၁ ကွဲးနီၣ်တၢ်
၁၅ ဒီးစီၤဒၤဝံး ဆဲးတ့ထီၣ် အဟံၣ်တဖၣ်လၢ စီၤဒၤဝံးအဝ့ၢ်ပူၤ ဒီးအဝဲ ကတဲာ်ကတီၤန့ၢ်ဝဲ တၢ်လီၢ်တတီၤလၢ ယွၤလၢအမ့ၢ်အတီတဂၤ အတလါစီဆှံအဂီၢ် ဒီးဆီလီၤ ဒဲတဖျၢၣ်လၢ တလါစီဆှံ အဂီၢ်န့ၣ်လီၤ.+ ၂ ဖဲန့ၣ်အခါ စီၤဒၤဝံး တဲဝဲလၢ “ယဟိဝၤယွၤ ဃုထၢထီၣ်ပာ်စၢၤ ပှၤလ့ၤဝံဖိတဖၣ် လၢကယိးဝဲ ယဟိဝၤယွၤ အတလါစီဆှံ ဒီးလၢကမၤတၢ်အခ့အပှၤ အတၢ်မၤ လၢကစၢ်ယွၤအဂီၢ် ထီဘိအဃိ ထဲဒၣ် ပှၤလ့ၤဝံဖိတဖၣ်န့ၣ် ကဘၣ်ယိးဝဲ ယွၤလၢ အမ့ၢ်အတီတဂၤ အတလါစီဆှံလီၤ. ပှၤအဂၤ တဘၣ်ယိးဝဲ နီတဂၤတဂ့ၤ.”+ ၃ ဒီးစီၤဒၤဝံး ကိးဖှိၣ်ဝဲ ပှၤအံၣ်စရ့လးဖိ ခဲလၢာ် ဖဲဝ့ၢ်ယရူၤၡလ့ၣ် ဒ်သိး ကဟဲဆှၢထီၣ် ယဟိဝၤယွၤ အတလါစီဆှံ လၢတၢ်လီၢ်လၢ စီၤဒၤဝံး ကတဲာ်ကတီၤပာ်ဝဲလၢ တလါစီဆှံ အဂီၢ်န့ၣ်လီၤ.+
၄ စီၤဒၤဝံး ကိးဖှိၣ်ဝဲ စီၤအၤဟရိၣ်အစၢၤအသွဲၣ်တဖၣ်+ ဒီးပှၤလ့ၤဝံဖိတဖၣ်လီၤ.+ ၅ လၢပှၤကဃးဖိ အကျါန့ၣ် အကိးန့ၢ်ဝဲ ပှၤအခိၣ် စီၤအူရံၤအ့လး ဒီးအဒူၣ်ဖိထၢဖိ* အဂၤ ၁၂၀, ၆ လၢပှၤမရၤရံၤဖိ အကျါန့ၣ် အကိးန့ၢ်ဝဲ ပှၤအခိၣ် စီၤဧစါယၤ+ ဒီးအဒူၣ်ဖိထၢဖိ အဂၤ ၂၂၀, ၇ လၢပှၤက့းရၡိၣ်ဖိ အကျါန့ၣ် အကိးန့ၢ်ဝဲ ပှၤအခိၣ် စီၤယိၤအ့လး+ ဒီးအဒူၣ်ဖိထၢဖိ အဂၤ ၁၃၀, ၈ လၢစီၤအလံစဖၣ်+ အစၢၤအသွဲၣ်တဖၣ် အကျါန့ၣ် အကိးန့ၢ်ဝဲ ပှၤအခိၣ် စီၤၡမါယၤ ဒီးအဒူၣ်ဖိထၢဖိ အဂၤ ၂၀၀, ၉ လၢစီၤဃ့ဘြိၣ် အစၢၤအသွဲၣ်တဖၣ် အကျါန့ၣ် အကိးန့ၢ်ဝဲ ပှၤအခိၣ် စီၤအလံၤအ့လး ဒီးအဒူၣ်ဖိထၢဖိ အဂၤ ၈၀, ၁၀ လၢစီၤဧူးစံၤအ့လး+ အစၢၤအသွဲၣ်တဖၣ် အကျါန့ၣ် အကိးန့ၢ်ဝဲ ပှၤအခိၣ် စီၤဧးမံၤနဒး ဒီးအဒူၣ်ဖိထၢဖိ အဂၤ ၁၁၂ ဂၤလီၤ. ၁၁ တကးဒံးဘၣ် စီၤဒၤဝံး ကိးန့ၢ် ပှၤလုၢ်တၢ်ဒိၣ်တဖၣ် လၢအမ့ၢ် စီၤစၤဒိး+ ဒီးစီၤအ့ဘယၤသၢ်,+ ပှၤလ့ၤဝံဖိတဖၣ် လၢအမ့ၢ် စီၤအူရံၤအ့လး, စီၤဧစါယၤ, စီၤယိၤအ့လး, စီၤၡမါယၤ, စီၤအလံၤအ့လး ဒီးစီၤဧးမံၤနဒးလီၤ. ၁၂ ဒီးစီၤဒၤဝံး တဲဘၣ်အဝဲသ့ၣ်လၢ “သုမ့ၢ် ပှၤလ့ၤဝံဖိ အဒူၣ်ဖိထၢဖိ အခိၣ်အနၢ်တဖၣ်လီၤ. သုဝဲ ဒီးသုဒူၣ်ဖိထၢဖိတဖၣ် မၤစီဆှံထီၣ်သုသး ဒီးဟဲဆှၢထီၣ် အံၣ်စရ့လး အကစၢ် ယဟိဝၤယွၤ အတလါစီဆှံလၢ တၢ်လီၢ်လၢ ယကတဲာ်ကတီၤပာ်စၢၤန့ၢ် လၢတလါစီဆှံအဂီၢ် တက့ၢ်. ၁၃ ဖဲအဆိကတၢၢ် တဘျီန့ၣ်+ မ့ၢ်လၢ ပတဃုသ့ၣ်ညါ ယွၤအတၢ်ဟံးစုနဲၣ်ကျဲဘၣ် ဒီးသုတယိး တလါစီဆှံဘၣ် အဃိ+ ပကစၢ် ယဟိဝၤယွၤ အတၢ်သးဒိၣ် ဖျိးထီၣ်လၢ ပလိၤလီၤ.”+ ၁၄ အဃိ ပှၤလုၢ်တၢ်ဒိၣ်တဖၣ် ဒီးပှၤလ့ၤဝံဖိတဖၣ် မၤစီဆှံထီၣ်အသး ဒ်သိး ကဟဲဆှၢထီၣ် အံၣ်စရ့လး အကစၢ် ယဟိဝၤယွၤ အတလါစီဆှံ အဂီၢ်လီၤ.
၁၅ ဝံၤဒီး ပှၤလ့ၤဝံဖိတဖၣ် ယိးဝဲ ယွၤလၢအမ့ၢ်အတီတဂၤ အတလါစီဆှံ ဃုာ်ဒီးနီၣ်ယိးဘိ လၢအဝဲသ့ၣ် အဖံဘၣ်ခိၣ်+ ဒ်ယဟိဝၤယွၤမၤလိာ်ဝဲ ခီဖျိလၢ စီၤမိၤၡ့အသိးလီၤ. ၁၆ ဒီးစီၤဒၤဝံးမၢ ပှၤလ့ၤဝံဖိ အခိၣ်အနၢ်တဖၣ်လၢ ကဃုထၢထီၣ် အဝဲသ့ၣ် အဒီပုၢ်ဝဲၢ် ပှၤသးဝံၣ်တၢ်ဖိတဖၣ် လၢကသးဝံၣ်တၢ်လၢ တၢ်သးခုအပူၤ အိၣ်ဒီး တၢ်ဒ့တၢ်အူ အတၢ်ပီးတၢ်လီတဖၣ် လၢအမ့ၢ် သီတူၢ်တဖၣ်, တနၢ်တဖၣ်+ ဒီးစှၢၣ်စှံးတဖၣ်လီၤ.+
၁၇ အဃိ လၢပှၤလ့ၤဝံဖိ အဒူၣ်ကျါန့ၣ် အဝဲသ့ၣ် ဃုထၢထီၣ် စီၤယိၤအ့လး အဖိခွါ စီၤဟ့မၣ်+ ဒီးစီၤဘရ့ကံယၤ အဖိခွါ စီၤအၤစာ်+ ဒီးလၢ စီၤမရၤရံၤ အစၢၤအသွဲၣ် အကျါန့ၣ် ဃုထၢထီၣ်ဝဲ စီၤကူၤၡါယၤ အဖိခွါ စီၤအ့ၤသၣ်လီၤ.+ ၁၈ လၢအဝဲသ့ၣ် အကျါန့ၣ် ပၣ်ဃုာ်ဒီး အဒီပုၢ်ဝဲၢ်တဖၣ် လၢအလီၢ်အလၤအိၣ်ဝဲ ခံပတီၢ်တပတီၢ်လီၤ.+ ပှၤတဖၣ်န့ၣ် မ့ၢ်ဝဲ စီၤစကၤရယၤ, စီၤဘ့ၣ်, စီၤယၤစံအ့းလး, စီၤၡမံၤရမိး, စီၤယဃံအ့လး, စီၤဧူးနံၤ, စီၤအလံအာ်, စီၤဘနါယၤ, စီၤမၤစ့ယၤ, စီၤမးတံးသယၤ, စီၤအလံဖလ့, စီၤမံးကန့ယၤ ဒီးပှၤခိးတြဲၤဖိတဖၣ် လၢအမ့ၢ် စီၤဧိၤဘ့းအ့ဒိၣ် ဒီးစီၤယံၤအ့လးလီၤ. ၁၉ ဒီးပှၤသးဝံၣ်တၢ်ဖိတဖၣ် လၢအမ့ၢ် စီၤဟ့မၣ်,+ စီၤအၤစာ်+ ဒီးစီၤအ့ၤသၣ်န့ၣ် ဘၣ်ဒဲသီၣ်ဝဲ စှၢၣ်စှံးတိၢ်ဘီတဖၣ်,+ ၂၀ စီၤစကၤရယၤ, စီၤဧၤစရ့လး, စီၤၡမံၤရမိး, စီၤယဃံအ့လး, စီၤဧူးနံၤ, စီၤအလံအာ်, စီၤမၤစ့ယၤ ဒီးစီၤဘနါယၤန့ၣ် ဒ့သီတူၢ်တဖၣ် ဒ်ဧၤလမိး* အသီၣ်အိၣ်ဝဲအသိး,+ ၂၁ ဒီးစီၤမးတံးသယၤ,+ စီၤအလံဖလ့, စီၤမံးကန့ယၤ, စီၤဧိၤဘ့းအ့ဒိၣ်, စီၤယံၤအ့လး ဒီးစီၤဧၤစါစယၤ ဒ့တနၢ်တဖၣ် ဒ်ၡမံနံး*+ အသီၣ်အိၣ်ဝဲအသိး ဒ်သိး ကတီခိၣ်ရိၤမဲ တၢ်သးဝံၣ်အဂီၢ်လီၤ. ၂၂ မ့ၢ်လၢ ပှၤလ့ၤဝံဖိ အခိၣ်အနၢ် စီၤကံနၤနယၤန့ၣ်+ သ့ၣ်ညါဝဲ တၢ်ယိးတလါစီဆှံ အကျိၤအကျဲဂ့ၤဂ့ၤ အဃိ အဝဲ ဟံးစုနဲၣ်ကျဲတၢ် ဘၣ်ဃး တၢ်ယိး တလါစီဆှံလီၤ. ၂၃ ဒီးစီၤဘရ့ကံယၤဒီး စီၤအ့လကါနၤန့ၣ် မ့ၢ်ဝဲ ပှၤခိးတလါစီဆှံလီၤ. ၂၄ ဒီးပှၤလုၢ်တၢ်ဒိၣ်တဖၣ် လၢအမ့ၢ် စီၤၡဘၤနယၤ, စီၤယဟိၡၤဖး, စီၤနၤသန့လး, စီၤဧမၤစဲ, စီၤစကၤရယၤ, စီၤဘနါယၤ ဒီးစီၤအလံၤဧ့စ့ၢ်န့ၣ် အူသီၣ်ထီၣ်ဝဲ ကွဲၤတဖၣ် ဒိၣ်ဒိၣ်လၢ ယွၤလၢအမ့ၢ်အတီတဂၤ အတလါစီဆှံ အမဲာ်ညါလီၤ.+ စီၤဧိၤဘ့းအ့ဒိၣ် ဒီးစီၤအဃံာ်ယၤ ကဲဝဲ ပှၤခိးတၢ်ဖိတဖၣ် လၢတလါစီဆှံ အဂီၢ်စ့ၢ်ကီးလီၤ.
၂၅ ဝံၤဒီး လၢတၢ်သူၣ်ဖှံသးညီအပူၤန့ၣ်+ စီၤဒၤဝံး, အံၣ်စရ့လး အပှၤသူၣ်က့သးပှၢ်တဖၣ် ဒီးပှၤတကထိအခိၣ်တဖၣ် လဲၤတၢ်လၢကျဲ ဒ်သိး ကလဲၤဟံးန့ၢ် ယဟိဝၤယွၤ အတၢ်အၢၣ်လီၤအီလီၤ အတလါလၢ စီၤဧိၤဘ့းအ့ဒိၣ်အဟံၣ်+ ဒီးလဲၤဆှၢထီၣ်ဝဲ အဂီၢ်လီၤ. ၂၆ ယွၤလၢအမ့ၢ်အတီတဂၤ မၤစၢၤဝဲ ပှၤလ့ၤဝံဖိတဖၣ် လၢအယိးဝဲ ယဟိဝၤယွၤ အတၢ်အၢၣ်လီၤအီလီၤ အတလါအဃိ အဝဲသ့ၣ် လုၢ်ထီၣ်ဝဲ ကျီၢ်ဖါဖိနွံဒု ဒီးသိဖါနွံဒုလီၤ.+ ၂၇ စီၤဒၤဝံး, ပှၤလ့ၤဝံဖိခဲလၢာ် လၢအယိးဝဲ တလါစီဆှံ, ပှၤသးဝံၣ်တၢ်ဖိတဖၣ် ဒီးပှၤအခိၣ် စီၤကံနၤနယၤ လၢအဟံးစုနဲၣ်ကျဲ တၢ်ယိးတလါစီဆှံ ဒီးပှၤသးဝံၣ်တၢ်ဖိတဖၣ်န့ၣ် ကၤဝဲ ဆ့ကၤလၢ အစုဒုၣ်တအိၣ်ဘၣ် လၢအဘၣ်တၢ်မၤအီၤလၢ တၢ်ကံးညာ်လၢ အညၣ်ဂ့ၤန့ၣ်လီၤ. ဒီးစီၤဒၤဝံး ကၤစ့ၢ်ကီးဝဲဒီး အ့ဖိး လၢအညၣ်ဂ့ၤတဘ့ၣ်လီၤ.+ ၂၈ ပှၤအံၣ်စရ့လးဖိ ခဲလၢာ် ဆှၢထီၣ် ယဟိဝၤယွၤ အတၢ်အၢၣ်လီၤအီလီၤ အတလါ ဒီးကိးပသူထီၣ်ဝဲလၢ တၢ်သူၣ်ခုသးခုအပူၤ+ ဒီးအူထီၣ်ဝဲကွဲၤ,+ ဒဲဝဲစှၢၣ်စှံး, ဒ့ဝဲ သီတူၢ်ဒီးတနၢ် သီၣ်ဝဲဒိၣ်ဒိၣ်လီၤ.+
၂၉ ဘၣ်ဆၣ် ဖဲပှၤဟဲက့ၤယိးနုာ် ယဟိဝၤယွၤ အတၢ်အၢၣ်လီၤအီလီၤ အတလါလၢ စီၤဒၤဝံး အဝ့ၢ်ပူၤအခါ+ စီၤစီလူး အဖိမုၣ် နီၢ်မံကၤလး+ ကွၢ်စိလီၤတၢ်လၢ ပဲတြီဖိအပူၤ ဒီးထံၣ်ဝဲလၢ စီၤဒၤဝံး ဖုကဆဲး* ဒီးမၤတၢ်သူၣ်ဖှံသးညီလီၤ. အဃိ နီၢ်မံကၤလး ဆိကမိၣ်ဆံးအီၤလီၤ.+