ယံးရမံယၤ

၂၆ ဖဲစီၤယိၤၡံယၤ အဖိခွါ ယူဒၤအစီၤပၤ ယဟိၤယါကံၣ်+ အတၢ်ပၢ စးထီၣ်အခါ ယဟိဝၤယွၤ တဲတၢ်ဒီး ဝံယံးရမံယၤလီၤ. ၂ “ယၤ, ယဟိဝၤယွၤ တဲဝဲလၢ ‘ဆၢထၢၣ်လၢ ယဟိဝၤယွၤ အဟံၣ်အတၢ်ပျီပူၤ ဒီးတဲတၢ်ဒီး* ပှၤဂီၢ်မုၢ်ခဲလၢာ် လၢအဟဲလၢ ယူဒၤအဝ့ၢ်တဖၣ် ဒ်သိးကဘူၣ်ထီၣ်ဘါထီၣ်တၢ်လၢ ယၤ, ယဟိဝၤယွၤ အဟံၣ်န့ၣ်တက့ၢ်. တၢ်လၢယမၤလိာ်နၤလၢ နကဘၣ်တဲန့ၣ် တဲဘၣ်အဝဲသ့ၣ် ခဲလၢာ်ခဲဆ့ ဒီးတဘၣ်ပာ်တ့ၢ် တၢ်ကတိၤနီတဖျၢၣ်တဂ့ၤ. ၃ ဘၣ်သ့ၣ်သ့ၣ် အဝဲသ့ၣ် ကဒိကနၣ် ယကလုၢ် ဒီးအဝဲသ့ၣ် တဂၤစုာ်စုာ် ကပတုာ်ကွံာ် အတၢ်မၤလၢ အအၢအသီတဖၣ် ဒီးယကဆိကမိၣ်ထံကဒါက့ၤ* ဘၣ်ဃးဒီး တၢ်နးတၢ်ဖှီၣ်လၢ ယပာ်လီၤယသးလၢ ယကဒုးလီၤဘၣ် အဝဲသ့ၣ် လၢအတၢ်မၤလၢ အအၢအသီအဃိ ဒီးယတမၤလၢၤဘၣ်.+ ၄ တဲအဝဲသ့ၣ်လၢ “ယၤ, ယဟိဝၤယွၤ တဲဝဲလၢ ‘သုမ့ၢ်တဒိကနၣ် ယကလုၢ် ခီဖျိသုတအိၣ်မူမၤထွဲ ယတၢ်သိၣ်တၢ်သီ* လၢယဟ့ၣ်လီၤသုဘၣ် ၅ ဒီးသုမ့ၢ်တဒိကနၣ် ယခ့ယပှၤ ဝံတဖၣ်လၢ ယဆှၢလီၤလၢ သုအိၣ်တဘျီဝံၤတဘျီ အတၢ်ကတိၤတဖၣ်ဘၣ်န့ၣ်+ ၆ ယကဒုးကဲထီၣ် ဟံၣ်တဖျၢၣ်အံၤ ဒ်သိးဒီးဝ့ၢ်ၡံလိၤ+ ဒီးယကဒုးကဲထီၣ် ဝ့ၢ်တဖျၢၣ်အံၤလၢ တၢ်ဆိၣ်အၢအလီၢ်လၢ ပှၤကလုာ်ခဲလၢာ် လၢဟီၣ်ခိၣ်ချၢအဂီၢ်လီၤ.’”’”+

၇ ပှၤလုၢ်တၢ်ဒိၣ်တဖၣ်, ဝံတဖၣ် ဒီးပှၤဂီၢ်မုၢ်ခဲလၢာ် နၢ်ဟူဝဲ ဝံယံးရမံယၤ တဲတၢ်ကတိၤသ့ၣ်တဖၣ်န့ၣ် လၢယဟိဝၤယွၤ အဟံၣ်လီၤ.+ ၈ အဃိ ဖဲဝံယံးရမံယၤ တဲဘၣ် ပှၤဂီၢ်မုၢ်ခဲလၢာ် လၢတၢ်ကတိၤလၢ ယဟိဝၤယွၤ မၤလိာ်အီၤ ဝံၤဝဲအခါ ပှၤလုၢ်တၢ်ဒိၣ်တဖၣ်, ဝံတဖၣ် ဒီးပှၤဂီၢ်မုၢ်ခဲလၢာ် ဖီၣ်န့ၢ်အီၤ ဒီးတဲအီၤလၢ “နကသံ သပှၢ်တၢၢ်လီၤ. ၉ ဘၣ်မနုၤအဃိ နတဲတၢ်ဒ်ဝံအသိး လၢယဟိဝၤယွၤ အမံၤပူၤ ဒီးတဲလၢ ‘ဟံၣ်တဖျၢၣ်အံၤ ကကဲထီၣ် ဒ်သိးဒီးဝ့ၢ်ၡံလိၤ ဒီးဝ့ၢ်တဖျၢၣ်အံၤ ကအိၣ်သယုၢ်ဝဲ ဒီးပှၤတအိၣ်လၢအပူၤ နီတဂၤလၢၤဘၣ်’ န့ၣ်လဲၣ်.” ဒီးပှၤဂီၢ်မုၢ်ခဲလၢာ် ကဝီၤဃာ် ဝံယံးရမံယၤ လၢယဟိဝၤယွၤ အဟံၣ်လီၤ.

၁၀ ဖဲယူဒၤ အပဒိၣ်ဖးဒိၣ်တဖၣ် နၢ်ဟူတၢ်ကတိၤတဖၣ်န့ၣ်အခါ အဝဲသ့ၣ် ဟးထီၣ်လၢ စီၤပၤအဟံၣ် ဒီးလဲၤထီၣ်လၢ ယဟိဝၤယွၤအဟံၣ် ဒီးဆ့ၣ်နီၤလၢ ယဟိဝၤယွၤအဟံၣ် အတြဲၤလၢအသီ အကျဲနုာ်လီၤ အလီၢ်လီၤ.+ ၁၁ ပှၤလုၢ်တၢ်ဒိၣ်တဖၣ် ဒီးဝံတဖၣ် တဲဘၣ် ပဒိၣ်ဖးဒိၣ်တဖၣ် ဒီးပှၤဂီၢ်မုၢ်ခဲလၢာ်လၢ “ပှၤတဂၤအံၤ ကြၢးတၢ်စံၣ်ညီၣ်သံအီၤ,+ မ့ၢ်လၢ အတဲဆိပာ်စၢၤတၢ်လၢ အထီဒါ ဝ့ၢ်တဖျၢၣ်အံၤ ဒ်သုနၢ်ဟူဘၣ် အသိးလီၤ.”+

၁၂ ဒီးဝံယံးရမံယၤ တဲဘၣ် ပဒိၣ်ဖးဒိၣ်ကိးဂၤဒဲး ဒီးပှၤဂီၢ်မုၢ်ခဲလၢာ်လၢ “ပှၤလၢအမၢလီၤယၤလၢ ယကတဲဆိပာ်စၢၤ တၢ်ကတိၤခဲလၢာ်လၢ သုနၢ်ဟူဘၣ်အီၤလၢ အထီဒါဟံၣ်အံၤ ဒီးဝ့ၢ်တဖျၢၣ်အံၤန့ၣ် မ့ၢ်ဒၣ် ယဟိဝၤယွၤလီၤ.+ ၁၃ အဃိ ခဲအံၤ ဆီတလဲက့ၤ သုသကဲာ်ပဝး, သုတၢ်မၤတဖၣ် ဒီးဒိကနၣ် သုကစၢ်ယဟိဝၤယွၤ အကလုၢ်တက့ၢ်. ဒီးယဟိဝၤယွၤ ကဆိကမိၣ်ကဒါက့ၤ အတၢ်ဆၢတဲာ်လၢ အကဒုးလီၤဘၣ် တၢ်ကီတၢ်ခဲလၢ သုဖီခိၣ် ဒီးအတမၤလၢၤဘၣ်.+ ၁၄ မ့မ့ၢ်ယၤန့ၣ် ယအိၣ်လၢသုစုပူၤလီၤ. ကွၢ်လၢသုထံၣ်လၢအဂ့ၤ ဒီးအကြၢးန့ၣ် မၤယၤဟီ. ၁၅ ဘၣ်ဆၣ် ယကတဲသုတီတီလၢ ယဟိဝၤယွၤ မၢလီၤယၤလၢ ယကတဲဘၣ်သု တၢ်ကတိၤတဖၣ်န့ၣ်ခဲလၢာ် ဒ်သိး သုကနၢ်ဟူဘၣ် အဂီၢ်လီၤ. အဃိ သုကဘၣ်နၢ်ပၢၢ် လီၤတံၢ်လီၤဆဲးလၢ သုမ့ၢ်မၤသံယၤန့ၣ် သုကဒုးလီၤတီ ပှၤလၢ အတၢ်ကမၣ် တအိၣ်ဘၣ်တဂၤ အသွံၣ်လၢ သုခိၣ်လိၤ, လၢဝ့ၢ်တဖျၢၣ်အံၤအလိၤ ဒီးလၢပှၤဝ့ၢ်ဖိတဖၣ် အခိၣ်လိၤလီၤ.”

၁၆ ဒီးပဒိၣ်ဖးဒိၣ်တဖၣ် ဒီးပှၤဂီၢ်မုၢ်ခဲလၢာ် တဲဘၣ် ပှၤလုၢ်တၢ်ဒိၣ်တဖၣ် ဒီးဝံတဖၣ်လၢ “ပှၤတဂၤအံၤ တဲတၢ်ဒီးပှၤလၢ ပကစၢ် ယဟိဝၤယွၤအမံၤပူၤအဃိ အတကြၢးတၢ်စံၣ်ညီၣ်သံအီၤဘၣ်.”

၁၇ တကးဒံးဘၣ် ထံကီၢ်အပှၤသူၣ်က့သးပှၢ်တနီၤ တဲဘၣ်ပှၤလၢ အဟဲပာ်ဖှိၣ်ထီၣ်အသး ဖဲန့ၣ်ခဲလၢာ်လၢ ၁၈ “ဖဲယူဒၤအစီၤပၤ ဃံးစကံယၤ+ ပၢတၢ်အခါန့ၣ် ပှၤမိရၤၡးဖိ စီၤမံကၤ+ တဲတၢ်ဒ်ဝံအသိး ဒီးတဲဘၣ် ယူဒၤအပှၤဂီၢ်မုၢ် ခဲလၢာ်ဒ်အံၤ, ‘တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ

၁၉ “ဖဲဝံမံကၤတဲဒ်န့ၣ်အခါ ယူဒၤအစီၤပၤဃံးစကံယၤ ဒီးယူဒၤအပှၤဂီၢ်မုၢ် တမၤသံကွံာ်အီၤဘၣ်. စီၤဃံးစကံယၤ ပျံၤယဟိဝၤယွၤ ဒီးဃ့ကညးယဟိဝၤယွၤ ဒ်သိးကန့ၢ်ဘၣ် အတၢ်သးကညီၤအဂီၢ် တမ့ၢ်ဧီၤ. ဒီးယဟိဝၤယွၤ ဆိကမိၣ်ကဒါက့ၤ အတၢ်ဆၢတဲာ်လၢ အကဒုးလီၤဘၣ် တၢ်ကီတၢ်ခဲလၢ အဝဲသ့ၣ်အဖီခိၣ် ဒီးအတမၤလၢၤဘၣ်.+ အဃိ ပမ့ၢ်မၤဒ်အံၤန့ၣ်* ပကဒုးအိၣ်ထီၣ် တၢ်ကီတၢ်ခဲဖးဒိၣ်လၢ ပနီၢ်ကစၢ်အဂီၢ်လီၤ.

၂၀ “ပှၤလၢ အတဲတၢ်ဒ်ဝံအသိး လၢယဟိဝၤယွၤအမံၤပူၤန့ၣ် အိၣ်ဒံးတဂၤလီၤ. အဝဲမ့ၢ် စီၤၡလါယၤ လၢအအိၣ်လၢ ဝ့ၢ်ကံးရယးယဧၤရံၣ်န့ၣ်+ အဖိခွါ စီၤဧူၤရံယၤလီၤ. အဝဲတဲဆိပာ်စၢၤ တၢ်လၢအထီဒါ ဝ့ၢ်တဖျၢၣ်အံၤ ဒီးတၢ်လီၢ်တတီၤအံၤ ဒ်ဝံယံးရမံယၤ တဲဝဲအသိးလီၤ. ၂၁ စီၤပၤယဟိၤယါကံၣ်,+ အပှၤသုးဖိလၢ အဂံၢ်ဆူၣ်ဘါဆူၣ်ခဲလၢာ် ဒီးအပဒိၣ်ဖးဒိၣ်တဖၣ် နၢ်ဟူဝဲ တၢ်လၢ စီၤဧူၤရံယၤ တဲဝဲအဃိ စီၤပၤ ဃုမၤသံအီၤလီၤ.+ ဖဲစီၤဧူၤရံယၤ သ့ၣ်ညါဘၣ်ဝဲအခါ အဝဲပျံၤတၢ် တဘျီဃီဒီး လဲၤဃ့ၢ်ဝဲလၢ ကီၢ်အဲၤကူပတူးလီၤ. ၂၂ ဝံၤဒီး စီၤပၤယဟိၤယါကံၣ် ဆှၢလီၤ စီၤဧးကဘိၢ် အဖိခွါ စီၤအ့လနၤသၣ်+ ဃုာ်ဒီးပှၤပိာ်ခွါအဂၤတဖၣ် လၢကီၢ်အဲၤကူပတူးလီၤ. ၂၃ အဝဲသ့ၣ် ဖီၣ်န့ၢ် စီၤဧူၤရံယၤ လၢကီၢ်အဲၤကူပတူး ဒီးဟဲက့ၤကိးအီၤလၢ စီၤပၤယဟိၤယါကံၣ် အအိၣ်လီၤ. ဒီးစီၤပၤ မၤသံအီၤလၢနး+ ဒီးတၢၤကွံာ် အစိၣ်လၢ ပှၤမုၢ်ဆ့ၣ်မုၢ်ဂီၤဖိ အသွၣ်ခိၣ်လီၤ.”

၂၄ ဘၣ်ဆၣ် စီၤၡၤဖၣ်+ အဖိခွါ စီၤအဃံကၣ်+ ဆီၣ်ထွဲမၤစၢၤ ဝံယံးရမံယၤ ဒ်သိး ပှၤသုတဟ့ၣ်လီၤကွံာ် ဝံယံးရမံယၤ လၢပှၤဂီၢ်မုၢ်အအိၣ် ဒီးမၤသံအီၤတဂ့ၤအဂီၢ်လီၤ.+