ယိၤၡူ

၂၄ စီၤယိၤၡူကိးဖှိၣ်ဝဲ ပှၤအံၣ်စရ့လးဖိ အဒူၣ်ခဲလၢာ် လၢဝ့ၢ်ၡက့ၣ်လီၤ. ဒီးအဝဲကိးဖှိၣ်ဝဲ ပှၤသူၣ်က့သးပှၢ်, ပှၤခိၣ်ပှၤနၢ်, စံၣ်ညီၣ်ကွီၢ် ဒီးပဒိၣ်တဖၣ်+ ဒီးအဝဲသ့ၣ်​ ဆၢထၢၣ်ဝဲလၢ ယွၤလၢအမ့ၢ်အတီတဂၤ အမဲာ်ညါလီၤ. ၂ ဒီးစီၤယိၤၡူ တဲဘၣ်ပှၤခဲလၢာ်လၢ “အံၣ်စရ့လး အကစၢ်ယဟိဝၤယွၤ တဲဝဲဒ်အံၤ ‘သုမိၢ်ပၢ်ဖံဖု လၢပျၢၤတဖၣ်+ ဃုာ်ဒီး စီၤတ့ရၤလၢအမ့ၢ် စီၤအၤဘြၤဟၣ်​ ဒီးစီၤနၤဃိၢ် အပၢ်န့ၣ်​ ဖဲအဝဲသ့ၣ်အိၣ်လၢ ထံကျိဝၢ်ခီ*+ အခါအဝဲသ့ၣ်​ မ့ၢ်ဝဲပှၤလၢ အဘူၣ်ထီၣ်ဘါထီၣ်​ ယွၤအဂၤတဖၣ်လီၤ.+

၃ “‘လၢခံ သုဖုဖးဒိၣ်​ လၢအမ့ၢ် စီၤအၤဘြၤဟၣ်န့ၣ်+ ယကိးထီၣ်အီၤ လၢထံကျိဝၢ်ခီ ဒီးမၢအဝဲလဲၤလၢ ကီၢ်ကနၤဧၣ်​ အပူၤဝးဝး ဒီးယမၤအါထီၣ်အချံအသၣ်​ အါအါဂီၢ်ဂီၢ်လီၤ.+ ယဟ့ၣ်အီၤလၢ စီၤအံၤစဲးလီၤ.+ ၄ ဒီးယဟ့ၣ်လီၤ စီၤအံၤစဲးလၢ စီၤယၤကိာ် ဒီးစီၤဧ့ၡီၤလီၤ.+ ဒီးစီၤဧ့ၡီၤန့ၣ်​ ယဟ့ၣ်လီၤအီၤလၢ ကစၢၢ်စ့ဧၢ်လီၤ.+ မ့မ့ၢ် စီၤယၤကိာ် ဒီးအဖိခွါတဖၣ်န့ၣ်​ လဲၤဝဲဆူ ကီၢ်အဲၤကူပတူးအပူၤလီၤ.+ ၅ လၢခံ ယဆှၢလီၤ စီၤမိၤၡ့ ဒီးစီၤအၤဟရိၣ်+ ဒီးယဒုးလီၤ တၢ်နးတၢ်ဖှီၣ်လၢ ကီၢ်အဲၤကူပတူးအပူၤလီၤ.+ ဝံၤဒီးယထုးထီၣ်ကွံာ် သုမိၢ်ပၢ်ဖံဖု လၢပျၢၤတဖၣ်လၢ ကီၢ်အဲၤကူပတူးအပူၤလီၤ. ၆ ဖဲယထုးထီၣ်ကွံာ် သုမိၢ်ပၢ်ဖံဖု လၢပျၢၤတဖၣ်လၢ ကီၢ်အဲၤကူပတူးအပူၤအခါ+ ပှၤအဲၤကူပတူးဖိ ဒီးအလ့ၣ်ကဟၣ်သုး ဒီးအပှၤဒိးကသ့ၣ်တဖၣ်​ လဲၤလူၤ အဝဲသ့ၣ်​ တုၤလၢ ပီၣ်လဲၣ်ဂီၤလီၤ.+ ဒီးဖဲအဝဲသ့ၣ်​ လဲၤတုၤလၢ ပီၣ်လဲၣ်အခါ ၇ အဝဲသ့ၣ်​ ဃ့တၢ်မၤစၢၤလၢ ယဲဒၣ်​ ယဟိဝၤယွၤအအိၣ်လီၤ.+ အဃိ ယပာ်လီၤ တၢ်ခံးသူလၢ အဝဲသ့ၣ်ဒီးပှၤအဲၤကူပတူးဖိ အဘၢၣ်စၢၤ ဒီးဒုးဟဲလီၤ ပီၣ်လဲၣ်ထံ လၢပှၤအဲၤကူပတူးဖိတဖၣ်​ အဖီခိၣ်​ ဒီးဒုးလီၤအုးကွံာ် အဝဲသ့ၣ်လီၤ.+ ဒီးယမၤ အဲၤကူပတူး ဒ်လဲၣ်န့ၣ်​ အဝဲသ့ၣ်​ ထံၣ်ဘၣ်လၢ အနီၢ်ကစၢ်အမဲာ်လီၤ.+ ဝံၤဒီး အဝဲသ့ၣ်အိၣ်လၢ ပှၢ်မုၢ်ကနၢအပူၤ အနံၣ်အါမးလီၤ.+

၈ “‘ဒီးယဟဲကိးသုလၢ ပှၤအမိၢ်ဖိအကီၢ် လၢအအိၣ်လၢ ထံကျိယၢ်ဒ့ၣ်​ အဝၢ်ခီ ဒီးအဝဲသ့ၣ်​ ဒုးတၢ်ဒီးသုလီၤ.+ ဘၣ်ဆၣ်​ ဒ်သိး သုကမၤန့ၢ် အဝဲသ့ၣ်အကီၢ်အဂီၢ် ယဟ့ၣ်လီၤအဝဲသ့ၣ်လၢ သုစုပူၤ ဒီးယမၤဟးဂီၤကွံာ် အဝဲသ့ၣ်လၢ သုမဲာ်ညါလီၤ.+ ၉ ဒီးစီၤစံးပိၢ် အဖိခွါ စီၤဘၤလး လၢအမ့ၢ် မိၤအးအစီၤပၤန့ၣ်​ ဟဲဒုးဝဲ အံၣ်စရ့လးလီၤ. ဒီးအဝဲမၢဝဲ စီၤဘဧိၢ် အဖိခွါ စီၤဘံးလၣ်လၢ ကလဲၤဆိၣ်အၢသုလီၤ.+ ၁၀ ဘၣ်ဆၣ်​ ယတဒိကနၣ်​ စီၤဘံးလၣ်ဘၣ်.+ အဃိ စီၤဘံးလၣ်​ ဆိၣ်ဂ့ၤသု တဘျီဝံၤတဘျီ+ ဒီးယမၤပူၤဖျဲးသုလၢ အစုပူၤလီၤ.+

၁၁ “‘ဒီးသုခီဂာ် ထံကျိယၢ်ဒ့ၣ်+ ဒီးလဲၤတုၤလၢ ဝ့ၢ်ယရံၤဃိလီၤ.+ ဒီးဝ့ၢ်ယရံၤဃိ အခိၣ်အနၢ်တဖၣ်, ပှၤအမိၢ်ဖိ, ပှၤပရးစၤဖိ, ပှၤကနၤဧၣ်ဖိ, ပှၤဃ့ၤသးဖိ, ပှၤကံၢ်ကၣ်ဖိ, ပှၤဃံၤဝံဖိ ဒီးပှၤယဘူၣ်ဖိ ဒုးတၢ်ဒီးသုလီၤ. ဘၣ်ဆၣ်​ ယဟ့ၣ်လီၤအဝဲသ့ၣ်လၢ သုစုပူၤလီၤ.+ ၁၂ တချုးလၢ သုလဲၤတုၤဒံးဘၣ်န့ၣ်​ အဝဲသ့ၣ်​ အသးကဟးဂီၤ ဆိပာ်စၢၤလၢယဃိ ဒီးဟးထီၣ်ကွံာ်လၢ သုမဲာ်ညါ+ ဒ်သိးဒီး ပှၤအမိၢ်ဖိ အစီၤပၤခံဂၤန့ၣ်လီၤ. ဒီးတၢ်ကဲထီၣ်အသး ဒ်အံၤန့ၣ်​ တမ့ၢ်လၢ သုနးဒီး သုချံၣ်အဃိဘၣ်.+ ၁၃ သုတမၤတၢ်လၢ သုကဒိးန့ၢ်ဘၣ်​ ကီၢ်အံၤအဂီၢ်ဘၣ်​ သနာ်က့ ယဟ့ၣ်လီၤသုလၢ ကီၢ်အံၤ တကးဒံးဘၣ်​ ယဟ့ၣ်လီၤသု ဝ့ၢ်တဖၣ်လၢ သုတတ့ထီၣ်အီၤဘၣ်+ ဒီးသုအိၣ်သုဆိးလၢ အပူၤလီၤ. စပံးကျီး ဒီးသ့ၣ်စၤယံးကျီး လၢသုတသူၣ်လီၤဘၣ်န့ၣ်​ သုအီၣ်အသၣ်လီၤ.’+

၁၄ “အဃိ ပျံၤယဟိဝၤယွၤ ဒီးဘူၣ်ထီၣ်ဘါထီၣ်အီၤလၢ တၢ်သးတီ ဒီးတၢ်သူၣ်ဘျၢသးဘျၢ အပူၤတက့ၢ်. တၢၤကွံာ်ယွၤတဖၣ်​ လၢသုမိၢ်ပၢ်ဖံဖု လၢပျၢၤတဖၣ်+ ဘူၣ်ထီၣ်ဘါထီၣ်အီၤလၢ ထံကျိဝၢ်ခီ ဒီးလၢကီၢ်အဲၤကူပတူး အပူၤန့ၣ်တက့ၢ်.+ ဒီးဘူၣ်ထီၣ်ဘါထီၣ်​ ယဟိဝၤယွၤတက့ၢ်. ၁၅ သုမ့ၢ်တအဲၣ်ဒိး ဘူၣ်ထီၣ်ဘါထီၣ်​ ယဟိဝၤယွၤဘၣ်န့ၣ်​ မ့ၢ်သုကဘူၣ်ထီၣ်ဘါထီၣ်​ ယွၤတဖၣ်လၢ သုမိၢ်ပၢ်ဖံဖု လၢပျၢၤတဖၣ်​ ဘူၣ်ထီၣ်ဘါထီၣ်အီၤလၢ ထံကျိဝၢ်ခီဧါ+ မ့တမ့ၢ် သုကဘူၣ်ထီၣ်ဘါထီၣ်​ ပှၤအမိၢ်ဖိလၢ သုအိၣ်သုဆိးလၢ အကီၢ်ပူၤအံၤ အယွၤတဖၣ်ဧါန့ၣ်+ တနံၤအံၤ ဃုထၢလၢ သုနီၢ်ကစၢ်တက့ၢ်.+ ဘၣ်ဆၣ်​ မ့မ့ၢ် ယၤဒီးယဟံၣ်ဖိဃီဖိန့ၣ်​ ပကဘူၣ်ထီၣ်ဘါထီၣ်​ ယဟိဝၤယွၤလီၤ.”

၁၆ အဃိ ပှၤဂီၢ်မုၢ် စံးဆၢဝဲလၢ “လ့ၤတက့ၤ ပတပာ်တ့ၢ်ကွံာ် ယဟိဝၤယွၤ ဒီးဘူၣ်ထီၣ်ဘါထီၣ်​ ယွၤအဂၤတဖၣ်​ နီတဘျီဘၣ်. ၁၇ ပကစၢ်ယဟိဝၤယွၤ လၢအဒုးဟးထီၣ်ကွံာ်ပဝဲ ဒီးပပၢ်တဖၣ်လၢ တၢ်ကဲကုၢ်အကီၢ်+ လၢအမ့ၢ် အဲၤကူပတူးအပူၤန့ၣ်+ အဝဲမၤ တၢ်ပနီၣ်လီၤလးဖးဒိၣ်တဖၣ်​ လၢပမဲာ်ညါလီၤ.+ ဖဲပလဲၤတၢ်လၢ ကျဲဒီတဘိ ဒီးပလဲၤခီဂာ်တၢ်လၢ ပှၤကလုာ်ခဲလၢာ်အကျါအခါ အဝဲဒီသဒၢပှၤလီၤ.+ ၁၈ ဒီးယဟိဝၤယွၤ နီဟးထီၣ်ကွံာ်ပှၤခဲလၢာ် ဃုာ်ဒီးပှၤအမိၢ်ဖိ လၢအအိၣ်ပာ်စၢၤလၢကီၢ်ပူၤ လၢပမဲာ်ညါလီၤ. မ့ၢ်လၢယဟိဝၤမ့ၢ် ပကစၢ်ယွၤအဃိ ပဝဲစ့ၢ်ကီး ပကဘူၣ်ထီၣ်ဘါထီၣ်အီၤလီၤ.”

၁၉ ဒီးစီၤယိၤၡူ တဲဘၣ်ပှၤဂီၢ်မုၢ်လၢ “မ့ၢ်သုဆဲး ဘူၣ်ထီၣ်ဘါထီၣ်​ ယဟိဝၤယွၤ ကကဲနီၢ်ကီၢ်ဧါ. အဝဲမ့ၢ် ယွၤလၢအစီဆှံ+ ဒီးမ့ၢ်ယွၤလၢ အမၤလိာ်ပှၤလၢ ပှၤကဘၣ်​ တီဒီးအီၤလၢ သးဒီဖျၢၣ်လီၤ.+ သုမ့ၢ်တမၤဒ်န့ၣ်ဘၣ်န့ၣ်​ အဝဲတပျၢ်ကွံာ်သုတၢ်ကမၣ်​ ဒီးသုတၢ်ဒဲးဘးတဖၣ်ဘၣ်.+ ၂၀ သုမ့ၢ်ပာ်တ့ၢ်ကွံာ် ယဟိဝၤယွၤ ဒီးဘူၣ်ထီၣ်ဘါထီၣ်​ ယွၤအဂၤတဖၣ်န့ၣ်​ အဝဲကထီဒါက့ၤသု ဒီးအဝဲမ့ၢ်မၤဂ့ၤတၢ်လၢသုဖီခိၣ်​ လၢညါဘၣ်ဆၣ်​ အဝဲကမၤဟးဂီၤသုလီၤ.”+

၂၁ ဘၣ်ဆၣ်​ ပှၤဂီၢ်မုၢ်တဲ စီၤယိၤၡူလၢ “ပကဘူၣ်ထီၣ်ဘါထီၣ်​ ယဟိဝၤယွၤလီၤ.”+ ၂၂ အဃိ စီၤယိၤၡူတဲ ပှၤဂီၢ်မုၢ်လၢ “သုနီၢ်ကစၢ် မ့ၢ်ပှၤအုၣ်အသးလၢ သုဃုထၢလၢ သုကဘူၣ်ထီၣ်ဘါထီၣ်​ ယဟိဝၤယွၤလီၤ.”+ ဝံၤဒီး အဝဲသ့ၣ်တဲဝဲလၢ “မ့ၢ်, ပမ့ၢ်ပှၤအုၣ်အသးတဖၣ်လီၤ.”

၂၃ ဒီးစီၤယိၤၡူ တဲဝဲလၢ “မ့မ့ၢ်ဒ်န့ၣ်န့ၣ်​ တၢၤကွံာ်ယွၤအဂၤတဖၣ်​ လၢအအိၣ်လၢ သုကျါ ဒီးဘူၣ်ထီၣ်ဘါထီၣ်​ အံၣ်စရ့လးအကစၢ် ယဟိဝၤယွၤ လၢသုသးဒီဖျၢၣ်တက့ၢ်.” ၂၄ ဒီးပှၤဂီၢ်မုၢ်တဲ စီၤယိၤၡူလၢ “ပကဘူၣ်ထီၣ်ဘါထီၣ်​ ပကစၢ်ယဟိဝၤယွၤ ဒီးပကဒိကနၣ်​ အကလုၢ်လီၤ.”

၂၅ အဃိ ဖဲမုၢ်နံၤအဝဲန့ၣ်န့ၣ်​ စီၤယိၤၡူမၤတၢ်အၢၣ်လီၤအီလီၤဒီး ပှၤဂီၢ်မုၢ် ဒီးဒုးအိၣ်ထီၣ်​ တၢ်သိၣ်တၢ်သီလၢ အဝဲသ့ၣ်အဂီၢ် ဖဲဝ့ၢ်ၡက့ၣ်န့ၣ်လီၤ. ၂၆ ဝံၤဒီးစီၤယိၤၡူ ကွဲးလီၤတၢ်ကတိၤတဖၣ်အံၤ လၢကစၢ်ယွၤ အလံာ်တၢ်သိၣ်တၢ်သီအပူၤ+ ဒီးအဝဲဟံးန့ၢ် လၢၢ်ဖးဒိၣ်တဖျၢၣ်+ ဒီးဆီလီၤအီၤလၢ သ့ၣ်ဖးဒိၣ်တထူၣ်​ အဖီလာ်လီၤ. သ့ၣ်တထူၣ်အံၤ အိၣ်ဘူးဒီး ယဟိဝၤယွၤ အတၢ်စီဆှံအလီၢ်လီၤ.

၂၇ စီၤယိၤၡူ ဆဲးတဲဘၣ်​ ပှၤဂီၢ်မုၢ်ကိးဂၤဒဲးလၢ “ကွၢ်လၢအံၤ, လၢၢ်တဖျၢၣ်အံၤ ကဲထီၣ်ဝဲ တၢ်အုၣ်အသးလၢပဂီၢ်+ မ့ၢ်လၢအနၢ်ဟူဝဲ တၢ်ကိးမံၤဒဲးလၢ ယဟိဝၤယွၤ တဲဘၣ်ပှၤန့ၣ်လီၤ. ဒီးလၢၢ်တဖျၢၣ်အံၤ ကကဲထီၣ်​ တၢ်အုၣ်အသး ဒ်သိးသုသုတထီဒါက့ၤ သုကစၢ်ယွၤတဂ့ၤ အဂီၢ်လီၤ.” ၂၈ ဒီးစီၤယိၤၡူ ပျဲက့ၤပှၤဂီၢ်မုၢ်ဆူ အဝဲသ့ၣ်​ တဂၤစုာ်စုာ် အတၢ်န့ၢ်သါအအိၣ်လီၤ.+

၂၉ လၢခံ စီၤနိၣ်အဖိခွါ လၢအမ့ၢ် ယဟိဝၤယွၤ အခ့အပှၤ စီၤယိၤၡူန့ၣ်​ သံဝဲဖဲ အသးနံၣ်အိၣ်​ ၁၁၀ န့ၣ်လီၤ.+ ၃၀ ဒီးပှၤခူၣ်လီၤကွံာ်အီၤလၢ အတၢ်န့ၢ်သါ အဟီၣ်ကဝီၤ ဖဲဝ့ၢ်တံးမနးစ့ရၤ+ လၢအအိၣ်လၢ အ့ဖရဲၣ်အကစၢၢ်ကလိကျါ လၢကစၢၢ်ကၤဧၣ်​ အကလံၤစိးတခီန့ၣ်လီၤ. ၃၁ စီၤယိၤၡူ ဒီးပှၤသူၣ်က့သးပှၢ်တဖၣ်​ လၢအဆဲးအိၣ်မူဒံး လၢစီၤယိၤၡူ အလီၢ်ခံ လၢအထံၣ်ဘၣ်​ တၢ်ခဲလၢာ်လၢ ယဟိဝၤယွၤ မၤဝဲလၢ ပှၤအံၣ်စရ့လးဖိအဂီၢ်န့ၣ်​ ဖဲအဝဲသ့ၣ်​ အိၣ်မူဒံးအဆၢကတီၢ် ပှၤအံၣ်စရ့လးဖိ ဆဲးဘူၣ်ထီၣ်ဘါထီၣ်​ ယဟိဝၤယွၤလီၤ.+

၃၂ စီၤယိၤသးအဃံ+ လၢပှၤအံၣ်စရ့လးဖိ ဟဲက့ၤစိာ်ဝဲ လၢကီၢ်အဲၤကူပတူးန့ၣ်​ ပှၤခူၣ်လီၤအီၤဖဲ ဝ့ၢ်ၡက့ၣ်​ လၢဟီၣ်ခိၣ်တကဝီၤလၢ စီၤယၤကိာ်ပှ့ၤန့ၢ်ဝဲလၢ စ့ညၣ်အဘ့ၣ်​ ၁၀၀+ လၢစီၤၡက့ၣ်အပၢ် စီၤဃမိၢ် အဖိခွါတဖၣ်​ အအိၣ်လီၤ.+ ဒီးဟီၣ်ခိၣ်တကဝီၤအံၤ ကဲထီၣ်ဝဲ တၢ်န့ၢ်သါလၢ စီၤယိၤသး အဖိအလံၤတဖၣ်​ အဂီၢ်လီၤ.+

၃၃ ဒီးစီၤအၤဟရိၣ်​ အဖိခွါ စီၤအလၤဧစၢ် သံဝဲစ့ၢ်ကီးလီၤ.+ အဃိအဝဲသ့ၣ်​ ခူၣ်လီၤအီၤဖဲ အဖိခွါ စီၤဖံၤနဃၣ်+ အတၢ်လူၢ်ခိၣ်​ လၢအဝဲဒိးန့ၢ်ဘၣ်ဝဲလၢ အ့ဖရဲၣ်​ အကစၢၢ်ကလိကျါလီၤ.