လူၤကၣ်

၁၉ ဝံၤဒီး ယ့ၣ်ၡူးလဲၤနုာ်လီၤလၢ ဝ့ၢ်ယရံၤဃိ ဒီးလဲၤခီဂာ်ဝ့ၢ်အံၤလီၤ. ၂ ဒီးစီၤစးဃဲ အိၣ်ဝဲဖဲန့ၣ်လီၤ. အဝဲမ့ၢ် ပှၤထၢတၢ်ခိတၢ်သွဲ အခိၣ်တဂၤ ဒီးအဝဲမ့ၢ် ပှၤထူးပှၤတီၤလီၤ. ၃ အဝဲဂုာ်ကျဲးစၢးဝဲ ဒ်သိးကထံၣ်ဘၣ်​ ယ့ၣ်ၡူး ဘၣ်ဆၣ်​ မ့ၢ်လၢအနီၢ်ဖုၣ်​ ဒီးပှၤဂီၢ်မုၢ်အိၣ်ဝးတရံး ယ့ၣ်ၡူးအဃိ အဝဲကွၢ်အီၤ တဖျါဘၣ်. ၄ အဃိ အဝဲလဲၤဃ့ၢ်လၢ တၢ်မဲာ်ညါ ဒီးထီၣ်လၢ သိးဝံာ်ဒၢ တထူၣ်အလိၤ ဒ်သိးကထံၣ်ဘၣ်​ ယ့ၣ်ၡူး ဖဲအဟဲလၢကျဲ အခါလီၤ. ၅ ဖဲယ့ၣ်ၡူး လဲၤတုၤဖဲန့ၣ်အခါ အဝဲကွၢ်ထီၣ်တၢ်ဒီး တဲအီၤလၢ “စီၤစးဃဲဧၢ, တနံၤအံၤ ယကဘၣ်လဲၤအိၣ်လၢ နဟံၣ်အဃိ စံၣ်လီၤချ့ချ့ဟီ.” ၆ အဃိ အဝဲစံၣ်လီၤချ့ချ့ ဒီးတူၢ်လိာ်မုာ်ယ့ၣ်ၡူးလၢ တၢ်သးခုအပူၤလီၤ. ၇ ဖဲပှၤထံၣ်ဝဲအခါ အဝဲသ့ၣ်ခဲလၢာ် ကဒူးကဒ့ၣ်ဝဲလၢ “အဝဲလဲၤဟးလၢ ပှၤတၢ်ဒဲးဘးဖိတဂၤ အဟံၣ်လီၤ.”+ ၈ ဒီးစီၤစးဃဲ ဂဲၤဆၢထၢၣ်ဒီး တဲဘၣ်ကစၢ်လၢ “ကစၢ်ဧၢ, တၢ်လၢအိၣ်ဒီးယၤ တဝာ်န့ၣ်​ ယကဟ့ၣ်လီၤ ပှၤဖှီၣ်ဖိယာ်ဖိလီၤ. ဒီးပှၤလၢ ယလံၣ်အီၣ်လီအီၣ်အီၤ ကိးဂၤဒဲးန့ၣ်​ ယကဟ့ၣ်ကဒါက့ၤ အဝဲသ့ၣ်​ အါန့ၢ်အလီၢ် လွံၢ်စးလီၤ.”+ ၉ ဖဲန့ၣ်​ ယ့ၣ်ၡူးတဲအီၤလၢ “တနံၤညါအံၤ ကစၢ်ယွၤ အုၣ်က့ၤခီၣ်က့ၤ နၤဒီးနဟံၣ်ဖိဃီဖိလံ, မ့ၢ်လၢနမ့ၢ်စ့ၢ်ကီး စီၤအၤဘြၤဟၣ်​ အဖိခွါအဃိလီၤ. ၁၀ ပှၤကညီဖိခွါအံၤ ဟဲဒ်သိးကဃု ပှၤလၢအဟးဖျိး ဒီးကမၤပူၤဖျဲး အဝဲသ့ၣ်​ အဂီၢ်လီၤ.”+

၁၁ ဖဲယ့ၣ်ၡူး အပျဲၢ်အဘီၣ်တဖၣ်​ ဒိကနၣ်​ တၢ်ဂ့ၢ်တဖၣ်အံၤအခါ မ့ၢ်လၢ ယ့ၣ်ၡူးအိၣ်ဘူးဒီး ယရူၤၡလ့ၣ်အဃိ အဝဲသ့ၣ်​ ဆိကမိၣ်ဝဲလၢ ယွၤအဘီအမုၢ်န့ၣ်​ ကဟဲအိၣ်ဖျါထီၣ်ဝဲ တဘျီဃီလီၤ.+ အဃိ ယ့ၣ်ၡူးတဲဘၣ်​ အဝဲသ့ၣ်​ တၢ်ကတိၤဒိအဂၤတခါလီၤ. ၁၂ အတဲဝဲလၢ “စီၤပၤအဖိခွါတဂၤန့ၣ်​ ဒ်သိးအကန့ၢ်ဘၣ်​ စီၤပၤအလီၢ်လၤအဂီၢ် အကလဲၤဝဲလၢ ထံယံၤကီၢ်ယံၤ+ ဝံၤဒီး ကဟဲက့ၤဝဲလီၤ. ၁၃ အဃိ အဝဲကိးန့ၢ်ဝဲ အကုၢ်အဂၤတဆံ ဒီးဟ့ၣ်လီၤအဝဲသ့ၣ်လၢ စ့မနါတဆံ* ဒီးတဲအဝဲသ့ၣ်လၢ ‘လဲၤပှ့ၤတၢ်ဆါတၢ် တုၤလၢ ယဟဲက့ၤနီၤ.’+ ၁၄ ဘၣ်ဆၣ်​ အထံဖိကီၢ်ဖိတဖၣ်​ သးဟ့အီၤ ဒီးဆှၢလီၤဝဲ ပှၤခၢၣ်စးတဒူၣ်​ ဒ်သိး ကတဲအီၤလၢ ‘ပတအဲၣ်ဒိးလၢ နကကဲပစီၤပၤဘၣ်.’

၁၅ “လၢခံ ဖဲအဒိးန့ၢ်ဘၣ်​ စီၤပၤအလီၢ်အလၤဝံၤဒီး ဟဲက့ၤတုၤဝဲအခါ အဝဲကိးန့ၢ်ဝဲ အကုၢ်လၢ အဟ့ၣ်လီၤဝဲ စ့တဖၣ်​ ဒ်သိး အကသ့ၣ်ညါလၢ အဝဲသ့ၣ်​ ပှ့ၤတၢ်ဆါတၢ် ဒီးန့ၢ်အါထီၣ်​ စ့ထဲလဲၣ်အဂီၢ်လီၤ.+ ၁၆ အဃိ အဆိကတၢၢ်တဂၤန့ၣ်​ ဟဲထီၣ်ဒီးတဲဝဲလၢ ‘ကစၢ်ဧၢ, နစ့တမနါန့ၣ်​ အါထီၣ်ဝဲ အမနါတဆံလီၤ.’+ ၁၇ အဝဲတဲဘၣ်အီၤလၢ ‘ကုၢ်လၢအဂ့ၤဧၢ, နမၤတၢ်ဂ့ၤဒိၣ်မး. လၢတၢ်ဆံးဆံးဖိ အဖီခိၣ်ဒၣ်လဲာ် နပာ်ဖျါထီၣ်လၢ နသးတီအဃိ နကပၢဘၣ်​ ဝ့ၢ်အဖျၢၣ်တဆံလီၤ.’+ ၁၈ ဒီးခံဂၤတဂၤန့ၣ်​ ဟဲတဲဝဲလၢ ‘ကစၢ်ဧၢ, နစ့တမနါန့ၣ်​ အါထီၣ်ဝဲ ယဲၢ်မနါလီၤ.’+ ၁၉ ကစၢ်န့ၣ်​ တဲဘၣ်ပှၤတဂၤအံၤလၢ ‘နၤစ့ၢ်ကီး နကပၢဘၣ်ဝ့ၢ်ယဲၢ်ဖျၢၣ်လီၤ.’ ၂၀ ဘၣ်ဆၣ်​ အဂၤတဂၤ ဟဲတဲဝဲလၢ ‘ကစၢ်ဧၢ, အအံၤနစ့တမနါလၢ ယပာ်ခူသူၣ်အီၤလၢ တၢ်ကံးညာ်အကျါလီၤ. ၂၁ ယပျံၤနၤ မ့ၢ်လၢနမ့ၢ် ပှၤလၢအဆူၣ်အကိၤတဂၤအဃိလီၤ. တၢ်လၢနတမၤအီၤဘၣ်​ နာ်က့ နအဲၣ်ဒိး ဒိးန့ၢ်ဘၣ်အမၠးလီၤ. ဒီးနကူးတၢ်လၢ နတဖှံအီၤဘၣ်.’+ ၂၂ ကစၢ်န့ၣ်​ တဲဘၣ်အီၤလၢ ‘ကုၢ်လၢ အအၢတဂၤဧၢ, ယကစံၣ်ညီၣ်နၤ ဒ်နတၢ်ကတိၤအသိးလီၤ. ယမ့ၢ် ပှၤလၢအဆူၣ်အကိၤ ဒီးတၢ်လၢယတမၤအီၤဘၣ်​ နာ်က့ ယအဲၣ်ဒိး ဒိးန့ၢ်ဘၣ်အမၠး ဒီးယကူးတၢ်လၢ ယတဖှံဘၣ်န့ၣ်​ နသ့ၣ်ညါ တမ့ၢ်ဧီၤ.+ ၂၃ မ့မ့ၢ်ဒ်န့ၣ်န့ၣ်​ ဘၣ်မနုၤအဃိ နတလဲၤပၢနုာ်လီၤ ယစ့လၢ စ့တၢးအပူၤဘၣ်လဲၣ်. ဒီးဖဲယဟဲက့ၤတုၤအခါ ယကဒိးန့ၢ်ဘၣ်က့ၤအီၤ ဒီးစ့အအ့ၣ်လီၤ.’

၂၄ “ဒီးအဝဲတဲဘၣ်​ ပှၤလၢအဆၢထၢၣ်​ ဖဲန့ၣ်တဖၣ်လၢ ‘ဟံးန့ၢ်က့ၤ အစ့တမနါ ဒီးဟ့ၣ်လီၤပှၤလၢ အစ့အိၣ်​ အမနါတဆံတဂၤတက့ၢ်.’+ ၂၅ ဘၣ်ဆၣ်​ အဝဲသ့ၣ်​ တဲဘၣ်အီၤလၢ ‘ကစၢ်ဧၢ, အတၢ်အိၣ်​ အမနါတဆံလံဒၢး.’— ၂၆ ‘ယကတဲဘၣ်သုလၢ ပှၤလၢအတၢ်အိၣ်လံန့ၣ်​ တၢ်ကဟ့ၣ်လီၤ အါထီၣ်အီၤ ဘၣ်ဆၣ်​ ပှၤလၢ အတၢ်တအိၣ်ဘၣ်န့ၣ်​ တၢ်လၢအအိၣ်ဒီးအီၤဒၣ်လဲာ် တၢ်ကဟံးထီၣ်ကွံာ်အီၤလီၤ.+ ၂၇ ဒီးယဒုၣ်ယဒါတဖၣ်လၢ အတအဲၣ်ဒိးလၢ ယကကဲအစီၤပၤဘၣ်န့ၣ်​ ဟဲကိးအဝဲသ့ၣ်ဖဲအံၤ ဒီးမၤသံအီၤလၢ ယမဲာ်ညါဟီ.’”

၂၈ ဖဲယ့ၣ်ၡူး တဲတၢ်ဂ့ၢ်တဖၣ်အံၤ ဝံၤအလီၢ်ခံ အဝဲလဲၤဆူညါ ဒီးလဲၤထီၣ်လၢ ယရူၤၡလ့ၣ်လီၤ. ၂၉ ဖဲအဝဲလဲၤဘူးထီၣ်ဒီး ဘ့ၤသဖၤက့ဒီး ဘ့ၤသနံသဝီ လၢအအိၣ်လၢ ကစၢၢ်သ့ၣ်စၤယံးအခါ+ အဝဲမၢလီၤဝဲ အပျဲၢ်အဘီၣ်ခံဂၤ+ ၃၀ ဒီးတဲဝဲလၢ “လဲၤနုာ်လီၤလၢ သဝီလၢ သုကွၢ်စိအီၤဖျါတဖျၢၣ်​ ဒီးဖဲသုလဲၤနုာ်လီၤအခါန့ၣ်​ သုကထံၣ်​ ကသ့ၣ်ယီၤဖိတဒုလၢ ပှၤတဒိးဘၣ်အီၤ နီတဂၤဒံးဘၣ်န့ၣ်​ ဘၣ်တၢ်စၢဃာ်အီၤလီၤ. ဃဲၣ်လီၤကွံာ်အီၤ ဒီးဟဲက့ၤမူၤအီၤ ဖဲအံၤတက့ၢ်. ၃၁ ဘၣ်ဆၣ်​ ပှၤတဂၤဂၤ မ့ၢ်သံကွၢ်သုလၢ ‘ဘၣ်မနုၤအဃိ သုဃဲၣ်လီၤအီၤလဲၣ်’ န့ၣ်သုဘၣ်တဲလၢ ‘ကစၢ်လိၣ်ဘၣ်အီၤလီၤ.’” ၃၂ ဒီးပှၤလၢအဘၣ်​ တၢ်မၢလီၤအီၤတဖၣ်​ လဲၤဒီးထံၣ်ဝဲဒ်ယ့ၣ်ၡူး တဲအဝဲသ့ၣ်အသိးလီၤ.+ ၃၃ ဖဲအဝဲသ့ၣ်​ ဃဲၣ်လီၤဝဲ ကသ့ၣ်ယီၤဖိအခါ ကသ့ၣ်ယီၤအကစၢ်တဖၣ်​ တဲအဝဲသ့ၣ်လၢ “ဘၣ်မနုၤအဃိ သုဃဲၣ်လီၤ ကသ့ၣ်ယီၤဖိလဲၣ်.” ၃၄ အဝဲသ့ၣ်တဲဝဲလၢ “ကစၢ်လိၣ်ဘၣ်အီၤလီၤ.” ၃၅ ဒီးအဝဲသ့ၣ်​ ဟဲက့ၤမူၤဝဲလၢ ယ့ၣ်ၡူးအအိၣ်​ ဒီးဒါလီၤဝဲ အတၢ်ကူတၢ်ကၤလၢ ကသ့ၣ်ယီၤဖိအလိၤဒီး ယ့ၣ်ၡူးဆ့ၣ်နီၤလၢ အလိၤလီၤ.+

၃၆ ဖဲယ့ၣ်ၡူးလဲၤတၢ်အခါ ပှၤဒါလီၤ ပှၤကူပှၤကၤ လၢကျဲပူၤလီၤ.+ ၃၇ ဒီးဖဲအလဲၤဘူးထီၣ်လၢ ကျဲလၢ အလဲၤလီၤလၢ ကစၢၢ်သ့ၣ်စၤယံးအခါ အပျဲၢ်အဘီၣ်ခဲလၢာ် သးခုဒီးစံးထီၣ်ပတြၢၤ ကစၢ်ယွၤလၢ အကလုၢ်ဖးဒိၣ်​ ခီဖျိလၢ တၢ်လီၤလးခဲလၢာ်လၢ အဝဲသ့ၣ်ထံၣ်တ့ၢ်ဝဲ အဃိလီၤ. ၃၈ ဒီးအဝဲသ့ၣ်တဲဝဲလၢ “ပှၤလၢအဟဲဒ် စီၤပၤတဂၤအသိးလၢ ယဟိဝၤယွၤ* အမံၤန့ၣ်​ မ်အဘၣ်ဆိၣ်ဂ့ၤတက့ၢ်. မ်တၢ်မုာ်တၢ်ခုၣ်​ အိၣ်လၢမူခိၣ်​ ဒီးတၢ်လၤတၢ်ကပီၤ အိၣ်လၢ တၢ်လီၢ်ထီၣ်ထီတက့ၢ်.”+ ၃၉ ဒီးပှၤဖၤရံၤၡဲတနီၤလၢ ပှၤဂီၢ်မုၢ်အကျါန့ၣ်​ တဲယ့ၣ်ၡူးလၢ “သရၣ်ဧၢ, သိၣ်နပျဲၢ်နဘီၣ်တဖၣ်သၢၤ.”+ ၄၀ ဘၣ်ဆၣ်​ ယ့ၣ်ၡူး တဲဆၢက့ၤဝဲလၢ “ယကတဲသု, အဝဲသ့ၣ်​ မ့ၢ်အိၣ်ဘှ့ၣ်န့ၣ်​ လၢၢ်တဖၣ်​ ကကိးပသူထီၣ်လီၤ.”

၄၁ ဒီးဖဲယ့ၣ်ၡူးလဲၤဘူးထီၣ်​ လၢဝ့ၢ်ယရူၤၡလ့ၣ်အခါ အထံၣ်ဝဲဝ့ၢ် ဒီးဟီၣ်ဝဲလၢအဃိ+ ၄၂ ဒီးတဲဝဲလၢ “တုၤလၢတနံၤအံၤဒၣ်လဲာ် ယမုၢ်လၢ်လၢန* ကနၢ်ပၢၢ်ထီၣ်တၢ်လၢ အကဟ့ၣ်နၤ တၢ်ဃူတၢ်ဖိးလီၤ. ဘၣ်ဆၣ်ခဲအံၤ တၢ်ဂ့ၢ်တဖၣ်န့ၣ်​ ဘၣ်တၢ်ပာ်ခူသူၣ်​ အီၤလၢ နမဲာ်ညါလံ.+ ၄၃ တၢ်ဆၢကတီၢ် ကဟဲတုၤလၢ နဒုၣ်နဒါ ကဆီလီၤသ့ၣ်တၢၣ်​ အခိၣ်စူဝးတရံးနၤ, ကကဝီၤဃာ်နၤ ဒီးကဖီၣ်ဃံးနၤဆူၣ်ဆူၣ်​ လၢကျဲကိးကပၤဒဲးလီၤ.+ ၄၄ တၢ်သမံသမိးနၤ အဆၢကတီၢ်ဘၣ်ပာ်စၢၤလံ ဘၣ်ဆၣ်​ နတပလီၢ်နသးဘၣ်​ အဃိ အဝဲသ့ၣ်​ ကမၤသဘှံးနၤဒီးနဖိ လၢဟီၣ်ခိၣ်အလိၤ+ ဒီးအဝဲသ့ၣ်​ တပာ်လီၤတဲာ် လၢၢ်တဖျၢၣ်​ လၢတဖျၢၣ်အဖီခိၣ်​ လၢနပူၤလၢၤဘၣ်.”+

၄၅ ဝံၤဒီး ယ့ၣ်ၡူးလဲၤနုာ်လီၤလၢ တၢ်လုၢ်ဟံၣ်အပူၤ ဒီးနီဟးထီၣ်ကွံာ် ပှၤလၢအပှ့ၤတၢ်ဆါတၢ်တဖၣ်+ ၄၆ ဒီးယ့ၣ်ၡူးတဲအဝဲသ့ၣ်လၢ “တၢ်ကွဲးအသးအိၣ်ဝဲလၢ ‘ယဟံၣ်န့ၣ်ကမ့ၢ်ဝဲ တၢ်ဃ့ထုကဖၣ်အဟံၣ်’+ ဘၣ်ဆၣ်​ သုမၤကဲထီၣ်အီၤလၢ တၢ်ဟုၣ်တၢ်ဘျၣ်​ အဟံၣ်လီၤ.”+

၄၇ အဝဲဆဲးသိၣ်လိတၢ်လၢ တၢ်လုၢ်ဟံၣ်ပူၤ ကိးနံၤဒဲးလီၤ. ဘၣ်ဆၣ်​ ပှၤလုၢ်တၢ်ဒိၣ်အခိၣ်တဖၣ်, ပှၤကွဲးလံာ်ဖိတဖၣ်​ ဒီးပှၤဂီၢ်မုၢ်အခိၣ်အနၢ်တဖၣ်​ ဃုကျဲလၢ ကမၤသံအီၤလီၤ.+ ၄၈ ဘၣ်ဆၣ်​ မ့ၢ်လၢ ပှၤကိးဂၤဒဲး အဲၣ်ဒိးဒိကနၣ်​ ယ့ၣ်ၡူးအတၢ်ကတိၤအဃိ+ အဝဲသ့ၣ်​ ဃုကျဲ တဘၣ်ဘၣ်.