၁ စီၤပၤ

၁၅ ဖဲစီၤနဘး အဖိခွါ စီၤပၤယၤရၤဘၣ်+ ပၢတၢ် ၁၈ နံၣ်တနံၣ်န့ၣ်​ စီၤအဘံယၣ်​ ကဲထီၣ်​ စီၤပၤလၢ ယူဒၤအဘီမုၢ်အပူၤလီၤ.+ ၂ ဒီးစီၤအဘံယၣ်​ ပၢတၢ်လၢ ဝ့ၢ်ယရူၤၡလ့ၣ်အပူၤ သၢနံၣ်လီၤ. အမိၢ်အမံၤမ့ၢ်ဝဲ နီၢ်မၤကၤ+ လၢအမ့ၢ် စီၤအးဘၡါလိၣ်​ အလံၤမုၣ်လီၤ. ၃ ဒီးစီၤအဘံယၣ်​ အိၣ်မူမၤထွဲ ဒ်တၢ်ဒဲးဘးလၢ အပၢ်မၤဆိပာ်စၢၤဝဲ ဒီးအသးတတီဒီး ကစၢ်ယဟိဝၤယွၤ လၢအသးဒီဖျၢၣ်​ ဒ်အဖုဖးဒိၣ်​ စီၤဒၤဝံး အသိးဘၣ်. ၄ ဘၣ်ဆၣ်​ လၢစီၤဒၤဝံး+ အဃိန့ၣ်​ ယဟိဝၤယွၤ ဟ့ၣ်လီၤ စီၤအဘံယၣ်လၢ မ့ၣ်အူဒၢတဖျၢၣ်​ လၢဝ့ၢ်ယရူၤၡလ့ၣ်အပူၤ+ ခီဖျိလၢ အပာ်ထီၣ်အဖိခွါ လၢကကဲစီၤပၤ လၢအလီၢ် ဒီးခီဖျိ အဒုးအိၣ်ဂၢၢ်ဆိးကျၢၤ ဝ့ၢ်ယရူၤၡလ့ၣ်​ အဃိလီၤ. ၅ ဒီးကစၢ်ယွၤ မၤဝဲဒ်န့ၣ်​ မ့ၢ်လၢ စီၤဒၤဝံး မၤတၢ်လၢ ယဟိဝၤယွၤ ထံၣ်ဝဲလၢအဂ့ၤ ဒီးလၢအတၢ်အိၣ်မူ ဒီတစိၤန့ၣ်​ အဝဲမၤထွဲ တၢ်မၤလိာ်ခဲလၢာ်လၢ ကစၢ်ယွၤ မၤလိာ်အီၤလီၤ. တၢ်လၢ အတမၤထွဲဝဲဘၣ်န့ၣ်​ အိၣ်ဒၣ်ထဲ တၢ်ဂ့ၢ်လၢ အဘၣ်ဃးဒီး ပှၤဃ့ၤသးဖိ စီၤအူၤရံယၤန့ၣ်လီၤ.+ ၆ ဒီးလၢစီၤရဃၤဘၣ်​ အတၢ်အိၣ်မူ ဒီတစိၤန့ၣ်​ တၢ်ဒုးတၢ်ယၤ အိၣ်ထီၣ်ဝဲလၢ အီၤဒီးစီၤယၤရၤဘၣ်​ အဘၢၣ်စၢၤလီၤ.+

၇ မ့မ့ၢ် စီၤအဘံယၣ်​ အဂ့ၢ်လၢ အဂၤတဖၣ်​ ဒီးတၢ်လၢအမၤဝဲခဲလၢာ်န့ၣ်​ ဘၣ်တၢ်ကွဲးလီၤအီၤလၢ ယူဒၤအစီၤပၤ တၢ်စံၣ်စိၤတဲစိၤ အလံာ်ပူၤလီၤ.+ ဒီးလၢ စီၤအဘံယၣ်​ ဒီးစီၤယၤရၤဘၣ်​ အဘၢၣ်စၢၤန့ၣ်​ တၢ်ဒုးတၢ်ယၤ အိၣ်ထီၣ်ဝဲစ့ၢ်ကီးလီၤ.+ ၈ လၢခံ စီၤအဘံယၣ်​ သံဝဲဒ် အမိၢ်ပၢ်ဖံဖု လၢပျၢၤတဖၣ်အသိး ဒီးဘၣ်တၢ်ခူၣ်လီၤကွံာ်အီၤလၢ စီၤဒၤဝံး အဝ့ၢ်ပူၤလီၤ. ဒီးအဖိခွါ စီၤအၤစါ+ ကဲထီၣ်က့ၤ စီၤပၤလၢအလီၢ်လီၤ.+

၉ ဖဲအံၣ်စရ့လး အစီၤပၤယၤရၤဘၣ်​ ပၢတၢ် ၂၀ နံၣ်အနံၣ်န့ၣ်​ စီၤအၤစါ စးထီၣ်ပၢတၢ်လၢ ယူဒၤအဘီမုၢ် အပူၤလီၤ. ၁၀ စီၤအၤစါ ပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ ၄၁ နံၣ်လီၤ. စီၤအၤစါ အဖံအမံၤမ့ၢ်ဝဲ နီၢ်မၤကၤ+ လၢအမ့ၢ် စီၤအးဘၡါလိၣ်​ အလံၤမုၣ်လီၤ. ၁၁ စီၤအၤစါ မၤတၢ်လၢ ယဟိဝၤယွၤ ထံၣ်ဝဲလၢအဂ့ၤ+ ဒ်အဖုဖးဒိၣ်​ စီၤဒၤဝံး အသိးလီၤ. ၁၂ ပိာ်ခွါတဖၣ်လၢ အဆါလီၤအီၣ်သး* လၢတၢ်ဘူၣ်ထီၣ်ဘါထီၣ်အလီၢ်တဖၣ်န့ၣ်+ စီၤအၤစါ ဟီထီၣ်ကွံာ် အဝဲသ့ၣ်လၢ ကီၢ်ပူၤ ဒီးအဝဲမၤဟးဂီၤကွံာ် တၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ်​ လၢအဖုဖးဒိၣ်တဖၣ်​ တ့ထီၣ်ပာ်စၢၤဝဲန့ၣ်လီၤ.+ ၁၃ အဖံနီၢ်မၤကၤဒၣ်လဲာ်+ အဝဲထုးထီၣ်ကွံာ်ဝဲလၢ နီၢ်ပၤမုၣ်အလီၢ်အလၤ, မ့ၢ်လၢ နီၢ်မၤကၤ တ့ထီၣ်​ တၢ်ဂီၤတၢ်ဖှီၣ်လၢ အလီၤသးဘၣ်အၢတခါလၢ တၢ်ဘူၣ်ထီၣ်ဘါထီၣ်​ တၢ်စီဆှံအထူၣ်* အဂီၢ်လီၤ. စီၤအၤစါ မၤဟးဂီၤကွံာ်ဝဲ တၢ်ဂီၤတၢ်ဖှီၣ်​ လၢအလီၤသးဘၣ်အၢ တခါအံၤ+ ဒီးဒွဲၣ်အူထီၣ်ဝဲလၢ ကံဒြိၣ်တၢ်တြီၤပူၤလီၤ.+ ၁၄ မ့မ့ၢ် တၢ်လီၢ်ထီၣ်ထီတဖၣ်န့ၣ်​ အိၣ်ဒံးဝဲလီၤ.+ ဘၣ်ဆၣ်​ လၢစီၤအၤစါ အတၢ်အိၣ်မူ ဒီတစိၤန့ၣ်​ အသးတီဒီး ယဟိဝၤယွၤ လၢအသးဒီဖျၢၣ်လီၤ. ၁၅ ဒီးတၢ်ခဲလၢာ်လၢ စီၤအၤစါ ဒီးအပၢ် ပာ်စီဆှံဝဲ ဒ်သိးဒီး စ့ညၣ်, ထူ ဒီးတၢ်ပီးတၢ်လီ အကလုာ်ကလုာ်န့ၣ်​ အဝဲဟဲစိာ်ဝဲလၢ ယဟိဝၤယွၤ အဟံၣ်ပူၤလီၤ.+

၁၆ လၢစီၤအၤစါ ဒီးအံၣ်စရ့လး အစီၤပၤဘါၡၤ+ အဘၢၣ်စၢၤန့ၣ်​ တၢ်ဒုးတၢ်ယၤ အိၣ်ထီၣ်ဝဲ ထီဘိလီၤ. ၁၇ အဃိ အံၣ်စရ့လး အစီၤပၤဘါၡၤ လဲၤဒုးဝဲ ယူဒၤအဘီမုၢ် ဒီးတ့ဂၢၢ်တ့ကျၢၤထီၣ်က့ၤဝဲ ဝ့ၢ်ရၤမါ+ ဒ်သိး ပှၤသုတလဲၤနုာ် ဒီးဟးထီၣ်လၢ ယူဒၤ အစီၤပၤအၤစါ အအိၣ်တဂ့ၤအဂီၢ်လီၤ.+ ၁၈ ဒီးစီၤအၤစါ ဟံးန့ၢ်ဝဲ စ့ညၣ်​ ဒီးထူခဲလၢာ်လၢ အအိၣ်တ့ၢ်လၢ တၢ်လုၢ်ဒိၣ်ပှ့ၤဒိၣ်​ အလီၢ်လၢ ယဟိဝၤယွၤ အဟံၣ်ပူၤ ဒီးတၢ်လုၢ်ဒိၣ်ပှ့ၤဒိၣ်​ အလီၢ်လၢ စီၤပၤအဟံၣ်ပူၤ ဒီးဟ့ၣ်လီၤဝဲလၢ အခ့အပှၤတဖၣ်လီၤ. ဝံၤဒီးစီၤပၤအၤစါ ဆှၢဝဲတၢ်သ့ၣ်တဖၣ်န့ၣ်လၢ ကီၢ်စူၤရံအစီၤပၤ+ ဘ့ၣ်ဟဒး လၢအအိၣ်လၢ ဝ့ၢ်ဒၤမ့ၤစ့းန့ၣ်လီၤ. စီၤဘ့ၣ်ဟဒး အပၢ်မ့ၢ်ဝဲ စီၤတၤဘြံမိၣ်​ ဒီးစီၤတၤဘြံမိၣ်​ အပၢ်မ့ၢ်ဝဲ စီၤဃ့စိၣ်လီၤ. ဒီးစီၤအၤစါ တဲဝဲလၢ ၁၉ “လၢနပၢ် ဒီးယပၢ်အဘၢၣ်စၢၤ ဒီးလၢနၤဒီးယၤ အဘၢၣ်စၢၤန့ၣ်​ တၢ်အၢၣ်လီၤအီလီၤ အိၣ်ဝဲတခါလီၤ. ယဆှၢလီၤန့ၢ်နၤ တၢ်ဟ့ၣ်လၢ အမ့ၢ်စ့ညၣ်​ ဒီးထူလီၤ. ဒ်သိး အံၣ်စရ့လး အစီၤပၤဘါၡၤ ကဂုၤက့ၤအလီၢ်ခံအဂီၢ် ဟဲမၤဟးဂီၤကွံာ် နတၢ်အၢၣ်လီၤအီလီၤ ဒီးအီၤတက့ၢ်.” ၂၀ စီၤဘ့ၣ်ဟဒး မၤဝဲဒ် စီၤပၤအၤစါ တဲအီၤအသိး ဒီးဆှၢလီၤဝဲ အသုးခိၣ်တဖၣ်​ ဒ်သိးကလဲၤဒုးဝဲ အံၣ်စရ့လး အဝ့ၢ်တဖၣ်အဂီၢ်လီၤ. ဒီးအဝဲသ့ၣ်​ မၤန့ၢ်ဝဲ ဝ့ၢ်ဧံၤယိၣ်,+ ဝ့ၢ်ဒၣ်,+ ဝ့ၢ်အၤဘ့ၤလးဘ့ၤသမၤကၤ, ကံးန့ၤရ့သး အတၢ်လီၢ်ခဲလၢာ် ဒီးနးသၤလံ အတၢ်လီၢ်တၢ်ကျဲ ခဲလၢာ်လီၤ. ၂၁ ဖဲစီၤဘါၡၤ နၢ်ဟူဝဲ တၢ်ဂ့ၢ်န့ၣ်အခါ အဝဲပတုာ်ကွံာ်ဝဲ တၢ်တ့ဂၢၢ်တ့ကျၢၤထီၣ်က့ၤ ဝ့ၢ်ရၤမါ တဘျီဃီလီၤ. ဒီးစီၤဘါၡၤ က့ၤအိၣ်ဝဲလၢ ဝ့ၢ်တံးရစၢ် အပူၤလီၤ.+ ၂၂ အဃိ စီၤပၤအၤစါ ကိးဝဲ ပှၤလၢအအိၣ်ဝဲလၢ ယူဒၤအဘီမုၢ်ပူၤ ကိးဂၤဒဲး ဒီးပှၤလၢ တလိၣ်ဟဲဘၣ်န့ၣ်​ တအိၣ်နီတဂၤဘၣ်. ဒီးအဝဲသ့ၣ်​ က့ၤစိာ်ဝဲ လၢၢ်တဖၣ်​ ဒီးသ့ၣ်ဘၣ်တဖၣ်​ လၢအအိၣ်ဝဲလၢ ဝ့ၢ်ရၤမါအပူၤ လၢစီၤဘါၡၤ သူပာ်စၢၤဝဲ ဒီးစီၤပၤအၤစါ သူက့ၤအီၤ ဒ်သိးကတ့ဂၢၢ်တ့ကျၢၤထီၣ်က့ၤ ဝ့ၢ်က့ဘၤလၢ+ ဘံၣ်ယၤမံၣ်​ အဟီၣ်ကဝီၤပူၤ ဒီးဝ့ၢ်မံးစပၤ အဂီၢ်လီၤ.+

၂၃ မ့မ့ၢ် စီၤအၤစါ အဂ့ၢ်လၢ အဂၤတဖၣ်, အတၢ်မၤလၢအဒိၣ်အမုၢ် ခဲလၢာ်, တၢ်ခဲလၢာ်လၢ အမၤတ့ၢ်ဝဲ ဒီးဝ့ၢ်လၢ အသူၣ်ထီၣ်ဝဲတဖၣ်​ အဂ့ၢ်န့ၣ်​ ဘၣ်တၢ်ကွဲးလီၤအီၤလၢ ယူဒၤအစီၤပၤ တၢ်စံၣ်စိၤတဲစိၤ အလံာ်ပူၤလီၤ. ဘၣ်ဆၣ်​ ဖဲစီၤအၤစါ အသးပှၢ်ထီၣ်အခါ အဝဲဘၣ်တူၢ်ဝဲ တၢ်ဆါတခါလၢ အအိၣ်လၢ အခီၣ်လၣ်န့ၣ်လီၤ.+ ၂၄ လၢခံ စီၤအၤစါ သံဝဲဒ် အမိၢ်ပၢ်ဖံဖု လၢပျၢၤတဖၣ်အသိး ဒီးဘၣ်တၢ် ခူၣ်လီၤကွံာ်အီၤ တပူၤဃီ ဒီးအဝဲသ့ၣ်​ လၢအဖုဖးဒိၣ်​ စီၤဒၤဝံး အဝ့ၢ်ပူၤလီၤ. ဒီးအဖိခွါ စီၤယဟိၤၡၤဖး+ ကဲထီၣ်စီၤပၤလၢ အလီၢ်လီၤ.

၂၅ ဖဲယူဒၤ အစီၤပၤအၤစါ ပၢတၢ် ခံနံၣ်တနံၣ်န့ၣ်​ စီၤယၤရၤဘၣ်​ အဖိခွါ စီၤနၤဒး+ ကဲထီၣ်​ အံၣ်စရ့လး အစီၤပၤလီၤ. ဒီးစီၤနၤဒး ပၢဘၣ်ဝဲ အံၣ်စရ့လး ခံနံၣ်လီၤ. ၂၆ တၢ်လၢ ယဟိဝၤယွၤ ထံၣ်ဝဲလၢ အအၢန့ၣ်​ စီၤနၤဒး မၤဝဲတလီၢ်လီၢ် ဒီးအဝဲ အိၣ်မူပိာ်ထွဲဒ် အပၢ်မၤဝဲအသိး+ ဒီးမၤတၢ်ဒဲးဘးလၢ ပှၤအံၣ်စရ့လးဖိ မၤပာ်စၢၤဝဲလၢ အပၢ်အဃိလီၤ.+ ၂၇ စီၤအဃံယၤ အဖိခွါ စီၤဘါၡၤလၢ အပၣ်ဃုာ်လၢ ယံးစၣ်ကၢ် အဒူၣ်ကျါန့ၣ်​ ကူၣ်အၢဝဲ စီၤနၤဒးလီၤ. ဒီးဖဲန့ၣ်အခါ ဝ့ၢ်ကံးဘသိၣ်+ အိၣ်ဝဲလၢ ပှၤဖလ့ၡသးဖိ အတၢ်ပၢဖီလာ်လီၤ. အဃိ ဖဲစီၤနၤဒး ဒီးအံၣ်စရ့လး အသုးဖိခဲလၢာ် လဲၤကဝီၤဃာ် ဝ့ၢ်ကံးဘသိၣ်အခါ စီၤဘါၡၤ မၤသံ စီၤနၤဒးလီၤ. ၂၈ ဖဲယူဒၤ အစီၤပၤအၤစါ ပၢတၢ် သၢနံၣ်တနံၣ်န့ၣ်​ စီၤဘါၡၤ မၤသံဝဲ စီၤနၤဒး ဒီးအဝဲကဲထီၣ်က့ၤ စီၤပၤလၢ စီၤနၤဒး အလီၢ်လီၤ. ၂၉ ဒီးဖဲအဝဲ ကဲထီၣ်​ စီၤပၤအခါ အမၤသံ စီၤယၤရၤဘၣ်​ အဒူၣ်ဖိထၢဖိ ကိးဂၤဒဲးလီၤ. အဝဲတပာ်မူ စီၤယၤရၤဘၣ်​ အဘူးအတံၢ် နီတဂၤဘၣ်. ဒ်ယဟိဝၤယွၤ တဲပာ်စၢၤ ခီဖျိလၢ အခ့အပှၤ ပှၤၡံလိၤဖိ စီၤအဃံယၤ အသိးန့ၣ်​ စီၤဘါၡၤ မၤသံကွံာ် အဝဲသ့ၣ်​ ခဲလၢာ်လီၤ.+ ၃၀ တၢ်ကဲထီၣ်အသးဒ်န့ၣ်​ ခီဖျိလၢ တၢ်ဒဲးဘးလၢ စီၤယၤရၤဘၣ်​ မၤဝဲ ဒီးတၢ်ဒဲးဘးလၢအဝဲဆီၣ်ထွဲ ပှၤအံၣ်စရ့လးဖိလၢ ကမၤဝဲတဖၣ်​ ဒီးခီဖျိလၢ အဝဲမၤဆါ အံၣ်စရ့လး အကစၢ် ယဟိဝၤယွၤ အသးဒိၣ်မးအဃိလီၤ. ၃၁ မ့မ့ၢ်စီၤနၤဒးအဂ့ၢ် လၢအဂၤတဖၣ်​ ဒီးတၢ်လၢ အမၤဝဲခဲလၢာ်န့ၣ်​ ဘၣ်တၢ်ကွဲးလီၤအီၤလၢ အံၣ်စရ့လး အစီၤပၤ တၢ်စံၣ်စိၤတဲစိၤ အလံာ်ပူၤလီၤ. ၃၂ ဒီးလၢစီၤအၤစါ ဒီးအံၣ်စရ့လး အစီၤပၤဘါၡၤ အဘၢၣ်စၢၤန့ၣ်​ တၢ်ဒုးတၢ်ယၤ အိၣ်ထီၣ်ဝဲ ထီဘိလီၤ.+

၃၃ ဖဲယူဒၤ အစီၤပၤအၤစါ ပၢတၢ် သၢနံၣ်တနံၣ်န့ၣ်​ စီၤအဃံယၤ အဖိခွါ စီၤဘါၡၤ ကဲထီၣ်စီၤပၤ လၢအံၣ်စရ့လး ခဲလၢာ်အဖီခိၣ်​ လၢဝ့ၢ်တံးရစၢ်အပူၤ ဒီးအဝဲပၢဘၣ်တၢ် ၂၄ နံၣ်လီၤ.+ ၃၄ တၢ်လၢ ယဟိဝၤယွၤ ထံၣ်ဝဲလၢ အအၢန့ၣ်+ စီၤဘါၡၤ မၤဝဲတလီၢ်လီၢ် ဒီးအဝဲ အိၣ်မူပိာ်ထွဲဒ် စီၤယၤရၤဘၣ်​ မၤဝဲအသိး ဒီးမၤတၢ်ဒဲးဘးလၢ ပှၤအံၣ်စရ့လးဖိ မၤပာ်စၢၤဝဲလၢ စီၤယၤရၤဘၣ်အဃိလီၤ.+