၁ စီၤပၤ

၁၇ ပှၤတံးၡဘးဖိ စီၤအ့ၤလံယၤ*+ လၢအဟဲလၢ ကံးလဧးအဟီၣ်ကဝီၤပူၤန့ၣ်+ တဲစီၤအၤဃာ်လၢ “အံၣ်စရ့လး အကစၢ် ယဟိဝၤယွၤလၢ ယဘူၣ်ထီၣ်ဘါထီၣ်အီၤန့ၣ်* ယအၢၣ်လီၤတၢ်လၢ အမဲာ်ညါလၢ မ့တမ့ၢ် ဘၣ်လၢ ယဟ့ၣ်လီၤတၢ်ကလုၢ်ဘၣ်န့ၣ်​ လၢနံၣ်လၢ ကဟဲတဖၣ်အတီၢ်ပူၤ ပစီၤထံမ့ၢ်ဂ့ၤ, တၢ်စူၤမ့ၢ်ဂ့ၤ တလီၤဘၣ်ဝဲဘၣ်.”+

၂ ဒီးယဟိဝၤယွၤ တဲဘၣ်​ စီၤအ့ၤလံယၤလၢ ၃ “ဟးထီၣ်ကွံာ်ဖဲအံၤ ဒီးလဲၤလၢ မုၢ်ထီၣ်တခီ ဒီးအိၣ်ခူသူၣ်လၢ ကရံသး အတၢ်တြီၤပူၤ လၢထံကျိယၢ်ဒ့ၣ်​ အမုၢ်ထီၣ်တခီတက့ၢ်. ၄ နကဘၣ်အီထံလၢ ထံကျိဖိအပူၤ ဒီးယကမၤလိာ် စိးဝၣ်ဃးတဖၣ်​ ဒ်သိးကလဲၤစိာ်န့ၢ်နၤ တၢ်အီၣ်ဖဲန့ၣ်လီၤ.”+ ၅ တဘျီဃီန့ၣ်​ စီၤအ့ၤလံယၤ လဲၤဒီးမၤဝဲဒ် ယဟိဝၤယွၤ တဲအီၤအသိးလီၤ. အဝဲလဲၤအိၣ်လၢ ကရံသး အတၢ်တြီၤပူၤ လၢထံကျိယၢ်ဒ့ၣ်​ အမုၢ်ထီၣ်တခီန့ၣ်လီၤ. ၆ ဒီးစိးဝၣ်ဃးတဖၣ်​ ဟဲစိာ်န့ၢ်အီၤကိၣ်​ ဒီးတၢ်ညၣ်​ ကိးဂီၤဒဲးကိးဟါဒဲး ဒီးအဝဲအီထံလၢ ထံကျိဖိအပူၤလီၤ.+ ၇ ဘၣ်ဆၣ်​ လၢကီၢ်ပူၤန့ၣ်​ တၢ်တစူၤဘၣ်အဃိ လၢခံ ထံကျိဖိ လီၤသံးကွံာ်ဝဲလီၤ.+

၈ ဒီးယဟိဝၤယွၤ တဲဘၣ်​ စီၤအ့ၤလံယၤလၢ ၉ “ဂဲၤဆၢထၢၣ်​ လဲၤလၢ ဝ့ၢ်စၤရဖၤသး လၢအအိၣ်လၢ ဝ့ၢ်စံဒိၣ်​ အတၢ်ပၢဖီလာ် ဒီးအိၣ်ဖဲန့ၣ်တက့ၢ်. ယကမၤလိာ် မုၣ်ကမဲဖဲန့ၣ်တဂၤ ဒ်သိး ကဒုးအီၣ်​ ဒုးအီနၤလီၤ.”+ ၁၀ အဃိ အဝဲဂဲၤဆၢထၢၣ်​ လဲၤဝဲလၢ ဝ့ၢ်စၤရဖၤသးလီၤ. ဖဲအဝဲလဲၤတုၤလၢ ဝ့ၢ်အကျဲနုာ်လီၤအခါ အထံၣ်ဝဲ မုၣ်ကမဲတဂၤ ထၢထီၣ်သ့ၣ်မုၣ်လီၤ. ဒီးအဝဲကိးဝဲ မုၣ်ကမဲတဂၤန့ၣ်​ ဒီးတဲလၢ “ဝံသးစူၤ ဟဲစိာ်ဒုးအီယၤ ထံတခွးဖိမီၤ.”+ ၁၁ ဖဲအဝဲ လဲၤဘျၢၣ်ထံအခါ စီၤအ့ၤလံယၤ တဲအီၤလၢ “ဝံသးစူၤ ဟဲစိာ်န့ၢ်ယၤ ကိၣ်တက့နီၤ.” ၁၂ ဒီးမုၣ်ကမဲန့ၣ်​ တဲဝဲလၢ “ယအၢၣ်လီၤတၢ်လၢ ယဟိဝၤယွၤ လၢအမူဝဲတဂၤ အမဲာ်ညါလၢ ယကိၣ်တအိၣ်ဘၣ်. လၢကိဖးဒိၣ်အပူၤန့ၣ်​ ယကိၣ်ကမူၣ်​ အိၣ်ထဲတစှီၤဖိ ဒီးလၢကိဆံးဆံးဖိအပူၤန့ၣ်​ ယသိအိၣ်ထဲတစဲးဖိလီၤ.+ ခဲအံၤ ယဟဲထၢသ့ၣ်မုၣ်​ ဝံၤဒီးယကက့ၤ မၤအီၣ်တၢ်တမံၤမံၤလၢ ယၤဒီးယဖိခွါအဂီၢ် ဒီးပအီၣ်တၢ်မ့ၢ်ဝံၤန့ၣ်​ ပကသံလီၤ.”

၁၃ ဒီးစီၤအ့ၤလံယၤ တဲဘၣ်အီၤလၢ “ဘၣ်ယိၣ်တၢ်တဂ့ၤ. က့ၤမၤဒ် နတဲအသိးဟီ. ဘၣ်ဆၣ်​ ဟံးန့ၢ်တၢ်လၢ အအိၣ်ဒီးနၤဖဲန့ၣ်​ ဒီးတ့ဆိန့ၢ်ယၤ ကိၣ်ဖိတလိၣ်​ ဒီးဟဲစိာ်လၢ ယအိၣ်တက့ၢ်. ဝံၤဒီး နမၤအီၣ်တၢ်လၢ နၤဒီးနဖိခွါအဂီၢ် တမံၤမံၤသ့လီၤ. ၁၄ ဒီးအံၣ်စရ့လး အကစၢ် ယဟိဝၤယွၤ တဲဝဲလၢ ‘ကိၣ်ကမူၣ်​ လၢအအိၣ်လၢ ကိဖးဒိၣ်အပူၤန့ၣ်​ တလၢာ်ကွံာ်ဘၣ်​ ဒီးသိလၢအအိၣ်လၢ ကိဆံးဆံးဖိအပူၤန့ၣ်​ တလၢာ်ကွံာ်ဘၣ်​ တုၤလၢ မုၢ်နံၤလၢ ယဟိဝၤယွၤ ဒုးစူၤလီၤ မူခိၣ်လၢ ဟီၣ်ခိၣ်လိၤလီၤ.’”+ ၁၅ အဃိ မုၣ်ကမဲန့ၣ်​ လဲၤမၤဝဲဒ် စီၤအ့ၤလံယၤ တဲအီၤအသိးလီၤ. အဝဲဒီး အဟံၣ်ဖိဃီဖိ ဃုာ်ဒီး စီၤအ့ၤလံယၤ အီၣ်ဘၣ်တၢ် တဘျုးသီညါလီၤ.+ ၁၆ ဒ်ယဟိဝၤယွၤ တဲပာ်စၢၤ စီၤအ့ၤလံယၤအသိး ကိၣ်ကမူၣ်​ လၢအအိၣ်လၢ ကိဖးဒိၣ်အပူၤန့ၣ်​ တလၢာ်ကွံာ်ဘၣ်​ ဒီးသိလၢအအိၣ်လၢ ကိဆံးဆံးဖိအပူၤန့ၣ်​ တလၢာ်ကွံာ်ဘၣ်.

၁၇ လၢခံ ဟံၣ်ကစၢ်မုၣ်န့ၣ်​ အဖိခွါ ဆိးက့ထီၣ်​ ဒီးအဆိးက့ နးထီၣ်​ တုၤဒၣ်လဲာ် အတကသါလၢၤဘၣ်.+ ၁၈ အဃိ အဝဲတဲ စီၤအ့ၤလံယၤလၢ “ယွၤလၢ အမ့ၢ်အတီ အပှၤတဂၤဧၢ, ယမၤကမၣ်ဘၣ်နၤဒ်လဲၣ်. မ့ၢ်နဟဲ ဒ်သိးနကဒုးသ့ၣ်နီၣ်ထီၣ်ယၤလၢ ယတၢ်ကမၣ်​ ဒီးမၤသံ ယဖိခွါအဂီၢ်ဧါ.”+ ၁၉ စီၤအ့ၤလံယၤ တဲအီၤလၢ “ဟ့ၣ်လီၤယၤ နဖိခွါ.” ဒီးအဝဲဟံးထီၣ်အီၤ လၢအမိၢ်အစုတီၤလိၤ ဒီးလဲၤစိာ်အီၤလၢ ဒၢးလၢဟံၣ်ခိၣ်​ ဖဲအဝဲအိၣ်ဝဲအလီၢ် ဒီးပာ်လီၤအီၤလၢ အလီၢ်မံခိၣ်န့ၣ်လီၤ.+ ၂၀ စီၤအ့ၤလံယၤ ကိးထီၣ်​ ယဟိဝၤယွၤလၢ “အိ ယကစၢ် ယဟိဝၤယွၤဧၢ,+ မုၣ်ကမဲလၢ ယဟဲအိၣ်လၢ အဟံၣ်တဂၤအံၤ မ့ၢ်နဒုးလီၤဘၣ်စ့ၢ်ကီးအီၤလၢ တၢ်နးတၢ်ဖှီၣ်​ ခီဖျိ နပျဲသံ အဖိခွါန့ၣ်ဧါ.” ၂၁ ဝံၤဒီး စီၤအ့ၤလံယၤ ဖိးဟုဖိသၣ်သၢဘျီ ဒီးဃ့ထုကဖၣ်ဝဲလၢ ယဟိဝၤယွၤ အအိၣ်လၢ “အိ ယကစၢ် ယဟိဝၤယွၤဧၢ, ဝံသးစူၤ မ်ဖိသၣ်တဂၤအံၤ သမူထီၣ်က့ၤတက့ၢ်.” ၂၂ ယဟိဝၤယွၤ ဒိကနၣ်​ စီၤအ့ၤလံယၤ အတၢ်ထုကဖၣ်+ ဒီးဖိသၣ်တဂၤန့ၣ်​ သမူထီၣ်က့ၤဝဲလီၤ.+ ၂၃ စီၤအ့ၤလံယၤ ဟံးထီၣ်​ ဖိသၣ်လၢ အအိၣ်လၢ ဒၢးလၢဟံၣ်ခိၣ်ဒီးဟဲက့ၤစိာ်လီၤအီၤလၢ ဟံၣ်ပူၤ ဒီးဟ့ၣ်လီၤအီၤလၢ အမိၢ်အအိၣ်န့ၣ်လီၤ. ဒီးစီၤအ့ၤလံယၤ တဲဝဲလၢ “ကွၢ်လၢအံၤ, နဖိခွါ မူထီၣ်က့ၤလံ.”+ ၂၄ ဒီးပိာ်မုၣ်န့ၣ်​ တဲစီၤအ့ၤလံယၤလၢ “ခဲအံၤ ယသ့ၣ်ညါလၢ နမ့ၢ် ကစၢ်ယွၤ အပှၤနီၢ်ကီၢ်+ ဒီးယဟိဝၤယွၤ အတၢ်ကတိၤလၢ နတဲတဖၣ်န့ၣ်​ မ့ၢ်ဝဲတီဝဲလီၤ.”