ယိၤၡူ

၂၀ ယဟိဝၤယွၤ တဲဘၣ်စီၤယိၤၡူလၢ ၂ “တဲဘၣ်​ ပှၤအံၣ်စရ့လးဖိလၢ ‘ဃုထၢထီၣ်​ တၢ်ပူၤဖျဲးအဝ့ၢ်တဖၣ်လၢ+ သုဂီၢ် ဒ်ယတဲပာ်စၢၤသု ခီဖျိ စီၤမိၤၡ့န့ၣ်တက့ၢ်. ၃ ဒီးပှၤလၢအမၤသံဘၣ်​ ပှၤတဂၤဂၤလၢ တၢ်တပာ်သူၣ်ပာ်သးအပူၤန့ၣ်​ လဲၤဃ့ၢ်အိၣ်ဝဲဖဲန့ၣ်​ သ့ဝဲလီၤ. ဒီးအဝဲ မ့ၢ်လဲၤဃ့ၢ်အိၣ်ဖဲ ဝ့ၢ်တဖၣ်အံၤန့ၣ်​ ကပူၤဖျဲးဝဲလၢ ပှၤလၢအမၤကၣ်က့ၤတၢ်တဂၤ* အစုပူၤလီၤ.+ ၄ အဝဲကဘၣ်လဲၤဃ့ၢ်ဝဲ လၢဝ့ၢ်တဖၣ်အံၤ အကျါတဖျၢၣ်ဖျၢၣ်+ ဒီးဘၣ်ဆၢထၢၣ်ဝဲလၢ ဝ့ၢ်အတြဲၤခိၣ်ထိး+ ဒီးတဲဘၣ်​ ဝ့ၢ်အပှၤသူၣ်က့သးပှၢ်တဖၣ်​ လၢအတၢ်ဂ့ၢ်လီၤ. ဒီးအဝဲသ့ၣ်​ ကဘၣ်တူၢ်လိာ်အီၤ လၢဝ့ၢ်ပူၤ ဒီးဟ့ၣ်အီၤတၢ်လီၢ် ဒ်သိးအဝဲကအိၣ်ဒီး အဝဲသ့ၣ်ဖဲန့ၣ်လီၤ. ၅ ပှၤလၢအမၤကၣ်က့ၤတၢ်တဂၤ မ့ၢ်ဟဲလူၤ ပှၤလၢအမၤသံတၢ်တဂၤအံၤ သနာ်က့ ခီဖျိလၢ ပှၤလၢအမၤသံတၢ်တဂၤအံၤ တသးဟ့ဆိပာ်စၢၤ ပှၤလၢအမၤသံဘၣ်ဝဲတဂၤဘၣ်​ ဒီးမၤသံဘၣ်အီၤလၢ တၢ်တပာ်သူၣ်ပာ်သးအပူၤအဃိ အဝဲသ့ၣ်​ တကြၢးဟ့ၣ်လီၤအီၤလၢ ပှၤလၢအမၤကၣ်က့ၤတၢ်တဂၤ အစုပူၤဘၣ်.+ ၆ ဒီးအဝဲကဘၣ်အိၣ်လၢ ဝ့ၢ်တဖျၢၣ်အံၤအပူၤ တုၤလၢ ပှၤသမံသမိးအီၤလၢ တၢ်အိၣ်ဖှိၣ်အမဲာ်ညါလီၤ.+ ဒီးအဝဲကဘၣ်ဆဲးအိၣ်ဝဲလၢ ဝ့ၢ်ပူၤတုၤလၢ ပှၤလုၢ်တၢ်ခိၣ်အဒိၣ်ကတၢၢ်+ လၢအလီၤဘၣ်မူဒါလၢ ဆၢကတီၢ်ဖဲန့ၣ်တဂၤ သံဝဲတစုလီၤ. ဖဲန့ၣ်ဝံၤဒီး ပှၤလၢအမၤသံတၢ်တဂၤအံၤ က့ၤကဒါက့ၤလၢ အဝ့ၢ်တဖျၢၣ်လၢ အဃ့ၢ်ဟးထီၣ်ကွံာ်ဝဲလၢအပူၤ ဒီးက့ၤလၢ အနီၢ်ကစၢ်အဟံၣ်သ့ဝဲလီၤ.’”+

၇ အဃိ အဝဲသ့ၣ်ပာ်လီၤဆီဝဲ ဝ့ၢ်က့ဒ့ၣ်လၢ+ အအိၣ်​ လၢနးသၤလံ အကစၢၢ်ကလိကျါ လၢကီၢ်ကၤလံၤလါအပူၤ, ဝ့ၢ်ၡက့ၣ်+ လၢအအိၣ်လၢ အ့ဖရဲၣ်​ ကစၢၢ်ကလိကျါ ဒီးဝ့ၢ်ကံးရယးအၢ်ဘၤ+ လၢအမ့ၢ် ဝ့ၢ်ဃ့ဘြိၣ်​ လၢအအိၣ်လၢ ယူဒၤ အကစၢၢ်ကလိကျါန့ၣ်လီၤ. ၈ ဒီးလၢထံကျိယၢ်ဒ့ၣ်​ အဟီၣ်ကဝီၤ လၢဝ့ၢ်ယရံၤဃိ အမုၢ်ထီၣ်တခီန့ၣ်​ အဝဲသ့ၣ်ဃုထၢထီၣ်ဝဲ ဝ့ၢ်ဘ့စ့ၢ်+ လၢအအိၣ်လၢ ပှၢ်မုၢ်ကနၢအပူၤ လၢတၢ်ပၢၤခိၣ်​ လၢရူၤဘ့ၣ်အဒူၣ်​ အဟီၣ်ကဝီၤအပူၤ, ဝ့ၢ်ရၤမိး+ လၢအအိၣ်လၢ ကံးလဧး လၢကးအဒူၣ်​ အဟီၣ်ကဝီၤအပူၤ ဒီးဝ့ၢ်ကိလၣ်+ လၢအအိၣ်လၢ ဘၤၡၣ်​ လၢမနၤၡ့ၤအဒူၣ်​ အဟီၣ်ကဝီၤအပူၤလီၤ.+

၉ ဝ့ၢ်တဖၣ်အံၤ ဘၣ်တၢ်ဃုထၢထီၣ်အီၤလၢ ပှၤအံၣ်စရ့လးဖိခဲလၢာ် ဒီးပှၤထံဂၤကီၢ်ဂၤလၢ အအိၣ်လၢအဝဲသ့ၣ်အကျါ အဂီၢ်လီၤ. ပှၤလၢအမၤသံဘၣ်​ ပှၤတဂၤဂၤလၢ တၢ်တပာ်သူၣ်ပာ်သးအပူၤန့ၣ်​ ဒ်သိးပှၤလၢ အဟ့ၣ်ကၣ်က့ၤတၢ်တဂၤ သုတမၤသံအီၤ တချုးလၢ ပှၤသမံသမိးအီၤလၢ တၢ်အိၣ်ဖှိၣ်အမဲာ်ညါ+ ဒံးဘၣ်တဂ့ၤအဂီၢ် အဝဲလဲၤဃ့ၢ်အိၣ်ဝဲဖဲ ဝ့ၢ်တဖၣ်အံၤအပူၤ သ့ဝဲလီၤ.+