၂ ၡမူၤအ့လး
၁၅ ဒီးတၢ်သ့ၣ်တဖၣ်န့ၣ် ဝံၤအလီၤခံ စီၤအးဘၡါလိၣ် ကတဲာ်ကတီၤထီၣ်ဝဲ လ့ၣ်ကဟၣ်သုးတခိၣ်, ကသ့ၣ်တဖၣ် ဒီးပှၤအဂၤ ၅၀ ဒ်သိးကဃ့ၢ်လၢ အမဲာ်ညါအဂီၢ်လီၤ.+ ၂ ဒီးညီနုၢ်စီၤအးဘၡါလိၣ် ဂဲၤဆၢထၢၣ်ဂီၤဂီၤ ဒီးလဲၤဆၢထၢၣ်လၢ ကျဲကပၤ ဖဲကျဲတဘိလၢ အလဲၤဆူ ဝ့ၢ်အတြဲၤလီၤ.+ ဖဲပှၤတဂၤဂ့ၤ တဂၤဂ့ၤ အိၣ်ဒီးတၢ်ဂ့ၢ်လိာ်ဘှီလိာ် ဒီးကဘၣ်လဲၤလၢ စီၤပၤအအိၣ်လၢ ကစံၣ်ညီၣ်န့ၢ်တၢ်လၢအဂီၢ်အခါ+ စီၤအးဘၡါလိၣ် ကိးဃီၤအီၤ ဒီးသံကွၢ်အီၤလၢ “နဟဲလၢ ဝ့ၢ်ဖဲလဲၣ်တဖျၢၣ်လဲၣ်.” ဒီးပှၤတဂၤန့ၣ် ကတဲဘၣ်အီၤလၢ အဝဲပၣ်ဃုာ်လၢ ပှၤအံၣ်စရ့လးဖိ အဒူၣ် ဖဲလဲၣ်တဒူၣ် အကျါလဲၣ်န့ၣ်လီၤ. ၃ ဒီးစီၤအးဘၡါလိၣ် ညီနုၢ်တဲဝဲလၢ “တၢ်လၢနဃ့န့ၣ် အဘၣ် ဒီးကြၢးဝဲဘၣ်ဝဲလီၤ. ဘၣ်ဆၣ် လၢစီၤပၤအအိၣ်န့ၣ် ပှၤလၢအကဒိကနၣ်န့ၢ် နတၢ်ဂ့ၢ် တအိၣ်နီတဂၤဘၣ်.” ၄ စီၤအးဘၡါလိၣ် ညီနုၢ်တဲဝဲလၢ “ပှၤမ့ၢ် ပာ်ထီၣ်ယၤလၢ စံၣ်ညီၣ်ကွီၢ်လၢ ကီၢ်ပူၤန့ၣ် ပှၤလၢအအိၣ်ဒီး တၢ်ဂ့ၢ်လိာ်ဘှီလိာ်မ့ၢ်ဂ့ၤ ပှၤလၢအလိၣ်ဘၣ် ပှၤလၢ ကစံၣ်ညီၣ်န့ၢ်တၢ် လၢအဂီၢ်မ့ၢ်ဂ့ၤန့ၣ် ဟဲလၢယအိၣ်သ့ ကိးဂၤဒဲးလီၤ. ဒီးယကစံၣ်ညီၣ်န့ၢ်တၢ်လၢအဂီၢ် တီတီလိၤလိၤလီၤ.”
၅ ဒီးဖဲပှၤတဂၤဂၤ ဟဲလၢအခီၣ်ထံး ဒ်သိးကထိၣ်လီၤပှီၤအသးလၢ အမဲာ်ညါအခါ စီၤအးဘၡါလိၣ် ယူာ်ဃီၤအစုဒီး ဖီၣ်ထီၣ်အီၤ ဒီးနၢမူအီၤလီၤ.+ ၆ ပှၤအံၣ်စရ့လးဖိ ခဲလၢာ်လၢ အလဲၤလၢစီၤပၤအအိၣ် ဒ်သိးစီၤပၤ ကစံၣ်ညီၣ်န့ၢ်တၢ်လၢ အဝဲသ့ၣ်အဂီၢ်န့ၣ် စီၤအးဘၡါလိၣ် မၤဝဲအဝဲသ့ၣ် ဒ်န့ၣ်ကိးဂၤဒဲးလီၤ. အဃိ စီၤအးဘၡါလိၣ် ကွဲန့ၢ်လွဲန့ၢ် ပှၤအံၣ်စရ့လးဖိလီၤ.+
၇ ပူၤကွံာ်လွံၢ်နံၣ်* ဝံၤအလီၢ်ခံ စီၤအးဘၡါလိၣ် တဲဘၣ်စီၤပၤလၢ “ဝံသးစူၤ ပျဲယလဲၤလၢ ဝ့ၢ်ဃ့ဘြိၣ်+ ဒ်သိးယကမၤလၢပှဲၤ ယတၢ်အၢၣ်လီၤလၢ ယအၢၣ်လီၤ ယဟိဝၤယွၤ န့ၣ်တက့ၢ်. ၈ ဖဲယအိၣ်လၢ ကၡူၢ်လၢ+ ကီၢ်စူၤရံအခါ ယမၤ တၢ်အၢၣ်လီၤလၢ+ အဒိၣ်အမုၢ်တခါလၢ ‘ယဟိဝၤယွၤ မ့ၢ်ကိးက့ၤယၤလၢ ဝ့ၢ်ယရူၤၡလ့ၣ်န့ၣ် ယကလုၢ်ထီၣ်တၢ်လၢ ယဟိဝၤယွၤအအိၣ်လီၤ.’” ၉ အဃိ စီၤပၤတဲအီၤလၢ “လဲၤမုာ်မုာ်ဟီ.” ဒီးစီၤအးဘၡါလိၣ် လဲၤဝဲလၢ ဝ့ၢ်ဃ့ဘြိၣ်လီၤ.
၁၀ ဒီးစီၤအးဘၡါလိၣ် ဆှၢလီၤဝဲ တၢ်မဲာ်ချံတဖၣ်လၢ အံၣ်စရ့လး အဒူၣ်ခဲလၢာ်အကျါ ဒီးတဲအဝဲသ့ၣ်လၢ “ဖဲသုနၢ်ဟူ ကွဲၤသီၣ်ထီၣ်အခါ ကိးပသူထီၣ်လၢ ‘စီၤအးဘၡါလိၣ် ကဲထီၣ် စီၤပၤလၢ ဝ့ၢ်ဃ့ဘြိၣ်လံ’+ န့ၣ်တက့ၢ်.” ၁၁ ဒီးပှၤလၢ ဝ့ၢ်ယရူၤၡလ့ၣ် လၢအလဲၤပိာ် စီၤအးဘၡါလိၣ်အခံ ဆူဝ့ၢ်ဃ့ဘြိၣ်န့ၣ် အိၣ်ဝဲ အဂၤ ၂၀၀ လီၤ. စီၤအးဘၡါလိၣ် ကွဲမုာ်အဝဲသ့ၣ်အဃိ အဝဲသ့ၣ် လဲၤဝဲလၢ တၢ်သူၣ်ဘျၢသးဘျၢအပူၤ ဒီးအဝဲသ့ၣ် တသ့ၣ်ညါ တၢ်နီတမံၤဘၣ်. ၁၂ တကးဒံးဘၣ် ဖဲစီၤအးဘၡါလိၣ် ဟ့ၣ်လုၢ်ထီၣ် တၢ်လုၢ်တၢ်ပာ်တဖၣ်အခါ အမၢပှၤလဲၤကိးန့ၢ်အီၤ စီၤအဃံသဖ့ၤလး+ လၢအမ့ၢ် စီၤဒၤဝံး အပှၤဟ့ၣ်ကူၣ်ဟ့ၣ်ဖးတၢ်တဂၤ+ လၢအအိၣ်ဝဲလၢ အနီၢ်ကစၢ် အဝ့ၢ်ကံလိၤန့ၣ်လီၤ.+ ဒီးတၢ်ရဲၣ်တၢ်ကျဲၤတခါအံၤ လဲၤထီၣ်လဲၤထီဝဲ ဒီးပှၤလၢအဆီၣ်ထွဲ စီၤအးဘၡါလိၣ်န့ၣ် အနီၣ်ဂံၢ်အါထီၣ်ဝဲလီၤ.+
၁၃ လၢခံ ပှၤလၢအဆှၢခူသူၣ် တၢ်ကစီၣ်တဂၤ ဟဲတဲဘၣ် စီၤဒၤဝံးလၢ “ပှၤအံၣ်စရ့လးဖိတဖၣ် အိၣ်ဃူ စီၤအးဘၡါလိၣ်လံ.” ၁၄ တဘျီဃီန့ၣ် စီၤဒၤဝံးတဲ အခ့အပှၤခဲလၢာ်လၢ အအိၣ်လၢ ဝ့ၢ်ယရူၤၡလ့ၣ်န့ၣ်လၢ “ဂဲၤဆၢထၢၣ်, ပကဘၣ်ဃ့ၢ်လီၤ.+ ပမ့ၢ်တဃ့ၢ်ဘၣ်န့ၣ် ပတပူၤဖျဲးလၢ စီၤအးဘၡါလိၣ် အစုပူၤ နီတဂၤဘၣ်. မၤမ့ၢ်ချ့ဟီ, အဝဲဟဲလူၤပှၤကချုးဘၣ်ဖုး ဒီးကမၤဟးဂီၤပှၤ ဒီးကမၤသံကွံာ် ပှၤလၢဝ့ၢ်ပူၤခဲလၢာ် လၢနးလီၤ.”+ ၁၅ စီၤပၤ အခ့အပှၤတဖၣ် တဲဆၢက့ၤစီၤပၤလၢ “ပကစၢ်စီၤပၤ မ့ၢ်ဆၢတဲာ် တမံၤဂ့ၤ တမံၤဂ့ၤ ပကမၤလီၤ.”+ ၁၆ အဃိ စီၤပၤဟးထီၣ်ဝဲ ဒီးပှၤလၢ အအိၣ်လၢအဟံၣ်ပူၤ ခဲလၢာ်ပိာ်ထီၣ်အခံလီၤ. ဘၣ်ဆၣ် စီၤပၤ ပာ်တ့ၢ်ဝဲ အသံၣ်မါ*+ အဂၤတဆံ ဒ်သိးကကွၢ်ထွဲ ဟံၣ်အဂီၢ်လီၤ. ၁၇ ဒီးစီၤပၤ ဆဲးလဲၤတၢ် ဒီးပှၤခဲလၢာ် ပိာ်ထီၣ်အခံလီၤ. ဒီးအဝဲသ့ၣ် အိၣ်ပတုာ်လၢ ဘ့ၤမၢၤဟၢ်လီၤ.*
၁၈ ဒီးအခ့အပှၤခဲလၢာ် လၢအဟးထီၣ်ဃုာ်ဒီးအီၤ ဒီးကယဲၢ်ပှၤကရံသးဖိ, ပှၤပလ့သးဖိ+ ဒီးပှၤကံးတံးဖိ+ အဂၤ ၆၀၀ လၢအပိာ်ထီၣ်တ့ၢ်အခံလၢ ဝ့ၢ်ကၤသးန့ၣ်+ လဲၤခီဂာ်တၢ်လၢ စီၤပၤအမဲာ်ညါ ဒီးစီၤပၤ သမံသမိးအဝဲသ့ၣ်လီၤ. ၁၉ ဒီးစီၤပၤတဲ ပှၤကၤသးဖိ စီၤအံတဲၤလၢ+ “ဘၣ်မနုၤအဃိ နလဲၤဒီးပှၤလဲၣ်. နမ့ၢ် ပှၤထံဂၤကီၢ်ဂၤဖိ ဒီးနဘၣ်ဟးထီၣ်ကွံာ်လၢ နအိၣ်တၢ်အလီၢ် စ့ၢ်ကီးလီၤ. အဃိ က့ၤအိၣ်ဒီး စီၤပၤလၢ အသီတဂၤမီၤ. ၂၀ ယကဘၣ်လဲၤဖဲလဲၣ်န့ၣ် ယတသ့ၣ်ညါဘၣ် ဒီးနဟဲတုၤတယံာ်ဒံးဘၣ်, အဃိ ယကမၢ နလဲၤပိာ်ပခံန့ၣ် မ့ၢ်ကကြၢးဧါ. က့ၤကဒါက့ၤ ဒီးက့ၤကိးဒီး နပှၤတဖၣ်န့ၣ် ဒီးမ်ယဟိဝၤယွၤ ပာ်ဖျါထီၣ် တၢ်အဲၣ်လၢအတီ ဒီးတၢ်သးတီ လၢနဖီခိၣ်တက့ၢ်.”+ ၂၁ ဘၣ်ဆၣ် စီၤအံတဲၤ တဲဆၢက့ၤ စီၤပၤလၢ “ယအၢၣ်လီၤတၢ်လၢ ယဟိဝၤယွၤလၢ အမူဝဲတဂၤ အမဲာ်ညါ ဒီးယကစၢ်စီၤပၤ အမဲာ်ညါလၢ ဖဲယကစၢ်စီၤပၤ လဲၤတပူၤဂ့ၤ တပူၤဂ့ၤန့ၣ် သံဂ့ၤမူဂ့ၤ ယကလဲၤပိာ် နခံလီၤ.”+ ၂၂ ဒီးစီၤဒၤဝံး တဲစီၤအံတဲၤလၢ+ “လဲၤ, လဲၤခီဂာ်တၢ်ဟီ.” ဒီးပှၤကၤသးဖိ စီၤအံတဲၤ လဲၤခီဂာ်တၢ် ဃုာ်ဒီး အပှၤဒီးအဖိ ခဲလၢာ်လီၤ.
၂၃ ဖဲပှၤလၢအအိၣ်ဒီး စီၤဒၤဝံးတဖၣ် ခီဂာ်တၢ် ဒီးလဲၤဃီၤဝဲလၢ ကျဲလၢ အလဲၤဆူ ပှၢ်မုၢ်ကနၢအခါ ပှၤခဲလၢာ် လၢကီၢ်ပူၤန့ၣ် ဟီၣ်ဝဲဖးဒိၣ် ဒီးမ့မ့ၢ် စီၤပၤန့ၣ် ဆၢထၢၣ်ဝဲလၢ ကံဒြိၣ်အတၢ်တြီၤန့ၣ်လီၤ.+ ၂၄ ဒီးစီၤစၤဒိး+ အိၣ်ဝဲဖဲန့ၣ်စ့ၢ်ကီး ဒီးပှၤလ့ၤဝံဖိခဲလၢာ်+ လၢအယိးဝဲယွၤလၢ အမ့ၢ်အတီတဂၤ အတၢ်အၢၣ်လီၤအီလီၤ+ အတလါန့ၣ်+ အိၣ်ဒီးအီၤလီၤ. ဒီးအဝဲသ့ၣ် ပာ်လီၤ ယွၤလၢအမ့ၢ်အတီတဂၤ အတလါစီဆှံ ဒီးဖဲပှၤခဲလၢာ် ဟးထီၣ်ကွံာ်လၢ ဝ့ၢ်ပူၤဒီးခီဂာ် တၢ်တြီၤအခါ စီၤအ့ဘယၤသၢ်+ လဲၤထီၣ်ဝဲဖဲန့ၣ် စ့ၢ်ကီးလီၤ. ၂၅ ဘၣ်ဆၣ် စီၤပၤတဲဘၣ် စီၤစၤဒိးလၢ “က့ၤဆှၢက့ၤ ယွၤလၢ အမ့ၢ်အတီတဂၤ အတလါစီဆှံ လၢဝ့ၢ်ပူၤတက့ၢ်.+ ယဟိဝၤယွၤ မ့ၢ်ဘၣ်သူၣ်ဘၣ်သးယၤန့ၣ် အဝဲကဒုး ဟဲက့ၤယၤ ဒီးယကထံၣ်ဘၣ် တလါစီဆှံ ဒီးတလါစီဆှံ အိၣ်ဝဲအလီၢ်န့ၣ်လီၤ.+ ၂၆ ဘၣ်ဆၣ် ကစၢ်ယွၤ မ့ၢ်တဲယၤလၢ ‘ယတဘၣ်သူၣ်ဘၣ်သးနၤဘၣ်’ န့ၣ်မ်အဝဲမၤယၤဒ် အအဲၣ်ဒိးမၤဝဲအသိးတက့ၢ်.” ၂၇ စီၤပၤတဲဘၣ် ပှၤလုၢ်တၢ်ဒိၣ် စီၤစၤဒိးလၢ “နကဲပှၤထံၣ်တၢ်တဂၤ, တမ့ၢ်ဧီၤ.+ နၤဒီးစီၤအ့ဘယၤသၢ်န့ၣ် ကဘၣ်က့ၤအိၣ်လၢ ဝ့ၢ်ပူၤမုာ်မုာ်လီၤ. ဒီးက့ၤကိးဃုာ်ဒီး စီၤအ့ဘယၤသၢ် အဖိခွါ စီၤယိနၤသၣ်+ ဒီးနဖိခွါလၢအမ့ၢ် စီၤအဃံမဧးန့ၣ်တက့ၢ်. ၂၈ ယကအိၣ်လၢ ပှၢ်မုၢ်ကနၢ အထံဒီၣ်အလီၢ်တဖၣ် တုၤလၢ သုဒုးသ့ၣ်ညါယၤလၢ တၢ်အိၣ်သးတစုလီၤ.”+ ၂၉ အဃိ စီၤစၤဒိး ဒီးစီၤအ့ဘယၤသၢ် က့ၤဆှၢက့ၤ ယွၤလၢအမ့ၢ်အတီတဂၤ အတလါစီဆှံ လၢဝ့ၢ်ယရူၤၡလ့ၣ် ဒီးအဝဲသ့ၣ် အိၣ်တ့ၢ်ဝဲဖဲန့ၣ်လီၤ.
၃၀ ဖဲစီၤဒၤဝံး လဲၤထီၣ်လၢ ကစၢၢ်သ့ၣ်စၤယံးအခါ+ အဝဲလဲၤဝဲတခီခီ ဟီၣ်ဝဲတခီခီလီၤ. အဝဲကးဘၢ အခိၣ်သၣ်ဃံဒီးဟးဝဲလၢ အခီၣ်ညါသးလီၤ. ဒီးပှၤလၢအိၣ်ဒီးအီၤ ကိးဂၤဒဲးန့ၣ် အဝဲသ့ၣ် ကးဘၢစ့ၢ်ကီးအခိၣ်သၣ်ဃံ ဒီးလဲၤဝဲတခီခီ ဟီၣ်ဝဲတခီခီလီၤ. ၃၁ ဒီးပှၤတဲ စီၤဒၤဝံးလၢ “စီၤအဃံသဖ့ၤလး ပၣ်ဃုာ်လၢ စီၤအးဘၡါလိၣ်+ အတၢ်ရဲၣ်တၢ်ကျဲၤလံ.”+ ဒီးစီၤဒၤဝံး တဲဝဲလၢ “အိ ယဟိဝၤယွၤဧၢ,+ ဝံသးစူၤ ဒုးကဲထီၣ် စီၤအဃံသဖ့ၤလး အတၢ်ဟ့ၣ်ကူၣ်လၢ တၢ်ကလီကလီတက့ၢ်.”+
၃၂ ဖဲစီၤဒၤဝံး လဲၤထီၣ်တုၤလၢ ကစၢၢ်ဒီခိၣ် လၢတၢ်လီၢ်လၢ ညီနုၢ် ပှၤလဲၤထီၣ် ဘူၣ်ထီၣ်ဘါထီၣ် ကစၢ်ယွၤအခါ ပှၤအၢ်ကံဖိ+ စီၤဃူၡဲၤ+ လဲၤထံၣ်လိာ်သးဒီးအီၤဖဲန့ၣ်လီၤ. ဒီးစီၤဃူၡဲၤန့ၣ် သိးဝဲဒီးဆ့ကၤဖးထီ လၢအညာ် ဒီးဟီၣ်ခိၣ်ကမူၣ် အိၣ်လၢအခိၣ်လိၤလီၤ. ၃၃ ဘၣ်ဆၣ် စီၤဒၤဝံးတဲအီၤလၢ “နမ့ၢ်လဲၤခီဂာ်တၢ်ဒီးယၤန့ၣ် နကကဲထီၣ် တၢ်ဝံတၢ်ယိး လၢယဂီၢ်လီၤ. ၃၄ ဘၣ်ဆၣ် နမ့ၢ်က့ၤလၢ ဝ့ၢ်ပူၤ ဒီးနမ့ၢ်တဲဘၣ် စီၤအးဘၡါလိၣ်လၢ ‘စီၤပၤဧၢ, ယကဲထီၣ် နခ့နပှၤလံ. လၢညါ ယကဲနပၢ်အခ့အပှၤ ဘၣ်ဆၣ် ခဲအံၤ ယကဲထီၣ် နခ့နပှၤလံ’+ န့ၣ်နမၤဟးဂီၤ စီၤအဃံသဖ့ၤလး အတၢ်ဟ့ၣ်ကူၣ် လၢယဂီၢ်ကသ့လီၤ.+ ၃၅ ဒီးပှၤလုၢ်တၢ်ဒိၣ် စီၤစၤဒိး ဒီးစီၤအ့ဘယၤသၢ်န့ၣ် ကအိၣ်ဒီးနၤဖဲန့ၣ် တမ့ၢ်ဧီၤ. ဒီးတၢ်လၢ နနၢ်ဟူလၢ စီၤပၤ အဟံၣ်ပူၤခဲလၢာ်န့ၣ် နကဘၣ်တဲကျၢ ပှၤလုၢ်တၢ်ဒိၣ် စီၤစၤဒိး ဒီးစီၤအ့ဘယၤသၢ်လီၤ.+ ၃၆ စီၤအ့ဘယၤသၢ် အဖိခွါ စီၤယိနၤသၣ်+ ဒီးစီၤစၤဒိး အဖိခွါ စီၤအဃံမဧး+ အိၣ်ဖဲန့ၣ် စ့ၢ်ကီးလီၤ. ဒီးတၢ်လၢ နနၢ်ဟူခဲလၢာ်န့ၣ် ဒုးသ့ၣ်ညါယၤ ခီဖျိအဝဲသ့ၣ်တက့ၢ်.” ၃၇ အဃိ ဖဲစီၤအးဘၡါလိၣ် လဲၤနုာ်ဝဲလၢ ဝ့ၢ်ယရူၤၡလ့ၣ်အပူၤအခါ စီၤဒၤဝံးအသကိး+ စီၤဃူၡဲၤ လဲၤနုာ်စ့ၢ်ကီးဝဲလၢ ဝ့ၢ်ပူၤလီၤ.