လူၤကၣ်
၉ ယ့ၣ်ၡူးကိးဖှိၣ် ပှၤတဆံခံဂၤန့ၣ် ဒီးဟ့ၣ်လီၤအဝဲသ့ၣ် တၢ်စိတၢ်ကမီၤ လၢတၢ်ဝံတၢ်နါ ခဲလၢာ်အဖီခိၣ်+ ဒီးဒ်သိးကမၤဘျါက့ၤ တၢ်ဆူးတၢ်ဆါတဖၣ်အဂီၢ်လီၤ.+ ၂ ဒီးအဝဲဆှၢလီၤအဝဲသ့ၣ် ဒ်သိးကစံၣ်တဲၤတဲလီၤ ကစၢ်ယွၤအဘီအမုၢ် ဒီးကမၤဘျါက့ၤတၢ် အဂီၢ်လီၤ. ၃ အဝဲတဲဘၣ် အဝဲသ့ၣ်လၢ “လၢတၢ်လဲၤတၢ်က့ၤအဂီၢ် တဘၣ်လဲၤစိာ် တၢ်နီတမံၤတဂ့ၤ. နီၣ်ထိးဘိမ့ၢ်ဂ့ၤ, တၢ်အီၣ်အထၢၣ်မ့ၢ်ဂ့ၤ, ကိၣ်မ့ၢ်ဂ့ၤ, စ့မ့ၢ်ဂ့ၤ, ဆ့ကၤခံဘ့ၣ်မ့ၢ်ဂ့ၤ* တဘၣ်လဲၤစိာ် တဂ့ၤ.+ ၄ ဘၣ်ဆၣ် သုမ့ၢ်လဲၤနုာ်လၢ ဟံၣ်တဖျၢၣ်အပူၤန့ၣ် အိၣ်ဖဲန့ၣ်တုၤလၢ သုဟးထီၣ်လၢ တၢ်လီၢ်ဖဲန့ၣ်တက့ၢ်.+ ၅ ဝ့ၢ်တဖျၢၣ်လၢ ပှၤတတူၢ်လိာ်သုဘၣ်န့ၣ် ဖဲသုဟးထီၣ်အခါ တရုၤလီၤက့ၤ ဟီၣ်ခိၣ်ကမူၣ်လၢ သုခီၣ်လိၤ ဒ်တၢ်ဟ့ၣ်ပလီၢ်လၢ အဝဲသ့ၣ်အဂီၢ်တက့ၢ်.”+ ၆ ဒီးအဝဲသ့ၣ် လဲၤလၢ သဝီတဖျၢၣ်ဘၣ်တဖျၢၣ် လၢဟီၣ်ကဝီၤအပူၤ ဒီးစံၣ်တဲၤတဲလီၤတၢ်သးခုကစီၣ် ဒီးမၤဘျါကွံာ် တၢ်ဆူးတၢ်ဆါလၢ တၢ်လီၢ်ကိးပူၤဒဲးလီၤ.+
၇ မ့ၢ်လၢ ပှၤတနီၤ တဲဝဲလၢ စီၤယိၤဟၣ် ဂဲၤဆၢထၢၣ်သမူထီၣ်က့ၤလၢ တၢ်သံအဃိ+ ဖဲပဒိၣ်စီၤဟ့ၤရိာ်* နၢ်ဟူဝဲဘၣ်ဃးဒီး တၢ်မၤအသးခဲလၢာ်အခါ အခိၣ်နူာ်ဘံဘူဝဲဒိၣ်မးလီၤ. ၈ ဘၣ်ဆၣ် ပှၤအဂၤတနီၤ တဲဝဲလၢ စီၤအ့ၤလံယၤ အိၣ်ဖျါထီၣ်ကဒီးဝဲ ဒီးအဂၤတနီၤန့ၣ် တဲဝဲလၢ ဝံလၢပျၢၤတဂၤဂၤ ဂဲၤဆၢထၢၣ် သမူထီၣ်ဝဲလီၤ.+ ၉ ဒီးစီၤဟ့ၤရိာ် တဲဝဲလၢ “စီၤယိၤဟၣ်န့ၣ် ယဒီၣ်တဲာ်ကွံာ် အခိၣ်သၣ်ဃံလံ.+ မ့မ့ၢ်ဒ်န့ၣ်န့ၣ် ပှၤလၢ ယနၢ်ဟူဘၣ်အဂ့ၢ် တဂၤအံၤ မ့ၢ်မတဂၤလဲၣ်.” အဃိ အဝဲအဲၣ်ဒိးထံၣ်ယ့ၣ်ၡူး ဖးဒိၣ်ညါ.+
၁၀ ဖဲတၢ်မၢဖိတဖၣ် ဟဲက့ၤအခါ အဝဲသ့ၣ် တဲဘၣ်ယ့ၣ်ၡူးတၢ်လၢ အဝဲသ့ၣ်မၤဝဲခဲလၢာ်.+ ဝံၤဒီး ယ့ၣ်ၡူးလဲၤကိး အဝဲသ့ၣ်လၢ တၢ်တဒၢအလီၢ် လၢဝ့ၢ်လၢ ပှၤကိးအီၤလၢ ဘ့ၤသစဲဒၤလီၤ.+ ၁၁ ဘၣ်ဆၣ် ပှၤဂီၢ်မုၢ်တဖၣ် သ့ၣ်ညါဝဲအဃိ အဝဲသ့ၣ်ပိာ်ထီၣ်အခံလီၤ. ယ့ၣ်ၡူးတူၢ်လိာ် အဝဲသ့ၣ်ဂ့ၤဂ့ၤ ဒီးတဲဘၣ် အဝဲသ့ၣ် ဘၣ်ဃးဒီး ကစၢ်ယွၤ အဘီမုၢ်အဂ့ၢ် ဒီးမၤဘျါက့ၤ ပှၤဆူးပှၤဆါတဖၣ်လီၤ.+ ၁၂ လၢခံ ဘူးထီၣ်ဖဲ မုၢ်ကလီၤနုာ်အခါ ပှၤတဆံခံဂၤ ဟဲထီၣ်ဝဲ ဒီးတဲဘၣ်ယ့ၣ်ၡူးလၢ “ပအိၣ်တၢ်လီၢ်အံၤ အိၣ်ဖးယံၤညါအဃိ ပျဲက့ၤပှၤဂီၢ်မုၢ်တဖၣ် ဒ်သိးအဝဲသ့ၣ် ကလဲၤလၢ ခိခိၣ်ဒီးသဝီလၢ အဘူးတဖၣ် လၢကဃုအီၣ်ဃုအီ ဒီးကဃုတၢ်လီၢ်လၢ ကအိၣ်ဝဲအဂီၢ်မီၤ.”+ ၁၃ ဘၣ်ဆၣ် ယ့ၣ်ၡူးတဲဘၣ် အဝဲသ့ၣ်လၢ “သုကဘၣ်ဒုးအီၣ် အဝဲသ့ၣ် တၢ်အီၣ်လီၤ.”+ အဝဲသ့ၣ် တဲဝဲလၢ “ပတၢ်တအိၣ် နီတမံၤဘၣ်, အိၣ်ထဲ ကိၣ်ယဲၢ်လိၣ် ဒီးညၣ်ခံဘ့ၣ်လီၤ. မ့ၢ်ပဘၣ်လဲၤပှ့ၤန့ၢ် တၢ်အီၣ်တၢ်အီလၢ ပှၤတဖၣ်အံၤ ခဲလၢာ်အဂီၢ်ဧါ.” ၁၄ ထဲဒၣ်ပိာ်ခွါန့ၣ် ကအိၣ်ဝဲအဂၤ ၅,၀၀၀ ညါ. ဘၣ်ဆၣ် ယ့ၣ်ၡူးတဲဘၣ် အပျဲၢ်အဘီၣ်တဖၣ်လၢ “မၢအဝဲသ့ၣ် ဆ့ၣ်နီၤ တကရူၢ်ဘၣ်တကရူၢ် ဒီးတကရူၢ်န့ၣ် အဂၤ ၅၀ နီၤ.” ၁၅ အဝဲသ့ၣ် မၤဝဲဒ်န့ၣ်ဒီး ပှၤခဲလၢာ်ဆ့ၣ်နီၤဝဲလီၤ. ၁၆ ဒီးယ့ၣ်ၡူးဟံးန့ၢ် ကိၣ်ယဲၢ်လိၣ် ဒီးညၣ်ခံဘ့ၣ် ဒီးကွၢ်ထီၣ်တၢ် လၢမူခိၣ် ဒီးဆိၣ်ဂ့ၤ တၢ်အီၣ်အံၤလီၤ. ဝံၤဒီးအဝဲဘိးကၢ်ကိၣ် ဒီးဟ့ၣ်လီၤကိၣ်ဒီးညၣ်လၢ အပျဲၢ်အဘီၣ် အအိၣ် ဒ်သိးအဝဲသ့ၣ် ကဟ့ၣ်လီၤဝဲ ပှၤဂီၢ်မုၢ်လီၤ. ၁၇ ပှၤခဲလၢာ် အီၣ်ဝဲတုၤအဘျဲ ဒီးအဝဲသ့ၣ်ထၢဖှိၣ်က့ၤဝဲ ကိၣ်အဘျဲၣ်အစဲၢ်န့ၣ် ပှဲၤကု ၁၂ ဒုလီၤ.+
၁၈ လၢခံ ဖဲယ့ၣ်ၡူးဃ့ထုကဖၣ်တၢ် ထဲတဂၤအခါ အပျဲၢ်အဘီၣ်တဖၣ် ဟဲလၢအအိၣ်လီၤ. ဒီးယ့ၣ်ၡူးသံကွၢ် အဝဲသ့ၣ်လၢ “ပှၤဂီၢ်မုၢ်တဖၣ် တဲဝဲလၢ ယမ့ၢ်မတဂၤလဲၣ်.”+ ၁၉ အဝဲသ့ၣ် တဲဆၢဝဲလၢ “ပှၤဘျၢတၢ် စီၤယိၤဟၣ်လီၤ. ဘၣ်ဆၣ် ပှၤတနီၤတဲဝဲလၢ နမ့ၢ်ဝံအ့ၤလံယၤ, မ့မ့ၢ် အဂၤတနီၤန့ၣ် တဲဝဲလၢ နမ့ၢ်ဝံလၢပျၢၤတဂၤဂၤလၢ အဂဲၤဆၢထၢၣ်ဝဲလီၤ.”+ ၂၀ ယ့ၣ်ၡူးတဲ အဝဲသ့ၣ်လၢ “သုမီၤ, မ့ၢ်သုကတဲလၢ ယမ့ၢ်မတဂၤလဲၣ်.” စီၤပ့းတရူး တဲဆၢဝဲလၢ “ကစၢ်ယွၤအခရံာ်လီၤ.”+ ၂၁ ဒီးယ့ၣ်ၡူးမၤလိာ် အဝဲသ့ၣ် လီၤတံၢ်လီၤဆဲးလၢ အဝဲသ့ၣ်တဘၣ်တဲဘၣ် တၢ်ဂ့ၢ်အံၤလၢ ပှၤနီတဂၤဘၣ်.+ ၂၂ ဒီးယ့ၣ်ၡူး တဲဝဲလၢ “ပှၤကညီဖိခွါအံၤ ကဘၣ်တူၢ် တၢ်နးတၢ်ဖှီၣ်အါမံၤ ဒီးပှၤသူၣ်က့သးပှၢ်တဖၣ်, ပှၤလုၢ်တၢ်ဒိၣ်အခိၣ်တဖၣ် ဒီးပှၤကွဲးလံာ်ဖိတဖၣ် တတူၢ်လိာ်အီၤဘၣ် ဒီးပှၤကမၤသံအီၤလီၤ.+ ဘၣ်ဆၣ် လၢသၢသီတသီန့ၣ် အကဘၣ် တၢ်ဒုးဂဲၤဆၢထၢၣ်က့ၤအီၤလီၤ.”+
၂၃ ယ့ၣ်ၡူးတဲဘၣ် အဝဲသ့ၣ်ခဲလၢာ်လၢ “ပှၤလၢအအဲၣ်ဒိး ပိာ်ယခံ တဂၤဂၤန့ၣ် အတဘၣ်အိၣ်မူလၢ အနီၢ်ကစၢ်အဂီၢ်လၢၤဘၣ်.+ ဒီးအဘၣ်ယိးထီၣ် အတၢ်မၤအၢမၤနး အသ့ၣ်တၢၣ်* တနံၤဘၣ်တနံၤ ဒီးပိာ်ယခံထီဘိလီၤ.+ ၂၄ ပှၤလၢ အအဲၣ်ဒိးမၤပူၤဖျဲး အနီၢ်ကစၢ် အသးသမူန့ၣ် အသးသမူ ကလီၤမၢ်ကွံာ်ဝဲလီၤ. မ့မ့ၢ်ပှၤလၢ အသးသမူ လီၤမၢ်ကွံာ် လၢယဃိန့ၣ် ကအိၣ်မူဘၣ်ကဒီးလီၤ.+ ၂၅ ပှၤတဂၤ မ့ၢ်န့ၢ်ဘၣ် ဟီၣ်ခိၣ်ဒီတဘ့ၣ်ညါ သနာ်က့ အသးသမူ မ့ၢ်လီၤမၢ်ကွံာ် မ့တမ့ၢ် မ့ၢ်ဘၣ်ဒိဝဲန့ၣ် မ့ၢ်အဘျုးကအိၣ်လၢ အဂီၢ်ဒ်လဲၣ်.+ ၂၆ ပှၤလၢ အမဲာ်ဆှးလၢယဃိ ဒီးလၢယကလုၢ်ကထါ အဃိန့ၣ် ပှၤကညီဖိခွါအံၤ ကမဲာ်ဆှးဒီးအီၤ ဖဲအဟဲတုၤဒီး အလၤကပီၤ ဒီးအပၢ်အလၤကပီၤ ဒီးမူခိၣ်ကလူးစီဆှံတဖၣ် အလၤကပီၤအခါလီၤ.+ ၂၇ ဘၣ်ဆၣ် ယကတဲဘၣ်သု တီတီလၢ ပှၤလၢ အဆၢထၢၣ်ဖဲအံၤ တနီၤနီၤန့ၣ် တချုးလၢ အသံဒံးဘၣ်အခါ အဝဲသ့ၣ် ကထံၣ်ဘၣ်ဆိ ကစၢ်ယွၤ အဘီအမုၢ်လီၤ.”+
၂၈ ဖဲယ့ၣ်ၡူးတဲ တၢ်ဂ့ၢ်တဖၣ်န့ၣ် ဝံၤအလီၢ်ခံ ကအိၣ်ဝဲဃိးသီဃၣ်ဃၣ် ဒီးအဝဲလဲၤကိးဝဲ စီၤပ့းတရူး, စီၤယိၤဟၣ် ဒီးစီၤယၤကိာ် ဒီးလဲၤထီၣ်ဝဲလၢ ကစၢၢ်ခိၣ် ဒ်သိး ကဃ့ထုကဖၣ်တၢ် အဂီၢ်လီၤ.+ ၂၉ ဖဲအဝဲ ဃ့ထုကဖၣ်တၢ်အခါ အမဲာ်ဆီတလဲဝဲ ဒီးအတၢ်ကူတၢ်ကၤတဖၣ် ဝါထီၣ်ဒီး ကပြုၢ်ကပြီၤထီၣ်ဝဲလီၤ. ၃၀ ဖဲန့ၣ် ပှၤခံဂၤတဲသကိးတၢ်ဒီးယ့ၣ်ၡူး ဒီးအဝဲသ့ၣ်မ့ၢ်ဝဲ စီၤမိၤၡ့ ဒီးဝံအ့ၤလံယၤလီၤ. ၃၁ အဝဲသ့ၣ် အိၣ်ဖျါထီၣ်လၢ တၢ်လၤတၢ်ကပီၤအပူၤ ဒီးတဲတၢ်ဘၣ်ဃး ယ့ၣ်ၡူးကဘၣ်ဟးထီၣ်လၢ ဟီၣ်ခိၣ်ချၢ ဒီးတၢ်မၤအသးအံၤ ကကဲထီၣ်ဝဲလၢ ဝ့ၢ်ယရူၤၡလ့ၣ်လီၤ.+ ၃၂ ဒီးစီၤပ့းတရူး ဒီးပှၤလၢ အိၣ်ဒီးအီၤတဖၣ် အမဲာ်ဖံးဃၢဒီး မံခ့ဝဲလီၤ. ဘၣ်ဆၣ် ဖဲအဝဲသ့ၣ် ပၢၢ်ထီၣ်အခါ အဝဲသ့ၣ်ထံၣ် ယ့ၣ်ၡူးအလၤကပီၤ+ ဒီးပှၤခံဂၤန့ၣ် ဆၢထၢၣ်ဒီးအီၤလီၤ. ၃၃ ဖဲပှၤခံဂၤန့ၣ် ကဟးထီၣ်လၢ ယ့ၣ်ၡူးအအိၣ်အခါ စီၤပ့းတရူးတဲဘၣ် ယ့ၣ်ၡူးလၢ “သရၣ်ဧၢ, ပမ့ၢ်အိၣ်ဖဲအံၤဒု ဂ့ၤမး. အဃိ ပျဲပသူၣ်ထီၣ် ဒဲသၢဖျၢၣ်တက့ၢ်. လၢနဂီၢ်တဖျၢၣ်, လၢစီၤမိၤၡ့အဂီၢ်တဖျၢၣ် ဒီးလၢဝံအ့ၤလံယၤအဂီၢ် တဖျၢၣ်.” အဝဲတဲ တၢ်မနုၤလဲၣ်န့ၣ် အတသ့ၣ်ညါလီၤအသးဘၣ်. ၃၄ ဘၣ်ဆၣ် ဖဲစီၤပ့းတရူးတဲဝဲ ဒ်န့ၣ်အခါ တၢ်အၢၣ်ဟဲဖျါထီၣ် ဒီးအကဒုလီၤဘၣ်လၢ အဝဲသ့ၣ် အဖီခိၣ်လီၤ. ဖဲတၢ်အၢၣ်ကးဘၢ အဝဲသ့ၣ်အခါ အဝဲသ့ၣ်ပျံၤတၢ်လီၤ. ၃၅ ဒီးလၢတၢ်အၢၣ်အပူၤန့ၣ် တၢ်ကလုၢ်+ သီၣ်ထီၣ်ဝဲလၢ “အဝဲ မ့ၢ်ယဖိခွါ ဒီးပှၤလၢ ယဃုထၢအီၤလီၤ.+ ဒိကနၣ် အကလုၢ်တက့ၢ်.”+ ၃၆ ဖဲတၢ်ကလုၢ် သီၣ်ထီၣ်အခါ ယ့ၣ်ၡူးအိၣ်ဝဲ ထဲတဂၤလီၤ. ဘၣ်ဆၣ် အဝဲသ့ၣ်အိၣ်ဘှ့ၣ်ဝဲ ဒီးတၢ်လၢ အဝဲသ့ၣ် ထံၣ်ဝဲတဖၣ်န့ၣ် အဝဲသ့ၣ်တတဲဘၣ် ပှၤနီတဂၤဘၣ် ကအိၣ်တတီၤဖိညါလီၤ.+
၃၇ လၢခံတနံၤဖဲ အဝဲသ့ၣ် ဟဲက့ၤလီၤလၢ ကစၢၢ်ခိၣ်အခါန့ၣ် ပှၤဂီၢ်မုၢ်ဖးဒိၣ်+ ဟဲလၢ ယ့ၣ်ၡူးအအိၣ်လီၤ. ၃၈ ဖဲန့ၣ် ပိာ်ခွါတဂၤလၢ ပှၤဂီၢ်မုၢ်အကျါန့ၣ် ကိးပသူထီၣ်ဝဲလၢ “သရၣ်ဧၢ, ယဖိအိၣ် ထဲတဂၤလီၤ, အဃိ ယဃ့ကညးနၤလၢ နကဟဲကွၢ် ယဖိခွါလီၤ.+ ၃၉ ဖဲတၢ်ဝံတၢ်နါ ဒိးအီၤအခါ အဝဲကိးပသူထီၣ် တဘျီဃီ ဒီးတၢ်ဝံတၢ်နါ တရုၤဆှဲးဆှုအီၤ ဒီးအထးခိၣ် သဘှဲထီၣ်ဝဲလီၤ. ဒီးတၢ်ဝံတၢ်နါ မၤဘၣ်ဒိအီၤ ဝံၤအလီၢ်ခံဒၣ်လဲာ် တအဲၣ်ဒိး ဟးထီၣ်ဒံးဘၣ်. ၄၀ ယဃ့ကညး နပျဲၢ်နဘီၣ်တဖၣ် ဒ်သိး ကနီဟးထီၣ်ကွံာ် တၢ်ဝံတၢ်နါအံၤ ဘၣ်ဆၣ် အဝဲသ့ၣ် မၤဝဲတန့ၢ်ဘၣ်.” ၄၁ ယ့ၣ်ၡူး တဲဆၢဝဲလၢ “ပှၤတစိၤလၢ အတၢ်နာ်တအိၣ်ဘၣ် ဒီးအၢသီသ့ၣ်ဧၢ,+ ယကဘၣ်ဆဲးအိၣ်ဒီးသု ယံာ်ဒံးထဲလဲၣ်. ဒီးယကဘၣ်ဆဲး ဝံသးစူၤသု ယံာ်ဒံးထဲလဲၣ်. ဟဲကိးနဖိခွါ လၢအံၤတက့ၢ်.”+ ၄၂ ဖဲအဝဲဟဲလၢ ယ့ၣ်ၡူးအအိၣ်အခါ တၢ်ဝံတၢ်နါမၤလီၤဃံၢ်အီၤလၢ ဟီၣ်ခိၣ်လိၤ ဒီးတရုၤဆှဲးဆှုအီၤ နးမးလီၤ. ဘၣ်ဆၣ် ယ့ၣ်ၡူးဒူဝဲ တၢ်ဝံတၢ်နါ, မၤဘျါကွံာ် ဖိသၣ်ပိာ်ခွါန့ၣ် ဒီးဟ့ၣ်လီၤက့ၤအီၤလၢ အပၢ်အအိၣ်လီၤ. ၄၃ ခီဖျိလၢ ကစၢ်ယွၤအစိကမီၤလၢ အဒိၣ်အံၤအဃိ အဝဲသ့ၣ်ခဲလၢာ် ကမၢကမၣ်ဝဲလီၤ.
ဖဲပှၤခဲလၢာ် ကမၢကမၣ်ဝဲလၢ တၢ်ခဲလၢာ်လၢ အမၤဝဲတဖၣ်အခါ အဝဲတဲဘၣ် အပျဲၢ်အဘီၣ်တဖၣ်လၢ ၄၄ “ဒိကနၣ်လီၤတံၢ်လီၤဆဲး ဒီးသ့ၣ်နီၣ်ထီၣ်က့ၤ တၢ်ကတိၤတဖၣ်အံၤတက့ၢ်. ပှၤကညီဖိခွါအံၤ ကဘၣ် တၢ်ဟ့ၣ်လီၤကွံာ်အီၤလၢပှၤဂၤအစုပူၤလီၤ.”+ ၄၅ ဘၣ်ဆၣ် ဒ်သိးအဝဲသ့ၣ် သုတနၢ်ပၢၢ်တဂ့ၤအဂီၢ် တၢ်ကတိၤတထံၣ်အံၤ အခီပညီန့ၣ် ဘၣ်တၢ်ပာ်တဒၢအီၤလီၤ. အဃိ တၢ်လၢယ့ၣ်ၡူး တဲဝဲန့ၣ် အဝဲသ့ၣ် တနၢ်ပၢၢ်ဝဲဘၣ်. ဒီးအဝဲသ့ၣ် သံကွၢ်အီၤဘၣ်ဃးဒီး တၢ်ဂ့ၢ်အံၤ တဘူၣ်စ့ၢ်ကီးဘၣ်.
၄၆ ဝံၤဒီး အဝဲသ့ၣ် တဲအါလိာ်သး ဘၣ်ဃးဒီး မတဂၤ ကဲပှၤအဒိၣ်ကတၢၢ်လၢ အဝဲသ့ၣ် အကျါလဲၣ်.+ ၄၇ ဒီးယ့ၣ်ၡူးသ့ၣ်ညါ တၢ်အိၣ်လၢ အဝဲသ့ၣ် အသးပူၤအဃိ အဝဲကိးန့ၢ်ဝဲ ဖိသၣ်တဂၤ ဒီးဒုးဆၢထၢၣ်အီၤလၢ အကပၤ ၄၈ ဒီးတဲဘၣ် အဝဲသ့ၣ်လၢ “ပှၤလၢအတူၢ်လိာ် ဖိသၣ်တဂၤအံၤ လၢယမံၤအဃိန့ၣ် မ့ၢ်အတူၢ်လိာ်ယၤ စ့ၢ်ကီးလီၤ. ဒီးပှၤလၢ အတူၢ်လိာ်ယၤန့ၣ် မ့ၢ်အတူၢ်လိာ်စ့ၢ်ကီး ပှၤလၢ အဆှၢလီၤယၤ တဂၤလီၤ.+ ဒီးပှၤလၢသုကျါ လၢအပာ်အသးဒ် ပှၤအဆံးတဂၤအသိးန့ၣ် အဝဲမ့ၢ်ပှၤလၢ အဒိၣ်လီၤ.”+
၄၉ စီၤယိၤဟၣ် တဲဝဲလၢ “သရၣ်ဧၢ, ပထံၣ်ပှၤတဂၤ သူနမံၤ ဒ်သိး ကနီဟးထီၣ် တၢ်ဝံတၢ်နါတဖၣ် အဂီၢ်လီၤ. ဒီးအဝဲတမ့ၢ် ပှၤလၢ အပိာ်ပခံဘၣ်အဃိ+ ပဂုာ်ကျဲးစၢး တြီအီၤလီၤ.” ၅၀ ဘၣ်ဆၣ် ယ့ၣ်ၡူးတဲဘၣ်အီၤလၢ “တဘၣ်တြီအီၤတဂ့ၤ. ပှၤလၢအတထီဒါသုဘၣ်န့ၣ် မ့ၢ်အအိၣ်လၢ သုအိၣ်တကပၤလီၤ.”
၅၁ ဖဲတၢ်ကဟံးထီၣ်ယ့ၣ်ၡူး ဘူးထီၣ်အခါန့ၣ်+ အဝဲပာ်လီၤအသး ဂၢၢ်ဂၢၢ်ကျၢၤကျၢၤလၢ အကလဲၤလၢ ယရူၤၡလ့ၣ်လီၤ. ၅၂ ဒီးအဝဲဆှၢလီၤဆိ အပျဲၢ်အဘီၣ်တနီၤလၢ အမဲာ်ညါလီၤ. အပျဲၢ်အဘီၣ် လဲၤနုာ်လီၤလၢ ၡၤမရံအသဝီပူၤဒ်သိး ကကတဲာ်ကတီၤ တၢ်လၢအဂီၢ်လီၤ. ၅၃ ပှၤသဝီဖိတဖၣ်အံၤ သ့ၣ်ညါထီၣ်ဝဲလၢ ယ့ၣ်ၡူးပာ်လီၤအသးလၢ အကလဲၤလၢ ယရူၤၡလ့ၣ်အဃိ အဝဲသ့ၣ် တတူၢ်လိာ်မုာ်အီၤဘၣ်.+ ၅၄ ဖဲအပျဲၢ်စီၤယၤကိာ် ဒီးစီၤယိၤဟၣ်+ ထံၣ်ဝဲဒ်န့ၣ်အခါ အဝဲသ့ၣ်တဲဝဲလၢ “ကစၢ်ဧၢ, မ့ၢ်နအဲၣ်ဒိးလၢ ပကကိးလီၤ မ့ၣ်အူလၢမူခိၣ် ဒ်သိး ကမၤဟးဂီၤကွံာ် အဝဲသ့ၣ်အဂီၢ်ဧါ.”+ ၅၅ ဒီးယ့ၣ်ၡူး ဃၣ်ဃီၤအသး ဒီးသိၣ်အဝဲသ့ၣ်လီၤ. ၅၆ အဃိ အဝဲသ့ၣ် လဲၤက့ၤလၢ သဝီအဂၤတဖျၢၣ်လီၤ.
၅၇ ဖဲအဝဲသ့ၣ် လဲၤတၢ်လၢကျဲအခါ ပှၤတဂၤ တဲဘၣ်ယ့ၣ်ၡူးလၢ “ဖဲနလဲၤ တပူၤဂ့ၤတပူၤဂ့ၤန့ၣ် ယကပိာ်နခံလီၤ.” ၅၈ ဘၣ်ဆၣ် ယ့ၣ်ၡူး တဲအီၤလၢ “ထွံၣ်ဟီၣ်ခိၣ်တဖၣ်န့ၣ် အိၣ်ဒီးအပူၤ ဒီးထိၣ်လၢ တၢ်ဖးဖီတဖၣ်န့ၣ် အိၣ်ဒီးအသွံ မ့မ့ၢ် ပှၤကညီဖိခွါအံၤ အနီၢ်ကစၢ်အဟံၣ် တအိၣ်ဘၣ်.”*+ ၅၉ ဝံၤဒီး အဝဲတဲဘၣ် ပှၤအဂၤတဂၤလၢ “ဟဲပိာ်ယခံတက့ၢ်.” ပှၤတဂၤန့ၣ် တဲဝဲလၢ “ကစၢ်ဧၢ, ဟ့ၣ်ယၤအခွဲးလၢ ယကက့ၤခူၣ်လီၤဆိ ယပၢ်မီၤ.”+ ၆၀ ဘၣ်ဆၣ် ယ့ၣ်ၡူးတဲဘၣ်အီၤလၢ “ပှၤသံကခူၣ်လီၤကွံာ် ပှၤသံဒၣ်ဝဲ.*+ မ့မ့ၢ်နၤန့ၣ် လဲၤစံၣ်တဲၤတဲလီၤ ကစၢ်ယွၤ အဘီအမုၢ်လၢ တၢ်လီၢ်ဝးဝးတက့ၢ်.”+ ၆၁ ဒီးပှၤအဂၤတဂၤ တဲဝဲလၢ “ကစၢ်ဧၢ, ယကပိာ်နခံလီၤ. ဘၣ်ဆၣ် ဟ့ၣ်ဆိယၤအခွဲးလၢ ယကတဲကျၢ ယဟံၣ်ဖိဃီဖိတက့ၢ်.” ၆၂ ယ့ၣ်ၡူး တဲအီၤလၢ “ပှၤလၢ အထူစံာ်ဒီး ကွၢ်ကဒါက့ၤ လၢအလီၢ်ခံန့ၣ်+ တကြၢးဒီး ကစၢ်ယွၤ အဘီအမုၢ်ဘၣ်.”+