ယိၤၡူ
၈ ယဟိဝၤယွၤ တဲဘၣ်စီၤယိၤၡူလၢ “တဘၣ်ပျံၤတၢ်တဂ့ၤ.+ ကိးထီၣ်ပှၤသုးဖိတဖၣ် ဒီးလဲၤထီၣ်ဒုး ဝ့ၢ်ဂဲတက့ၢ်. ယဟ့ၣ်လီၤကွံာ် ဝ့ၢ်ဂဲအစီၤပၤ, အထံဖိကီၢ်ဖိ, အဝ့ၢ် ဒီးအတၢ်လီၢ်တၢ်ကျဲ လၢသုစုပူၤလံ.+ ၂ မၤဝ့ၢ်ဂဲ ဒီးအစီၤပၤ ဒ်နမၤဝ့ၢ်ယရံၤဃိ ဒီးအစီၤပၤအသိးန့ၣ်တက့ၢ်.+ မ့မ့ၢ် အတၢ်ဖိတၢ်လံၤ ဒီးအဆၣ်ဖိကီၢ်ဖိတဖၣ်န့ၣ် သုဟံးန့ၢ်အီၤလၢ သုနီၢ်ကစၢ်အဂီၢ်သ့လီၤ. ဒီးမၢပှၤခိးခူသူၣ်တၢ်လၢ ဝ့ၢ်အလီၢ်ခံတခီတက့ၢ်.”
၃ အဃိ စီၤယိၤၡူ ဒီးအပှၤသုးဖိခဲလၢာ် လဲၤထီၣ်ဒုးဝဲ ဝ့ၢ်ဂဲလီၤ. စီၤယိၤၡူ ဃုထၢထီၣ်ဝဲ ပှၤသုးဖိလၢ အဂံၢ်ဆူၣ်ဘါဆူၣ် ၃၀,၀၀၀ ဒီးပျဲလီၤအဝဲသ့ၣ်လၢ မုၢ်နၤခီလီၤ. ၄ စီၤယိၤၡူမၤလိာ် အဝဲသ့ၣ်လၢ “သုကဘၣ် ခိးခူသူၣ်တၢ်လၢ ဝ့ၢ်အလီၢ်ခံ ဒီးတဘၣ်အိၣ်ယံၤယံၤ ဒီးဝ့ၢ်တဂ့ၤ. သုကဘၣ် အိၣ်ကတဲာ်ကတီၤသုသး ခဲလၢာ်လီၤ. ၅ ယၤဒီး ပှၤသုးဖိလၢအအိၣ်ဒီးယၤခဲလၢာ်န့ၣ် ပကလဲၤဘူးထီၣ်လၢဝ့ၢ် ဒီးဖဲပှၤဂဲဖိတဖၣ် ဟဲထီၣ်ဒုးပှၤ ဒ်လၢညါအသိးအခါ+ ပကဃ့ၢ်ကွံာ်လၢ အဝဲသ့ၣ် အမဲာ်ညါလီၤ. ၆ ဖဲအဝဲသ့ၣ် ဟဲထီၣ်လူၤပှၤအခါ ပကဃ့ၢ်န့ၢ်အဝဲသ့ၣ်လၢ ဝ့ၢ်အချၢ ဒီးအဝဲသ့ၣ်ကတဲဝဲလၢ ‘အံၣ်စရ့လး အသုးဖိတဖၣ်န့ၣ် ဃ့ၢ်ကွံာ်လၢပမဲာ်ညါ ဒ်လၢညါအသိးလီၤ.’+ ဒီးပကဃ့ၢ်ကွံာ်လၢ အဝဲသ့ၣ် အမဲာ်ညါလီၤ. ၇ ဒီးဖဲန့ၣ်အခါ သုဝဲလၢ အခိးခူသူၣ်တၢ်န့ၣ် ကဘၣ်လဲၤထီၣ် မၤန့ၢ်ဝ့ၢ်လီၤ. သုကစၢ် ယဟိဝၤယွၤ ကဟ့ၣ်လီၤဝ့ၢ်လၢ သုစုပူၤလီၤ. ၈ ဖဲသုလဲၤမၤန့ၢ်ဝ့ၢ် တဘျီဃီန့ၣ် သုကဘၣ်ဒွဲၣ်အူထီၣ်ကွံာ်အီၤလီၤ.+ ယဟ့ၣ်လီၤသု တၢ်ကလုၢ်လံ, သုကဘၣ်မၤဒ် ယဟိဝၤယွၤ အတၢ်ကတိၤ အိၣ်ဝဲအသိးလီၤ.”
၉ ဒီးစီၤယိၤၡူ ဆှၢလီၤအဝဲသ့ၣ် ဒီးအဝဲသ့ၣ် လဲၤလၢ ပှၤခိးခူသူၣ်တၢ်အလီၢ်လီၤ. အဝဲသ့ၣ် လဲၤခိးခူသူၣ်တၢ်လၢ ဝ့ၢ်ဘ့ၤသ့လး ဒီးဝ့ၢ်ဂဲ အဘၢၣ်စၢၤ လၢအအိၣ်လၢ ဝ့ၢ်ဂဲအမုၢ်နုာ် တကပၤလီၤ. ဒီးဖဲနၤအဝဲန့ၣ် စီၤယိၤၡူအိၣ်ဒီး ပှၤသုးဖိအဂၤတဖၣ်န့ၣ်လီၤ.
၁၀ စီၤယိၤၡူ ဂဲၤဆၢထၢၣ်ဂီၤဂီၤ ဒီးကိးဖှိၣ်ဝဲပှၤသုးဖိတဖၣ် ဝံၤအလီၢ်ခံ စီၤယိၤၡူဒီး အံၣ်စရ့လး အပှၤသူၣ်က့သးပှၢ်တဖၣ် လဲၤဝဲဆူဝ့ၢ်ဂဲ လၢအဝဲသ့ၣ် အမဲာ်ညါလီၤ. ၁၁ ပှၤသုးဖိလၢ+ အအိၣ်ဒီးအီၤခဲလၢာ်န့ၣ် လဲၤထီၣ်ဝဲဘူးထီၣ်ဒီး ဝ့ၢ်ဂဲအမဲာ်ညါလီၤ. အဝဲသ့ၣ် လဲၤဆီလီၤ အဒဲလၢ ဝ့ၢ်ဂဲ အကလံၤစိးတကပၤ ဒီးဖဲဝ့ၢ်ဂဲ ဒီးအဝဲသ့ၣ်အဘၢၣ်စၢၤန့ၣ် အိၣ်ဒီးတၢ်တြီၤလီၤ. ၁၂ ဒီးဖဲန့ၣ်အခါ စီၤယိၤၡူ ကိးန့ၢ်ဝဲ ပှၤသုးဖိအဂၤ ၅,၀၀၀ ဒီးမၢအဝဲသ့ၣ် ခိးခူသူၣ်တၢ်လၢ+ ဝ့ၢ်ဘ့ၤသ့လး+ ဒီးဝ့ၢ်ဂဲ အဘၢၣ်စၢၤ လၢဝ့ၢ်ဂဲအမုၢ်နုာ် တကပၤလီၤ. ၁၃ အဃိ ပှၤသုးဖိအါတက့ၢ် ဆီလီၤအဒဲလၢ ဝ့ၢ်ဂဲအကလံၤစိးတကပၤ+ ဒီးသုးဖိလၢ အခိးခူသူၣ်တၢ်တဖၣ်န့ၣ် ဆီလီၤအဒဲလၢ ဝ့ၢ်ဂဲ အမုၢ်နုာ်တကပၤလီၤ.+ ဒီးတၢ်တနၤန့ၣ် စီၤယိၤၡူ လဲၤဝဲလၢ တၢ်တြီၤပူၤလီၤ.
၁၄ ဖဲဝ့ၢ်ဂဲအစီၤပၤထံၣ် တၢ်မၤအသးဒ်န့ၣ်အခါ အဝဲဒီးပိာ်ခွါ လၢအအိၣ်လၢ ဝ့ၢ်ပူၤန့ၣ် ကရီလဲၤတၢ်ဂီၤဂီၤ ဒ်သိးကလဲၤဒုး ပှၤအံၣ်စရ့လးဖိ ဖဲတၢ်လီၢ်တတီၤလၢ အအိၣ်လၢ တၢ်ပၢၤခိၣ်အမဲာ်ညါလီၤ. ဘၣ်ဆၣ် ပှၤခိးခူသူၣ်တၢ်လၢ ဝ့ၢ်အလီၢ်ခံတခီန့ၣ် အဝဲတသ့ၣ်ညါဝဲဘၣ်. ၁၅ ဖဲပှၤဂဲဖိ အသုးဖိ ဟဲထီၣ်ဒုး ပှၤအံၣ်စရ့လးဖိအခါ စီၤယိၤၡူ ဒီးအပှၤသုးဖိခဲလၢာ် ဃ့ၢ်ကွံာ်ဝဲလၢ ကျဲလၢအလဲၤဆူ ပှၢ်မုၢ်ကနၢ တကပၤလီၤ.+ ၁၆ ဒီးပှၤပိာ်ခွါလၢ အအိၣ်လၢ ဝ့ၢ်ပူၤကိးဂၤဒဲး ပာ်ဖှိၣ်ထီၣ်အသး ဒ်သိးကလူၤဝဲ ပှၤအံၣ်စရ့လးဖိအဂီၢ်လီၤ. ဒီးဖဲအဝဲသ့ၣ်လူၤဝဲ စီၤယိၤၡူအခါ အဝဲသ့ၣ် ယံၤထီၣ်ဒီးဝ့ၢ်လီၤ. ၁၇ ပှၤပိာ်ခွါလၢ အအိၣ်တ့ၢ်လၢ ဝ့ၢ်ဂဲ ဒီးဝ့ၢ်ဘ့ၤသ့လးအပူၤ လၢအတလဲၤလူၤ ပှၤအံၣ်စရ့လးဖိဘၣ်န့ၣ် တအိၣ်နီတဂၤဘၣ်. အဝဲသ့ၣ်ဟးထီၣ်လၢ ဝ့ၢ်ပူၤဒီး လူၤပှၤအံၣ်စရ့လးဖိအဃိ ပှၤလၢအကဒီသဒၢဝ့ၢ် တအိၣ်လၢၤဘၣ်.
၁၈ ဖဲန့ၣ်အခါ ယဟိဝၤယွၤ တဲဘၣ်စီၤယိၤၡူလၢ “ယကဟ့ၣ်လီၤ ဝ့ၢ်ဂဲလၢ နစုပူၤအဃိ+ ဘီလၢ အအိၣ်လၢ နစုလိၤန့ၣ် ယူာ်ထီၣ်အီၤ လိၤလိၤလၢ ဝ့ၢ်ဂဲတကပၤန့ၣ်တက့ၢ်.”+ အဃိ စီၤယိၤၡူ ယူာ်ထီၣ်အဘီ လၢအအိၣ်လၢ အစုလိၤန့ၣ် လိၤလိၤလၢ ဝ့ၢ်ဂဲတကပၤလီၤ. ၁၉ ဖဲစီၤယိၤၡူ ယူာ်ထီၣ်အစု တဘျီဃီန့ၣ် ပှၤသုးဖိလၢ အခိးခူသူၣ်တၢ်တဖၣ် ဟးထီၣ်လၢအလီၢ် ချ့ချ့ဒီး လဲၤဃ့ၢ်နုာ်လၢဝ့ၢ်ပူၤ ဒီးမၤန့ၢ်ဝဲဝ့ၢ်န့ၣ်လီၤ. ဒီးအဝဲသ့ၣ် ဒွဲၣ်အူထီၣ်ဝ့ၢ် လၢမ့ၣ်အူတဘျီဃီလီၤ.+
၂၀ ဖဲပှၤဂဲဖိတဖၣ် ကွၢ်လီၤလၢ အလီၢ်ခံအခါ အဝဲသ့ၣ်ထံၣ်ဝဲလၢ ဝ့ၢ်အမ့ၣ်အူခုၣ်ထီၣ်လၢ တၢ်ဖးဖီလီၤ. ဒီးအဝဲသ့ၣ်အသးအဂံၢ်ဘါ လီၤစၢ်လၢာ်လံအဃိ အဝဲသ့ၣ်ဃ့ၢ်ကွံာ် တကဲလၢၤဘၣ်. ဒီးအံၣ်စရ့လးအပှၤသုးဖိလၢ အလဲၤဃ့ၢ်လၢ ပှၢ်မုၢ်ကနၢတကပၤန့ၣ် ဃၣ်ကဒါက့ၤအသးလၢ ပှၤဂဲဖိလၢ အလူၤအီၤတဖၣ်အအိၣ်လီၤ. ၂၁ ဖဲစီၤယိၤၡူ ဒီးအပှၤသုးဖိတဖၣ် ထံၣ်ဝဲလၢ ပှၤခိးခူသူၣ်တၢ်တဖၣ် မၤန့ၢ်ဝ့ၢ် ဒီးဝ့ၢ်အမ့ၣ်အူ ခုၣ်ထီၣ်အခါ အဝဲသ့ၣ်ဃၣ်အသး ဒီးဒုးဝဲပှၤဂဲဖိလီၤ. ၂၂ ဒီးပှၤလၢအမၤန့ၢ် ဝ့ၢ်န့ၣ် ဟဲထီၣ်လၢဝ့ၢ်ချၢဒီး တရီးဝဲပှၤဂဲဖိအခိၣ် အဃိ ပှၤဂဲဖိသ့ၣ်တဖၣ် အိၣ်ကတာ်ဝဲလၢ ပှၤအံၣ်စရ့လးဖိ ခံခီအဘၢၣ်စၢၤန့ၣ်လီၤ. ဒီးပှၤအံၣ်စရ့လးဖိ ကျီသံအဝဲသ့ၣ် တုၤလၢအလၢာ် ဒီးတပူၤဖျဲး နီတဂၤဘၣ်.+ ၂၃ မ့မ့ၢ်ဝ့ၢ်ဂဲအစီၤပၤန့ၣ်+ အဝဲသ့ၣ်ဖီၣ်မူဒံးဝဲဒီး ဟဲက့ၤကိးအီၤလၢ စီၤယိၤၡူအအိၣ်လီၤ.
၂၄ ပှၤအံၣ်စရ့လးဖိ မၤသံကွံာ် ပှၤဂဲဖိခဲလၢာ်လၢ ပှၢ်မုၢ်ကနၢအပူၤ ဖဲတၢ်လီၢ်လၢ ပှၤဂဲဖိလူၤအီၤလီၤ. ဒီးပှၤဂဲဖိသံလၢနး ကိးဂၤဒဲးလီၤ. ဝံၤဒီး ပှၤအံၣ်စရ့လးဖိ က့ၤကဒါက့ၤလၢ ဝ့ၢ်ဂဲ ဒီးကျီသံပှၤလၢ အအိၣ်တ့ၢ်ဖဲန့ၣ် လၢနးလီၤ. ၂၅ ဖဲနံၤအဝဲန့ၣ် ပှၤဂဲဖိ အပိာ်မုၣ် ဒီးအပိာ်ခွါ လၢအသံဝဲ ခဲလၢာ်ခဲဆ့န့ၣ် အိၣ်ဝဲ ၁၂,၀၀၀ လီၤ. ၂၆ စီၤယိၤၡူ ဆဲးယူာ်ထီၣ်ဃာ်အစု လိၤလိၤလၢ ဝ့ၢ်ဂဲတကပၤန့ၣ်+ တုၤလၢပှၤမၤဟးဂီၤ ပှၤဂဲဖိ ခဲလၢာ်လီၤ.+ ၂၇ မ့မ့ၢ်လၢ တၢ်ဖိတၢ်လံၤ ဒီးဆၣ်ဖိကီၢ်ဖိ လၢဝ့ၢ်ပူၤန့ၣ် ပှၤအံၣ်စရ့လးဖိ ဟံးန့ၢ်လၢ အနီၢ်ကစၢ်အဂီၢ် ဒ်ယဟိဝၤယွၤ မၤလိာ်ပာ်စၢၤ စီၤယိၤၡူအသိးလီၤ.+
၂၈ ဒီးစီၤယိၤၡူ ဒွဲၣ်အူထီၣ်ဝဲ ဝ့ၢ်ဂဲ ဒီးမၤကဲထီၣ်အီၤလၢ လၢၢ်ပူၣ်+ ဒီးအိၣ်ဝဲဒ်န့ၣ် တုၤလၢ မုၢ်မဆါတနံၤအံၤလီၤ. ၂၉ ဒီးအဝဲ ပျၤထီဝဲ ဝ့ၢ်ဂဲအစီၤပၤ လၢသ့ၣ်တၢၣ်အလိၤ တုၤလီၤလၢ ဟါလီၤခီန့ၣ်လီၤ. ဘူးထီၣ်လၢ မုၢ်ကလီၤနုာ်အခါန့ၣ် စီၤယိၤၡူ ဟ့ၣ်လီၤတၢ်ကလုၢ်လၢ ပှၤကထုးလီၤကွံာ် စီၤပၤအစိၣ် လၢသ့ၣ်တၢၣ်အလိၤလီၤ.+ ဒီးအဝဲသ့ၣ် ကွံာ်လီၤဝဲ စီၤပၤအစိၣ်လၢ ဝ့ၢ်အတြဲၤအမဲာ်ညါ ဒီးပာ်ပူၣ်ထီၣ်လၢၢ် လၢအလိၤလီၤ. ဒီးလၢၢ်တဖၣ် အိၣ်ဝဲဖဲန့ၣ် တုၤလၢမုၢ်မဆါတနံၤအံၤလီၤ.
၃၀ ဖဲန့ၣ်အဆၢကတီၢ် စီၤယိၤၡူ သူၣ်ထီၣ် တၢ်လုၢ်လီၢ်လၢ အံၣ်စရ့လး အကစၢ် ယဟိဝၤယွၤ အဂီၢ်လၢ ကစၢၢ်ဧ့ၤဘါလးအလိၤ+ ၃၁ ဒ်ယဟိဝၤယွၤ အခ့အပှၤစီၤမိၤၡ့ မၤလိာ် ပှၤအံၣ်စရ့လးဖိအသိး ဒီးဒ်တၢ်ကွဲးအသး အိၣ်လၢစီၤမိၤၡ့အလံာ် တၢ်သိၣ်တၢ်သီအပူၤအသိးလီၤ.+ ဖဲန့ၣ်အတဲဝဲလၢ “သူၣ်ထီၣ်တၢ်လုၢ်လီၢ်လၢ လၢၢ်တဖၣ်လၢ တၢ်တဒီၣ်တဲာ်အီၤလၢ တၢ်ပီးတၢ်လီထးဘၣ်န့ၣ်တက့ၢ်.”+ ဒီးလၢတၢ်လုၢ်လီၢ်အံၤ အဖီခိၣ်န့ၣ် အဝဲသ့ၣ် ဟ့ၣ်လုၢ်ထီၣ် တၢ်လုၢ်ဒွဲၣ်အူတဖၣ်လၢ ယဟိဝၤယွၤအအိၣ် ဒီးတၢ်လုၢ်အိၣ်ဃူအိၣ်ဖိးတဖၣ်လီၤ.+
၃၂ တၢ်သိၣ်တၢ်သီလၢ+ စီၤမိၤၡ့ကွဲးဝဲလၢ ပှၤအံၣ်စရ့လးဖိတဖၣ် အမဲာ်ညါန့ၣ် စီၤယိၤၡူကွဲးကူလီၤဝဲလၢ လၢၢ်တဖၣ်အလိၤဖဲန့ၣ်လီၤ.+ ၃၃ ပှၤအံၣ်စရ့လးဖိခဲလၢာ်, အပှၤသူၣ်က့သးပှၢ်, အခိၣ်အနၢ် ဒီးအပှၤစံၣ်ညီၣ်ကွီၢ်တဖၣ် ဆၢထၢၣ်ဝဲလၢ ပှၤလုၢ်တၢ်ဒိၣ်တဖၣ်* လၢအယိးဝဲ ယဟိဝၤယွၤ အတလါစီဆှံအမဲာ်ညါ ခံကပၤလၢာ်န့ၣ်လီၤ. ပှၤအံၣ်စရ့လးဖိ အိၣ်ဝဲဖဲန့ၣ် တကးဒံးဘၣ် ပှၤထံဂၤကီၢ်ဂၤတဖၣ် အိၣ်ဝဲဖဲန့ၣ်စ့ၢ်ကီးလီၤ.+ (ဒ်ယဟိဝၤယွၤ အခ့အပှၤ စီၤမိၤၡ့ မၤလိာ်ပာ်စၢၤဝဲ လၢညါအသိး)+ အဝဲသ့ၣ်တဝာ်န့ၣ် ဆၢထၢၣ်လၢ ကစၢၢ်ကရံးစံၣ်အမဲာ်ညါ ဒီးလၢအဝဲတဝာ်န့ၣ် ဆၢထၢၣ်ဝဲလၢ ကစၢၢ် ဧ့ၤဘါလးအမဲာ်ညါ+ ဒ်သိးအဝဲသ့ၣ် ကဒိးန့ၢ်ဘၣ် တၢ်ဆိၣ်ဂ့ၤအဂီၢ်လီၤ. ၃၄ စီၤမိၤၡ့ အတၢ်သိၣ်တၢ်သီ+ ခဲလၢာ်လၢ အဘၣ်ဃးဒီး တၢ်ဆိၣ်ဂ့ၤမ့ၢ်ဂ့ၤ+ တၢ်ဆိၣ်အၢမ့ၢ်ဂ့ၤန့ၣ်+ စီၤယိၤၡူ ဖးထီၣ်ဝဲလၢ အကလုၢ်သီၣ်ဖးဒိၣ် ဒ်တၢ်ကွဲးလီၤအီၤလၢ စီၤမိၤၡ့အတၢ်သိၣ်တၢ်သီအပူၤ အသိးလီၤ. ၃၅ တၢ်လၢစီၤမိၤၡ့ မၤလိာ်စီၤယိၤၡူန့ၣ် စီၤယိၤၡူဖးထီၣ်ဝဲ ခဲလၢာ်လီၤ. အဝဲဖးထီၣ်ဝဲလၢ အံၣ်စရ့လး အတၢ်အိၣ်ဖှိၣ်ဒီတဖု အမဲာ်ညါ+ လၢအပၣ်ဃုာ်ဒီးပှၤပိာ်မုၣ်, ပှၤဖိသၣ် ဒီးပှၤထံဂၤကီၢ်ဂၤ+ လၢအအိၣ်လၢ အဝဲသ့ၣ်အကျါန့ၣ်လီၤ.+