၁ ၡမူၤအ့လး
၆ ယဟိဝၤယွၤ အတလါစီဆှံ+ အိၣ်ဝဲလၢ ပှၤဖလ့ၡသးဖိ အဟီၣ်ကဝီၤ နွံလါလီၤ. ၂ ဒီးပှၤဖလ့ၡသးဖိ ကိးဖှိၣ်ဝဲ ပှၤလုၢ်တၢ်ဒိၣ်တဖၣ် ဒီးပှၤတဖၣ်လၢ အဖးတၢ်ကမၤအသး ခါဆူညါအဂ့ၢ်+ ဒီးသံကွၢ်ဝဲလၢ “ယဟိဝၤယွၤ အတလါစီဆှံန့ၣ် ပကဘၣ်မၤအီၤဒ်လဲၣ်. ပကဘၣ် ဆှၢကဒါက့ၤ လၢအလီၢ်ဒ်လဲၣ်န့ၣ် တဲဘၣ်ပှၤမီၤ.” ၃ အဝဲသ့ၣ် တဲဆၢဝဲလၢ “သုမ့ၢ်ဆှၢကဒါက့ၤ အံၣ်စရ့လးအကစၢ် ယဟိဝၤယွၤ အတၢ်အၢၣ်လီၤအီလီၤ အတလါန့ၣ် သုကဘၣ်ဆှၢကဒါက့ၤအီၤ ဃုာ်ဒီး တၢ်လုၢ်တၢ်ပာ် တမံၤမံၤသၢၤ. သုကဘၣ်ဆှၢကဒါက့ၤအီၤ ဃုာ်ဒီး တၢ်လုၢ်လၢ တၢ်ကမၣ်အဂီၢ်+ လၢအံၣ်စရ့လး အကစၢ်ယွၤ အအိၣ်လီၤ. သုမ့ၢ်မၤဒ်န့ၣ်မး သုကဘျါက့ၤ ဒီးသုကနၢ်ပၢၢ်ထီၣ်လၢ ဘၣ်မနုၤအဃိ အဝဲသိၣ်ဃီၣ် သုဒံးလဲၣ်န့ၣ်လီၤ.” ၄ အဃိ အဝဲသ့ၣ် သံကွၢ်ဝဲလၢ “ပကဘၣ်ဆှၢလီၤန့ၢ်အီၤ တၢ်လုၢ်လၢ တၢ်ကမၣ်အဂီၢ် မနုၤတခါလဲၣ်.” အဝဲသ့ၣ် တဲဆၢဝဲလၢ “ဒ်ပှၤဖလ့ၡသးဖိ အခိၣ်အနၢ်တဖၣ်+ အနီၣ်ဂံၢ်အိၣ်ဝဲအသိး ဆှၢလီၤ အ့ၣ်ကီၢ်ထူ ယဲၢ်လိၣ် ဒီးယုၢ်ထူယဲၢ်ဒု လၢအမ့ၢ် တၢ်ဂီၤတၢ်ဖှီၣ်တဖၣ် ခီဖျိလၢ တၢ်သိၣ်ဃီၣ်တမံၤဃီ ဘၣ်သုကိးဂၤဒဲး ပၣ်ဃုာ်ဒီး သုခိၣ်သုနၢ်အဃိ န့ၣ်တက့ၢ်. ၅ အဃိ သုကဘၣ်တ့ တၢ်ဂီၤတၢ်ဖှီၣ် လၢအလီၤဂာ်ဒ် သုအ့ၣ်ကီၢ် ဒီးဒ်သုယုၢ်လၢ အမၤဟးဂီၤ သုကီၢ်အသိး+ ဒီးသုကဘၣ် မၤလၤကပီၤ အံၣ်စရ့လး အကစၢ်ယွၤလီၤ. ဒီးဘၣ်သ့ၣ်သ့ၣ် အဝဲ တသိၣ်ဃီၣ်သု ဒီးသုယွၤ ဒီးသုထံသုကီၢ်လၢၤဘၣ်.+ ၆ ဘၣ်မနုၤအဃိ သုခိၣ်ဘၣ်ကိၤ ဒ်ပှၤအဲၤကူပတူးဖိ ဒီးဖၤရိၤ အသိးလဲၣ်.+ ဖဲကစၢ်ယွၤ သိၣ်ဃီၣ်အဝဲသ့ၣ် နးနးအခါ+ အဝဲသ့ၣ် ဘၣ်ပျဲက့ၤ ပှၤအံၣ်စရ့လးဖိ ဒီးပှၤအံၣ်စရ့လးဖိ ဟးထီၣ်ကွံာ်ဝဲလီၤ.+ ၇ ဒီးခဲအံၤန့ၣ် ကတဲာ်ကတီၤ လ့ၣ်သီသီတခိၣ်ဒီး ကျီၢ်မိၢ်ခံဒုလၢ ပှၤတပာ်ထီၣ် နီၣ်ယိးဘိလၢ အဖီခိၣ် နီတဘျီဒံးဘၣ်န့ၣ်တက့ၢ်. စၢတံၢ်ကျီၢ်မိၢ်ခံဒုလၢလ့ၣ် ဒီးက့ၤမူၤအဖိတဖၣ် လၢအကရၢတက့ၢ်. ၈ ဝံၤဒီးဟံးန့ၢ် ယဟိဝၤယွၤ အတလါစီဆှံ ဒီးပာ်အီၤလၢ လ့ၣ်ပူၤ ဒီးတၢ်ဂီၤတၢ်ဖှီၣ်ထူတဖၣ်လၢ သုကဆှၢလၢ အံၣ်စရ့လး အကစၢ်ယွၤ အအိၣ် ဒ်တၢ်လုၢ်လၢ တၢ်ကမၣ်အဂီၢ်အသိးန့ၣ် ပာ်အီၤလၢတလါတဖျၢၣ်အပူၤ ဘူးဒီး တလါစီဆှံ တက့ၢ်.+ ဝံၤဒီး ဆှၢလီၤကျီၢ် ၉ ဒီးအမ့ၢ်လဲၤထီၣ်လၢ ဝ့ၢ်ဘ့ၤသၡ့မ့ၣ်အကျဲ+ ဆူအလီၢ်ဒၣ်ဝဲန့ၣ် ပကသ့ၣ်ညါဘၣ်လၢ အံၣ်စရ့လးအကစၢ်ယွၤ မ့ၢ်ပှၤလၢ အမၤအၢမၤသီပှၤ ဒ်အံၤလီၤ. အမ့ၢ်တလဲၤထီၣ်ကျဲ ဖဲန့ၣ်ဘၣ်န့ၣ် ပကသ့ၣ်ညါဘၣ်လၢ အံၣ်စရ့လး အကစၢ်ယွၤ တမၤပှၤဒ်အံၤဘၣ် ဒီးအကဲတၢ်ဘၣ်အတီၤလီၤ.”
၁၀ ဒီးပှၤပိာ်ခွါတဖၣ်န့ၣ် မၤပိာ်ထွဲဝဲ တၢ်ဟ့ၣ်ကူၣ်တခါအံၤလီၤ. အဝဲသ့ၣ် ဟံးန့ၢ်ကျီၢ်မိၢ်ခံဒု ဒီးစၢတံၢ်ဝဲဒီးလ့ၣ် ဒီးအဖိတဖၣ်န့ၣ် ပှၤက့ၤမူၤဝဲလၢ အကရၢလီၤ. ၁၁ ဝံၤဒီး အဝဲသ့ၣ် ပာ်ယဟိဝၤယွၤ အတလါစီဆှံ လၢလ့ၣ်ပူၤ ဃုာ်ဒီး တလါတဖျၢၣ်လီၤ. ဒီးလၢတလါတဖျၢၣ်န့ၣ် အပူၤန့ၣ် အိၣ်ဒီး အ့ၣ်ကီၢ်ထူယဲၢ်လိၣ် ဒီးယုၢ်ထူယဲၢ်ဒု လၢအမ့ၢ် တၢ်ဂီၤတၢ်ဖှီၣ်တဖၣ်လီၤ. ၁၂ ဒီးကျီၢ်မိၢ်တဖၣ် လဲၤဝဲလိၤလိၤလၢ ဝ့ၢ်ဘ့ၤသၡ့မ့ၣ် အကျဲလီၤ.+ ကျီၢ်မိၢ်တဖၣ်န့ၣ် လဲၤဝဲလၢကျဲမုၢ် ထဲတဘိ ဒီးလဲၤဝဲတခီခီ ကိးဝဲတခီခီ ဒီးတဃၣ်အသးလၢ စုထွဲမ့ၢ်ဂ့ၤ စုစ့ၣ်မ့ၢ်ဂ့ၤဘၣ်. ဒီးပှၤဖလ့ၡသးဖိ အခိၣ်အနၢ် လဲၤပိာ်ဝဲလၢ အလီၢ်ခံ တုၤလီၤလၢ ဝ့ၢ်ဘ့ၤသၡ့မ့ၣ် အဃၢၤလီၤ. ၁၃ ဒီးပှၤဘ့ၤသၡ့မ့ၣ်ဖိ ကူးဘုကၠူၣ်လၢ တၢ်ပၢၤခိၣ်လီၤ. ဖဲအဝဲသ့ၣ် မိာ်ထီၣ်အခိၣ်အခါ အဝဲသ့ၣ် ထံၣ်ဘၣ်ဝဲ တလါစီဆှံ ဒီးအဝဲသ့ၣ် သူၣ်ခုသးခုဒိၣ်မးလီၤ. ၁၄ ဒီးလ့ၣ်န့ၣ် လဲၤတုၤလၢ ပှၤဘ့ၤသၡ့မ့ၣ်ဖိ စီၤယိၤၡူ အပျီပူၤ ဒီးအိၣ်ပတုာ်ဝဲ ဘူးဒီး လၢၢ်ဖးဒိၣ်တဖျၢၣ်လီၤ. အဃိ အဝဲသ့ၣ် ကျီကွံာ်ဝဲ လ့ၣ်ဒ်သိးကန့ၢ်ဘၣ် သ့ၣ်မုၣ်အဂီၢ် ဒီးအဝဲသ့ၣ် ဟ့ၣ်လုၢ်ထီၣ် ကျီၢ်မိၢ်ခံဒုန့ၣ်+ ဒ်တၢ်လုၢ်ဒွဲၣ်အူအသိး လၢယဟိဝၤယွၤ အဂီၢ်လီၤ.
၁၅ ဒီးပှၤလ့ၤဝံဖိတဖၣ်+ စိာ်လီၤဝဲ ယဟိဝၤယွၤ အတလါစီဆှံ ဒီးတလါတဖျၢၣ် လၢအအိၣ်ဒီး တၢ်ဂီၤတၢ်ဖှီၣ်ထူတဖၣ် ဒီးအဝဲသ့ၣ် ပာ်လီၤဝဲလၢ လၢၢ်ဖးဒိၣ်တဖျၢၣ် အလိၤလီၤ. ဖဲနံၤအဝဲန့ၣ် ပှၤဘ့ၤသၡ့မ့ၣ်ဖိ+ လုၢ်ထီၣ်ဝဲ တၢ်လုၢ်ဒွဲၣ်အူ ဒီးလုၢ်ထီၣ် တၢ်လုၢ်တၢ်ပာ်တဖၣ် လၢယဟိဝၤယွၤ အဂီၢ်လီၤ.
၁၆ ဖဲပှၤဖလ့ၡသးဖိ အခိၣ်အနၢ်တဖၣ် ထံၣ်ဘၣ်ဝဲ တၢ်မၤအသးတဖၣ်အံၤအခါ အဝဲသ့ၣ် က့ၤကဒါက့ၤဝဲလၢ ဝ့ၢ်ဧ့ကြိၣ် ဖဲနံၤအဝဲန့ၣ်လီၤ. ၁၇ ပှၤဖလ့ၡသးဖိ ဆှၢလီၤ အ့ၣ်ကီၢ်ထူ အတၢ်ဂီၤတၢ်ဖှီၣ်တဖၣ် ဒ်တၢ်လုၢ်လၢ တၢ်ကမၣ်အဂီၢ် လၢယဟိဝၤယွၤ အအိၣ်လီၤ.+ တၢ်ဂီၤတၢ်ဖှီၣ်တဖၣ်အံၤ မ့ၢ်ဝဲလၢ ဝ့ၢ်အၤစဒိာ်+ အဂီၢ်တခါ, လၢဝ့ၢ်ဂါစၤ အဂီၢ်တခါ, လၢဝ့ၢ်အၤၡကလိၣ် အဂီၢ်တခါ, လၢဝ့ၢ်ကၤသး+ အဂီၢ်တခါ ဒီးလၢဝ့ၢ်ဧ့ကြိၣ်+ အဂီၢ်တခါလီၤ. ၁၈ ဒီးယုၢ်ထူလၢ အဘၣ် တၢ်ဟ့ၣ်လီၤအီၤန့ၣ် အနီၣ်ဂံၢ်ပှဲၤသိးဒီး ပှၤဖလ့ၡသးဖိ အဝ့ၢ်ခဲလၢာ်လၢ အအိၣ်ဝဲလၢ ပှၤဖလ့ၡသးဖိ အခိၣ်အနၢ်ယဲၢ်ဂၤ အတၢ်ပၢဖီလာ်လီၤ. အဃိ တၢ်ဟ့ၣ်လီၤအီၤလၢ ဝ့ၢ်တဖၣ်လၢ အအိၣ်ဒီးအဒူၣ် လၢအကျၢၤ ဒီးသဝီတဖၣ်လၢ အတအိၣ်ဒီး အဒူၣ်ဘၣ်အဂီၢ်လီၤ.
ဒီးလၢၢ်ဖးဒိၣ်တဖျၢၣ်လၢ အဝဲသ့ၣ် ပာ်လီၤ ယဟိဝၤယွၤ အတလါစီဆှံ လၢအလိၤန့ၣ် အိၣ်ဝဲတုၤလၢ မုၢ်မဆါတနံၤအံၤ ဒ်တၢ်အုၣ်အသးတခါအသိး လၢပှၤဘ့ၤသၡ့မ့ၣ်ဖိ စီၤယိၤၡူ အပျီပူၤလီၤ. ၁၉ ဘၣ်ဆၣ် ခီဖျိလၢ ပှၤပိာ်ခွါလၢ အအိၣ်လၢ ဝ့ၢ်ဘ့ၤသၡ့မ့ၣ်အပူၤန့ၣ် ကွၢ်ထံဝဲ ယဟိဝၤယွၤ အတလါစီဆှံအဃိ ကစၢ်ယွၤ မၤသံ အဝဲသ့ၣ်လီၤ. ကစၢ်ယွၤ မၤသံဝဲ ပှၤအဂၤ ၅၀,၀၇၀ လၢပှၤဂီၢ်မုၢ်အကျါလီၤ. မ့ၢ်လၢ ယဟိဝၤယွၤ မၤသံ အဝဲသ့ၣ် အါအါဂီၢ်ဂီၢ်အဃိ အဝဲသ့ၣ် သူၣ်အုးသးအုးဝဲလီၤ.+ ၂၀ အဃိ ပှၤပိာ်ခွါလၢ အအိၣ်လၢ ဝ့ၢ်ဘ့ၤသၡ့မ့ၣ်အပူၤန့ၣ် သံကွၢ်ဝဲလၢ “ကစၢ်ယဟိဝၤယွၤ လၢအစီဆှံ တဂၤအံၤ+ မ့ၢ်မတဂၤ ဆၢထၢၣ်လၢ အမဲာ်ညါ ကသ့တဂၤလဲၣ်. ဒီးအဝဲဟးထီၣ် လၢပအိၣ် ဝံၤအလီၢ်ခံ အကလဲၤလၢ မတၤတဖၣ် အအိၣ်လဲၣ်.”+ ၂၁ အဃိ အဝဲသ့ၣ် ဆှၢလီၤ ပှၤစိာ်တၢ်ကစီၣ်ဖိတဖၣ် လၢပှၤလၢအအိၣ်လၢ ဝ့ၢ်ကံးရယးယဧၤရံၣ်+ အပူၤ ဒီးတဲဝဲလၢ “ပှၤဖလ့ၡသးဖိ ဟဲက့ၤဆှၢကဒါက့ၤ ယဟိဝၤယွၤ အတလါစီဆှံလံ. ဟဲလီၤဟံးန့ၢ်အီၤ ဒီးက့ၤစိာ်အီၤတက့ၢ်.”+