ယိၤဟၣ်

၁၉ စီၤပံၤလး မၢပှၤက့ၤကိးယ့ၣ်ၡူးလၢ ကဖျ့အီၤအဂီၢ်လီၤ.+ ၂ ဒီးပှၤသုးဖိတဖၣ်​ သံၣ်ထီၣ်ဝဲ တၤဆှုၣ်တဖၣ်​ ဒ်ခိၣ်သလုးအသိး ဒီးဖျီၣ်ထီၣ်ဝဲလၢ ယ့ၣ်ၡူးအခိၣ်လိၤ ဒီးဒုးကၤထီၣ်အီၤ ဆ့ကၤဖးထီလၢ အလွဲၢ်လုးတဘ့ၣ်လီၤ.+ ၃ ဒီးအဝဲသ့ၣ်​ ဟဲထီၣ်လၢ ယ့ၣ်ၡူးအအိၣ်​ ဒီးတဲဝဲလၢ “ပှၤယူဒၤဖိ အစီၤပၤဧၢ, ပဆၢဂ့ၤဆၢဝါနၤလီၤ.” ဒီးအဝဲသ့ၣ်​ ဒဲအမဲာ်သၣ်​ တဘျီဝံၤတဘျီလီၤ.+ ၄ စီၤပံၤလး ဟးထီၣ်ကဒီးလၢ တၢ်ချၢ ဒီးတဲပှၤဂီၢ်မုၢ်လၢ “ကွၢ်မီၤ, ယကဟဲကိးထီၣ်အီၤလၢ တၢ်ချၢ လၢသုအိၣ်ဒ်သိး သုကသ့ၣ်ညါလၢ ယဃုအတၢ်ကမၣ်​ တဘၣ်နီတမံၤဘၣ်.”+ ၅ အဃိ ယ့ၣ်ၡူး ဟဲထီၣ်လၢတၢ်ချၢ ဒီးအခိၣ်ဘၣ်တၢ် ဖျီၣ်ဃာ်အီၤဒီး ခိၣ်သလုးတၤဆှုၣ်​ ဒီးအသိးဃာ်ဝဲ ဆ့ကၤဖးထီလၢ အလွဲၢ်လုးတဘ့ၣ်လီၤ. ဒီးစီၤပံၤလး တဲဘၣ်အဝဲသ့ၣ်လၢ “ကွၢ် ပှၤတဂၤအံၤမီၤ.” ၆ ဘၣ်ဆၣ်​ ဖဲပှၤလုၢ်တၢ်ဒိၣ်အခိၣ်တဖၣ်​ ဒီးပှၤပၢၤတၢ်ဖိတဖၣ်​ ထံၣ်အီၤအခါ အဝဲသ့ၣ်​ ကိးပသူထီၣ်လၢ “ပျၤထီအီၤ လၢသ့ၣ်တၢၣ်​ အလိၤဟီ. ပျၤထီအီၤ လၢသ့ၣ်တၢၣ်​ အလိၤဟီ.”*+ စီၤပံၤလး တဲဘၣ်အဝဲသ့ၣ်လၢ “လဲၤကိးအီၤလၢ သုနီၢ်ကစၢ် ဒီးမၤသံအီၤန့ၣ်. မ့မ့ၢ်ယၤန့ၣ်​ ယတထံၣ်​ အတၢ်ကမၣ်​ နီတမံၤဘၣ်.”+ ၇ ပှၤယူဒၤဖိတဖၣ်​ တဲဆၢက့ၤအီၤလၢ “ပအိၣ်ဒီး တၢ်သိၣ်တၢ်သီတခါလီၤ. မ့ၢ်လၢ အဝဲကိးလီၤအသးလၢ ကစၢ်ယွၤ အဖိခွါအဃိ+ ဒ်တၢ်သိၣ်တၢ်သီ အိၣ်ဝဲအသိး အဝဲကြၢးသံလီၤ.”+

၈ ဖဲစီၤပံၤလးနၢ်ဟူ အဝဲသ့ၣ်​ အတၢ်ကတိၤအခါ အဝဲပျံၤတၢ် ဒိၣ်န့ၢ်အလီၢ်ဒံး. ၉ ဒီးအဝဲ က့ၤနုာ်လီၤကဒီးလၢ အဟံၣ်ကရၢၢ်ပူၤ* ဒီးတဲယ့ၣ်ၡူးလၢ “နဟဲလၢ တၢ်လီၢ်ဖဲလဲၣ်.” ဘၣ်ဆၣ်​ ယ့ၣ်ၡူး တတဲဆၢအီၤ နီတမံၤဘၣ်.+ ၁၀ အဃိ စီၤပံၤလး တဲအီၤလၢ “နတတဲဆၢယၤဧီၤ. ယအိၣ်ဒီး တၢ်စိတၢ်ကမီၤလၢ ကပျၢ်ကွံာ်နၤ ဒီးယအိၣ်ဒီး တၢ်စိတၢ်ကမီၤလၢ ကမၤသံနၤန့ၣ်​ နတသ့ၣ်ညါဧီၤ.” ၁၁ ယ့ၣ်ၡူး တဲဆၢအီၤလၢ “ကစၢ်ယွၤ မ့ၢ်တပျဲနၤဘၣ်န့ၣ်​ နတအိၣ်ဒီး တၢ်စိတၢ်ကမီၤလၢ ယဖီခိၣ်​ နီတစဲးဘၣ်. အဃိ ပှၤလၢ အဟ့ၣ်လီၤကွံာ်ယၤလၢ နစုပူၤတဂၤန့ၣ်​ အတၢ်ဒဲးဘး ဒိၣ်န့ၢ်နၤဒံးလီၤ.”

၁၂ အဃိ စီၤပံၤလး ဆဲးဃုကျဲဒ်သိး ကပျၢ်ကွံာ်အီၤ အဂီၢ်လီၤ. ဘၣ်ဆၣ်​ ပှၤယူဒၤဖိတဖၣ်​ ကိးပသူထီၣ်ဝဲလၢ “ပှၤကိးဂၤဒဲးလၢ အဒုးကဲထီၣ်​ အနီၢ်ကစၢ်လၢ စီၤပၤန့ၣ်​ မ့ၢ်အထီဒါ ကဲစၢ်လီၤ. အဃိ နမ့ၢ်ပျၢ်ကွံာ် ပှၤတဂၤန့ၣ်​ နတမ့ၢ်ကဲစၢ် အသကိးဘၣ်.”+ ၁၃ ဖဲစီၤပံၤလး နၢ်ဟူတၢ်ကတိၤတဖၣ်အံၤ ဝံၤအလီၢ်ခံ အဝဲဆှၢထီၣ်​ ယ့ၣ်ၡူးလၢ တၢ်ချၢ ဒီးဆ့ၣ်နီၤဝဲလၢ ပှၤစံၣ်ညီၣ်တၢ် အလီၢ်ဆ့ၣ်နီၤ ဖဲတၢ်လီၢ်လၢ ပှၤကိးအီၤလၢ လၢၢ်ဘ့ၣ်ဘၣ်လီၤ. မ့မ့ၢ်လၢ ဧ့ၤဘြံၤကျိာ်န့ၣ်​ ပှၤကိးအီၤလၢ ကၤဘၤသါ လီၤ. ၁၄ ဖဲန့ၣ်ဘၣ်လၢ မုၢ်နံၤလၢ ပှၤကတဲာ်ကတီၤတၢ် လၢဘူၣ်လဲၤကပာ် အဂီၢ်လီၤ.+ ဒီးကဘၣ်ဖဲ မုၢ်ဆါခီ ၁၂ နၣ်ရံၣ်လီၤ.* ဒီးစီၤပံၤလး တဲဘၣ်​ ပှၤယူဒၤဖိတဖၣ်လၢ “ကွၢ်မီၤ, အကဲသုစီၤပၤလီၤ.” ၁၅ ဘၣ်ဆၣ်​ အဝဲသ့ၣ်​ ကိးပသူထီၣ်ဝဲလၢ “မၤသံကွံာ်အီၤန့ၣ်, မၤသံကွံာ်အီၤန့ၣ်. ပျၤထီအီၤ လၢသ့ၣ်တၢၣ်​ အလိၤဟီ.” စီၤပံၤလး တဲအဝဲသ့ၣ်လၢ “ယကဘၣ်မၤသံ သုစီၤပၤဟီဧါ.” ပှၤလုၢ်တၢ်ဒိၣ်အခိၣ်တဖၣ်​ တဲဆၢဝဲလၢ “ပစီၤပၤ အိၣ်ထဲ ကဲစၢ်တဂၤလီၤ.” ၁၆ ဒီးစီၤပံၤလး ဟ့ၣ်လီၤကွံာ် ယ့ၣ်ၡူးလၢ အဝဲသ့ၣ်အစုပူၤ ဒ်သိး ပှၤကမၤသံအီၤလၢ သ့ၣ်တၢၣ်အလိၤ အဂီၢ်လီၤ.+

အဃိ အဝဲသ့ၣ်​ လဲၤကိး ယ့ၣ်ၡူးလီၤ. ၁၇ ယ့ၣ်ၡူးယိးထီၣ်ဝဲ တၢ်မၤအၢမၤနး အသ့ၣ်တၢၣ်* လၢအနီၢ်ကစၢ် ဒီးလဲၤဝဲလၢ တၢ်လီၢ်လၢ ပှၤကိးဝဲလၢ တၢ်ခိၣ်သၣ်ဃံကုလီၤ.+ လၢဧ့ၤဘြံၤကျိာ်န့ၣ်​ ပှၤကိးတၢ်လီၢ်အံၤလၢ ကီၤလၤကီၤသါ လီၤ.+ ၁၈ ဖဲန့ၣ်​ ပှၤပျၤထီအီၤလၢ သ့ၣ်တၢၣ်လိၤ+ လၢပှၤခံဂၤအကပၤ ဒီးအဝဲသ့ၣ်အိၣ်လၢ အကပၤတခီတဂၤ ဒီးယ့ၣ်ၡူးအိၣ်လၢ တၢ်ခၢၣ်သးလီၤ.+ ၁၉ ဒီးလၢသ့ၣ်ဘ့ၣ်ဘၣ်အလိၤန့ၣ်​ စီၤပံၤလး ကွဲးလီၤဝဲလၢ “ပှၤနစၤရ့းဖိ ယ့ၣ်ၡူးလၢအမ့ၢ် ပှၤယူဒၤဖိ အစီၤပၤ” ဒီးမၢပှၤပာ်ထီၣ်ဝဲလၢ တၢ်မၤအၢမၤနး အသ့ၣ်တၢၣ်လိၤလီၤ.+ ၂၀ မ့ၢ်လၢ အဘၣ်တၢ်ကွဲးလီၤအီၤလၢ ဧ့ၤဘြံၤကျိာ်, လးတ့ၣ်ကျိာ် ဒီးကြံးကျိာ် ဒီးတၢ်ပျၤထီ ယ့ၣ်ၡူးအလီၢ်န့ၣ်​ အိၣ်ဘူးဒီးဝ့ၢ် အဃိ ပှၤယူဒၤဖိအါဂၤ ဖးဘၣ်ဝဲလီၤ. ၂၁ ဘၣ်ဆၣ်​ ပှၤယူဒၤဖိ အပှၤလုၢ်တၢ်ဒိၣ်​ အခိၣ်တဖၣ်​ တဲဘၣ်​ စီၤပံၤလးလၢ “တဘၣ်ကွဲးလီၤလၢ ‘ပှၤယူဒၤဖိ အစီၤပၤ’ တဂ့ၤ. နဘၣ်ကွဲးလီၤလၢ ‘အဝဲတဲဝဲလၢ ယမ့ၢ် ပှၤယူဒၤဖိအစီၤပၤ’ ဟီ.” ၂၂ စီၤပံၤလး တဲဆၢဝဲလၢ “တၢ်လၢယကွဲးလီၤအီၤ ဝံၤလံန့ၣ်​ ဝံၤလံ.”

၂၃ ဖဲပှၤသုးဖိတဖၣ်​ ပျၤထီယ့ၣ်ၡူးလၢ သ့ၣ်တၢၣ်အလိၤ ဝံၤအလီၢ်ခံ အဝဲသ့ၣ်ဟံးန့ၢ် ယ့ၣ်ၡူးအကူအသိး ဒီးနီၤဖးဝဲလွံၢ်ပူ ဒီးပှၤသုးဖိ ဒိးန့ၢ်ဘၣ်ဝဲ တဂၤတပူလီၤ. ဒီးအဝဲသ့ၣ်​ ဟံးန့ၢ်စ့ၢ်ကီး အဆ့ကၤလၢ အဖီလာ်တဘ့ၣ်လီၤ. အဆ့ကၤလၢ အဖီလာ်တဘ့ၣ်အံၤ ဘၣ်တၢ်ထါအီၤ စးထီၣ်လၢ အခိၣ်တုၤလီၤလၢ အခီၣ်ထံး ဒီးအတိၤတအိၣ်ဘၣ်. ၂၄ အဃိ အဝဲသ့ၣ်​ တဲလိာ်သး တဂၤဒီးတဂၤလၢ “မၤညာ်အီၤတဂ့ၤ. ပကဖးတၢ်ဒ်သိး ပကဆၢတဲာ်လၢ မတဂၤ ကန့ၢ်ဘၣ်ဝဲ ဆ့ကၤတဘ့ၣ်အံၤလဲၣ်.”+ တၢ်မၤအသးဒ်န့ၣ်န့ၣ်​ မၤလၢပှဲၤဝဲ တၢ်ကွဲးအသး လၢအမ့ၢ် “အဝဲသ့ၣ်​ နီၤဖးလိာ်အသးလၢ ယတၢ်ကူတၢ်သိးတဖၣ်​ ဒီးအဝဲသ့ၣ်​ ဖးတၢ်လၢ ယတၢ်ကူတၢ်သိး အဂီၢ်လီၤ.”+ ပှၤသုးဖိတဖၣ်​ မၤဝဲဒ်န့ၣ်​ နီၢ်ကီၢ်လီၤ.

၂၅ ယ့ၣ်ၡူး အမိၢ်,+ အမိၢ်အဒီပုၢ်ဝဲၢ်မုၣ်, စီၤကျ့းအီၤပၤအမါ လၢအမ့ၢ် နီၢ်မၤရံ ဒီးနီၢ်မၤရံမၤကဒၤလ့ၣ်+ န့ၣ်ဆၢထၢၣ်ဝဲလၢ ယ့ၣ်ၡူး အတၢ်မၤအၢမၤနး အသ့ၣ်တၢၣ်ကပၤလီၤ. ၂၆ အဃိ ဖဲယ့ၣ်ၡူး ထံၣ်ဘၣ်အမိၢ်ဒီး အပျဲၢ်အဘီၣ်လၢ အအဲၣ်ဝဲတဂၤ+ ဆၢထၢၣ်ဖဲန့ၣ်အခါ ယ့ၣ်ၡူးတဲဘၣ်​ အမိၢ်လၢ “ကွၢ်လၢန့ၣ်​ မ့ၢ်ဝဲနဖိခွါလီၤ.” ၂၇ ဒီးအဝဲတဲဘၣ်​ အပျဲၢ်အဘီၣ်တဂၤန့ၣ်လၢ “ကွၢ်လၢန့ၣ်, မ့ၢ်နမိၢ်လီၤ.” စးထီၣ်ဖဲ ဆၢကတီၢ်ဝဲန့ၣ်​ အပျဲၢ်အဘီၣ်တဂၤအံၤ က့ၤကိး နီၢ်မၤရံလၢ အဟံၣ်လီၤ.

၂၈ ဖဲန့ၣ်ဝံၤအလီၢ်ခံ ယ့ၣ်ၡူးသ့ၣ်ညါဝဲလၢ အဝဲမၤတၢ်ခဲလၢာ် ဝံၤလံအဃိ ဒ်သိးအကမၤလၢပှဲၤ တၢ်ကွဲးအသးအဂီၢ် အဝဲတဲဝဲလၢ “ယအဲၣ်ဒိးအီထံလီၤ.”+ ၂၉ ဒီးတၢ်အဒၢ အိၣ်ဝဲဖဲန့ၣ်တဖျၢၣ်လၢအ ပှဲၤဝဲဒီး စပံးထံအဆံၣ်လီၤ. အဃိ အဝဲသ့ၣ်ဟံးထီၣ်ဝဲ တၢ်ကပုာ်လုးတလိၣ်​ လၢအပှဲၤဒီး စပံးထံအဆံၣ်​ ဒီးဆဲးထီၣ်ဝဲလၢ သ့ၣ်အ့စိး အဒ့ ဒီးယူာ်ထီၣ်ဝဲလၢ အထးခိၣ်လီၤ.+ ၃၀ ဖဲယ့ၣ်ၡူးဒိးန့ၢ်ဘၣ်​ စပံးထံအဆံၣ်အခါ အဝဲတဲဝဲလၢ “တၢ်ခဲလၢာ်ဝံၤလံ.”+ ဒီးအခိၣ်လီၤဖျး ဒီးအသံဝဲလီၤ.*+

၃၁ တၢ်တနံၤန့ၣ်​ မ့ၢ်ဝဲ တၢ်ကတဲာ်ကတီၤတၢ် အမုၢ်နံၤလီၤ.+ အဃိ ဒ်သိး ပှၤအစိၣ်တဖၣ်​ သုတအိၣ်လၢ တၢ်မၤအၢမၤနး အသ့ၣ်တၢၣ်အလိၤတုၤလၢ+ မုၢ်အိၣ်ဘှံးနံၤတဂ့ၤအဂီၢ် (တဘျီအံၤန့ၣ်​ မ့ၢ်မုၢ်အိၣ်ဘှံးနံၤလီၤဆီ),+ ပှၤယူဒၤဖိတဖၣ်​ ဃ့စီၤပံၤလးလၢ ပှၤကမၤကၢ် အဝဲသ့ၣ်အခီၣ်​ ဒီးစိာ်လီၤကွံာ် အဝဲသ့ၣ်အစိၣ်လီၤ. ၃၂ အဃိ ပှၤသုးဖိတဖၣ်​ ဟဲမၤကၢ်ဝဲ ပှၤအဆိကတၢၢ်တဂၤအခီၣ်​ ဒီးပှၤအဂၤတဂၤလၢ အအိၣ်လၢ ယ့ၣ်ၡူးအကပၤန့ၣ်​ အခီၣ်လီၤ. ၃၃ ဘၣ်ဆၣ်​ ဖဲအဝဲသ့ၣ်​ ဟဲတုၤလၢ ယ့ၣ်ၡူးအအိၣ်အခါ အဝဲသ့ၣ်​ ထံၣ်ဝဲလၢ အသံလံအဃိ အဝဲသ့ၣ်​ တမၤကၢ် အခီၣ်လၢၤဘၣ်. ၃၄ ဘၣ်ဆၣ်​ ပှၤသုးဖိတဂၤ ဆဲးဝဲ ယ့ၣ်ၡူးအကပၤ လၢဘီ+ ဒီးတၢ်သွံၣ်ဒီးထံ ဟဲလီၤဝဲ တဘျီဃီလီၤ. ၃၅ ယ* ထံၣ်ဘၣ်​ တၢ်မၤအသးအံၤ ဒီးယအုၣ်ယသး ဒီးယတၢ်အုၣ်သးန့ၣ်​ မ့ၢ်ဝဲတီဝဲလီၤ. ယသ့ၣ်ညါလၢ တၢ်လၢယတဲန့ၣ်​ မ့ၢ်ဝဲတီဝဲ ဒီးယတဲ တၢ်ဂ့ၢ်တဖၣ်အံၤ ဒ်သိးသုကနာ်တၢ် အဂီၢ်လီၤ.+ ၃၆ နီၢ်ကီၢ်န့ၣ်​ တၢ်မၤအသးဒ်အံၤန့ၣ်​ မၤလၢထီၣ်ပှဲၤထီၣ်ဝဲ တၢ်ကွဲးအသး လၢအမ့ၢ် “အဃံတဘိဒၣ်လဲာ် တကၢ်ဝဲဘၣ်.”+ ၃၇ ဒီးတၢ်ကွဲးအသးလၢ အဂၤတခါ ပာ်ဖျါထီၣ်ဝဲလၢ “အဝဲသ့ၣ်​ ကကွၢ်ဝဲ ပှၤလၢ အဝဲသ့ၣ်​ ဆဲးဝဲတဂၤလီၤ.”+

၃၈ တၢ်မၤအသးတဖၣ်န့ၣ်​ ဝံၤအလီၢ်ခံ ပှၤအရံၤမၤသဲဖိ စီၤယိၤသး ဃ့အခွဲးလၢ စီၤပံၤလးအအိၣ်​ ဒ်သိးကက့ၤစိာ် ယ့ၣ်ၡူးအစိၣ်လီၤ. စီၤပံၤလး ဟ့ၣ်အီၤအခွဲးအဃိ အဝဲဟဲဝဲဒီး က့ၤစိာ်ဝဲအစိၣ်လီၤ.+ စီၤယိၤသး မ့ၢ်ဝဲယ့ၣ်ၡူး အပျဲၢ်အဘီၣ်​ ဘၣ်ဆၣ်​ မ့ၢ်လၢအပျံၤ ပှၤယူဒၤဖိ*+ အဃိ အဝဲတဒုးသ့ၣ်ညါ ပှၤဂၤဘၣ်. ၃၉ စီၤနံၤကဒ့မူး+ လၢအဟဲလၢ ယ့ၣ်ၡူးအအိၣ်​ အဆိကတၢၢ်တဘျီ လၢမုၢ်နၤခီန့ၣ်​ ဟဲစ့ၢ်ကီးဝဲ ဒီးစိာ်ဝဲ မူရၣ်​ လၢအဃါဃုာ်ဒီး တၢ်နၢမူနၢဆှီ ဒီးအဃၢကအိၣ်ဝဲ အပီၣ်တကယၤလီၤ.*+ ၄၀ အဝဲသ့ၣ်​ ဟံးန့ၢ် ယ့ၣ်ၡူးအစိၣ်​ ဒီးဘိၣ်ထီၣ်အီၤလၢ တၢ်ကံးညာ်လၢအဂ့ၤ ဒီးတၢ်နၢမူ+ ဒ်ပှၤယူဒၤဖိ ခူၣ်လီၤပှၤသံ အလုၢ်အလၢ် အိၣ်ဝဲအသိးလီၤ. ၄၁ ဒီးဖဲတၢ်မၤသံအီၤ အလီၢ်န့ၣ်​ တၤသၣ်အလီၢ် အိၣ်ဝဲလီၤ. ဒီးလၢ တၤသၣ်အလီၢ်န့ၣ်​ တၢ်သွၣ်ခိၣ်​ အသီအိၣ်ဝဲတဖျၢၣ်+ ဒီးပှၤတလဲၤပာ်လီၤဘၣ်​ ပှၤသံဖဲန့ၣ်​ နီတဂၤဒံးဘၣ်. ၄၂ ဒီးဘၣ်လၢ ပှၤယူဒၤဖိ အတၢ်ကတဲာ်ကတီၤတၢ် အမုၢ်နံၤ+ ဒီးတၢ်သွၣ်ခိၣ်တဖျၢၣ်န့ၣ်​ အိၣ်ဘူးဝဲအဃိ အဝဲသ့ၣ်ပာ်လီၤ ယ့ၣ်ၡူးအစိၣ်​ ဖဲန့ၣ်လီၤ.