၤ.”+ ၂ အဃိ စီၤစီလူး ဒီးအပှၤလၢ အဘၣ်တၢ်ဃုထၢအီၤလၢ ပှၤအံၣ်စရ့လးဖိ ခဲလၢာ်အကျါ အဂၤ ၃,၀၀၀ န့ၣ်လဲၤဝဲလၢ ဝ့ၢ်စံဖး အပှၢ်မုၢ်ကနၢ ဒီးဟးဃုဝဲ စီၤဒၤဝံးလီၤ.+ ၃ စီၤစီလူး ဆီလီၤအဒဲ လၢဃကံလၤ အတၢ်လူၢ်ခိၣ်လၢ အအိၣ်လၢကျဲအဃၢၤ လၢယံးၡံမိၣ်အမဲာ်ညါလီၤ. ဖဲန့ၣ်အခါ စီၤဒၤဝံးအိၣ်လၢ ပှၢ်မုၢ်ကနၢ ဒီးအသ့ၣ်ညါဘၣ်ဝဲလၢ စီၤစီလူး ဟဲလၢ ပှၢ်မုၢ်ကနၢ ဒ်သိးကလူၤအီၤအဂီၢ်လီၤ. ၄ အဃိ စီၤဒၤဝံး ပျၢ်လီၤ တၢ်မဲာ်ချံတဖၣ် ဒ်သိး အကသ့ၣ်ညါဘၣ်ဝဲလၢ မ့ၢ်စီၤစီလူး ဟဲဝဲသပှၢ်တၢၢ်ဧါန့ၣ်လီၤ. ၅ လၢခံ စီၤဒၤဝံးလဲၤလၢ တၢ်လီၢ်လၢ စီၤစီလူး ဆီလီၤပာ်အဒဲ ဒီးစီၤဒၤဝံးထံၣ်ဝဲ စီၤစီလူး ဒီးစီၤန့ၢ်အဖိခွါ စီၤအဘံန့ၢ်+ မံဝဲအလီၢ်လီၤ. စီၤစီလူး မံဘၣ်အသး လၢဒဲကဝီၤအပူၤ ဒီးပှၤသုးဖိတဖၣ် အိၣ်ဝးတရံးအီၤလီၤ. ၆ ဒီးစီၤဒၤဝံး တဲဘၣ် ပှၤဃ့ၤသးဖိ+ စီၤအဃံၤမ့လ့း ဒီးနီၢ်စရူယၤအဖိခွါ+ စီၤအဘံၡဲၤ+ လၢအမ့ၢ် စီၤယိၤအာ် အဒီပုၢ်ဝဲၢ်ခွါန့ၣ်လၢ “မတဂၤ ကလဲၤလီၤပိာ်ယခံလၢ တၢ်လီၢ်လၢ စီၤစီလူး ဆီလီၤအဒဲ အလီၢ်လဲၣ်.” စီၤအဘံၡဲၤ တဲဆၢက့ၤလၢ “ယကလဲၤလီၤပိာ်နခံ.” ၇ အဃိ စီၤဒၤဝံး ဒီးစီၤအဘံၡဲၤ လဲၤဝဲလၢ ပှၤသုးဖိတဖၣ်အအိၣ် လၢမုၢ်နၤခီလီၤ. အဝဲသ့ၣ် ထံၣ်ဝဲ စီၤစီလူးမံဘၣ်အသး လၢဒဲကဝီၤအပူၤ ဒီးအဘီတဘ့ၣ် အိၣ်ဆဲးလီၤအသးလၢ ဟီၣ်ခိၣ်လိၤ လၢအခိၣ်သၣ်ဃံအကပၤလီၤ. စီၤအဘံန့ၢ် ဒီးပှၤသုးဖိတဖၣ် မံဝးတရံးအီၤလီၤ.
၈ စီၤအဘံၡဲၤ တဲဘၣ်စီၤဒၤဝံးလၢ “တနံၤအံၤ ကစၢ်ယွၤ ဟ့ၣ်လီၤ နဒုၣ်နဒါ လၢနစုပူၤလံ.+ ဝံသးစူၤ ခဲအံၤ ဟ့ၣ်ယၤအခွဲးလၢ ယကဆဲးတံၢ်အီၤလၢဘီ တုၤအဖျိတုၤလၢဟီၣ်ခိၣ်လိၤ ထဲတထံၣ်မီၤ. ယတလိၣ်ဆဲးအီၤ ခံထံၣ်ဘၣ်.” ၉ ဘၣ်ဆၣ် စီၤဒၤဝံး တဲဘၣ် စီၤအဘံၡဲၤလၢ “တဘၣ်မၤဘၣ်ဒိ အီၤတဂ့ၤ. ပှၤလၢအမၤဘၣ်ဒိ ယဟိဝၤယွၤ အပှၤဒိးဖှူသးတဂၤန့ၣ်+ တၢ်ကမၣ် ကလီၤတီလၢ အခိၣ်လိၤလီၤ.”+ ၁၀ စီၤဒၤဝံးဆဲးတဲဝဲလၢ “ယအၢၣ်လီၤလၢ ယဟိဝၤယွၤ လၢအမူဝဲတဂၤ အမဲာ်ညါလၢ ယဟိဝၤယွၤ အနီၢ်ကစၢ် ကမၤသံအီၤ+ မ့တမ့ၢ် မုၢ်ကအိၣ်ဝဲတနံၤန့ၣ်+ အဝဲကတုၤလၢ တၢ်သံ မ့တမ့ၢ် အဝဲကလဲၤလီၤဒုးတၢ်ဒီး အကသံဝဲလီၤ.+ ၁၁ ယမ့ၢ်မၤဘၣ်ဒိ ယဟိဝၤယွၤ အပှၤဒိးဖှူသးတဂၤန့ၣ် လ့ၤတက့ၤ ယဟိဝၤယွၤတဘၣ်သးဘၣ်.+ အဃိ ဝံသးစူၤ ဟံးန့ၢ် ဘီလၢအအိၣ်လၢ အခိၣ်သၣ်ဃံအကပၤ ဒီးအထံဒၢ ဒီးပကက့ၤလီၤ.” ၁၂ ဒီးစီၤဒၤဝံး ဟံးန့ၢ် ဘီတဘ့ၣ် ဒီးထံဒၢလၢ အအိၣ်လၢ စီၤစီလူး အခိၣ်သၣ်ဃံအကပၤ ဒီးအဝဲသ့ၣ် က့ၤကဒါက့ၤဝဲလီၤ. မ့ၢ်လၢ ယဟိဝၤယွၤ ဒုးလီၤဘၣ် တၢ်မံယိာ် လၢအဝဲသ့ၣ်အလိၤ အဃိ ဖဲစီၤဒၤဝံးဒီး အပှၤသုးဖိတဂၤန့ၣ် ဟးထီၣ်ကွံာ်ဝဲအခါ ပှၤမံဝဲဒီး ပှၤတထံၣ်,+ တသ့ၣ်ညါ ဒီးတပၢၢ်ထီၣ်ဝဲ နီတဂၤဘၣ်. ၁၃ စီၤဒၤဝံး လဲၤခီဂာ်လၢအဝဲတကပၤ ဒီးဆၢထၢၣ်လၢ ကစၢၢ်ဒီခိၣ် လၢအယံၤဒီး စီၤစီလူး တစဲးဖိလီၤ.
၁၄ ဒီးစီၤဒၤဝံး ကိးပသူထီၣ်ဝဲလၢ ပှၤသုးဖိတဖၣ် ဒီးစီၤန့ၢ်အဖိခွါ စီၤအဘံန့ၢ်+ အအိၣ် ဒီးတဲဝဲလၢ “စီၤအဘံန့ၢ်ဧၢ, နတနၢ်ဟူဧီၤ.” စီၤအဘံန့ၢ် တဲဆၢက့ၤလၢ “မတဂၤ ကိးပသူထီၣ်လၢ စီၤပၤအအိၣ်လဲၣ်.” ၁၅ စီၤဒၤဝံး တဲဘၣ်စီၤအဘံန့ၢ်လၢ “နကဲပိာ်ခွါတမ့ၢ်ဧီၤ. လၢအံၣ်စရ့လးအပူၤန့ၣ် ပှၤဒ်သိးဒီးနၤ တအိၣ်နီတဂၤဘၣ် တမ့ၢ်ဧီၤ. မ့မ့ၢ်ဒ်န့ၣ်န့ၣ် ဘၣ်မနုၤအဃိ နတကွၢ်ထွဲ နကစၢ်စီၤပၤဘၣ်လဲၣ်. ဖဲမကိာ် ပှၤသုးဖိတဂၤ လဲၤနုာ်လီၤဝဲဒ်သိး အကမၤသံ နကစၢ်စီၤပၤမၢၤ.+ ၁၆ နမၤဒ်န့ၣ် တဂ့ၤဘၣ်. မ့ၢ်လၢ နတကွၢ်ထွဲ နကစၢ်လၢအမ့ၢ် ယဟိဝၤယွၤ အပှၤဒိးဖှူသးတဂၤန့ၣ်ဘၣ် အဃိ ယအၢၣ်လီၤနၤလၢ ယဟိဝၤယွၤ အမဲာ်ညါလၢ နကြၢးသံလီၤ.+ ခဲအံၤ ကွၢ်တရံး နဃၢၤမီၤ. စီၤပၤ အဘီဒီးအထံဒၢလၢ+ အအိၣ်လၢ အခိၣ်သၣ်ဃံအကပၤန့ၣ် ခဲအံၤအအိၣ်ဖဲလဲၣ်.”
၁၇ ဒီးစီၤစီလူး မၤနီၣ်ဝဲ စီၤဒၤဝံး အကလုၢ်ဘၣ် အဃိ အဝဲသံကွၢ်ဝဲလၢ “ဖိခွါ စီၤဒၤဝံးဧၢ, ပှၤတဲတၢ်န့ၣ် အကဲနၤဧါ.”+ စီၤဒၤဝံး တဲဆၢက့ၤလၢ “ကစၢ်စီၤပၤဧၢ, အကဲယၤလီၤ.” ၁၈ စီၤဒၤဝံး ဆဲးတဲဝဲလၢ “ကစၢ်ဧၢ, ဘၣ်မနုၤအဃိ နလူၤဃုယၤလဲၣ်.+ ယမၤဘၣ် မနုၤလဲၣ် ဒီးယတၢ်ကမၣ် မနုၤအိၣ်လဲၣ်.+ ၁၉ ကစၢ်စီၤပၤဧၢ, ဝံသးစူၤ ဒိကနၣ်ယတၢ်ကတိၤတက့ၢ်. ပှၤလၢအထိၣ်ဟူးထိၣ်ဂဲၤထီၣ် နသးလၢ နကထီဒါယၤ မ့မ့ၢ်ဘၣ်ဖုး ယဟိဝၤယွၤန့ၣ် မ်အဝဲတူၢ်လိာ် တၢ်လုၢ်ဘု လၢယအိၣ်တက့ၢ်. ဘၣ်ဆၣ် ပှၤလၢအထိၣ်ဟူးထိၣ်ဂဲၤထီၣ်နၤ မ့မ့ၢ်ဘၣ်ဖုး ပှၤကညီန့ၣ်+ မ့ၢ်လၢအဝဲသ့ၣ် တဲဝဲလၢ ‘လဲၤဘူၣ်ထီၣ်ဘါထီၣ် ကစၢ်လၢအဂၤတဖၣ်န့ၣ်’ ဒီးအဝဲသ့ၣ် နီဟးထီၣ်ကွံာ်ယၤလၢ ယဟိဝၤယွၤ အတၢ်န့ၢ်သါအအိၣ်+ အဃိ အဝဲသ့ၣ် ဘၣ်တၢ်ဆိၣ်အၢလၢ ယဟိဝၤယွၤ အမဲာ်ညါလီၤ. ၂၀ ဒီးခဲအံၤ တဘၣ်ဒုးယွၤလီၤယသွံၣ် လၢဟီၣ်ခိၣ်လိၤယံၤဒီး ယဟိဝၤယွၤတဂ့ၤ. အံၣ်စရ့လးအစီၤပၤ လူၤမၤသံ ကျံတဘ့ၣ်+ ဒီးအလီၤဂာ်ဒ် အလူၤဝဲထိၣ်ဘှၢၣ်တဘ့ၣ် လၢကစၢၢ်ကလိကျါ အသိးလီၤ.”
၂၁ အဃိ စီၤစီလူး တဲဆၢက့ၤလၢ “ယမၤကမၣ်ဘၣ်တၢ်လံ.+ ဖိခွါစီၤဒၤဝံးဧၢ, တနံၤအံၤ မ့ၢ်လၢ နပာ်လုၢ်ပာ်ပှ့ၤ ယသးသမူအဃိ ယတမၤဘၣ်ဒိနၤလၢၤဘၣ်.+ ဟဲက့ၤကဒါက့ၤဟီ. ယဟးမၤနါစိၤတၢ် ဒီးယမၤကမၣ်ဘၣ်တၢ်ဖးဒိၣ်လံ.” ၂၂ စီၤဒၤဝံး တဲဆၢက့ၤလၢ “စီၤပၤအဘီ အိၣ်လၢအံၤ. မၢပှၤပိာ်ခွါ သးစၢ်တဂၤ ဟဲဟံးန့ၢ်အီၤဟီ. ၂၃ ယဟိဝၤယွၤ မ့ၢ်ပှၤလၢ အကဟ့ၣ်ဆၢက့ၤ ပှၤတဂၤစုာ်စုာ်လၢ အနီၢ်ကစၢ် အတၢ်တီတၢ်လိၤ+ ဒီးအနီၢ်ကစၢ် အတၢ်သးတီ အဃိလီၤ. ယဟိဝၤယွၤ ဟ့ၣ်လီၤနၤလၢ ယစုပူၤလံ ဘၣ်ဆၣ် ယတအဲၣ်ဒိး မၤဘၣ်ဒိ ယဟိဝၤယွၤ အပှၤဒိးဖှူသးတဂၤဘၣ်.+ ၂၄ တနံၤအံၤ ဒ်ယပာ်လုၢ်ပာ်ပှ့ၤ နသးသမူအသိး မ်ယသးသမူ ကမ့ၢ်တၢ်လုၢ်ဒိၣ်ပှ့ၤဒိၣ် လၢယဟိဝၤယွၤ အမဲာ်ညါတက့ၢ်. ဒီးမ်အမၤပူၤဖျဲးယၤလၢ တၢ်နးတၢ်ဖှီၣ် ခဲလၢာ်အပူၤတက့ၢ်.”+ ၂၅ စီၤစီလူး တဲဆၢက့ၤ စီၤဒၤဝံးလၢ “ဖိခွါ စီၤဒၤဝံးဧၢ, မ်နဘၣ်ဆိၣ်ဂ့ၤ တက့ၢ်. နကမၤတၢ်လၢ အဒိၣ်အမုၢ်တဖၣ် ဒီးနကမၤနၢၤတၢ် သပှၢ်တၢၢ်လီၤ.”+ ဒီးစီၤဒၤဝံး ဟးထီၣ်ဝဲ ဒီးမ့မ့ၢ် စီၤစီလူးန့ၣ် က့ၤကဒါက့ၤလၢ အဟံၣ်လီၤ.+