ယိၤၡူ
၁၈ အံၣ်စရ့လး အပှၤဂီၢ်မုၢ်ခဲလၢာ် ပာ်ဖှိၣ်ထီၣ်အသးလၢ ဝ့ၢ်ၡံလိၤလီၤ.+ ဒီးမ့ၢ်လၢအဝဲသ့ၣ် မၤန့ၢ်ဝဲကီၢ်လံအဃိ+ အဝဲသ့ၣ် သူၣ်ထီၣ် တၢ်အိၣ်ဖှိၣ် အဒဲဖဲန့ၣ်လီၤ.+ ၂ ဘၣ်ဆၣ် အံၣ်စရ့လးအဒူၣ် လၢအတနီၤလီၤလိာ်သး အတၢ်န့ၢ်သါ ဒံးဘၣ်န့ၣ် အိၣ်တ့ၢ်ဝဲ နွံဒူၣ်ဒံးလီၤ. ၃ အဃိ စီၤယိၤၡူ တဲဘၣ် ပှၤအံၣ်စရ့လးဖိလၢ “ဒ်သိး သုကလဲၤမၤန့ၢ်ကီၢ်လၢ သုမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤ ဟ့ၣ်လီၤသုအဂီၢ် သုကထုးယံာ်ဒံး တၢ်ဆၢကတီၢ်ထဲလဲၣ်.+ ၄ လၢသုတဒူၣ်စုာ်စုာ်အကျါန့ၣ် ဃုထၢထီၣ်န့ၢ်ယၤ ပှၤတဒူၣ်သၢဂၤ တဒူၣ်သၢဂၤတက့ၢ်. ဒီးယကဆှၢလီၤ အဝဲသ့ၣ် ဒ်သိး အကလဲၤကွၢ် ကီၢ်ဒီတဘ့ၣ် ဒီးတ့န့ၢ် ဟီၣ်ခိၣ်ဂီၤတဘ့ၣ် ဒ်အဝဲသ့ၣ် အတၢ်န့ၢ်သါ အိၣ်ဝဲအသိးလီၤ. ဝံၤဒီးအဝဲသ့ၣ် ကဘၣ်ဟဲက့ၤ လၢယအိၣ်လီၤ. ၅ အဝဲသ့ၣ် ကဘၣ်နီၤဖး ကီၢ်အံၤနွံက့ လၢအဝဲသ့ၣ်အဂီၢ်လီၤ.+ မ့မ့ၢ်ယူဒၤအဒူၣ်န့ၣ် ကအိၣ်တ့ၢ်လၢ အနီၢ်ကစၢ် အဟီၣ်ကဝီၤ လၢကလံၤထံးတခီ+ ဒီးစီၤယိၤသး အစၢၤအသွဲၣ်တဖၣ်န့ၣ် ကအိၣ်တ့ၢ်လၢ အနီၢ်ကစၢ် အဟီၣ်ကဝီၤ လၢကလံၤစိးတခီလီၤ.+ ၆ မ့မ့ၢ်သုန့ၣ် တ့န့ၢ် ဟီၣ်ခိၣ်ဂီၤတဘ့ၣ် လၢအအိၣ်ဒီး ဟီၣ်ကဝီၤနွံက့ ဒီးဟဲက့ၤစိာ်အီၤ လၢယအိၣ် ဖဲအံၤတက့ၢ်. ဒီးဒ်သိး ယကနီၤဖးလီၤန့ၢ်သု+ ကီၢ်အံၤအဂီၢ် ယကဖးတၢ်လၢ ယဟိဝၤယွၤ အမဲာ်ညါလီၤ. ၇ ဘၣ်ဆၣ် ခီဖျိလၢ ယဟိဝၤယွၤ အပှၤလုၢ်တၢ်ဒိၣ်အတၢ်မၤ မ့ၢ်တၢ်န့ၢ်သါလၢ ပှၤလ့ၤဝံဖိအဒူၣ်အဂီၢ်အဃိ+ အဝဲသ့ၣ် တဒိးန့ၢ်ဘၣ် တၢ်န့ၢ်သါလၢ သုကျါဘၣ်.+ ဒီးကးအဒူၣ်, ရူၤဘ့ၣ်အဒူၣ် ဒီးမနၤၡ့ၤ အဒူၣ်တဝာ်န့ၣ်+ အဝဲသ့ၣ်န့ၢ်ဘၣ် အတၢ်န့ၢ်သါလၢ ထံကျိယၢ်ဒ့ၣ် အမုၢ်ထီၣ်တခီ ဝံၤလံ. တၢ်န့ၢ်သါအံၤ ယဟိဝၤယွၤ အခ့အပှၤ စီၤမိၤၡ့ ဟ့ၣ်လီၤအဝဲသ့ၣ်လီၤ.”
၈ ဒီးပှၤလၢ အကလဲၤတ့န့ၢ် ဟီၣ်ခိၣ်ဂီၤန့ၣ် ကတဲာ်ကတီၤထီၣ် အသးလၢ တၢ်လဲၤတၢ်က့ၤ အဂီၢ်လီၤ. အဃိ စီၤယိၤၡူ မၤလိာ်အဝဲသ့ၣ်လၢ “လဲၤလၢကီၢ်ပူၤ ဒီးတ့န့ၢ် ဟီၣ်ခိၣ်ဂီၤတဘ့ၣ် ဒီးဟဲက့ၤစိာ်အီၤလၢ ယအိၣ်တက့ၢ်. ဒီးဒ်သိး ယကနီၤဖးလီၤန့ၢ်သု ကီၢ်အံၤအဂီၢ် ယကဖးတၢ် ဖဲအံၤလၢ ဝ့ၢ်ၡံလိၤအပူၤ လၢယဟိဝၤယွၤ အမဲာ်ညါလီၤ.”+ ၉ ဒီးပှၤပိာ်ခွါတဖၣ်န့ၣ် လဲၤဝဲလၢကီၢ်ပူၤ ဒီးနီၤဖးလီၤဝဲ ဟီၣ်ကဝီၤနွံက့ ဒီးကွဲးနီၣ်ဃာ်ဝဲလၢ လံာ်ပူၤလီၤ. ဝံၤဒီး အဝဲသ့ၣ် ဟဲက့ၤလၢ စီၤယိၤၡူအအိၣ် လၢဝ့ၢ်ၡံလိၤအပူၤလီၤ. ၁၀ စီၤယိၤၡူ ဖးတၢ်လၢ အဝဲသ့ၣ်အဂီၢ် လၢယဟိဝၤယွၤ အမဲာ်ညါ+ ဖဲဝ့ၢ်ၡံလိၤန့ၣ်လီၤ. ဒီးစီၤယိၤၡူ နီၤလီၤဝဲ ကီၢ်လၢ ပှၤအံၣ်စရ့လးဖိအဂီၢ် တဒူၣ်တက့ တဒူၣ်တက့လီၤ.+
၁၁ တၢ်ဖးန့ၣ် လီၤဘၣ်လၢ ဘံၣ်ယၤမံၣ်အဒူၣ်အဂီၢ် ဒ်အဒူၣ်ဖိထၢဖိတဖၣ် အိၣ်ဝဲအသိးလီၤ. ဒီးအဝဲသ့ၣ် ဒိးန့ၢ်ဘၣ် တၢ်လီၢ်တၢ်ကျဲလၢ ပှၤယူဒၤဖိ+ အဟီၣ်ကဝီၤ ဒီးစီၤယိၤသး အစၢၤအသွဲၣ်တဖၣ်+ အဟီၣ်ကဝီၤ အဘၢၣ်စၢၤလီၤ. ၁၂ အဝဲသ့ၣ် အကီၢ်ဆၢ လၢကလံၤစိးတခီန့ၣ် စးထီၣ်အသးလၢ ထံကျိယၢ်ဒ့ၣ် ဒီးလဲၤထီၣ်လၢ ဝ့ၢ်ယရံၤဃိ+ အတၢ်လီၤဘံ လၢကလံၤစိးတခီ ဒီးလဲၤထီၣ်လၢ ကစၢၢ်ခိၣ် လၢမုၢ်နုာ်တခီ ဒီးလဲၤပၢၢ်တုၤလၢ ဝ့ၢ်ဘ့ၤသအၤဝ့ၣ် အပှၢ်မုၢ်ကနၢ+ ၁၃ ဒီးလဲၤတုၤလၢ ဝ့ၢ်လူးစး အတၢ်လီၤဘံ လၢကလံၤထံးတခီ လၢအမ့ၢ် ဝ့ၢ်ဘ့ၤသ့လးန့ၣ်လီၤ.+ ဒီးအကီၢ်ဆၢန့ၣ် လဲၤလီၤကဒီးဝဲလၢ ဝ့ၢ်ဧးတၤရိးအးဒၤ+ လၢကစၢၢ်ခိၣ် လၢအအိၣ်လၢ ဝ့ၢ်ဘ့ၤသဃိရိၣ် အလာ်ခီ လၢကလံၤထံးတခီန့ၣ်လီၤ.+ ၁၄ ဒီးကီၢ်ဆၢန့ၣ် ဘၣ်တၢ်မၤနီၣ်အီၤလၢ မုၢ်နုာ်တခီ ဒီးအလဲၤတရံးဝဲ လၢကလံၤထံးတခီ စးထီၣ်လၢ ကစၢၢ်လၢ အမဲာ်ဃၣ်ဃီၤအသး လၢဝ့ၢ်ဘ့ၤသဃိရိၣ် လၢကလံၤထံး တခီလီၤ. ဒီးကီၢ်ဆၢန့ၣ် ကတၢၢ်ဝဲဖဲ ပှၤယူဒၤဖိအဝ့ၢ် ကံးရယးဘဧၤလး လၢအမ့ၢ် ကံးရယးယဧၤရံၣ်လီၤ.+ အဝဲအံၤ မ့ၢ်ဝဲ ကီၢ်ဆၢလၢ မုၢ်နုာ်တခီလီၤ.
၁၅ မ့မ့ၢ်လၢ ကလံၤထံးတခီန့ၣ် ကီၢ်ဆၢစးထီၣ်အသးလၢ ကံးရယးယဧၤရံၣ် ဒီးလဲၤလၢ မုၢ်နုာ်တခီလီၤ. ကီၢ်ဆၢန့ၣ် လဲၤပၢၢ်တုၤလၢ န့ဖတိၤ အထံထီၣ်ပၢၢ်လီၤ.+ ၁၆ ကီၢ်ဆၢန့ၣ် လဲၤလီၤတုၤလၢ ကစၢၢ်အခီၣ်ထံး လၢအမဲာ်ဃၣ်ဃီၤအသး လၢဟံၣ်နိၣ်အတၢ်တြီၤပူၤ+ လၢအအိၣ်လၢ ပှၤရၤဖၤဖိ+ အတၢ်ပၢၤခိၣ် လၢကလံၤစိးတခီလီၤ. ဒီးလဲၤလီၤကဒီးဝဲလၢ ဟံၣ်နိၣ် အတၢ်တြီၤပူၤ လၢဝ့ၢ်ယဘူၣ်+ အတၢ်လီၤဘံ လၢကလံၤထံးတခီ ဒီးလီၤတုၤလၢ ဧ့ၣ်ရိၤက့လးလီၤ.+ ၁၇ ဒီးကီၢ်ဆၢန့ၣ် ဘၣ်တၢ်မၤနီၣ်အီၤလၢ ကလံၤစိးတခီ ဒီးလဲၤဝဲတုၤလီၤလၢ ဧ့ၣ်ၡ့မ့ၣ် ဒီးတုၤလၢ ကလံလိး လၢအလဲၤထီၣ်လၢ အဒူမံၣ် အမဲာ်ညါ+ ဒီးလဲၤလီၤတုၤလၢ စီၤရူၤဘ့ၣ် အဖိခွါ စီၤဘိဟၣ်+ အလၢၢ်န့ၣ်လီၤ.+ ၁၈ ဒီးအကီၢ်ဆၢန့ၣ် ဆဲးလဲၤဝဲ တုၤလၢ တၢ်လီၤဘံလၢ ကလံၤစိးတခီ လၢဧၤရဘၤ အမဲာ်ညါ ဒီးလဲၤလီၤဝဲဆူ ဧၤရဘၤန့ၣ်လီၤ. ၁၉ ဒီးကီၢ်ဆၢန့ၣ် ဆဲးလဲၤဝဲလၢ ဘ့ၤသဃါကလၤ+ အတၢ်လီၤဘံ လၢကလံၤစိးတခီ ဒီးကတၢၢ်ဝဲဖဲ ပီၣ်လဲၣ်အံသၣ်+ အကၢၢ်နံၤ လၢအအိၣ်လၢ ထံကျိယၢ်ဒ့ၣ် အကလံၤထံး အကတၢၢ်တခီန့ၣ်လီၤ. အဝဲအံၤမ့ၢ်ဝဲ ကီၢ်ဆၢလၢ ကလံၤထံးတခီလီၤ. ၂၀ ထံကျိယၢ်ဒ့ၣ် မ့ၢ်ဝဲကီၢ်ဆၢလၢ မုၢ်ထီၣ်တခီလီၤ. ဒီးဟီၣ်ကဝီၤ ကိးသနၢၣ်ဒဲးအံၤ မ့ၢ်ဝဲဘံၣ်ယၤမံၣ် အစၢၤအသွဲၣ် အတၢ်န့ၢ်သါ ဒ်အဒူၣ်ဖိထၢဖိတဖၣ် အိၣ်ဝဲအသိးန့ၣ်လီၤ.
၂၁ ဒီးဝ့ၢ်တဖၣ်လၢ ဘံၣ်ယၤမံၣ်အဒူၣ် ဒိးန့ၢ်ဘၣ်ဝဲဒ် အဒူၣ်ဖိထၢဖိတဖၣ် အိၣ်ဝဲအသိးန့ၣ် မ့ၢ်ဝဲ ယရံၤဃိ, ဘ့ၤသဃါကလၤ, ဧ့မဲးကစံး, ၂၂ ဘ့ၤသဧါရဘၤ,+ စမၤရဲၣ်, ဘ့ၤသ့လး,+ ၂၃ ဧ့ၤဝံ, ပါရၤ, ဧိးဖြၤ, ၂၄ ကဖၢ်ဧမိနဲ, ဧိၤဖနံၤ ဒီးက့ဘၤလီၤ.+ ဝ့ၢ်တဖၣ်အံၤ ခဲလၢာ်ခဲဆ့ အိၣ်ဝဲ ၁၂ ဖျၢၣ် ဒီးဒူသဝီတဖၣ် အိၣ်ဝဲစ့ၢ်ကီးလီၤ.
၂၅ ဒီးဝ့ၢ်လၢ အဂၤတဖၣ်မ့ၢ်ဝဲ ကံးဘိၣ်,+ ရၤမါ, ဘအ့ရိး, ၂၆ မံးစပၤ, ကဖံရၤ, မိစၤ, ၂၇ ရ့က့ၣ်, ယံရဖၤအ့လး, တၤရါလး, ၂၈ စ့လါ,+ အ့လ့ာ်, ယဘူၣ် လၢအမ့ၢ် ယရူၤၡလ့ၣ်,+ ကံဘဧၤ+ ဒီးကံးရယးလီၤ. ဝ့ၢ်တဖၣ်အံၤ ခဲလၢာ်ခဲဆ့ အိၣ်ဝဲ ၁၄ ဖျၢၣ် ဒီးဒူသဝီတဖၣ် အိၣ်ဝဲစ့ၢ်ကီးလီၤ.
အဝဲအံၤ မ့ၢ်ဝဲ ဘံၣ်ယၤမံၣ်အစၢၤအသွဲၣ် အတၢ်န့ၢ်သါ ဒ်အဒူၣ်ဖိထၢဖိတဖၣ် အိၣ်ဝဲအသိးလီၤ.