၁ စီၤပၤ

၁၄ ဖဲန့ၣ်အခါ စီၤယၤရၤဘၣ်​ အဖိခွါ စီၤအဘံယၤ ဆိးက့ထီၣ်ဝဲလီၤ. ၂ အဃိ စီၤယၤရၤဘၣ်​ တဲဘၣ်အမါလၢ “ဝံသးစူၤ မၤလီၤဆီထီၣ်နသး ဒ်သိး ပှၤသုတသ့ၣ်ညါလၢ နမ့ၢ်ယမါတဂ့ၤ ဒီးလဲၤလၢ ဝ့ၢ်ၡံလိၤ လၢဝံအဃံယၤ အအိၣ်တက့ၢ်. အဝဲမ့ၢ် ပှၤတဂၤလၢ အတဲပာ်စၢၤဝဲလၢ ယကကဲထီၣ်​ စီၤပၤလၢ ပှၤဂီၢ်မုၢ်တဖၣ်အံၤ အဖီခိၣ်လီၤ.+ ၃ လဲၤစိာ်န့ၢ်အီၤ ကိၣ်အလိၣ်တဆံ, ကိၣ်ဘ့ၣ်ဘၣ်တဖၣ်​ ဒီးကနဲစီ တကိတက့ၢ်. ဒီးအဝဲကတဲနၤလၢ တၢ်ကမၤအသးဒီး ပဖိခွါဒ်လဲၣ်န့ၣ်လီၤ.”

၄ စီၤယၤရၤဘၣ်​ အမါမၤဝဲဒ် အဝၤတဲအီၤအသိးလီၤ. အဝဲလဲၤလၢဝ့ၢ်ၡံလိၤ+ ဒီးလဲၤတုၤဝဲလၢ ဝံအဃံယၤ အဟံၣ်လီၤ. ဒီးစီၤအဃံယၤန့ၣ်​ အသးပှၢ်ထီၣ်​ ဖးဒိၣ်လံအဃိ အမဲာ်ချံ တထံၣ်တၢ်လၢၤဘၣ်.

၅ ဘၣ်ဆၣ်​ ယဟိဝၤယွၤ တဲပာ်စၢၤ စီၤအဃံယၤလၢ “စီၤယၤရၤဘၣ်​ အမါ ဟဲလၢနအိၣ်​ ဒ်သိး ကသံကွၢ်နၤ ဘၣ်ဃး အဖိခွါမ့ၢ်လၢ အဆိးက့အဃိလီၤ. နကဘၣ်တဲအီၤ မနုၤလဲၣ်န့ၣ်​ ယကတဲဘၣ်နၤ. အဟဲမ့ၢ်တုၤန့ၣ်​ အတပာ်ဖျါထီၣ်လၢ အမ့ၢ်မတဂၤလဲၣ်န့ၣ်ဘၣ်.”

၆ ဖဲစီၤအဃံယၤ နၢ်ဟူ စီၤယၤရၤဘၣ် အမါဟးသီၣ်ဝဲဖဲ ကျဲနုာ်လီၤအလီၢ်အခါ အတဲဘၣ်အီၤလၢ “စီၤယၤရၤဘၣ်​ အမါဧၢ, ဟဲနုာ်လီၤဟီ. ဘၣ်မနုၤအဃိ နမၤလီၤဆီထီၣ်နသးလဲၣ်. ကစၢ်ယွၤ မၢယတဲဘၣ်နၤ တၢ်ကစီၣ်လၢ အဆူၣ်အကိၤတခါလီၤ. ၇ က့ၤတဲဘၣ်​ စီၤယၤရၤဘၣ်ဒ်အံၤ, ‘အံၣ်စရ့လး အကစၢ် ယဟိဝၤယွၤ တဲဝဲလၢ “ယဃုထၢထီၣ်နၤ လၢနပှၤဂီၢ်မုၢ်အကျါ ဒ်သိးနကကဲထီၣ်​ ယပှၤဂီၢ်မုၢ် အံၣ်စရ့လး အခိၣ်လီၤ.+ ၈ ဒီးယထုးန့ၢ်ဆူၣ်ကွံာ် ဘီမုၢ်လၢ စီၤဒၤဝံး အစၢၤအသွဲၣ်တဖၣ်​ အအိၣ်​ ဒီးယဟ့ၣ်လီၤနၤလီၤ.+ ဘၣ်ဆၣ်​ နတလီၤဂာ်ဒ် ယခ့ယပှၤ စီၤဒၤဝံး အသိးဘၣ်. အဝဲမၤထွဲ ယတၢ်မၤလိာ်, ပိာ်ယခံ လၢအသးဒီဖျၢၣ်​ ဒီးမၤထဲ တၢ်လၢယဘၣ်သူၣ်ဘၣ်သးလီၤ.+ ၉ နမၤတၢ်အၢ နးဒိၣ်န့ၢ်ဒံး ပှၤလၢအပၢတ့ၢ်တၢ်လၢ နမဲာ်ညါတဖၣ်လီၤ. ဒီးနတ့ထီၣ်​ ယွၤအဂၤတဂၤ ဒီးတၢ်ဂီၤတၢ်ဖှီၣ်ထးတဖၣ်​ လၢနဂီၢ် ဒ်သိး နကမၤဆါယသးအဂီၢ်+ ဒီးနပာ်တ့ၢ်ကွံာ်ယၤလီၤ.+ ၁၀ လၢတၢ်န့ၣ်အဃိ ယဒုးလီၤဘၣ်​ တၢ်နးတၢ်ဖှီၣ်လၢ စီၤယၤရၤဘၣ်​ အစၢၤအသွဲၣ်တဖၣ်​ အလိၤ ဒီးယကမၤသံ ပှၤပိာ်ခွါလၢ စီၤယၤရၤဘၣ်​ အဒူၣ်ဖိထၢဖိအကျါ ကိးဂၤဒဲး ဃုာ်ဒီး အဒူၣ်ဖိထၢဖိလၢ အပတီၢ်ဖုၣ်ကတၢၢ် ဒီးလၢအဂံၢ်စၢ်တဖၣ်​ လၢအံၣ်စရ့လးအပူၤလီၤ. ယကခွဲပျီကွံာ် စီၤယၤရၤဘၣ်+ အစၢၤအသွဲၣ်တဖၣ်​ ဒ်ပှၤမၤပျီကွံာ် တၢ်အ့ၣ်​ ပျီပျီအသိးန့ၣ်လီၤ. ၁၁ ပှၤတဂၤဂ့ၤ တဂၤဂ့ၤလၢ အဘၣ်ဃးဒီး စီၤယၤရၤဘၣ်​ မ့ၢ်သံလၢ ဝ့ၢ်ပူၤန့ၣ်​ ထွံၣ်ကအီၣ်​ အဝဲသ့ၣ်လီၤ. ဒီးအဝဲသ့ၣ်​ တဂၤဂ့ၤ တဂၤဂ့ၤ မ့ၢ်သံလၢ ပျီပူၤန့ၣ်​ ထိၣ်လၢ အယူၤလၢ တၢ်ဖးဖီန့ၣ်​ ကအီၣ်အဝဲသ့ၣ်, မ့ၢ်လၢ ယဟိဝၤယွၤ တဲပာ်စၢၤဝဲဒ်န့ၣ်​ အဃိလီၤ.”’

၁၂ “ခဲအံၤ ဂဲၤဆၢထၢၣ်ဒီး က့ၤလၢနဟံၣ်ဟီ, ဖဲနခါလီၤနခီၣ်လၢ ဝ့ၢ်ပူၤအခါ ဖိသၣ်ကသံလီၤ. ၁၃ အံၣ်စရ့လး အပှၤဂီၢ်မုၢ် ခဲလၢာ် ကဟီၣ်ဝဲလၢ အဃိ ဒီးကခူၣ်လီၤအီၤလီၤ. လၢစီၤယၤရၤဘၣ်​ အဒူၣ်ဖိထၢဖိအကျါန့ၣ်​ ပှၤကခူၣ်လီၤ ထဲအီၤတဂၤ, မ့ၢ်လၢ လၢစီၤယၤရၤဘၣ်​ အစၢၤအသွဲၣ်တဖၣ်​ အကျါန့ၣ်​ အဝဲမ့ၢ် ပှၤထဲတဂၤလၢ အံၣ်စရ့လး အကစၢ် ယဟိဝၤယွၤ ထံၣ်န့ၢ်တၢ်လၢ အဂ့ၤတမံၤ လၢအသးပူၤ အဃိလီၤ. ၁၄ ယဟိဝၤယွၤ ကဃုထၢထီၣ်​ စီၤပၤတဂၤလၢ အံၣ်စရ့လးအဖီခိၣ်​ လၢအကမၤလီၤမၢ် စီၤယၤရၤဘၣ်+ အစၢၤအသွဲၣ်တဖၣ်​ စးထီၣ်ဖဲ မုၢ်နံၤအဝဲန့ၣ်​ ဒီးကစၢ်ယွၤ မ့ၢ်အဲၣ်ဒိးမၤဝဲ ခဲအံၤဒၣ်လဲာ် အမၤဝဲသ့လီၤ. ၁၅ ခီဖျိလၢ အံၣ်စရ့လး တ့ထီၣ်ဝဲ တၢ်စီဆှံ အထူၣ်တဖၣ်*+ ဒီးမၤဆါ ယဟိဝၤယွၤအသး အဃိ ယဟိဝၤယွၤ ကမၤဟးဂီၤကွံာ် အံၣ်စရ့လး ဒ်တပိၢ်တဘိလၢ အဟူးဝးဝဲလၢ ထံကျါအသိး ဒီးအကထဲးထီၣ်ကွံာ် အံၣ်စရ့လးလၢ ကီၢ်လၢအဂ့ၤတဘ့ၣ်အံၤလၢ အဟ့ၣ်ပာ်စၢၤ အဝဲသ့ၣ်​ အမိၢ်ပၢ်ဖံဖု လၢပျၢၤတဖၣ်လီၤ.+ ဒီးအဝဲကမၤ လီၤပြံလီၤပြါ အဝဲသ့ၣ်​ တုၤလီၤလၢ ထံကျိ* အဝၢ်ဘးခီလီၤ.+ ၁၆ ဒီးကစၢ်ယွၤ ကပာ်တ့ၢ်ကွံာ် အံၣ်စရ့လး ခီဖျိလၢ တၢ်ဒဲးဘးလၢ စီၤယၤရၤဘၣ်​ မၤတ့ၢ်ဝဲတဖၣ်​ ဒီးတၢ်ဒဲးဘးလၢ အဆီၣ်ထွဲ ပှၤအံၣ်စရ့လးဖိ လၢအကမၤဝဲတဖၣ်အဃိန့ၣ်လီၤ.”+

၁၇ ဖဲန့ၣ်အခါ စီၤယၤရၤဘၣ်​ အမါ ဂဲၤဆၢထၢၣ်ဒီး က့ၤဝဲတုၤလၢ ဝ့ၢ်တံးရစၢ်လီၤ. ဖဲအဝဲက့ၤတုၤလၢ အဟံၣ်​ အတြဲၤခိၣ်ထိးအခါ ဖိသၣ်န့ၣ်​ သံဝဲလီၤ. ၁၈ အဃိ ပှၤခူၣ်လီၤကွံာ်ဖိသၣ်​ ဒီးပှၤအံၣ်စရ့လးဖိခဲလၢာ် ဟီၣ်ဝဲလၢအဃိ ဒ်ယဟိဝၤယွၤ တဲပာ်စၢၤ အခ့အပှၤ ဝံအဃံယၤ အသိးန့ၣ်လီၤ.

၁၉ မ့မ့ၢ် စီၤယၤရၤဘၣ်​ အဂ့ၢ်လၢအဂၤတဖၣ်​ ဒီးအဒုးတၢ်ဒ်လဲၣ်မ့ၢ်ဂ့ၤ,+ အပၢတၢ်ဒ်လဲၣ်မ့ၢ်ဂ့ၤန့ၣ်​ ဘၣ်တၢ်ကွဲးလီၤအီၤလၢ အံၣ်စရ့လး အစီၤပၤ တၢ်စံၣ်စိၤတဲစိၤ အလံာ်ပူၤလီၤ. ၂၀ ဒီးစီၤယၤရၤဘၣ်​ ပၢတၢ်ယံာ်ဝဲ ၂၂ နံၣ်​ ဝံၤဒီးအသံဝဲ ဒီးပှၤခူၣ်လီၤအီၤဃုာ်ဒီး အမိၢ်ပၢ်ဖံဖု လၢပျၢၤတဖၣ်လီၤ.+ ဒီးအဖိခွါ စီၤနၤဒး ကဲထီၣ်စီၤပၤ လၢအလီၢ်လီၤ.+

၂၁ မ့မ့ၢ် စီၤၡလိၤမိၤ အဖိခွါ စီၤရဃၤဘၣ်​ ကဲဝဲ စီၤပၤလၢ ယူဒၤအဘီမုၢ်ပူၤလီၤ. ဖဲစီၤရဃၤဘၣ်​ ကဲထီၣ်​ စီၤပၤအခါ အသးနံၣ်အိၣ်ဝဲ ၄၁ နံၣ်​ ဒီးအဝဲပၢတၢ် ၁၇ နံၣ်​ လၢဝ့ၢ်ယရူၤၡလ့ၣ်​ လၢအမ့ၢ် ဝ့ၢ်လၢ ယဟိဝၤယွၤ ဃုထၢထီၣ်ဝဲ+ လၢအံၣ်စရ့လး အဒူၣ်ခဲလၢာ်အကျါ ဒ်သိး ကစၢ်ယွၤအမံၤ ကအိၣ်ဝဲ ဖဲန့ၣ်အဂီၢ်လီၤ.+ စီၤရဃၤဘၣ်​ အမိၢ်မ့ၢ်ဝဲ ပှၤဧၣ်မိၣ်ဖိ နီၢ်နၤဧမၤလီၤ.+ ၂၂ ဒီးပှၤလၢယူဒၤအဘီမုၢ်ပူၤန့ၣ်​ မၤတၢ်လၢ ယဟိဝၤယွၤ ထံၣ်ဝဲလၢအအၢ+ ဒီးတၢ်ဒဲးဘး လၢအဝဲသ့ၣ်​ မၤဝဲန့ၣ်​ မၤသးထီၣ်​ ကစၢ်ယွၤအသး အါန့ၢ်ဒံး အမိၢ်ပၢ်ဖံဖု လၢပျၢၤတဖၣ်​ မၤတ့ၢ်ဝဲန့ၣ်လီၤ.+ ၂၃ အဝဲသ့ၣ်​ တ့ထီၣ်စ့ၢ်ကီး တၢ်လီၢ်ထီၣ်ထီတဖၣ်, လၢၢ်ထူၣ်စီဆှံတဖၣ်​ ဒီးတၢ်စီဆှံအထူၣ်တဖၣ်+ လၢတၢ်လူၢ်လၢ အထီကိးဖျၢၣ်ဒဲးအလိၤ+ ဒီးလၢသ့ၣ်လါဟ့ လၢအပှဲၤဒီးအလၣ်​ ကိးထူၣ်ဒဲး အခီၣ်ထံးန့ၣ်လီၤ.+ ၂၄ ဒီးလၢကီၢ်ပူၤန့ၣ်​ အိၣ်စ့ၢ်ကီးဒီး ပိာ်ခွါဆါလီၤအီၣ်သးလၢ တၢ်ဘူၣ်ထီၣ်ဘါထီၣ်အလီၢ်တဖၣ်လီၤ.+ အဝဲသ့ၣ်​ မၤတၢ်လၢ အလီၤသးဘၣ်အၢ ဒ်သိးဒီး ပှၤကလုာ်တဖၣ်လၢ ယဟိဝၤယွၤ နီဟးထီၣ်ကွံာ်လၢ အံၣ်စရ့လး အမဲာ်ညါ မၤဝဲန့ၣ်လီၤ.

၂၅ ဖဲစီၤပၤရဃၤဘၣ်​ ပၢတၢ် ယဲၢ်နံၣ်တနံၣ်န့ၣ်​ ကီၢ်အဲၤကူပတူး အစီၤပၤၡံၡး+ ဟဲထီၣ်ဒ်သိးကဒုးဝဲ ဝ့ၢ်ယရူၤၡလ့ၣ်အဂီၢ်လီၤ.+ ၂၆ အဝဲဟံးန့ၢ်ဝဲ တၢ်လုၢ်ဒိၣ်ပှ့ၤဒိၣ်​ လၢအအိၣ်လၢ ယဟိဝၤယွၤအဟံၣ်ပူၤ ဒီးတၢ်လုၢ်ဒိၣ်ပှ့ၤဒိၣ်လၢ အအိၣ်လၢ စီၤပၤ အဟံၣ်ပူၤလီၤ.+ အဝဲဟံးန့ၢ် တၢ်ခဲလၢာ် ဃုာ်ဒီး ကတီၤတဖၣ်လၢ စီၤၡလိၤမိၤ တ့ဝဲလၢထူန့ၣ်လီၤ.+ ၂၇ အဃိ လၢကတီၤတဖၣ်လၢ ဘၣ်တၢ်တ့အီၤလၢထူ အလီၢ်န့ၣ်​ စီၤပၤရဃၤဘၣ်​ တ့ထီၣ်က့ၤဝဲ ကတီၤတဖၣ်လၢ တိၢ်ဘီန့ၣ်လီၤ. ဒီးစီၤပၤ အးလီၤဝဲ ကတီၤတဖၣ်န့ၣ်လၢ ပှၤခိးတၢ်ဖိ* အခိၣ်တဖၣ်​ အစုပူၤလီၤ. ပှၤခိးတၢ်ဖိတဖၣ်န့ၣ်​ ခိးဝဲ စီၤပၤအဟံၣ်​ အကျဲနုာ်လီၤန့ၣ်လီၤ. ၂၈ ဖဲစီၤပၤ လဲၤလၢ ယဟိဝၤယွၤ အဟံၣ်​ တဘျီဂ့ၤ တဘျီဂ့ၤ အခါ ပှၤခိးတၢ်ဖိတဖၣ်​ လဲၤစိာ်ဝဲ ကတီၤတဖၣ်​ ဒီးလၢခံ အဝဲသ့ၣ်​ က့ၤပာ်က့ၤဝဲ ကတီၤတဖၣ်န့ၣ်လၢ ပှၤခိးတၢ်ဖိ အဒၢးပူၤလီၤ.

၂၉ မ့မ့ၢ် စီၤရဃၤဘၣ်​ အဂ့ၢ်လၢအဂၤတဖၣ်​ ဒီးတၢ်လၢအမၤဝဲ ခဲလၢာ်န့ၣ်​ ဘၣ်တၢ်ကွဲးလီၤအီၤလၢ ယူဒၤအစီၤပၤ တၢ်စံၣ်စိၤတဲစိၤ အလံာ်ပူၤလီၤ.+ ၃၀ လၢစီၤရဃၤဘၣ်​ ဒီးစီၤယၤရၤဘၣ်​ အဘၢၣ်စၢၤန့ၣ်​ တၢ်ဒုးကဲထီၣ်​ ထီဘိလီၤ.+ ၃၁ ဒီးလၢခံ စီၤရဃၤဘၣ်​ သံဝဲ ဒ်အမိၢ်ပၢ်ဖံဖု လၢပျၢၤတဖၣ်အသိး ဒီးပှၤခူၣ်လီၤကွံာ်အီၤ ဃုာ်ဒီး အမိၢ်ပၢ်ဖံဖု လၢပျၢၤတဖၣ်​ လၢစီၤဒၤဝံး အဝ့ၢ်ပူၤလီၤ.+ အမိၢ်န့ၣ်​ မ့ၢ်ဝဲ ပှၤဧၣ်မိၣ်ဖိ နီၢ်နၤဧမၤလီၤ.+ ဒီးအဖိခွါ စီၤအဘံယၣ်*+ ကဲထီၣ်​ စီၤပၤ လၢအလီၢ်လီၤ.