၁ ၡမူၤအ့လး
၃၀ လၢသၢသီတသီန့ၣ် စီၤဒၤဝံး ဒီးအပှၤတဖၣ် ဟဲက့ၤတုၤဝဲလၢ ဝ့ၢ်စံကလးလီၤ.+ ဒီးအဝဲသ့ၣ်ထံၣ်ဝဲလၢ ပှၤဧမၤလ့းဖိတဖၣ်+ ဟဲဒုးတၢ်လၢ ကလံၤထံးတခီ ဒီးဟဲဒုးဝဲ ဝ့ၢ်စံကလး ဝံၤလံ. ဒီးပှၤဧမၤလ့းဖိတဖၣ် မၤဟးဂီၤကွံာ်ဝဲ ဝ့ၢ်စံကလး ဒီးဒွဲၣ်အူထီၣ်ကွံာ်အီၤလီၤ. ၂ ဒီးအဝဲသ့ၣ်ဖီၣ်န့ၢ်ဝဲ ပိာ်မုၣ်တဖၣ်+ ဒီးပှၤအိၣ်လၢ ဝ့ၢ်ပူၤခဲလၢာ် စးထီၣ်လၢအဒိၣ် တုၤလၢအဆံးလီၤ. အဝဲသ့ၣ် တမၤသံပှၤနီတဂၤဘၣ်, သနာ်က့ အဝဲသ့ၣ် ဖီၣ်န့ၢ်ပှၤတဖၣ်န့ၣ် ဒီးဆဲးလဲၤကိးဃုာ်ဒီး အဝဲသ့ၣ်လီၤ. ၃ အဃိ ဖဲစီၤဒၤဝံး ဒီးအပှၤတဖၣ် ဟဲက့ၤတုၤလၢဝ့ၢ်အခါ အဝဲသ့ၣ်ထံၣ်ဝဲလၢ ဝ့ၢ်န့ၣ် ဘၣ်တၢ်ဒွဲၣ်အူထီၣ်ကွံာ်အီၤလံ. ဒီးအဝဲသ့ၣ်အမါတဖၣ်, အဖိမုၣ်တဖၣ် ဒီးအဖိခွါတဖၣ်န့ၣ် ဘၣ်တၢ်က့ၤဖီၣ်အီၤလံ. ၄ အဃိ စီၤဒၤဝံး ဒီးအပှၤတဖၣ်န့ၣ် ဟီၣ်ဝဲဖးဒိၣ် တုၤလၢအဂံၢ်အဘါလၢ ကဟီၣ်ဝဲအဂီၢ် တအိၣ်လၢၤဘၣ်န့ၣ်လီၤ. ၅ ဒီးစီၤဒၤဝံး အမါခံဂၤစ့ၢ်ကီး ဘၣ်တၢ်က့ၤဖီၣ်အီၤလီၤ. အမါအမံၤမ့ၢ်ဝဲ နီၢ်အဃံနိၣ် လၢအဟဲလၢ ဝ့ၢ်ယံးစရ့လး ဒီးပှၤကၢ်မ့ၤလးဖိ နီၢ်အဘံၤကါယံးလး လၢအမ့ၢ်တ့ၢ် စီၤနၤဘလးအမါလီၤ.+ ၆ ခီဖျိလၢ ပှၤခဲလၢာ် အဖိမုၣ် ဒီးအဖိခွါတဖၣ် ဘၣ်တၢ်က့ၤဖီၣ်အီၤအဃိ အဝဲသ့ၣ် သးဒိၣ်ထီၣ်တၢ်ဒိၣ်မး ဒီးအဝဲသ့ၣ် တဲလိာ်အသးလၢ ကကွံာ်စီၤဒၤဝံး လၢလၢၢ်လီၤ. အဃိ စီၤဒၤဝံး သူၣ်ကိၢ်သးဂီၤတၢ် ဒိၣ်မးလီၤ. ဘၣ်ဆၣ် စီၤဒၤဝံး ပာ်ဂံၢ်ပာ်ဘါ အကစၢ် ယဟိဝၤယွၤလီၤ.+
၇ ပှၤလုၢ်တၢ်ဒိၣ် စီၤအ့ဘယၤသၢ်န့ၣ်+ မ့ၢ်ဝဲစီၤအဃံၤမ့လ့း အဖိခွါလီၤ. ဒီးစီၤဒၤဝံးတဲဘၣ် စီၤအ့ဘယၤသၢ်လၢ “ဝံသးစူၤ ဟဲစိာ်အ့ဖိးတဘ့ၣ်န့ၣ်လၢအံၤ.”+ အဃိ စီၤအ့ဘယၤသၢ် လဲၤစိာ်အ့ဖိးလၢ စီၤဒၤဝံးအအိၣ်လီၤ. ၈ ဒီးစီၤဒၤဝံး သံကွၢ် ယဟိဝၤယွၤလၢ+ “မ့ၢ်ယဘၣ် လဲၤလူၤသုးဖိတဒူၣ်အံၤဧါ. မ့ၢ်ယလဲၤလူၤအဝဲသ့ၣ် ကချုးဧါ.” ဒီးကစၢ်ယွၤ တဲအီၤလၢ “လဲၤလူၤဟီ, နလဲၤလူၤ အဝဲသ့ၣ် ကချုးသပှၢ်ကတၢၢ် ဒီးနကမၤန့ၢ်က့ၤ တၢ်ခဲလၢာ်လီၤ.”+
၉ တဘျီဃီန့ၣ် စီၤဒၤဝံး ဒီးအပှၤ ၆၀၀ န့ၣ်လဲၤဝဲလီၤ.+ ဒီးဖဲအဝဲသ့ၣ် လဲၤတုၤလၢ ဘစိၢ် အတၢ်တြီၤအခါ အပှၤတဖၣ် အိၣ်တ့ၢ်ဝဲဖဲန့ၣ် တနီၤလီၤ. ၁၀ စီၤဒၤဝံး ဒီးအပှၤ ၄၀၀ န့ၣ် ဆဲးလဲၤလူၤတၢ်လီၤ. မ့မ့ၢ်အပှၤ ၂၀၀ န့ၣ်လီၤဘှံးဒိၣ်တလၢ လၢကခီဂာ်ဝဲ ဘစိၢ်အတၢ်တြီၤပူၤအဃိ အဝဲသ့ၣ်အိၣ်တ့ၢ်ဝဲလီၤ.+
၁၁ ဒီးအဝဲသ့ၣ် ထံၣ်ဝဲ ပှၤအဲၤကူပတူးဖိတဂၤ လၢပျီပူၤ ဒီးက့ၤကိးအီၤလၢ စီၤဒၤဝံး အအိၣ်လီၤ. အဝဲသ့ၣ် ဒုးအီၣ်အီၤ တၢ်အီၣ် ဒီးဒုးအီအီၤထံလီၤ. ၁၂ ဒီးဟ့ၣ်စ့ၢ်ကီးအီၤ ကိၣ်တက့လၢ ဘၣ်တၢ်တ့အီၤလၢ ချၢၣ်ဒၢသၣ် ဒီးကိၣ်ခံလိၣ်လၢ ဘၣ်တၢ်တ့အီၤလၢ စပံးသၣ်ဃ့လီၤ. ဒီးမ့ၢ်လၢ အဝဲတအီၣ်ဘၣ်တၢ်ဘၣ် ဒီးတအီဘၣ်ထံဘၣ် အိၣ်ဝဲသၢနံၤ ဒီးသၢနၤလံအဃိ ဖဲအဝဲအီၣ်တၢ်ဝံၤအခါ အဂံၢ်ပှဲၤထီၣ်က့ၤဝဲလီၤ. ၁၃ ဒီးစီၤဒၤဝံး သံကွၢ်အီၤလၢ “နကဲမတဂၤအကုၢ်လဲၣ် ဒီးနဟဲလၢတၢ်လီၢ်ဖဲလဲၣ်.” အဝဲတဲဝဲလၢ “ယမ့ၢ် ပှၤအဲၤကူပတူးဖိတဂၤ ဒီးယကဲ ပှၤဧမၤလ့းဖိတဂၤ အကုၢ်လီၤ. ဘၣ်ဆၣ် လၢအပူၤကွံာ်သၢသီန့ၣ် ယဆိးက့အဃိ ယကစၢ် ပာ်တ့ၢ်ကွံာ်ယၤလီၤ. ၁၄ ပလဲၤဒုးတၢ်လၢ ကရံသး အကလံၤထံး,+ လၢယူဒၤ အဟီၣ်ကဝီၤ, လၢကၤလ့း+ အကလံၤထံး ဒီးပဒွဲၣ်ထီၣ် ဝ့ၢ်စံကလးလီၤ.” ၁၅ အဃိ စီၤဒၤဝံး တဲအီၤလၢ “နကလဲၤဆှၢယၤလၢ သုးဖိတဒူၣ်အံၤ အအိၣ်ဧါ.” အဝဲတဲဆၢက့ၤဝဲလၢ “နမ့ၢ်အၢၣ်လီၤယၤလၢ ကစၢ်ယွၤအမဲာ်ညါလၢ နတမၤသံယၤဘၣ် ဒီးနတဟ့ၣ်လီၤကွံာ်ယၤလၢ ယကစၢ်အအိၣ်ဘၣ်န့ၣ် ယကလဲၤဆှၢနၤလၢ သုးဖိတဒူၣ်အံၤ အအိၣ်လီၤ.”
၁၆ အဃိ အဝဲလဲၤဆှၢ စီၤဒၤဝံးလၢ အဝဲသ့ၣ်အအိၣ်လီၤ. ဒီးအဝဲသ့ၣ် မၤန့ၢ် တၢ်ဖိတၢ်လံၤဒီဒူၣ် လၢပှၤဖလ့ၡသးဖိ အထံကီၢ် ဒီးယူဒၤအဟီၣ်ကဝီၤအပူၤအဃိ အဝဲသ့ၣ် ဆ့ၣ်နီၤလၢ တၢ်လီၢ်သကုၤဆးဒး ဒီးအီၣ်တၢ် ဒီးမၤတၢ်သူၣ်ဖှံသးညီလီၤ. ၁၇ ဒီးစီၤဒၤဝံး မၤသံအဝဲသ့ၣ် စးထီၣ်လၢ ဂီၤခီ တုၤလီၤလၢ ဟါလီၤခီလီၤ. အဝဲသ့ၣ် ပူၤဖျဲးထဲ+ ပိာ်ခွါ အဂၤ ၄၀၀ လၢအဃ့ၢ်ကွံာ်လၢ ကီၤလၤအူး ဒီးပှၤအဂၤ တပူၤဖျဲးနီတဂၤဘၣ်. ၁၈ တၢ်လၢ ပှၤဧမၤလ့းဖိ က့ၤစိာ်တဖၣ်န့ၣ် စီၤဒၤဝံး မၤန့ၢ်က့ၤဝဲခဲလၢာ်+ ဒီးစီၤဒၤဝံး မၤပူၤဖျဲးဝဲ အမါခံဂၤန့ၣ်လီၤ. ၁၉ အဝဲသ့ၣ် အတၢ်ခဲလၢာ် စးထီၣ်လၢအဒိၣ် တုၤလၢအဆံး တလီၤမၢ်နီတမံၤဘၣ်. အဝဲသ့ၣ် မၤန့ၢ်က့ၤဝဲ အဖိမုၣ်ဖိခွါတဖၣ် ဒီးအတၢ်ဖိတၢ်လံၤလီၤ.+ စီၤဒၤဝံး မၤန့ၢ်က့ၤဝဲ တၢ်ခဲလၢာ်လၢ ပှၤဧမၤလ့းဖိ ဟံးန့ၢ်ဝဲန့ၣ်လီၤ. ၂၀ အဃိ စီၤဒၤဝံး ဟံးန့ၢ်ဝဲ သိ, မဲာ်တဲးလဲး ဒီးကျီၢ်ခဲလၢာ်လီၤ. ဒီးအပှၤတဖၣ် က့ၤနီဝဲလၢ အနီၢ်ကစၢ် အဆၣ်ဖိကီၢ်ဖိတဖၣ် အမဲာ်ညါ ဒီးအဝဲသ့ၣ် တဲဝဲလၢ “တၢ်သ့ၣ်တဖၣ်အံၤ ကဲထီၣ်ဝဲစီၤဒၤဝံး အတၢ်လံ.”
၂၁ ဒီးစီၤဒၤဝံး ဟဲက့ၤတုၤဝဲလၢ အပှၤ ၂၀၀ လၢအလီၤဘှံးဒိၣ်တလၢ လၢကလဲၤခီဂာ်ဝဲ ဘစိၢ်အတၢ်တြီၤပူၤ+ ဒီးအိၣ်တ့ၢ်ဝဲတဖၣ် အအိၣ်န့ၣ်လီၤ. ဒီးအဝဲသ့ၣ် ဟဲသဂၢၢ် စီၤဒၤဝံး ဒီးပှၤလၢအအိၣ်ဒီး စီၤဒၤဝံးန့ၣ်လီၤ. ဒီးဖဲစီၤဒၤဝံး ဟဲက့ၤဘူးထီၣ်လၢ အဝဲသ့ၣ် အအိၣ်အခါ စီၤဒၤဝံး သံကွၢ်အဝဲသ့ၣ်လၢ မ့ၢ်အဝဲသ့ၣ် အိၣ်ဆူၣ်အိၣ်ချ့ဧါန့ၣ်လီၤ. ၂၂ ဘၣ်ဆၣ် လၢပှၤလၢအလဲၤပိာ် စီၤဒၤဝံးအခံတဖၣ်အကျါ ပှၤလၢအသးတဂ့ၤဘၣ် ဒီးအလုၢ်အပှ့ၤ တအိၣ်ဘၣ်တဖၣ်န့ၣ် တဲဝဲလၢ “ခီဖျိလၢ အဝဲသ့ၣ် တလဲၤပိာ်ပခံဘၣ်အဃိ တၢ်လၢပမၤန့ၢ်အီၤတဖၣ်န့ၣ် ပတဟ့ၣ်အဝဲသ့ၣ် နီတစဲးဘၣ်. အဝဲသ့ၣ် ဟံးန့ၢ်က့ၤထဲ အမါဒီး အဖိတဖၣ် ဝံၤအဝဲသ့ၣ် ကဘၣ်က့ၤဝဲလီၤ.” ၂၃ ဘၣ်ဆၣ် စီၤဒၤဝံးတဲဝဲလၢ “ဒီပုၢ်ဝဲၢ်သ့ၣ်ဧၢ, တၢ်လၢ အအိၣ်ဒီးပှၤတဖၣ်န့ၣ် ယဟိဝၤယွၤ ဟ့ၣ်ပှၤလီၤ. အဃိ တဘၣ်မၤဒ်န့ၣ်တဂ့ၤ. အဝဲဒီသဒၢပှၤ ဒီးဟ့ၣ်လီၤပှၤသုးဖိလၢ အထီဒါပှၤတဒူၣ်အံၤ လၢပစုပူၤလီၤ.+ ၂၄ ဘၣ်ဃးဒီး တၢ်ဂ့ၢ်တခါအံၤ မတဂၤ သးလီၤပလိာ်ဒီးသု ကသ့တဂၤလဲၣ်. ပှၤလၢ အလဲၤဒုးတၢ်န့ၣ် ကန့ၢ်ဘၣ်တၢ်ပှဲၤသိးဒီး ပှၤလၢ အဆ့ၣ်နီၤကွၢ်ထွဲ တၢ်ဖိတၢ်လံၤတဖၣ်လီၤ.+ ပှၤခဲလၢာ် ကန့ၢ်ဘၣ်တၢ် ဒ်သိးသိးလီၤ.”+ ၂၅ ဒီးစးထီၣ်ဖဲ မုၢ်နံၤအဝဲန့ၣ် အဝဲပာ်ပနီၣ်ဝဲ တၢ်ဂ့ၢ်တခါအံၤ ဒ်တၢ်သိၣ်တၢ်သီ ဒီးတၢ်ဘျၢလၢ ပှၤအံၣ်စရ့လးဖိအဂီၢ် တုၤလၢ မုၢ်မဆါတနံၤအံၤလီၤ.
၂၆ ဖဲစီၤဒၤဝံး က့ၤတုၤလၢ ဝ့ၢ်စံကလးအခါ အဝဲဆှၢလီၤဝဲ တၢ်ဖိတၢ်လံၤတနီၤဆူ အတံၤသကိးလၢ အမ့ၢ်ယူဒၤ အပှၤသူၣ်က့သးပှၤတဖၣ် အအိၣ်လီၤ. ဒီးအဝဲတဲဝဲလၢ “အဝဲအံၤ မ့ၢ်ဝဲ ယဟိဝၤယွၤ အဒုၣ်အဒါတဖၣ် အတၢ်ဖိတၢ်လံၤတဖၣ် ဒီးယဟ့ၣ်လီၤသု ဒ်တၢ်ဟ့ၣ်အသိးလီၤ.” ၂၇ အဝဲဆှၢလီၤဝဲ တၢ်ဟ့ၣ်ဆူ ပှၤလၢအအိၣ်လၢ ဝ့ၢ်ဘ့ၤသ့လး,+ ပှၤလၢအအိၣ်လၢ ရၤမိး လၢနဲကဲၤ, ပှၤလၢအအိၣ်လၢ ဝ့ၢ်ယးတံၢ်,+ ၂၈ ပှၤလၢအအိၣ်လၢ ဝ့ၢ်ဧရိၤဧ့ၢ်, ပှၤလၢအအိၣ်လၢ ဝ့ၢ်ၡံးဖမး, ပှၤလၢအအိၣ်လၢ ဝ့ၢ်အ့ၡတမိး,+ ၂၉ ပှၤလၢအအိၣ်လၢ ရၤဃ့လး, ပှၤလၢအအိၣ်လၢ ပှၤယရၤဃမအ့လးဖိ+ အဝ့ၢ်တဖၣ်, ပှၤလၢအအိၣ်လၢ ပှၤက့ၣ်ဖိ အဝ့ၢ်တဖၣ်,+ ၃၀ ပှၤလၢအအိၣ်လၢ ဝ့ၢ်ဃိၢ်မါ,+ ပှၤလၢအအိၣ်လၢ ဘီၣ်ရၤၡၣ်, ပှၤလၢအအိၣ်လၢ ဝ့ၢ်ဧၤသး, ၃၁ ပှၤလၢအအိၣ်လၢ ဝ့ၢ်ဃ့ဘြိၣ်+ ဒီးဆူတၢ်လီၢ်ခဲလၢာ်လၢ စီၤဒၤဝံးဒီး အပှၤတဖၣ် လဲၤညီနုၢ်ဝဲန့ၣ်လီၤ.