မၤတၢ်
၉ စီၤစီလူးန့ၣ် ဆဲးတဲပျံၤတဲဖုး ကစၢ် အပျဲၢ်အဘီၣ်တဖၣ် ဒီးသးဆူၣ်လၢ ကမၤသံ အဝဲသ့ၣ်အဃိ+ အလဲၤဝဲလၢ ပှၤလုၢ်တၢ်ခိၣ် အဒိၣ်ကတၢၢ်တဂၤ အအိၣ်လီၤ. ၂ အဝဲဃ့န့ၢ်ဝဲ လံာ်တဖၣ်လၢ အကလဲၤစိာ်ဝဲလၢ ဘူၣ်ဘျီၣ်တဖၣ်လၢ ဝ့ၢ်ဒၤမ့ၤစ့းအပူၤလီၤ. ခီဖျိလံာ်တဖၣ်အံၤအဃိ အဝဲဒိးန့ၢ်ဘၣ် တၢ်ခွဲးတၢ်ယာ်လၢ အဝဲမ့ၢ်ထံၣ်န့ၢ်ပှၤလၢ အဘၣ်ထွဲလိာ်သးဒီး တၢ်မ့ၢ်တၢ်တီအကျဲန့ၣ်*+ အမ့မ့ၢ်ပိာ်မုၣ်မ့ၢ်ဂ့ၤ, ပိာ်ခွါမ့ၢ်ဂ့ၤ အဝဲ စၢဃာ် အဝဲသ့ၣ်ဒီး ဟဲက့ၤကိး အဝဲသ့ၣ်လၢ ဝ့ၢ်ယရူၤၡလ့ၣ် အပူၤသ့လီၤ.
၃ ဖဲအဝဲလဲၤတၢ် ဘူးကတုၤလၢ ဝ့ၢ်ဒၤမ့ၤစ့းအခါ တၢ်ကပီၤလၢ မူခိၣ်ဟဲလီၤဝဲ သတူၢ်ကလာ် ဒီးကပီၤဝးတရံးအီၤလီၤ.+ ၄ ဒီးအဝဲလီၤဃံၢ်လၢ ဟီၣ်ခိၣ်အလိၤ ဒီးနၢ်ဟူဝဲ တၢ်ကလုၢ်တဲအီၤလၢ “စီၤစီလူးဧၢ, စီၤစီလူးဧၢ, နမၤအၢမၤနးယၤ ဘၣ်လဲၣ်.” ၅ စီၤစီလူး သံကွၢ်ဝဲလၢ “ကစၢ်ဧၢ, နမ့ၢ် မတဂၤလဲၣ်.” အဝဲတဲဝဲလၢ “ယမ့ၢ် ယ့ၣ်ၡူးလၢ+ နမၤအၢမၤနးအီၤလီၤ.+ ၆ ဘၣ်ဆၣ် ဂဲၤဆၢထၢၣ် ဒီးလဲၤနုာ်လီၤလၢ ဝ့ၢ်ပူၤတက့ၢ်. နကဘၣ်မၤ တၢ်မနုၤလဲၣ်န့ၣ် ပှၤတဂၤဂၤ ကတဲဘၣ်နၤလီၤ.” ၇ မ့မ့ၢ် ပှၤလၢ အလဲၤတၢ်ဒီးအီၤတဖၣ်န့ၣ် နၢ်ဟူဝဲ တၢ်ကလုၢ်သီၣ်ထီၣ် ဘၣ်ဆၣ် တထံၣ်ပှၤနီတဂၤဘၣ်.+ အဃိ အဝဲသ့ၣ် ဆၢထၢၣ်ဝဲဒ်န့ၣ် ဒီးတဲတၢ် တထီၣ်လၢၤဘၣ်. ၈ ဒီးစီၤစီလူး ဂဲၤဆၢထၢၣ်လၢ ဟီၣ်ခိၣ်အလိၤ ဒီးအမဲာ်ချံ အိးထီၣ်အသး ဘၣ်ဆၣ် အဝဲတထံၣ် တၢ်နီတမံၤဘၣ်. အဃိ အဝဲသ့ၣ် မူၤအီၤလၢအစု ဒီးလဲၤဆှၢအီၤလၢ ဝ့ၢ်ဒၤမ့ၤစ့းအပူၤလီၤ. ၉ ဒီးလၢသၢသီ အတီၢ်ပူၤန့ၣ် အဝဲတထံၣ်တၢ် နီတမံၤဘၣ်+ ဒီးအဝဲ တအီၣ်တၢ်အီတၢ်ဘၣ်.
၁၀ ဒီးယ့ၣ်ၡူး အပျဲၢ်အဘီၣ်တဂၤလၢ အမံၤမ့ၢ် စီၤအနၤနံန့ၣ်+ အိၣ်ဝဲလၢ ဝ့ၢ်ဒၤမ့ၤစ့းအပူၤလီၤ. ဒီးလၢ တၢ်ထံၣ်လၢညါခီအပူၤန့ၣ် ကစၢ်ကိးအီၤလၢ “စီၤအနၤနံဧၢ.” ဒီးအဝဲကိးဆၢဝဲလၢ “မ့ၢ်, ကစၢ်ဧၢ.” ၁၁ ကစၢ်တဲအီၤလၢ “ဂဲၤဆၢထၢၣ် ဒီးလဲၤလၢကျဲလၢ ပှၤကိးအီၤလၢ ကျဲဘျၢ ဒီးဃုကွၢ် ပှၤတၢ်စူးဖိတဂၤလၢ အမံၤမ့ၢ် စီၤစီလူး+ လၢအအိၣ်လၢ စီၤယူဒၤအဟံၣ်ပူၤ တက့ၢ်. ခဲအံၤန့ၣ် အဝဲဃ့ထုကဖၣ်တၢ် ၁၂ ဒီးလၢတၢ်ထံၣ်လၢညါခီအပူၤန့ၣ် အထံၣ်ဝဲ နလဲၤပာ်ထီၣ်နစုလၢ အလိၤဒ်သိး အမဲာ်ကထံၣ်ထီၣ်က့ၤတၢ် အဂီၢ်လီၤ.”+ ၁၃ ဘၣ်ဆၣ် စီၤအနၤနံ တဲဆၢဝဲလၢ “ကစၢ်ဧၢ, ယနၢ်ဟူ ပှၤတဂၤအံၤအဂ့ၢ်လၢ ပှၤအါဂၤအအိၣ်လီၤ. အဝဲမၤဆါ နပှၤစီဆှံတဖၣ်လၢ ဝ့ၢ်ယရူၤၡလ့ၣ်အပူၤ ၁၄ ဒီးပှၤလုၢ်တၢ်ဒိၣ်အခိၣ်တဖၣ် ဟ့ၣ်စ့ၢ်ကီးအီၤ တၢ်စိတၢ်ကမီၤလၢ ကဖီၣ်ဝဲ ပှၤခဲလၢာ်လၢ အကိးထီၣ် နမံၤလီၤ.”+ ၁၅ ဘၣ်ဆၣ် ကစၢ်တဲဘၣ်အီၤလၢ “လဲၤဟီ, ပှၤတဂၤအံၤ မ့ၢ်ပှၤလၢ ယဃုထၢထီၣ်အီၤ*+ ဒ်သိး ကလဲၤစံၣ်တဲၤတဲလီၤယမံၤ လၢပှၤကလုာ်တဖၣ်,+ စီၤပၤတဖၣ်,+ ဒီးပှၤအံၣ်စရ့လးဖိတဖၣ် အအိၣ်လီၤ. ၁၆ ဒီးအဝဲကတူၢ်ဘၣ် တၢ်နးတၢ်ဖှီၣ်လၢ ယမံၤအဃိ ထဲလဲၣ်န့ၣ် ယကဒုးနဲၣ်အီၤ ပျီပျီလီၤ.”+
၁၇ အဃိ စီၤအနၤနံ လဲၤနုာ်လီၤလၢဟံၣ်ပူၤ ဒီးပာ်အစုလၢ စီၤစီလူးအလိၤ ဒီးတဲဝဲလၢ “ဒီပုၢ်ဝဲၢ် စီၤစီလူးဧၢ, ဖဲနဟဲလၢကျဲအခါ ကစၢ်ယ့ၣ်ၡူးလၢ အလီၣ်ဖျါထီၣ်အသးလၢ နမဲာ်ညါတဂၤန့ၣ် မၢလီၤယၤဒ်သိး နမဲာ် ကထံၣ်ထီၣ်က့ၤတၢ် ဒီးဒ်သိး နကလၢထီၣ်ပှဲၤထီၣ်ဒီး သးစီဆှံအဂီၢ်လီၤ.”+ ၁၈ တဘျီဃီန့ၣ် တၢ်လၢအလီၤဂာ်ဒီး ညၣ်သဘျံးတဖၣ် လီၤတဲာ်ကွံာ်လၢ စီၤစီလူးအမဲာ်ချံလိၤ ဒီးအဝဲ ထံၣ်ထီၣ်က့ၤတၢ်လီၤ. ဒီးအဝဲ ဂဲၤဆၢထၢၣ် ဒီးဒိးဘျၢအသးလီၤ. ၁၉ ဒီးအဝဲအီၣ်တၢ်အီၣ် ဒီးအဂံၢ်အဘါ ဆူၣ်ထီၣ်က့ၤဝဲလီၤ.
အဝဲဆဲးအိၣ်ဒီး ယ့ၣ်ၡူး အပျဲၢ်အဘီၣ်တဖၣ်လၢ ဝ့ၢ်ဒၤမ့ၤစ့းအပူၤ တဘျုးသီညါ.+ ၂၀ ဒီးစးထီၣ်ဖဲန့ၣ်န့ၣ် အဝဲလဲၤလၢ ဘူၣ်ဘျီၣ်တဖၣ် ဒီးစံၣ်တဲၤတဲလီၤတၢ်လၢ ယ့ၣ်ၡူးန့ၣ် မ့ၢ်ဝဲကစၢ်ယွၤ အဖိခွါလီၤ. ၂၁ ဘၣ်ဆၣ် ပှၤလၢအနၢ်ဟူအီၤ ကိးဂၤဒဲးန့ၣ် ကမၢကမၣ်ဝဲအဃိ အဝဲသ့ၣ်တဲဝဲလၢ “ပှၤတဂၤအံၤ မ့ၢ်ပှၤလၢ အမၤနးမၤဖှီၣ် ပှၤလၢအကိးထီၣ် ယ့ၣ်ၡူးအမံၤလၢ ဝ့ၢ်ယရူၤၡလ့ၣ်အပူၤတဖၣ်နးမး တမ့ၢ်ဧီၤ.+ အဝဲဟဲဖဲအံၤ ဒ်သိး ကက့ၤဖီၣ်ပှၤတဖၣ်န့ၣ် ဒီးကက့ၤဆှၢဝဲလၢ ပှၤလုၢ်တၢ်ဒိၣ်အခိၣ်တဖၣ် အအိၣ်အဂီၢ်ဧါသၢၤ.”+ ၂၂ ဘၣ်ဆၣ် စီၤစီလူး အတၢ်သူၣ်ဆူၣ်သးဆူၣ် အါထီၣ်မးအါထီၣ် ဒီးခီဖျိလၢ အဝဲပာ်ဖျါထီၣ်ဝဲ လီၤတံၢ်လီၤဆဲးလၢ ယ့ၣ်ၡူးမ့ၢ်ခရံာ်အဃိ ပှၤယူဒၤဖိတဖၣ်လၢ ဝ့ၢ်ဒၤမ့ၤစ့းအပူၤန့ၣ် ကမၢကမၣ်ဝဲ ဒီးတဲဆၢအီၤ တဘၣ်လၢၤဘၣ်.+
၂၃ ပူၤကွံာ်အါနံၤအါသီ ဝံၤအလီၢ်ခံ ပှၤယူဒၤဖိတဖၣ် ကူၣ်ထီၣ်သကိးတၢ် ဒ်သိးကမၤသံအီၤလီၤ.+ ၂၄ ဘၣ်ဆၣ် အဝဲသ့ၣ် အတၢ်ကူၣ်ထီၣ်န့ၣ် စီၤစီလူး သ့ၣ်ညါထီၣ်ဝဲလီၤ. ဒီးဒ်သိး အဝဲသ့ၣ် ကမၤသံအီၤအဂီၢ် အဝဲသ့ၣ်ခိးကွၢ်တၢ် ဖဲဝ့ၢ်အတြဲၤတဖၣ် အခီၣ်ထံး လၢမုၢ်ဆါဒီးလၢမုၢ်နၤလီၤ. ၂၅ အဃိ အပျဲၢ်အဘီၣ်တဖၣ် ဟံးန့ၢ်အီၤဒီး ထၢနုာ်လီၤအီၤလၢ ဃၤတဖျၢၣ်အပူၤ ဒီးလၢမုၢ်နၤခီန့ၣ် စဲၤလီၤအီၤလၢ ဝ့ၢ်ခိၣ်ဒူ အပဲတြီဖိလီၤ.+
၂၆ ဖဲအလဲၤတုၤဝဲလၢ ဝ့ၢ်ယရူၤၡလ့ၣ်အခါ+ အဝဲဂုာ်ကျဲးစၢးဝဲ ဒ်သိး ကမၤသကိးတၢ်ဒီး ယ့ၣ်ၡူး အပျဲၢ်အဘီၣ်တဖၣ် ဘၣ်ဆၣ် အဝဲသ့ၣ်ခဲလၢာ် ပျံၤအီၤ, မ့ၢ်လၢ အဝဲသ့ၣ် တနာ်အီၤလၢ အမ့ၢ် ယ့ၣ်ၡူးအပျဲၢ်အဘီၣ် တဂၤဘၣ် အဃိလီၤ. ၂၇ အဃိ စီၤဘၢ်နါဘၤ+ မၤစၢၤအီၤ ဒီးလဲၤဆှၢအီၤလၢ တၢ်မၢဖိတဖၣ် အအိၣ်လီၤ. ဒီးစီၤဘၢ်နါဘၤ တဲဘၣ်တၢ်မၢဖိတဖၣ် လီၤတံၢ်လီၤဆဲးလၢ စီၤစီလူး ထံၣ်ဘၣ်ကစၢ် လၢကျဲအဂ့ၢ်+ ဒီးကစၢ်တဲတၢ်ဒီးစီၤစီလူး ဒီးစီၤစီလူး စံၣ်တဲၤတဲလီၤတၢ်ဒူဒူလၢ ယ့ၣ်ၡူး အမံၤအပူၤ လၢဝ့ၢ်ဒၤမ့ၤစ့းလီၤ.+ ၂၈ အဃိ စီၤစီလူး ဆဲးအိၣ်ဒီးအဝဲသ့ၣ် ဒီးဟးဝဲလၢ ဝ့ၢ်ယရူၤၡလ့ၣ်အပူၤ ပျီပျီ ဒီးစံၣ်တဲၤတဲလီၤတၢ် ဒူဒူလၢ ကစၢ်အမံၤအပူၤလီၤ. ၂၉ အဝဲတဲသကိးတၢ်ဒီး ပှၤယူဒၤဖိတဖၣ်လၢ အတဲကြံးကျိာ် ဒီးတဲအါလိာ်သးဒီး အဝဲသ့ၣ် ဒီးအဝဲသ့ၣ် ဃုကျဲလၢ ကမၤသံအီၤ အဂီၢ်လီၤ.+ ၃၀ ဖဲဒီပုၢ်ဝဲၢ်တဖၣ် နၢ်ဟူဝဲ တၢ်ဂ့ၢ်အံၤအခါ အဝဲသ့ၣ်လဲၤကိးလီၤအီၤလၢ ဝ့ၢ်ကဲၤစါရံၤ ဒီးဆှၢကွံာ်အီၤလၢ ဝ့ၢ်တၢ်စူးလီၤ.+
၃၁ ဒီးတၢ်အိၣ်ဖှိၣ်ဖိခဲလၢာ်လၢ ယူဒၤအဟီၣ်ကဝီၤ, ကၤလံၤလါ ဒီးၡၤမရံအပူၤန့ၣ်+ အိၣ်ဘၣ် မုာ်မုာ်ခုၣ်ခုၣ် ဒီးအဝဲသ့ၣ် အဂံၢ်ဆူၣ်ထီၣ်ဝဲလီၤ. ဒီးတၢ်အိၣ်ဖှိၣ်ဖိတဖၣ်န့ၣ် ပာ်ဖျါထီၣ် တၢ်ပျံၤယဟိဝၤယွၤ* ဒီးဒိးန့ၢ်ဘၣ် တၢ်ဂံၢ်တၢ်ဘါလၢ သးစီဆှံအအိၣ်အဃိ+ အဝဲသ့ၣ် အနီၣ်ဂံၢ်ဒံးယံာ်ဒံးအါထီၣ်ဝဲလီၤ.
၃၂ ဖဲစီၤပ့းတရူး ဟးဝဲလၢ တၢ်လီၢ်ဝးဝးအခါ အဝဲလဲၤတုၤလၢ ပှၤစီဆှံတဖၣ်လၢ အအိၣ်လၢ ဝ့ၢ်လူးဒၤအပူၤ အအိၣ်စ့ၢ်ကီးလီၤ.+ ၃၃ ဒီးအဝဲထံၣ်ဝဲ ပှၤတဂၤလၢ အမံၤမ့ၢ်ဝဲ စီၤအဲၤန့းလီၤ. ပှၤတဂၤအံၤ မ့ၢ်လၢ အစုလီၤဘျ့ ခီၣ်လီၤဘျ့အဃိ အဝဲမံနီၤလၢ လီၢ်မံပူၤန့ၣ် အိၣ်ဝဲဃိးနံၣ်လံ. ၃၄ စီၤပ့းတရူး တဲဘၣ်အီၤလၢ “စီၤအဲၤန့းဧၢ, ယ့ၣ်ၡူးခရံာ် မၤဘျါက့ၤနၤလီၤ.+ ဂဲၤဆၢထၢၣ်ဒီး ချံးထီၣ်နလီၢ်မံတက့ၢ်.”+ ဒီးစီၤအဲၤန့း ဂဲၤဆၢထၢၣ်ဝဲ တဘျီဃီလီၤ. ၃၅ ဖဲပှၤခဲလၢာ်လၢ အအိၣ်လၢ ဝ့ၢ်လူးဒၤဒီးၡၤရိၣ် အတၢ်ပၢၤခိၣ် ထံၣ်အီၤအခါ အဝဲသ့ၣ်ကဲထီၣ် ပှၤလၢအစူၢ်က့ၤနာ်က့ၤ ကစၢ်လီၤ.
၃၆ ဒီးလၢ ဝ့ၢ်ယၤဖိၤအပူၤန့ၣ် ယ့ၣ်ၡူး အပျဲၢ်အဘီၣ် လၢအမံၤမ့ၢ်ဝဲ နီၢ်တဘံၤသါ အိၣ်ဝဲတဂၤလီၤ. ဒီးအမံၤန့ၣ် တၢ်ကွဲးကျိာ်ထံက့ၤအီၤလၢ “နီၢ်ဒီၢ်ကါ” လီၤ.* အဝဲမၤဂ့ၤတၢ် အိၣ်ဒီဒူၣ် ဒီးဟ့ၣ်မၤစၢၤ ပှၤဖှီၣ်ဖိယာ်ဖိတဖၣ်လီၤ. ၃၇ ဘၣ်ဆၣ် ဖဲန့ၣ်အဆၢကတီၢ် အဝဲဆိးက့ထီၣ်ဒီး သံဝဲလီၤ. အဃိ အဝဲသ့ၣ် ဒုးလုၢ်အီၤထံ ဒီးပာ်အီၤလၢ ဒၢးလၢဟံၣ်ဖီခိၣ်လီၤ. ၃၈ ဒီးဝ့ၢ်လူးဒၤန့ၣ် အိၣ်ဘူးဝဲဒီး ဝ့ၢ်ယၤဖိၤအဃိ ဖဲယ့ၣ်ၡူး အပျဲၢ်အဘီၣ်တဖၣ် နၢ်ဟူဝဲလၢ စီၤပ့းတရူးအိၣ်လၢ ဝ့ၢ်လူးဒၤအခါ အဝဲသ့ၣ် ဆှၢလီၤ ပှၤပိာ်ခွါခံဂၤ ဒ်သိး ကဃ့ကညးအီၤလၢ “ဝံသးစူၤ ဟဲလၢပအိၣ် လၢအဆိအချ့တက့ၢ်.” ၃၉ အဃိ စီၤပ့းတရူး လဲၤပိာ် အဝဲသ့ၣ်အခံလီၤ. ဖဲအဝဲ လဲၤတုၤအခါ အဝဲသ့ၣ် လဲၤဆှၢထီၣ်အီၤလၢ ဒၢးလၢ ဟံၣ်ဖီခိၣ်လီၤ. ဒီးမုၣ်ကမဲလၢ အအိၣ်ဖဲန့ၣ် ကိးဂၤဒဲးန့ၣ် ဟဲလၢ အအိၣ်ဒီးဟီၣ်ဝဲ ဒီးဒုးနဲၣ်အီၤ တၢ်ကူတၢ်ကၤတဖၣ်လၢ နီၢ်ဒီၢ်ကါ ဆးန့ၢ်အဝဲသ့ၣ် ဖဲအဝဲအိၣ်မူဒံး အဆၢကတီၢ်လီၤ. ၄၀ ဒီးစီၤပ့းတရူး မၢပှၤခဲလၢာ် ဟးထီၣ်ကွံာ်လၢ တၢ်ချၢလီၤ.+ ဒီးအဝဲ ချံးလီၤအခီၣ်ဒီး ဃ့ထုကဖၣ်တၢ် ဝံၤဒီး ဃၣ်ဃီၤအသးလၢ ပှၤသံစိၣ်အအိၣ် ဒီးတဲဝဲလၢ “နီၢ်တဘံၤသါဧၢ, ဂဲၤဆၢထၢၣ်တက့ၢ်.” ဒီးအဝဲ စီၣ်ထီၣ်အမဲာ် ဒီးဖဲအထံၣ်ဝဲ စီၤပ့းတရူးအခါ အဝဲဂဲၤထၢၣ်ဆ့ၣ်နီၤဝဲလီၤ.+ ၄၁ စီၤပ့းတရူး ယူာ်ဃီၤအစု ဒီးတွံၢ်ထီၣ်အီၤ ဒီးကိးဃီၤဝဲ ပှၤစီဆှံတဖၣ် ဒီးမုၣ်ကမဲတဖၣ် ဒ်သိးကထံၣ်ဝဲလၢ အမူထီၣ်က့ၤဝဲလီၤ.+ ၄၂ တၢ်ဂ့ၢ်တခါအံၤ ဟူထီၣ်ဝဲလၢ ဝ့ၢ်ယၤဖိၤအပူၤဝးဝး ဒီးပှၤအါဂၤ ကဲထီၣ် ပှၤစူၢ်က့ၤနာ်က့ၤ ကစၢ်လီၤ.+ ၄၃ ဒီးစီၤပ့းတရူး ဆဲးအိၣ်ဝဲလၢ ဝ့ၢ်ယၤဖိၤ လၢစီၤၡံမိၣ်လၢ+ အမၤတၢ်မၤလၢဘၣ်ဃးဒီး ဆၣ်ဖိကီၢ်ဖိအဘ့ၣ်တဂၤန့ၣ် အဟံၣ်ပူၤ တဘျုးသီညါလီၤ.