ယံးရမံယၤ
၃၇ ဘၤဘူၤလိၣ်အစီၤပၤ နဘူၤကးန့စၢ် ဒုးကဲထီၣ် စီၤယိၤၡံယၤအဖိခွါ စီၤစံးဒကံယၤလၢစီၤပၤ+ လၢယူဒၤအဟီၣ်ကဝီၤအပူၤ+ အဃိ စီၤစံးဒကံယၤ ပၢတၢ်လၢ စီၤယဟိၤယါကံၣ်အဖိခွါ စီၤကၤနယၤ* အလီၢ်လီၤ.+ ၂ ဘၣ်ဆၣ် စီၤစံးဒကံယၤ, အခ့အပှၤတဖၣ် ဒီးပှၤဂီၢ်မုၢ်လၢ အအိၣ်လၢ တၢ်လီၢ်အံၤန့ၣ် တဒိကနၣ် ယဟိဝၤယွၤ အတၢ်ကတိၤလၢ အတဲဝဲခီဖျိ ဝံယံးရမံယၤန့ၣ်ဘၣ်.
၃ ဒီးစီၤပၤစံးဒကံယၤ ဆှၢလီၤ စီၤၡလ့မယၤအဖိခွါ စီၤယဟူကၤလး+ ဒီးပှၤလုၢ်တၢ်ဒိၣ် စီၤမၤစ့ယၤအဖိခွါ စီၤစဖါနယၤလၢ+ ဝံယံးရမံယၤအအိၣ် ဒီးတဲဝဲလၢ “ဝံသးစူၤ ဃ့ထုကဖၣ်န့ၢ်တၢ်လၢပဂီၢ် လၢပကစၢ် ယဟိဝၤယွၤ အအိၣ်တက့ၢ်.” ၄ မ့ၢ်လၢ ပှၤတပာ် ဝံယံးရမံယၤလၢ ဃိာ်ပူၤဒံးဘၣ်အဃိ ဝံယံးရမံယၤ လဲၤဘၣ်က့ၤဘၣ်တၢ်လၢ ပှၤဂီၢ်မုၢ်အကျါ လၢတၢ်သဘျ့အပူၤလီၤ.+ ၅ ဖဲန့ၣ်အဆၢကတီၢ် ပှၤက့ၤစ့းဖိ ကဝီၤဃာ်ဝဲ ဝ့ၢ်ယရူၤၡလ့ၣ် ဘၣ်ဆၣ် ဖဲပှၤက့ၤစ့းဖိ နၢ်ဟူဝဲလၢ ဖၤရိၤအသုးမုၢ် ဟးထီၣ်လၢ ကီၢ်အဲၤကူပတူး အပူၤအခါ+ အဝဲသ့ၣ် ဂုၤက့ၤအလီၢ်ခံ ဒီးတဒုးဝဲ ဝ့ၢ်ယရူၤၡလ့ၣ်လၢၤဘၣ်.+ ၆ ဒီးယဟိဝၤယွၤ တဲဘၣ် ဝံယံးရမံယၤလၢ ၇ “အံၣ်စရ့လး အကစၢ် ယဟိဝၤယွၤ တဲဘၣ် စီၤပၤစံးဒကံယၤ အပှၤစိာ်တၢ်ကစီၣ်ဖိတဖၣ်လၢ ‘သုကဘၣ် တဲဘၣ် ယူဒၤအစီၤပၤလၢ အမၢသုဟဲသံကွၢ်တၢ်လၢ ယအိၣ်န့ၣ်လၢ “ကနၣ်လၢအံၤ, ဖၤရိၤအသုးမုၢ်လၢ အဟဲမၤစၢၤသုန့ၣ် ကက့ၤကဒါက့ၤလၢ အဝဲသ့ၣ် အကီၢ်အဲၤကူပတူး အပူၤလီၤ.+ ၈ ဒီးပှၤက့ၤစ့းဖိ ကဟဲက့ၤကဒါက့ၤ ဒီးဒုးဝဲ ဝ့ၢ်တဖျၢၣ်အံၤ, မၤန့ၢ်ဝဲ ဒီးဒွဲၣ်အူထီၣ်ကွံာ်ဝဲလီၤ.”+ ၉ ယဟိဝၤယွၤ တဲဝဲလၢ “တဘၣ်လံၣ်န့ၢ်လီန့ၢ်လီၤ သုနီၢ်ကစၢ်သး ဒီးတဲလၢ ‘ပှၤက့ၤစ့းဖိတဖၣ် တဟဲကဒါက့ၤလၢၤဘၣ်’ န့ၣ်တဂ့ၤ. အဝဲသ့ၣ် ကဟဲကဒါက့ၤ သပှၢ်တၢၢ်လီၤ. ၁၀ သုမ့ၢ်မၤနၢၤ ပှၤက့ၤစ့းဖိ အသုးမုၢ်လၢ အဒုးသုဒီတဖု ဒီးမ့ၢ်အိၣ်တ့ၢ်က့ၤထဲ အပှၤလၢအဘၣ်ဒိတဖၣ် သနာ်က့ အဝဲသ့ၣ် ကဟူးထီၣ်ဒံးလၢအဒဲ ဒီးဒွဲၣ်အူကွံာ် ဝ့ၢ်တဖျၢၣ်အံၤလီၤ.”’”+
၁၁ ခီဖျိလၢ ဖၤရိၤအသုးမုၢ်ဟဲဝဲအဃိ ဖဲပှၤက့ၤစ့းဖိအသုးမုၢ် ဂုၤက့ၤအလီၢ်ခံ ဒီးဟးယံၤကွံာ်ဒီး ဝ့ၢ်ယရူၤၡလ့ၣ်အခါ+ ၁၂ ဝံယံးရမံယၤ ဟးထီၣ်လၢ ဝ့ၢ်ယရူၤၡလ့ၣ် ဒီးလဲၤဝဲလၢ ဘံၣ်ယၤမံၣ်အဟီၣ်ကဝီၤပူၤ+ ဒ်သိးကမၤန့ၢ်ဝဲ အဟီၣ်ခိၣ်လီၢ်လၢ အပှၤတဖၣ်အကျါလီၤ. ၁၃ ဘၣ်ဆၣ် ဖဲအလဲၤတုၤလၢ ဘံၣ်ယၤမံၣ်အတြဲၤအခါ ပှၤခိးတၢ်ဖိအခိၣ် စီၤယရံယၤ ဖီၣ်န့ၢ်အီၤလီၤ. စီၤယရံယၤ အပၢ်မ့ၢ်ဝဲ စီၤၡလ့မယၤ ဒီးစီၤၡလ့မယၤ အပၢ်မ့ၢ်ဝဲ စီၤဃနၤနယၤလီၤ. စီၤယရံယၤ တဲဝဲ ဝံယံးရမံယၤလၢ “နကလဲၤ ဟ့ၣ်လီၤနသးလၢ ပှၤက့ၤစ့းဖိ အစုပူၤသၢၤ.” ၁၄ ဒီးဝံယံးရမံယၤ တဲဝဲလၢ “တမ့ၢ်ဘၣ်. ယတလဲၤ ဟ့ၣ်လီၤယသးလၢ ပှၤက့ၤစ့းဖိ အစုပူၤဘၣ်.” ဘၣ်ဆၣ် စီၤယရံယၤ တဒိကနၣ်အီၤဘၣ် အဃိ အဖီၣ်န့ၢ်ဝံယံးရမံယၤ ဒီးလဲၤကိးအီၤလၢ ပဒိၣ်ဖးဒိၣ်တဖၣ်အအိၣ်လီၤ. ၁၅ ဒီးပဒိၣ်ဖးဒိၣ်တဖၣ်န့ၣ် သးပှံၢ်ထီၣ် ဝံယံးရမံယၤ+ ဒီးတီၢ်အီၤ ဒီးပာ်အီၤလၢ+ နဲၣ်ရွဲၣ်စီၤယိနာ်သၣ် အဟံၣ်လၢ ပှၤဒုးကဲထီၣ်ဝဲလၢ ဃိာ်တဖျၢၣ်လီၤ. ၁၆ ဒီးပှၤထၢနုာ် ဝံယံးရမံယၤလၢ တၢ်ပူၤလၢ ပှၤခူၣ်န့ၢ်အီၤလၢ ဟီၣ်ခိၣ်လာ် ဒီးအအိၣ်ဝဲဖဲန့ၣ် တဘျုးနံၤတဘျုးသီညါလီၤ.
၁၇ လၢခံ စီၤပၤစံးဒကံယၤ မၢပှၤလဲၤကိးန့ၢ် ဝံယံးရမံယၤ ဒီးစီၤပၤသံကွၢ်ခူသူၣ်အီၤလၢ စီၤပၤအနီၢ်ကစၢ် အဟံၣ်ပူၤလီၤ.*+ စီၤပၤသံကွၢ်ဝဲလၢ “တၢ်ကစီၣ်လၢ အဟဲလၢ ယဟိဝၤယွၤအအိၣ်န့ၣ် အိၣ်တမံၤမံၤဧါ.” ဝံယံးရမံယၤ တဲဝဲလၢ “အိၣ်ဝဲသၢၤ.” ဒီးအဆဲးတဲ စီၤပၤလၢ “တၢ်ကဟ့ၣ်လီၤကွံာ်နၤလၢ ဘၤဘူၤလိၣ် အစီၤပၤ အစုပူၤလီၤ.”+
၁၈ ဝံယံးရမံယၤ တဲဘၣ်စ့ၢ်ကီး စီၤပၤစံးဒကံယၤလၢ “ပှၤထၢနုာ်ယၤလၢ ဃိာ်ပူၤန့ၣ် မ့ၢ်ယမၤကမၣ်ဘၣ်နၤ, နခ့နပှၤတဖၣ် ဒီးပှၤဂီၢ်မုၢ်တဖၣ်အံၤ ဒ်လဲၣ်. ၁၉ နဝံတဖၣ်လၢ အတဲဆိပာ်စၢၤနၤလၢ ‘ဘၤဘူၤလိၣ် အစီၤပၤ တဟဲဒုးနၤ ဒီးတၢ်လီၢ်တတီၤအံၤဘၣ်’ န့ၣ်ခဲအံၤ အဝဲသ့ၣ် အိၣ်ဖဲလဲၣ်.+ ၂၀ အဃိ ခဲအံၤ ယကစၢ်စီၤပၤဧၢ, ဝံသးစူၤ ကနၣ်လၢအံၤ. ယဃ့ကညးနၤလၢ နကမၤတၢ်လၢ ယဃ့နၤလီၤ. ဝံသးစူၤ တဘၣ်ဆှၢကဒါက့ၤယၤလၢ နဲၣ်ရွဲၣ် စီၤယိနာ်သၣ် အဟံၣ်တဂ့ၤ.+ နမ့ၢ်မၤဒ်န့ၣ်န့ၣ် ယကသံဖဲန့ၣ်လီၤ.”+ ၂၁ အဃိ စီၤစံးဒကံယၤ ဟ့ၣ်လီၤတၢ်ကလုၢ်လၢ ပှၤကဖီၣ်ဃာ် ဝံယံးရမံယၤလၢ ပှၤခိးတၢ်ဖိ အကရၢၢ်ပူၤလီၤ.+ ဒီးပှၤဟ့ၣ်ဒုးအီၣ်အီၤ ကိၣ်တနံၤတလိၣ်လၢ အဟဲဝဲလၢ ပှၤကုၢ်ကိၣ်အကျဲပူၤ+ ကိးနံၤဒဲး တုၤလၢ ကိၣ်လၢ ဝ့ၢ်ပူၤလၢာ်ကွံာ်ဝဲ ခဲလၢာ်လီၤ.+ ဒီးဝံယံးရမံယၤ ဆဲးအိၣ်ဝဲလၢ ပှၤခိးတၢ်ဖိ အကရၢၢ်ပူၤလီၤ.