ယၡါယၤ
၃ တပိၢ်တဘိလၢ အသဘှံးန့ၣ် အဝဲ တမၤတဲာ်ကွံာ်ဝဲဘၣ်
ဒီးမ့ၣ်အူဒၢအပှံာ်လၢ အကဲၤဒံး ထဲတစဲးဖိန့ၣ် အဝဲ တမၤလီၤပံာ် ဝဲဘၣ်.+
လၢတၢ်သးတီအပူၤန့ၣ် အဝဲကဒုးအိၣ်ထီၣ် တၢ်စံၣ်ညီၣ်တီလီၤ.+
၄ အတလီၤဘှံးဘၣ် ဒီးအသးတလီၤစၢ်ဘၣ် တုၤလၢ အဒုးအိၣ်ထီၣ် တၢ်စံၣ်ညီၣ်တီလၢ ဟီၣ်ခိၣ်ချၢ တစုလီၤ.+
ကီးတဖၣ် အိၣ်ခိးကွၢ်လၢ် အတၢ်သိၣ်တၢ်သီလီၤ.*
၅ ယဟိဝၤယွၤ မ့ၢ်ယွၤလၢ အမ့ၢ်အတီတဂၤ ဒီးပှၤလၢ အတ့လီၤမူခိၣ်လီၤ.
အဝဲမ့ၢ် ကစၢ်ယွၤဖးဒိၣ်တဂၤလၢ အသလၣ်ထီၣ်မူခိၣ်,+
အဝဲတ့လီၤ* ဟီၣ်ခိၣ် ဒီးတၢ်လၢ အမဲထီၣ်သၣ်ထီၣ်လၢ အပူၤ ခဲလၢာ်လီၤ.+
အဝဲဒုးကသါ ပှၤအိၣ်လၢ ဟီၣ်ခိၣ်ချၢ+
ဒီးဟ့ၣ်လီၤ တၢ်မူအသဟီၣ်လၢ ပှၤလၢအလဲၤတၢ်လၢ အပူၤလီၤ.+ အဝဲတဲဝဲလၢ
၆ “လၢတၢ်တီတၢ်လိၤအပူၤန့ၣ် ယၤ, ယဟိဝၤယွၤအံၤ ယကိးန့ၢ်နၤ ဒီးယဟံးဃာ်နစုလီၤ.
ယကဒီသဒၢနၤ ဒီးနကလီၤဂာ်ဒ်သိးဒီး တၢ်အၢၣ်လီၤအီလီၤတခါလၢ
ယၤဒီးပှၤဂီၢ်မုၢ်တဖၣ် အဘၢၣ်စၢၤ+
ဒီးဒ်သိးဒီး တၢ်ကပီၤလၢ ပှၤကလုာ်တဖၣ် အဂီၢ်လီၤ.+
၇ အဃိ ပှၤလၢ အမဲာ်တထံၣ်တၢ်ဘၣ်တဖၣ်န့ၣ် နကဒုးထံၣ်ထီၣ်က့ၤ အီၤတၢ်,+
နကဒုးဟးထီၣ် ပှၤဃိာ်ဖိ လၢဃိာ်အဒၢးခံးသူအပူၤ
ဒီးပှၤလၢအဆ့ၣ်နီၤလၢ တၢ်ခံးကျါန့ၣ် နကဒုးဟးထီၣ် အဝဲသ့ၣ်လၢ ဃိာ်ပူၤလီၤ.+
၈ ယမ့ၢ် ယဟိဝၤလီၤ. အဝဲန့ၣ် မ့ၢ်ဝဲ ယမံၤလီၤ.
တၢ်လၤကပီၤလၢ ယကြၢးဒိးန့ၢ်ဘၣ်န့ၣ် ယတပျဲလၢ ပှၤအဂၤ ကဒိးန့ၢ်ဘၣ်အီၤ နီတဂၤဘၣ်.
ဒီးတၢ်စံးထီၣ်ပတြၢၤ လၢယကြၢးဒိးန့ၢ်ဘၣ်အီၤန့ၣ် ယတပျဲလၢ တၢ်ဂီၤတၢ်ဖှီၣ်တဖၣ် ကဒိးန့ၢ်ဘၣ်ဘၣ်.+
၉ ကွၢ်မီၤ, တၢ်အခီၣ်ထံးတဖၣ်န့ၣ် ကဲထီၣ်တ့ၢ်အသးလံ
ခဲအံၤန့ၣ် ယတဲဖျါထီၣ် တၢ်အသီတဖၣ်လီၤ.
ဒီးတချုးလၢ တၢ်မၤအသး တဖၣ်အံၤ ဟဲကဲထီၣ်ဒံးဘၣ်န့ၣ် ယတဲဆိသုလီၤ.”+
၁၀ ပှၤလၢအလဲၤတၢ်လၢ ပီၣ်လဲၣ်ပူၤ ဒီးတၢ်လၢအအိၣ်လၢ ပီၣ်လဲၣ်ပူၤ ခဲလၢာ်သ့ၣ်ဧၢ,
ကီးတဖၣ် ဒီးပှၤလၢအအိၣ်လၢ အပူၤသ့ၣ်ဧၢ,+
သးဝံၣ်ထီၣ် ယဟိဝၤယွၤလၢ တၢ်သးဝံၣ်အသီတယုၢ်+
ဒီးသးဝံၣ်စံးထီၣ်ပတြၢၤအီၤ တုၤလၢဟီၣ်ခိၣ်အနၢၣ် အကတၢၢ်တဖၣ်တက့ၢ်.+
မ်ပှၤလၢ အအိၣ်လၢ လၢၢ်ဧိၤလ့ဧိၤ အကျါန့ၣ် ကိးပသူထီၣ်လၢ တၢ်သူၣ်ဖှံသးညီ အပူၤတက့ၢ်.
မ်အဝဲသ့ၣ် ကိးပသူထီၣ်လၢ ကစၢၢ်ဒီခိၣ်တက့ၢ်.
၁၂ မ်အဝဲသ့ၣ် မၤလၤကပီၤ ယဟိဝၤယွၤ
ဒီးလၢကီးတဖၣ်အပူၤဒၣ်လဲာ် မ်အဝဲသ့ၣ် စံးထီၣ်ပတြၢၤအီၤတက့ၢ်.+
၁၃ ယဟိဝၤယွၤ ကလဲၤတၢ်ဒ်သိးဒီး ပှၤဒူပှၤဃိၤတဂၤ,+
အဝဲကလီၤဂာ်ဒ်သိးဒီး ပှၤသုးဖိလၢ အသးဆူၣ်လၢ ကလဲၤဒုးတၢ် အဂီၢ်လီၤ.+
အဝဲကကိးပသူထီၣ် တၢ်ဒုး အတၢ်ကိးပသူ,
အဝဲကပာ်ဖျါထီၣ်လၢ အစိကမီၤဒိၣ်န့ၢ်ဒံး အဒုၣ်အဒါတဖၣ်လီၤ.+
၁၄ ကစၢ်ယွၤတဲဝဲလၢ “ယအိၣ်ဘှ့ၣ် ဖးယံာ်လံ.
ယပၢၤယသး ဒီးယအိၣ်ဘှီၣ်ကလာ် ယံာ်လံ.
ဘၣ်ဆၣ် ခဲအံၤန့ၣ် ဒ်ပိာ်မုၣ်တဂၤလၢ အဟုးဆါဒီး ကအိၣ်ဖျဲၣ်ထီၣ်အသိး
ယကကအု, ကသါဟီၤဟဲၤ ဒီးကသါအီခၣ် တဘျီဃီလီၤ.
၁၅ ယကမၤဟးဂီၤ ကစၢၢ် ဒီးတၢ်လူၢ်တဖၣ်
ဒီးမၤဃ့ထီ အတၢ်မုၢ်တၢ်ဘိ ခဲလၢာ်လီၤ.
၁၆ ယကဆှၢ ပှၤလၢ အမဲာ်တထံၣ်တၢ်ဘၣ်တဖၣ်လၢ ကျဲလၢ အဝဲသ့ၣ် တသ့ၣ်ညါဝဲဘၣ်+
ဒီးယကဒုးပိာ် အဝဲသ့ၣ် ကျဲဖိတဖၣ်လၢ အတသ့ၣ်ညါဝဲဘၣ်လီၤ.+
တၢ်ခံးလၢ အအိၣ်လၢ အဝဲသ့ၣ် အမဲာ်ညါန့ၣ် ယကဒုးကဲထီၣ်က့ၤအီၤလၢ တၢ်ကပီၤ+
ဒီးတၢ်လီၢ်လၢ အထီၣ်စိလီၤညၢၣ်န့ၣ် ယကဒုးကဲထီၣ်အီၤလၢ ဟီၣ်ခိၣ်လၢ အပၢၤလီၤ.+
ယကမၤန့ၢ်တၢ်လၢ အဝဲသ့ၣ်အဂီၢ်ဒ်န့ၣ် ဒီးယတပာ်တ့ၢ် အဝဲသ့ၣ်ဘၣ်.”
၁၇ ပှၤလၢအနာ်န့ၢ် တၢ်ဂီၤတၢ်ဖှီၣ်တဖၣ်
ဒီးပှၤလၢအတဲ တၢ်ဂီၤတၢ်ဖှီၣ်ထးတဖၣ်လၢ “သုမ့ၢ်ပယွၤ”+ န့ၣ်
အဝဲသ့ၣ် ကၡူကွံာ် ဒီးကဒိးန့ၢ်ဘၣ် တၢ်မဲာ်ဆှး သပှၢ်တၢၢ်လီၤ.
၁၈ သုဝဲလၢ အတနၢ်ဟူတၢ်ဘၣ်သ့ၣ်ဧၢ, ကနၣ်တက့ၢ်.
သုဝဲလၢ အမဲာ်တထံၣ်တၢ်ဘၣ်သ့ၣ်ဧၢ, ကွၢ်တၢ် လီၤတံၢ်လီၤဆဲးတက့ၢ်.+
၁၉ မတဂၤ အမဲာ်တထံၣ်တၢ်ဘၣ် ဒ်သိးဒီး ယခ့ယပှၤလဲၣ်.*
မတဂၤ တနၢ်ဟူတၢ်ဘၣ် ဒ်သိးဒီး ပှၤစိာ်တၢ်ကစီၣ်ဖိလၢ ယဆှၢလီၤ အီၤန့ၣ်လဲၣ်.
မတဂၤ အမဲာ်တထံၣ်တၢ်ဘၣ် နးထဲသိးဒီး ပှၤလၢအဒိးန့ၢ်ဘၣ် ခိၣ်ဖးလဲၣ်.
မတဂၤ အမဲာ်တထံၣ်တၢ်ဘၣ် နးထဲသိးဒီး ယဟိဝၤယွၤ အခ့အပှၤလဲၣ်.+
၂၀ သုထံၣ်တၢ်အါမံၤ ဘၣ်ဆၣ် သုတဆဲးကွၢ်တၢ်ဘၣ်.
သုနၢ်အိၣ် ဘၣ်ဆၣ် သုတကနၣ်တၢ်ဘၣ်.+
၂၁ လၢတၢ်သးခုအပူၤ ယဟိဝၤယွၤ ပာ်ဖျါထီၣ်လၢ အတၢ်သိၣ်တၢ်သီန့ၣ်* မ့ၢ်တၢ်လၢ အဒိၣ်ဝဲထီဝဲ ဒီးအိၣ်ဒီး အလၤကပီၤလီၤ.
ဒီးအဝဲမၤဝဲဒ်န့ၣ်န့ၣ် လၢအတၢ်တီ တၢ်လိၤ အဃိလီၤ.
၂၂ ဘၣ်ဆၣ် ပှၤဂီၢ်မုၢ်တဒူၣ်အံၤ ပှၤဂုာ်ဆူၣ်န့ၢ် အဝဲသ့ၣ်အတၢ် ဒီးတမျာ်အဝဲသ့ၣ်လံ.+
အဝဲသ့ၣ်ကိးဂၤဒဲး အိၣ်ကတာ်ထီလၢ တၢ်ပူၤတဖၣ် ဒီးတၢ်စၢဃာ်အဝဲသ့ၣ်လၢ ဃိာ်ပူၤလီၤ.+
ပှၤဂုာ်ဆူၣ်န့ၢ် အဝဲသ့ၣ်အတၢ် ဒီးပှၤလၢကမၤပူၤဖျဲး အဝဲသ့ၣ်န့ၣ် တအိၣ်နီတဂၤဘၣ်.+
ဒီးပှၤက့ၤဖီၣ်အဝဲသ့ၣ် ဒီးပှၤလၢအကတဲလၢ “က့ၤဆှၢက့ၤ အဝဲသ့ၣ်သၢၤ” န့ၣ်တအိၣ်နီတဂၤဘၣ်.
၂၃ လၢသုကျါန့ၣ် မတဂၤနၢ်ဟူ တၢ်ဂ့ၢ်တဖၣ်အံၤလဲၣ်.
မတဂၤ ကဒိကနၣ် ဒီးဟံးန့ၢ်တၢ်မၤလိ လၢခါဆူညါအဂီၢ်လဲၣ်.
၂၄ မတဂၤ ဟ့ၣ်လီၤကွံာ် စီၤယၤကိာ် အစၢၤအသွဲၣ်တဖၣ်လၢ ပှၤဂုာ်ဆူၣ်တၢ် အစုပူၤလဲၣ်.
ဒီးမတဂၤ ဟ့ၣ်လီၤကွံာ် ပှၤအံၣ်စရ့လးဖိလၢ တမျာ်တဖၣ် အစုပူၤလဲၣ်.
တမ့ၢ် ယဟိဝၤယွၤလၢ အမ့ၢ်ပှၤလၢ အဝဲသ့ၣ် မၤကမၣ်ဝဲ တဂၤန့ၣ်ဧီၤ.
၂၅ အဃိ အဝဲဆဲးလူလီၤ အတၢ်သးဒိၣ်
ဒီးတၢ်သးထီၣ်လၢ အဝဲသ့ၣ် အဖီခိၣ် ဒီးဒုးတူၢ်အဝဲသ့ၣ်လၢ တၢ်ဒုး အတၢ်မၤဆူၣ်မၤစိးလီၤ.+
တၢ်ဒုးအံၤ အိၣ်ဝးတရံးအဝဲသ့ၣ် ဒ်မ့ၣ်အူအသိး ဒီးအီၣ်ကွံာ် တၢ်ခဲလၢာ် ဘၣ်ဆၣ် အဝဲသ့ၣ် တန့ၢ်တၢ်မၤလိဒံးဘၣ်.+
ဒီးအဆဲးကဲၤကပျီၤထီၣ်ဘၣ် အဝဲသ့ၣ် သနာ်က့ အဝဲသ့ၣ် တတိၢ်နီၣ်ဝဲလၢ အသးပူၤဒံးဘၣ်.+