၂ ၡမူၤအ့လး
၁၉ ပှၤတဲဘၣ် စီၤယိၤအာ်လၢ “စီၤပၤသူၣ်အုးသးအုး ဒီးဟီၣ်ဝဲလၢ စီၤအးဘၡါလိၣ် အဃိလီၤ.”+ ၂ ဖဲတၢ်တနံၤန့ၣ် သုးဖိတဖၣ်နၢ်ဟူဝဲလၢ စီၤပၤအသူၣ်အုးသးအုးအဃိ အဝဲသ့ၣ်အတၢ်မၤနၢၤန့ၣ် ကဲထီၣ်က့ၤ တၢ်သးအုးလၢ အဝဲသ့ၣ်အဂီၢ်လီၤ. ၃ အဃိ ဖဲတၢ်တနံၤန့ၣ် သုးဖိတဖၣ် က့ၤနုာ်လီၤဝဲလၢ ဝ့ၢ်ပူၤကစုဒု+ ဒ်ပှၤသုးဖိလၢ အမဲာ်ဆှး ခီဖျိလၢ အဃ့ၢ်ထီၣ်ကွံာ်လၢ တၢ်ဒုးပျီပူၤအသိးန့ၣ်လီၤ. ၄ ဒီးစီၤပၤ ကးဘၢ အမဲာ်သၣ် ဒီးဟီၣ်ဝဲတခီခီ ဒီးကိးပသူထီၣ်ဝဲ တခီခီလၢ “ယဖိခွါ စီၤအးဘၡါလိၣ်ဧၢ, ယဖိခွါ စီၤအးဘၡါလိၣ်ဧၢ, ယဖိခွါဧၢ.”+
၅ အဃိ စီၤယိၤအာ် လဲၤနုာ်လၢဟံၣ်ပူၤ ဒီးလဲၤလၢစီၤပၤအအိၣ်ဒီး တဲအီၤလၢ “နခ့နပှၤတဖၣ်လၢ အမၤပူၤဖျဲး နၤ, နဖိမုၣ်နဖိခွါတဖၣ်,+ နမါဒီးနသံၣ်မါတဖၣ်*+ အသးသမူန့ၣ် တနံၤအံၤ နမၤမဲာ်ဆှး အဝဲသ့ၣ်ကိးဂၤဒဲးလီၤ. ၆ နအဲၣ်ပှၤလၢ အသးဟ့နၤ ဒီးနသးဟ့ ပှၤလၢအအဲၣ်နၤလီၤ. တနံၤအံၤ နပာ်ဖျါထီၣ် ပျီပျီလၢ နသုးခိၣ်တဖၣ် ဒီးနသုးဖိတဖၣ်န့ၣ် လၢနဂီၢ် တမ့ၢ်တၢ်နီတမံၤဘၣ်. ခဲအံၤ စီၤအးဘၡါလိၣ် မ့ၢ်အိၣ်မူဒံး ဒီးပဝဲခဲလၢာ် မ့ၢ်သံသနာ်က့ ယနာ်သပှၢ်ကတၢၢ်လၢ နကထံၣ်လၢ အမ့ၢ်တၢ်လၢ အဂ့ၤလီၤသၢၤ. ၇ ဂဲၤဆၢထၢၣ်ခဲအံၤ, လဲၤဟ့ၣ်ဂံၢ်ဟ့ၣ်ဘါ နသုးဖိတဖၣ်သၢၤ. ယအၢၣ်လီၤလၢ ယဟိဝၤယွၤအမဲာ်ညါလၢ နမ့ၢ်တမၤဒ်န့ၣ်ဘၣ်န့ၣ် တနၤအံၤ ပှၤတအိၣ်တ့ၢ်ဒီးနၤ နီတဂၤလၢၤဘၣ်. ဒီးတၢ်အိၣ်သး ကကီထီၣ်လၢနဂီၢ် နးန့ၢ်ဒံး ကယဲၢ်တၢ်လၢ နတူၢ်ဘၣ်ခဲလၢာ် စးထီၣ်လၢ နသးစၢ်အခါ တုၤလၢခဲအံၤလီၤ.” ၈ အဃိ စီၤပၤဂဲၤဆၢထၢၣ် ဒီးလဲၤဆ့ၣ်နီၤလၢ ဝ့ၢ်အတြဲၤလီၤ. ဒီးပှၤဒုးသ့ၣ်ညါ ပှၤခဲလၢာ်လၢ “ခဲအံၤစီၤပၤ ဆ့ၣ်နီၤလၢ ဝ့ၢ်အတြဲၤလံ.” ဒီးပှၤခဲလၢာ် ဟဲလၢ စီၤပၤအအိၣ်လီၤ.
ဘၣ်ဆၣ် ပှၤအံၣ်စရ့လးဖိတဖၣ်* က့ၤဃ့ၢ်ပာ်စၢၤဝဲလၢ အဝဲသ့ၣ် အနီၢ်ကစၢ် အဟံၣ်လံ.+ ၉ အံၣ်စရ့လး အဒူၣ်ခဲလၢာ် တဲအါလိာ်အသးလၢ “စီၤပၤဒၤဝံး မၤပူၤဖျဲးတ့ၢ်ပှၤလၢ ပဒုၣ်ပဒါ+ ဒီးမၤထူၣ်ဖျဲးထီၣ်ပှၤလၢ ပှၤဖလ့ၡသးဖိ အစုပူၤလီၤ. ဘၣ်ဆၣ်ခဲအံၤ အဝဲဘၣ်ဃ့ၢ်ထီၣ်ကွံာ်လၢ ကီၢ်ပူၤ ခီဖျိလၢ စီၤအးဘၡါလိၣ်အဃိလီၤ.+ ၁၀ ဒီးစီၤအးဘၡါလိၣ်လၢ ပဒိးဖှူအီၤလၢ စီၤပၤလၢ ပဖီခိၣ်န့ၣ်+ သံကွံာ်ဝဲလၢ တၢ်ဒုးပျီပူၤလံ.+ အဃိခဲအံၤ ဒ်သိးသုကဟဲက့ၤ ကိးကဒါက့ၤ စီၤပၤအဂီၢ် ဘၣ်မနုၤအဃိ သုတမၤ တၢ်နီတမံၤဘၣ်လဲၣ်.”
၁၁ စီၤပၤဒၤဝံး ဆှၢလီၤတၢ်ကစီၣ်လၢ ပှၤလုၢ်တၢ်ဒိၣ်တဖၣ် လၢအမ့ၢ် စီၤစၤဒိး+ ဒီးစီၤအ့ဘယၤသၢ်+ အအိၣ်လၢ “တဲယူဒၤ အပှၤသူၣ်က့သးပှၢ်တဖၣ်လၢ+ ‘တၢ်ကစီၣ်လၢ အဟဲလၢ ပှၤအံၣ်စရ့လးဖိ ခဲလၢာ်အအိၣ်န့ၣ် ဟဲတုၤလၢ စီၤပၤအအိၣ် ဖဲအအိၣ်ဝဲအလီၢ်လံအဃိ သုမ့ၢ်ကဲထီၣ် ပှၤအလီၢ်ခံကတၢၢ် တဒူၣ်လၢ အကဟဲက့ၤကိး စီၤပၤလၢအဟံၣ်န့ၣ် မ့ၢ်အကကြၢးဧါ. ၁၂ သုမ့ၢ် ယဒီပုၢ်ဝဲၢ်တဖၣ် ဒီးသုမ့ၢ် ယသွံၣ်ထံဖံးညၣ်လီၤ. ဘၣ်မနုၤအဃိ သုကဘၣ်ကဲထီၣ် ပှၤအလီၢ်ခံကတၢၢ် တဒူၣ်လၢ အကဟဲက့ၤကိးက့ၤ စီၤပၤန့ၣ်လဲၣ်.’ ၁၃ ဒီးသုဘၣ်တဲ စီၤဧမါစၤလၢ+ ‘နကဲယသွံၣ်ထံဖံးညၣ် တမ့ၢ်ဧီၤ. စးထီၣ်ခဲအံၤန့ၣ် နမ့ၢ်တကဲထီၣ်ဘၣ် သုးခိၣ်ကျၢၢ် လၢယသုးမုၢ်အဖီခိၣ် လၢစီၤယိၤအာ်အလီၢ်ဘၣ်န့ၣ် မ်ယဟိဝၤယွၤ သိၣ်ဃီၣ်ယၤ ဆူၣ်ဆူၣ်တက့ၢ်.’”+
၁၄ အဃိ အဝဲထုးန့ၢ် ပှၤပိာ်ခွါလၢ ယူဒၤအဒူၣ်အကျါ ကိးဂၤဒဲးအသး လၢအအိၣ်တခီလီၤ. ဒီးအဝဲသ့ၣ် ဆှၢလီၤတၢ်ကစီၣ်လၢ စီၤပၤအအိၣ်လၢ “နၤဒီးနခ့အပှၤခဲလၢာ်န့ၣ် ဟဲက့ၤသၢၤ.”
၁၅ ဒီးစီၤပၤ က့ၤကဒါက့ၤဝဲ တုၤလီၤလၢ ထံကျိယၢ်ဒ့ၣ် ဒီးပှၤလၢ အပၣ်ဃုာ်လၢ ယူဒၤအဒူၣ်အကျါန့ၣ် လဲၤဝဲလၢ ဝ့ၢ်ကံးလကၤလး+ ဒ်သိးကထံၣ်လိာ်သးဒီး စီၤပၤ ဒီးကဆှၢအီၤလၢ ကခီဂာ် ထံကျိယၢ်ဒ့ၣ် အဂီၢ်လီၤ. ၁၆ ဒီးပှၤဘံၣ်ယၤမံၣ်ဖိ စီၤက့ရၤအဖိခွါ စီၤၡံမံၤ+ လၢအအိၣ်လၢ ဘၤဃူရံၣ်န့ၣ် ကရီလဲၤလီၤဃုာ်ဒီး ပှၤပိာ်ခွါလၢအပၣ်ဃုာ်လၢ ယူဒၤအဒူၣ်အကျါ ဒ်သိးကထံၣ်လိာ်သးဒီး စီၤပၤဒၤဝံးအဂီၢ်လီၤ. ၁၇ ဒီးပှၤဘံၣ်ယၤမံၣ်ဖိ အဂၤ ၁,၀၀၀ အိၣ်ဒီးအီၤလီၤ. ဒီးစီၤစီလူးအဒူၣ်ဖိထၢဖိ အခ့အပှၤတဂၤ စီၤစံဘၤ+ ဒီးအဖိခွါ ၁၅ ဂၤ ဒီးအခ့အပှၤအဂၤ ၂၀ အိၣ်ဝဲစ့ၢ်ကီး ဒီးအဝဲသ့ၣ် ကရီလဲၤလၢ ထံကျိယၢ်ဒ့ၣ် ဒ်သိးကတုၤဆိလၢ စီၤပၤအမဲာ်ညါလီၤ. ၁၈ အဝဲလဲၤခီဂာ် ထံဒီၣ်အလီၢ် ဒ်သိးကဟဲက့ၤကိး စီၤပၤအဒူၣ်ဖိထၢဖိ ဒီးကမၤတၢ်လၢ စီၤပၤလီကီဝဲအဂီၢ်လီၤ. မ့မ့ၢ် စီၤက့ရၤ အဖိခွါ စီၤၡံမံၤန့ၣ် ဖဲစီၤပၤ ကခီလီၤ ထံကျိယၢ်ဒ့ၣ်အခါ အဝဲထိၣ်လီၤပှီၤအသးလၢ စီၤပၤအမဲာ်ညါလီၤ. ၁၉ အဝဲတဲဘၣ်စီၤပၤလၢ “ကစၢ်စီၤပၤဧၢ, ဝံသးစူၤ တဘၣ်ဟံးန့ၢ်ယၤ အရ့တဂ့ၤ. ယမၤကမၣ်တၢ် ဖဲနဟးထီၣ်လၢ ဝ့ၢ်ယရူၤၡလ့ၣ်တနံၤန့ၣ် သးပ့ၤနီၣ်အီၤမီၤ.+ စီၤပၤဧၢ, ဝံသးစူၤ တၢ်ဂ့ၢ်တခါန့ၣ် တဘၣ်ပာ်လၢ နသးပူၤတဂ့ၤ. ၂၀ ယကစၢ်စီၤပၤဧၢ, ယမၤကမၣ်ဘၣ်တၢ်န့ၣ် ယသ့ၣ်ညါလံ အဃိတနံၤအံၤ လၢစီၤယိၤသး အဒူၣ်ဖိထၢဖိ* ခဲလၢာ်အကျါ ယမ့ၢ် ပှၤအဆိကတၢၢ်တဂၤလၢ အဟဲလီၤထံၣ်လိာ်သးဒီးနၤလီၤ.”
၂၁ တဘျီဃီန့ၣ် နီၢ်စရူယၤ အဖိခွါ+ စီၤအဘံၡဲၤ+ တဲဝဲလၢ “မ့ၢ်လၢ စီၤၡံမံၤ ဆိၣ်အၢ ပှၤလၢယဟိဝၤယွၤ ဒိးဖှူအီၤအဃိ တကြၢးလၢ အဘၣ်သံဧီၤ.”+ ၂၂ ဘၣ်ဆၣ် စီၤဒၤဝံးတဲဝဲလၢ “နီၢ်စရူယၤ အဖိခွါသ့ၣ်ဧၢ,+ တၢ်ဂ့ၢ်တခါအံၤ အဘၣ်ဃးဒီးသုဒ်လဲၣ်, ဘၣ်မနုၤအဃိ တနံၤအံၤ သုအဲၣ်ဒိးထီဒါယၤလဲၣ်. ပှၤကဘၣ် တၢ်မၤသံအီၤတဂၤဂၤလၢ အံၣ်စရ့လးအကျါ တနံၤအံၤန့ၣ် မ့ၢ်အကြၢးဧါ. တနံၤအံၤ ယကဲထီၣ်က့ၤ စီၤပၤလၢ အံၣ်စရ့လး အဖီခိၣ်န့ၣ် မ့ၢ်ယတသ့ၣ်ညါလီၤယသးဒံးဧီၤ.” ၂၃ စီၤပၤ တဲဘၣ်စီၤၡံမံၤလၢ “နတသံဘၣ်လၢၤဘၣ်.” ဒီးစီၤပၤ ဟ့ၣ်အီၤ တၢ်အၢၣ်လီၤလီၤ.+
၂၄ စီၤစီလူး အလံၤခွါ စီၤမဖံဘိၤၡ့း+ ဟဲလီၤစ့ၢ်ကီးဝဲ ဒ်သိးကထံၣ်လိာ်သးဒီး စီၤပၤအဂီၢ်လီၤ. စးထီၣ်လၢ မုၢ်တနံၤဖဲ စီၤပၤဟးထီၣ်ကွံာ် တုၤလၢမုၢ်တနံၤဖဲ စီၤပၤဟဲက့ၤကဒါ မုာ်မုာ်ခုၣ်ခုၣ်န့ၣ် စီၤမဖံဘိၤၡ့း တမၤကဆှီအခီၣ်ဘၣ်, တတံာ်အခၣ်ဆူၣ်ဘၣ်, ဒီးတဆှုၣ်အကူအကၤဘၣ်. ၂၅ ဖဲစီၤမဖံဘိၤၡ့း လဲၤတုၤလၢ* ဝ့ၢ်ယရူၤၡလ့ၣ် ဒ်သိးကထံၣ်လိာ်သးဒီး စီၤပၤအခါ စီၤပၤတဲအီၤလၢ “စီၤမဖံဘိၤၡ့းဧၢ, ဘၣ်မနုၤအဃိ နတလဲၤပိာ်ယခံဘၣ်လဲၣ်.” ၂၆ ဒီးအဝဲတဲဝဲလၢ “ယကစၢ်စီၤပၤဧၢ, ဒ်နသ့ၣ်ညါအသိး ယခီၣ်တဂ့ၤဘၣ်.+ အဃိ ယတဲလၢ ‘ယကကတဲာ်ကတီၤထီၣ် ယကသ့ၣ်ယီၤ ဒ်သိးယကဒိးအီၤအဂီၢ် ဒီးယကလဲၤပိာ် စီၤပၤအခံလီၤ.’ ဘၣ်ဆၣ် ယခ့ယပှၤ+ လံၣ်န့ၢ်ယၤလီၤ. ၂၇ ဒီးအဝဲတဲဟးဂီၤယၤလၢ ယကစၢ်စီၤပၤ အမဲာ်ညါလီၤ.+ ဘၣ်ဆၣ် ယကစၢ်စီၤပၤ လီၤဂာ်ဒ် ယွၤလၢ အမ့ၢ်အတီ အမူခိၣ်ကလူးတဂၤ အသိးအဃိ တၢ်လၢနဆိကမိၣ်လၢ အဘၣ်န့ၣ် မၤဟီ. ၂၈ လၢညါ ယကစၢ်စီၤပၤ မ့ၢ်အဲၣ်ဒိး စံၣ်ညီၣ်သံ ယပၢ်အဒူၣ်ဖိထၢဖိ ခဲလၢာ်န့ၣ်သ့လီၤ. ဘၣ်ဆၣ် နဟ့ၣ်ယၤအခွဲးလၢ ယကပၣ်ဃုာ်လၢ ပှၤတဖၣ်လၢ အဟဲအီၣ်တၢ်လၢ နစီၢ်နီၤခိၣ်အကျါလီၤ.+ အဃိ ယကဆဲးဃ့အါန့ၢ်အန့ၣ် လၢစီၤပၤအအိၣ်န့ၣ် ကကြၢးဧါ.”
၂၉ ဘၣ်ဆၣ် စီၤပၤ တဲအီၤလၢ “တဘၣ်တဲဒ်န့ၣ်လၢၤတဂ့ၤ. နၤဒီးစီၤစံဘၤ ကန့ၢ်ဘၣ်ဃုာ် ဟီၣ်ခိၣ်လီၢ် ဒ်သိးသိးန့ၣ် ယဆၢတဲာ်ဝံၤလံ.”+ ၃၀ ဖဲန့ၣ်စီၤမဖံဘိၤၡ့း တဲဘၣ်စီၤပၤလၢ “ခဲအံၤ ယကစၢ်စီၤပၤ ဟဲက့ၤတုၤဘၣ်လၢ အဟံၣ် မုာ်မုာ်ခုၣ်ခုၣ်လံ. အဃိ မ်စီၤစံဘၤ ဟံးန့ၢ် ဝဲခဲလၢာ်တက့ၢ်.”
၃၁ ဒီးပှၤကံးလဧးဖိ စီၤဘၢ်စံးလဲလၢ+ အအိၣ်လၢ ရိကလံၣ်န့ၣ် ဟဲလီၤဝဲလၢ ထံကျိယၢ်ဒ့ၣ် ဒ်သိးကလဲၤဆှၢ စီၤပၤလၢ ထံကျိယၢ်ဒ့ၣ်အဂီၢ်လီၤ. ၃၂ စီၤဘၢ်စံးလဲန့ၣ် အသးအိၣ် အနံၣ် ၈၀ အဃိအသးပှၢ်ဒိၣ်မးလံ. စီၤဘၢ်စံးလဲ မ့ၢ်ဝဲပှၤလၢ အကဲဒိၣ်တဂၤအဃိ ဖဲစီၤပၤအိၣ်လၢ မၤဃန့ၤအခါ+ အဝဲလုၢ်အီၣ်လုၢ်အီစီၤပၤလီၤ. ၃၃ အဃိ စီၤပၤ တဲဘၣ် စီၤဘၢ်စံးလဲလၢ “လဲၤခီဂာ်တၢ်ဒီးယၤ ဒီးယကလုၢ်အီၣ်လုၢ်အီနၤလၢ ဝ့ၢ်ယရူၤၡလ့ၣ်အပူၤမီၤ.”+ ၃၄ ဘၣ်ဆၣ် စီၤဘၢ်စံးလဲ တဲဘၣ်စီၤပၤလၢ “ယကအိၣ်မူဘၣ် ပှဲၤနံၣ်ဒံးလဲၣ်မး ယတသ့ၣ်ညါဘၣ်. အဃိ ယကြၢးလဲၤပိာ် စီၤပၤအခံလၢ ဝ့ၢ်ယရူၤၡလ့ၣ်အပူၤဧါ. ၃၅ ခဲအံၤ ယအိၣ်အနံၣ် ၈၀ လံ.+ ယနီၤဖး တၢ်အဂ့ၤ ဒီးတၢ်အအၢ အဆၢတဘၣ်လၢၤဘၣ်. တၢ်အီၣ်တၢ်အီ အဝံၣ်အဘဲန့ၣ် ယတသ့ၣ်ညါလၢၤဘၣ်. ပှၤပိာ်မုၣ်ဒီး ပှၤပိာ်ခွါ သးဝံၣ်တၢ်သီၣ် စ့ၢ်ကီး ယတနၢ်ဟူလၢၤဘၣ်.+ အဃိ ယတအဲၣ်ဒိး ကဲထီၣ် တၢ်ဝံတၢ်ယိးလၢ ယကစၢ်စီၤပၤ အဂီၢ်ဘၣ်. ၃၆ ယလဲၤဆှၢဘၣ် စီၤပၤလၢ ထံကျိယၢ်ဒ့ၣ်န့ၣ် ယသးမံလံ. တလိၣ်လၢ စီၤပၤကဟ့ၣ်ဆၢက့ၤယၤလၢ ခိၣ်ဖးတခါန့ၣ်ဘၣ်. ၃၇ ဝံသးစူၤ ပျဲယက့ၤကဒါက့ၤ ဒီးပျဲယသံလၢ ယနီၢ်ကစၢ်အဝ့ၢ် လၢအဘူးဒီး ယမိၢ်ဒီးယပၢ် အတၢ်သွၣ်ခိၣ် အိၣ်ဝဲအလီၢ်န့ၣ်တက့ၢ်.+ ဘၣ်ဆၣ် လၢအံၤ နခ့နပှၤ စီၤကံမဟၣ် အိၣ်ဒံး.+ ပျဲအဝဲလဲၤခီဂာ်တၢ်ဒီး ယကစၢ်စီၤပၤ ဒီးမၤအီၤဒ် တၢ်လၢနဆိကမိၣ်လၢ အဘၣ်န့ၣ်တက့ၢ်.”
၃၈ အဃိ စီၤပၤတဲဝဲလၢ “စီၤကံမဟၣ် ကလဲၤခီဂာ်တၢ်ဒီးယၤ ဒီးတၢ်လၢနဆိကမိၣ်လၢ အဘၣ်န့ၣ် ယကမၤအီၤလီၤ. တၢ်လၢနမၢယၤ တမံၤဂ့ၤတမံၤဂ့ၤန့ၣ် ယကမၤန့ၢ်နၤလီၤ.” ၃၉ ဒီးပှၤခဲလၢာ် ခီဂာ်ဝဲ ထံကျိယၢ်ဒ့ၣ်လီၤ. ဒီးတချုးစီၤပၤ ခီဂာ်ထံကျိယၢ်ဒ့ၣ် ဒံးဘၣ်န့ၣ် အဝဲနၢမူ စီၤဘၢ်စံးလဲ ဒီးဆိၣ်ဂ့ၤအီၤလီၤ. ဒီးစီၤဘၢ်စံးလဲ+ က့ၤကဒါက့ၤလၢ အဟံၣ်လီၤ. ၄၀ ဖဲစီၤပၤ ခီဂာ်တၢ်ဒီး လဲၤဝဲလၢ ဝ့ၢ်ကံးလကၤလးအခါ+ စီၤကံမဟၣ် လဲၤပိာ်အခံလီၤ. ပှၤလၢယူဒၤ အဒူၣ်ကျါခဲလၢာ် ဒီးအံၣ်စရ့လး တဝာ်န့ၣ် လဲၤဆှၢစီၤပၤလၢ အကခီဂာ်တၢ်အဂီၢ်လီၤ.+
၄၁ ဒီးအံၣ်စရ့လးပိာ်ခွါခဲလၢာ် လဲၤဝဲလၢ စီၤပၤအအိၣ် ဒီးတဲအီၤလၢ “ပှၤလၢယူဒၤအဒူၣ်အကျါ လဲၤကိးခူသူၣ်နၤဒ်သိး ကဆှၢနၤ, နဒူၣ်ဖိထၢဖိ ဒီးနပှၤတဖၣ်လၢ ကလဲၤခီဂာ် ထံကျိယၢ်ဒ့ၣ်လီၤ. ဘၣ်မနုၤအဃိ ပဒီပုၢ်ဝဲၢ်တဖၣ်အံၤ မၤဝဲဒ်န့ၣ်လဲၣ်.”+ ၄၂ ပှၤပိာ်ခွါလၢ ယူဒၤအဒူၣ်ကျါခဲလၢာ် တဲဆၢက့ၤ အံၣ်စရ့လးပိာ်ခွါတဖၣ်လၢ “ပမၤဒ်အံၤ မ့ၢ်လၢစီၤပၤန့ၣ် ဒီဘူးဒီတံၢ်ဒီးပှၤ အဃိလီၤ.+ ဘၣ်မနုၤအဃိ သုသးပှံၢ်ထီၣ်တၢ်လဲၣ်. မ့ၢ်ပအီၣ်ဘၣ် စီၤပၤအတၢ် တမံၤမံၤဧါ ဒီးမ့ၢ်အဟ့ၣ်လီၤပှၤ တၢ်ဟ့ၣ်တမံၤမံၤဧါ.”
၄၃ ဘၣ်ဆၣ် အံၣ်စရ့လးပိာ်ခွါတဖၣ် တဲဆၢ ပှၤလၢယူဒၤ အဒူၣ်ကျါလၢ “ပဝဲဒၣ်အံၤ ပအိၣ်အဒူၣ်တဆံညါ အဃိ စီၤပၤဒၤဝံးန့ၣ် အဘၣ်ဃးဒီးပှၤ အါန့ၢ်ဒံးအဘၣ်ဃးဒီးသု အစးတဆံညါ. မ့မ့ၢ်ဒ်န့ၣ်န့ၣ် ဘၣ်မနုၤအဃိ သုတပာ်ကဲပှၤဘၣ်လဲၣ်. ပကြၢးမ့ၢ် ပှၤအဆိကတၢၢ်လၢ အဟဲက့ၤကိးစီၤပၤ တမ့ၢ်ဧီၤ.” ဘၣ်ဆၣ် ပှၤလၢယူဒၤ အဒူၣ်အကျါန့ၣ် တဲနၢၤ အံၣ်စရ့လးပိာ်ခွါတဖၣ်လီၤ.