ဧ့ၤဘြံၤ
၁၁ တၢ်နာ်န့ၣ် မ့ၢ်တၢ်လၢ အဒုးနာ်န့ၢ်နၤ လီၤတံၢ်လီၤဆဲးလၢ တၢ်လၢနမုၢ်လၢ်အီၤန့ၣ်+ ကဟဲကဲထီၣ်ဝဲ သပှၢ်တၢၢ် ဒီးမ့ၢ်ဝဲ တၢ်အုၣ်အသးလၢ တၢ်လၢနတထံၣ်ဘၣ်တဖၣ်န့ၣ် အိၣ်ဝဲနီၢ်ကီၢ်လီၤ. ၂ ဒီးခီဖျိလၢ ပှၤလၢပျၢၤတဖၣ် အိၣ်ဒီးတၢ်နာ်အဃိ အဝဲသ့ၣ် ဒိးန့ၢ်ဘၣ် တၢ်အုၣ်အသးလၢ ကစၢ်ယွၤအအိၣ်လၢ ကစၢ်ယွၤ ဘၣ်သူၣ်ဘၣ်သး အဝဲသ့ၣ်လီၤ.
၃ ခီဖျိလၢ တၢ်နာ်အဃိ ပနၢ်ပၢၢ်လၢ တၢ်အိၣ်လၢဟီၣ်ခိၣ်ချၢ ဒီးတၢ်အိၣ်လၢ မူခိၣ်ခဲလၢာ်န့ၣ် ဘၣ်တၢ် ကတဲာ်ကတီၤအီၤလၢ ကစၢ်ယွၤ အကလုၢ်အဃိလီၤ. လၢတၢ်န့ၣ်အဃိ တၢ်လၢပထံၣ်အီၤတဖၣ်အံၤ ဟဲအိၣ်ထီၣ် ခီဖျိလၢ တၢ်လၢပတထံၣ်ဘၣ်အီၤတဖၣ် အဃိလီၤ.
၄ ခီဖျိလၢ တၢ်နာ်အဃိ စီၤဟ့းဘ့းလး လုၢ်ထီၣ်တၢ်လုၢ်လၢ ကစၢ်ယွၤအအိၣ် လၢအလုၢ်ဒိၣ်ပှ့ၤဒိၣ်န့ၢ်ဒံး စီၤကၤယံၣ်အတၢ်လုၢ်လီၤ.+ ဒီးခီဖျိလၢ တၢ်နာ်အံၤအဃိ အဝဲဒိးန့ၢ်ဘၣ် တၢ်အုၣ်အသးလၢ အဝဲမ့ၢ်ပှၤလၢအတီအလိၤ မ့ၢ်လၢ ကစၢ်ယွၤတူၢ်လိာ် အတၢ်ဟ့ၣ်အဃိလီၤ.+ အဝဲသံလံဘၣ်ဆၣ် အတဲဒံးတၢ်+ ခီဖျိလၢ အတၢ်နာ်လီၤ.
၅ ခီဖျိလၢ တၢ်နာ်အဃိ စီၤဃနိာ်+ ဘၣ်တၢ်သုးကွံာ်အီၤ ဒ်သိးအသုတထံၣ်ဘၣ် တၢ်သံတဂ့ၤအဂီၢ်လီၤ. ဒီးမ့ၢ်လၢကစၢ်ယွၤ သုးကွံာ်အီၤအဃိ+ ပှၤတထံၣ်န့ၢ်အီၤလၢ တၢ်လီၢ်နီတပူၤဘၣ်. ဒီးတချုးလၢ ကစၢ်ယွၤ သုးကွံာ် စီၤဃနိာ်ဒံးဘၣ်အခါ စီၤဃနိာ် ဒိးန့ၢ်ဘၣ် တၢ်အုၣ်အသးလၢ ကစၢ်ယွၤဘၣ်သူၣ်ဘၣ်သးအီၤလီၤ. ၆ ဒီးတၢ်နာ်မ့ၢ်တအိၣ်ဘၣ်န့ၣ် လ့ၤတက့ၤ တၢ်ဘၣ်ကစၢ်ယွၤအသး တသ့ဘၣ်. ပှၤလၢအသုးဃီၤအသးလၢ ကစၢ်ယွၤအအိၣ်န့ၣ် ကဘၣ်နာ်လၢ ကစၢ်ယွၤအိၣ်ဝဲ ဒီးကဘၣ်နာ်လၢ ကစၢ်ယွၤကကဲထီၣ်ပှၤလၢ အဟ့ၣ်လီၤခိၣ်ဖးဆူ ပှၤလၢအဃုအီၤလၢ တၢ်သူၣ်ဆူၣ်သးဆူၣ် အပူၤလီၤ.+
၇ ခီဖျိလၢ တၢ်နာ်အဃိ ဖဲစီၤနိအၤ+ ဒိးန့ၢ်ဘၣ် ကစၢ်ယွၤ အတၢ်ဟ့ၣ်ပလီၢ်လၢ အဘၣ်ဃးဒီး တၢ်လၢအကမၤအသး လၢအတထံၣ်ဘၣ်ဝဲဒံးဘၣ်+ ဝံၤအလီၢ်ခံ အဝဲပာ်ဖျါထီၣ် တၢ်ပျံၤယွၤ ဒီးတ့ထီၣ်ဝဲကဘီလၢ+ ကအုၣ်က့ၤခီၣ်က့ၤ အဟံၣ်ဖိဃီဖိလီၤ. ဒီးခီဖျိလၢ တၢ်နာ်အံၤအဃိ အဝဲပာ်ဖျါထီၣ်လၢ ဟီၣ်ခိၣ်န့ၣ် ကြၢးဒီးတၢ်စံၣ်ညီၣ်လီၤ.+ ဒီးအဝဲကဲထီၣ် ပှၤန့ၢ်သါဘၣ် တၢ်တီတၢ်လိၤ ခီဖျိတၢ်နာ်အဃိလီၤ.
၈ ခီဖျိလၢ တၢ်နာ်အဃိ ဖဲစီၤအၤဘြၤဟၣ်+ ဘၣ်တၢ်ကိးအီၤအခါ အဝဲဒိကနၣ်ဝဲ ခီဖျိအလဲၤဝဲလၢတၢ်လီၢ်လၢ အကဒိးန့ၢ်ဘၣ်ဝဲ ဒ်တၢ်န့ၢ်သါအသိးလီၤ. အဝဲကဘၣ်လဲၤလၢ တၢ်လီၢ်ဖဲလဲၣ်န့ၣ် အတသ့ၣ်ညါဝဲဘၣ် သနာ်က့ အဟးထီၣ်ဒီးလဲၤဝဲလီၤ.+ ၉ ခီဖျိလၢ တၢ်နာ်အဃိ အဝဲလဲၤအိၣ်လၢကီၢ်လၢ ကစၢ်ယွၤ စံးပာ်အီၤအပူၤ+ ဒ်ပှၤထံဂၤကီၢ်ဂၤဖိအသိး ဒီးအိၣ်ဝဲလၢဒဲပူၤ+ ဃုာ်ဒီးစီၤအံၤစဲး ဒီးစီၤယၤကိာ်လၢ အမ့ၢ်ပှၤလၢ အကန့ၢ်သါဘၣ် တၢ်စံးပာ် တမံၤဃီဒီးအီၤလီၤ.+ ၁၀ ဒီးဝ့ၢ်တဖျၢၣ်လၢ အဘၣ်တၢ်သူၣ်လီၤအီၤ ဂၢၢ်ဂၢၢ်ကျၢၤကျၢၤ အနီၢ်ကီၢ်န့ၣ် စီၤအၤဘြၤဟၣ် အိၣ်ခိးကွၢ်လၢ်ဝဲလီၤ. ပှၤလၢ အတ့ထီၣ်ဝ့ၢ်အံၤ ဒီးသူၣ်ထီၣ်အီၤန့ၣ် မ့ၢ်ဝဲကစၢ်ယွၤလီၤ.+
၁၁ ခီဖျိလၢ တၢ်နာ်အဃိ နီၢ်စၤရါ အသးမ့ၢ်ပှၢ်တလၢ+ သနာ်က့ မ့ၢ်လၢ အနာ်ဝဲလၢ ပှၤလၢ အအၢၣ်လီၤအီလီၤတၢ်တဂၤန့ၣ် မ့ၢ်ပှၤလၢအတီအဃိ အဒိးန့ၢ်ဘၣ် တၢ်စိတၢ်ကမီၤလၢ အကဒၢထီၣ်လီၤ.* ၁၂ လၢတၢ်ဂ့ၢ်အံၤအဃိ ပှၤလၢအနီၣ်ဂံၢ်အိၣ်အါ+ ထဲသိးဒီး ဆၣ်တဖၣ်လၢမူခိၣ် ဒီးမဲးလၢပီၣ်လဲၣ်နံၤ+ လၢပှၤဂံၢ်အီၤတသ့ဘၣ်န့ၣ် ဟဲအိၣ်ထီၣ်လၢ ပိာ်ခွါတဂၤလၢ အမၤအသးဒ် ပှၤသံအသိးအအိၣ်လီၤ.+
၁၃ တၢ်စံးပာ်တဖၣ်အံၤ တဟဲလၢထီၣ်ပှဲၤထီၣ် ဖဲအဝဲသ့ၣ်အိၣ်မူဒံး အဆၢကတီၢ်ဘၣ်.+ ဘၣ်ဆၣ် အဝဲသ့ၣ်ခဲလၢာ်သံဝဲလၢ တၢ်နာ်အပူၤလီၤ. အဝဲသ့ၣ် ထံၣ်စိတၢ်စံးပာ်တဖၣ်အံၤလၢအယံၤ,+ တူၢ်လိာ်ဝဲ ဒီးတဲဘၣ်ပှၤဂၤလၢ အဝဲသ့ၣ်မ့ၢ်ပှၤထံဂၤကီၢ်ဂၤဖိ ဒီးပှၤလၢအအိၣ်ဝဲဆိးဝဲ တစိၢ်တလီၢ်လၢ ကီၢ်ပူၤလီၤ. ၁၄ ပှၤလၢ အတဲဝဲဒ်အံၤတဖၣ်န့ၣ် ပာ်ဖျါထီၣ်ဝဲလၢ အဝဲသ့ၣ်ဃု တၢ်လီၢ်လၢ ကကဲထီၣ် အနီၢ်ကစၢ် တၢ်အိၣ်တၢ်ဆိးအလီၢ် လၢတၢ်သူၣ်ဆူၣ်သးဆူၣ်အပူၤလီၤ. ၁၅ ဘၣ်ဆၣ်သနာ်က့ အဝဲသ့ၣ် မ့ၢ်ဆဲးဆိကမိၣ်ဝဲ တၢ်လီၢ်လၢအဝဲသ့ၣ် ဟးထီၣ်ကွံာ်လၢအပူၤအဂ့ၢ်န့ၣ်+ အဝဲသ့ၣ်ဃု တၢ်ခွဲးတၢ်ယာ်လၢ ကက့ၤကဒါက့ၤဝဲ အဂီၢ်ကဘၣ်ဝဲလီၤ. ၁၆ ဘၣ်ဆၣ် နီၢ်ကီၢ်န့ၣ် ပှၤဒ်အံၤတဖၣ် သးလီတၢ်လီၢ်လၢ အဂ့ၤန့ၢ်အန့ၣ် လၢအမ့ၢ် တၢ်လီၢ်လၢ အဘၣ်ထွဲလိာ်သးဒီးမူခိၣ်လီၤ. အဃိ ကစၢ်ယွၤ တမဲာ်ဆှးလၢ ပှၤကကိးအီၤလၢ အဝဲသ့ၣ်အကစၢ်ဘၣ်.+ ဒီးအဝဲကတဲာ်ကတီၤပာ်စၢၤ ဝ့ၢ်လၢအဝဲသ့ၣ်အဂီၢ်လီၤ.+
၁၇ ခီဖျိလၢ တၢ်နာ်အဃိ ဖဲစီၤအၤဘြၤဟၣ် ဘၣ်တၢ်မၤကွၢ်အီၤအခါ+ လီၤဂာ်ဒ်သိး အဟ့ၣ်လုၢ်ထီၣ် စီၤအံၤစဲးလီၤ. မ့ၢ်လီၤ, ပှၤလၢအဒိးန့ၢ်ဘၣ် တၢ်အၢၣ်လီၤတဖၣ်လၢ တၢ်သးခုအပူၤတဂၤအံၤန့ၣ် အိၣ်ကတဲာ်ကတီၤအသး လၢကဟ့ၣ်လုၢ်ထီၣ် အဖိခွါနီၢ်နီၢ် ထဲတဂၤဧိၤလီၤ.+ ၁၈ ဒီးကစၢ်ယွၤ တဲပာ်စၢၤအီၤလၢ “ပှၤလၢအကဘၣ် တၢ်ကိးအီၤလၢ နချံနသၣ်န့ၣ် ကဟဲခီဖျိလၢ စီၤအံၤစဲးလီၤ.”+ ၁၉ ဘၣ်ဆၣ် အဝဲသ့ၣ်ညါဝဲလၢ ကစၢ်ယွၤ ဒုးဂဲၤဆၢထၢၣ်က့ၤ စီၤအံၤစဲးလၢ တၢ်သံအပူၤသ့လီၤ. ဒီးအဝဲဒိးန့ၢ်ဘၣ်က့ၤအီၤလီၤ. ဒီးတၢ်မၤအသးအံၤ ကဲတၢ်အဒိလၢ အပာ်ဖျါထီၣ် တၢ်လၢ ကမၤအသးလၢ ခါဆူညါလီၤ.+
၂၀ ခီဖျိလၢ တၢ်နာ်အဃိ စီၤအံၤစဲးစ့ၢ်ကီး ဆိၣ်ဂ့ၤဝဲ စီၤယၤကိာ်+ ဒီးစီၤဧ့ၡီၤ+ ဒီးတဲဘၣ်အဝဲသ့ၣ် တၢ်လၢကမၤအသးလၢ ခါဆူညါလီၤ.
၂၁ ခီဖျိလၢ တၢ်နာ်အဃိ စီၤယၤကိာ်န့ၣ် ဖဲအဘူးထီၣ်ကသံအခါ+ အဝဲဆိၣ်ဂ့ၤ စီၤယိၤသးအဖိခွါခံဂၤ+ ဒီးဖဲအသန့ၤထီၣ်အသးလၢ အနီၣ်ထိးဘိအခါ အဝဲဘူၣ်ထီၣ်ဘါထီၣ် ကစၢ်ယွၤလီၤ.+
၂၂ ခီဖျိလၢ တၢ်နာ်အဃိ ဖဲစီၤယိၤသး ဘူးထီၣ်ကသံအခါ အတဲဝဲဘၣ်ဃး ပှၤအံၣ်စရ့လးဖိ ဟးထီၣ်ကွံာ်လၢ ကီၢ်အဲၤကူပတူးအဂ့ၢ် ဒီးဟ့ၣ်လီၤတၢ်ကလုၢ် ဘၣ်ဃးဒီးအဃံလီၤ.+
၂၃ ခီဖျိလၢ တၢ်နာ်အဃိ ဖဲစီၤမိၤၡ့အိၣ်ဖျဲၣ်ထီၣ်ဝံၤ အလီၢ်ခံ+ အမိၢ်အပၢ် ပာ်ခူသူၣ်အီၤသၢလါလီၤ. အဝဲသ့ၣ်မၤဝဲဒ်အံၤန့ၣ် မ့ၢ်လၢ အဝဲသ့ၣ်ထံၣ်ဝဲလၢ ဖိသၣ်န့ၣ် လီၤအဲၣ်ဝဲဒီး+ အဝဲသ့ၣ် တပျံၤဝဲစီၤပၤ အတၢ်မၤလိာ်ဘၣ်အဃိလီၤ.+ ၂၄ ခီဖျိလၢ တၢ်နာ်အဃိ ဖဲစီၤမိၤၡ့ ဒိၣ်ထီၣ်အခါ+ အဝဲတတူၢ်လိာ်ဝဲလၢ ပှၤကကိးအီၤလၢ စီၤပၤဖၤရိၤ အဖိမုၣ်န့ၣ် အဖိခွါဘၣ်.+ ၂၅ ဒီးလၢအဝဲကအိၣ်ဒီး တၢ်မုာ်တၢ်ပၠီၣ် တစိၢ်တလီၢ်လၢ အဟဲခီဖျိ တၢ်ဒဲးဘးအဃိ အလီၢ်န့ၣ် အဝဲဆၢတဲာ်လီၤအသးလၢ အကဘၣ်နးဘၣ်ဖှီၣ်ဃုာ်ဒီး ကစၢ်ယွၤအပှၤဂီၢ်မုၢ်, ၂၆ မ့ၢ်လၢအဝဲပာ်ပနီၣ် ခရံာ်အတၢ်ဒုၣ်ဒွဲၣ် ဒ်တၢ်ထူးတၢ်တီၤလၢ အဒိၣ်န့ၢ်ဒံး ကီၢ်အဲၤကူပတူး အတၢ်လုၢ်ဒိၣ်ပှ့ၤဒိၣ်တဖၣ် အဃိလီၤ. ဒီးအဝဲကွၢ်စိဃီၤဝဲထံထံ ဆူခိၣ်ဖးလၢ အကဒိးန့ၢ်ဘၣ်ဝဲလီၤ. ၂၇ ခီဖျိလၢ တၢ်နာ်အဃိ အဝဲဟးထီၣ်ကွံာ်လၢ ကီၢ်အဲၤကူပတူးအပူၤ+ ဒီးတပျံၤစီၤပၤ အတၢ်သးဒိၣ်ထီၣ်ဘၣ်.+ အဆဲးအိၣ်ဒီး တၢ်သူၣ်ဂၢၢ်သးကျၢၤ ဒီးလီၤဂာ်ဒ် အထံၣ်ဘၣ်ဝဲ ကစၢ်ယွၤလၢ ပှၤထံၣ်အီၤတသ့ဘၣ် တဂၤလီၤ.+ ၂၈ ခီဖျိလၢ တၢ်နာ်အဃိ အဝဲမၤဝဲ ဘူၣ်လဲၤကပာ် ဒီးပဲထီၣ်တၢ်သွံၣ် ဒ်သိးပှၤလၢ အမၤဟးဂီၤတၢ်တဂၤ သုတမၤဘၣ်ဒိ အဝဲသ့ၣ်အဖိဝဲၢ်ကိတဂ့ၤ အဂီၢ်လီၤ.+
၂၉ ခီဖျိလၢ တၢ်နာ်အဃိ အဝဲသ့ၣ်ခီဂာ်ဝဲ ပီၣ်လဲၣ်ဂီၤ ဒ်ခိသူခိၣ်အသိး+ ဘၣ်ဆၣ် ဖဲပှၤအဲၤကူပတူးဖိတဖၣ် ခီဂာ်ဝဲအခါ ပှၤအဲၤကူပတူးဖိတဖၣ် လီၤအုးသံဝဲလီၤ.+
၃၀ ခီဖျိလၢ တၢ်နာ်အဃိ ပှၤလဲၤတရံး ဝ့ၢ်ယရံၤဃိ နွံသီဝံၤအလီၢ်ခံ ယရံၤဃိအဝ့ၢ်ဒူၣ် လီၤပှီၢ်ကွံာ်ဝဲလီၤ.+ ၃၁ ခီဖျိလၢ တၢ်နာ်အဃိ နီၢ်ရၤဃး လၢအမ့ၢ် ပိာ်မုၣ်လၢအဆါလီၤအီၣ်သးန့ၣ် တဟးဂီၤဃုာ်ဒီး ပှၤလၢ အတဒိကနၣ်တၢ်တဖၣ်ဘၣ်, မ့ၢ်လၢ အတူၢ်လိာ်ဝဲ ပှၤကွၢ်ဟုၣ်တၢ်တဖၣ် မုာ်မုာ်အဃိလီၤ.+
၃၂ ဒီးယကဘၣ်တဲဒံး တၢ်မနုၤလဲၣ်. ယမ့ၢ်ဆဲးတဲဖျါထီၣ် စီၤကံးဒဧိၣ်,+ စီၤဘါရး,+ စီၤၡံၡိၣ်,+ စီၤယံးဖသၤ,+ စီၤဒၤဝံး,+ စီၤၡမူၤအ့လး+ ဒီးဝံအဂၤတဖၣ်အဂ့ၢ်န့ၣ် တၢ်ဆၢကတီၢ်တအိၣ်လၢ ယဂီၢ်လၢၤဘၣ်. ၃၃ ခီဖျိလၢ တၢ်နာ်အဃိ အဝဲသ့ၣ်မၤနၢၤဘီမုၢ်တဖၣ်,+ ဒုးအိၣ်ထီၣ်တၢ်တီတၢ်လိၤ, ဒိးန့ၢ်ဘၣ်တၢ်စံးပာ်တဖၣ်,+ ကးပံးဃာ်ခ့ယုၢ်တဖၣ် အထးခိၣ်,+ ၃၄ မၤလီၤပံာ် မ့ၣ်အူအစိအကမီၤ,+ ပူၤဖျဲးထီၣ်ကွံာ်လၢ နးအကနၣ်,+ ဖဲအဂံၢ်စၢ်ဘါစၢ်အခါ တၢ်ဒုးကဲထီၣ်အီၤလၢ အဂံၢ်ဆူၣ်ဘါဆူၣ်,+ ကဲထီၣ်ပှၤဒူပှၤဃိၤလၢ တၢ်ဒုးအပူၤ+ ဒီးလူၤမၤနၢၤကွံာ် သုးမုၢ်သံၣ်ဘိ လၢအဟဲဒုးအီၤတဖၣ်လီၤ.+ ၃၅ ပိာ်မုၣ်တဖၣ် ဒိးန့ၢ်ဘၣ်က့ၤ အဘူးအတံၢ်လၢ အသံတ့ၢ်တဖၣ် ခီဖျိလၢ တၢ်ဂဲၤဆၢထၢၣ် သမူထီၣ်က့ၤလီၤ.+ မ့မ့ၢ် ပှၤပိာ်ခွါအဂၤတဖၣ်န့ၣ် ပှၤမၤအၢမၤနးအဝဲသ့ၣ် ဘၣ်ဆၣ် အဝဲသ့ၣ် တမၤဟးဂီၤအတၢ်သးတီ ဒ်သိး အကထူၣ်ဖျဲးထီၣ်အဂီၢ်ဘၣ်. အဝဲသ့ၣ်မၤဝဲဒ်အံၤန့ၣ် မ့ၢ်ဒ်သိးအဝဲသ့ၣ် ကဒိးန့ၢ်ဘၣ် တၢ်ဂဲၤဆၢထၢၣ်သမူထီၣ်က့ၤလၢ အဂ့ၤဒိၣ်ဝဲတခါ အဂီၢ်လီၤ. ၃၆ ဒီးပှၤအဂၤတဖၣ်န့ၣ် ပှၤမၤကွၢ်အီၤ ခီဖျိလၢ ပှၤဒုၣ်ဒွဲၣ်အဝဲသ့ၣ် ဒီးပှၤဖျ့အဝဲသ့ၣ်လီၤ. တကးဒံးဘၣ် ပှၤစၢဃာ်အဝဲသ့ၣ် လၢပျံၤထး+ ဒီးအဝဲသ့ၣ်လီၤဘၣ်လၢ ဃိာ်ပူၤလီၤ.+ ၃၇ ဒီးပှၤကွံာ် အဝဲသ့ၣ်လၢလၢၢ်,+ ပှၤလ့ပစီအဝဲသ့ၣ်, ပှၤဘုးတဲာ် အဝဲသ့ၣ်ခံကူာ် ဒီးပှၤမၤသံအဝဲသ့ၣ် လၢနးလီၤ.+ ဖဲအဝဲသ့ၣ် ဘၣ်ဖှီၣ်ဘၣ်ယာ်, ဘၣ်နးဘၣ်ဖှီၣ်+ ဒီးဘၣ်တၢ်မၤအၢမၤနးအခါ+ အဝဲသ့ၣ် ဘၣ်ကူဘၣ်သိးဝဲ သိအဘ့ၣ် ဒီးမဲာ်တဲးလဲးအဘ့ၣ်လီၤ.+ ၃၈ ဒီးဟီၣ်ခိၣ်န့ၣ် တကြၢးဒီးအဝဲသ့ၣ်ဘၣ်. အဝဲသ့ၣ်ဟးဝ့ၤဝီၤလၢ မဲးမုၢ်ခိၣ်, လၢကစၢၢ်ကလိကျါ, လၢလ့တဖၣ်အပူၤ+ ဒီးလၢဟီၣ်ခိၣ်အကိပူၤလီၤ.
၃၉ ခီဖျိလၢ တၢ်နာ်အဃိ အဝဲသ့ၣ်ခဲလၢာ် ဒိးန့ၢ်ဘၣ် တၢ်အုၣ်အသးလၢ ကစၢ်ယွၤ ဘၣ်သူၣ်ဘၣ်သး အဝဲသ့ၣ်လီၤ. ဘၣ်ဆၣ်အဝဲသ့ၣ် တထံၣ်ဘၣ်ဝဲ တၢ်စံးပာ် ဟဲလၢထီၣ်ပှဲၤထီၣ်ဘၣ်, ၄၀ မ့ၢ်လၢ ကစၢ်ယွၤထံၣ်စိဝဲ တၢ်လၢ အဂ့ၤဒိၣ်န့ၢ်အန့ၣ် လၢပဂီၢ်လီၤ.+ လၢတၢ်န့ၣ်အဃိ တၢ်တမၤကဲထီၣ်ဆိ အဝဲသ့ၣ်လၢ ပှၤလၢပှၤပှဲၤလၢ ပမဲာ်ညါဘၣ်.*