၁ စီၤပၤ
၁၁ စီၤပၤၡလိၤမိၤ အဲၣ်ဖၤရိၤအဖိမုၣ်+ တကးဒံးဘၣ် အဝဲအဲၣ်စ့ၢ်ကီး ပှၤကလုာ်ဂၤ+ အါဂၤလၢအမ့ၢ် ပှၤမိၤအးမုၣ်,+ ပှၤဧၣ်မိၣ်မုၣ်,+ ပှၤအဒိၣ်မုၣ်, ပှၤစံဒိၣ်မုၣ်+ ဒီးပှၤဃ့ၤသးမုၣ်တဖၣ်လီၤ.+ ၂ ဒီးအဝဲသ့ၣ် မ့ၢ်ပှၤကလုာ်တဖၣ်လၢ ယဟိဝၤယွၤ တဲပာ်စၢၤ ပှၤအံၣ်စရ့လးဖိလၢ “မ့ၢ်လၢ အဝဲသ့ၣ် ကဒုးဃၣ်ကွံာ် သုသး ဒ်သိးသုကပိာ် အဝဲသ့ၣ် အယွၤတဖၣ်အခံ သပှၢ်တၢၢ်အဃိ သုတဘၣ် နုာ်လီၤပၣ်ဃုာ်လၢ အဝဲသ့ၣ်အကျါဘၣ်* ဒီးအဝဲသ့ၣ် တဘၣ်နုာ်လီၤပၣ်ဃုာ်လၢ သုကျါဘၣ်.”+ ဘၣ်ဆၣ် စီၤၡလိၤမိၤ အသးစဲဘူးဒီးအဝဲသ့ၣ် ဒီးအဲၣ်အဝဲသ့ၣ်လီၤ. ၃ စီၤၡလိၤမိၤအမါ လၢအမ့ၢ် နီၢ်ပၤမုၣ်န့ၣ် အိၣ်ဝဲ အဂၤ ၇၀၀ ဒီးအသံၣ်မါ* အဂၤ ၃၀၀ လီၤ. ဒီးကယီကယီန့ၣ် စီၤၡလိၤမိၤ အမါတဖၣ် ဆှၢကမၣ်အီၤလီၤ. ၄ ဖဲစီၤၡလိၤမိၤ အသးပှၢ်ထီၣ်အခါ+ အမါတဖၣ် ကွဲန့ၢ်လွဲန့ၢ်အီၤ ဒ်သိးကပိာ် ယွၤအဂၤတဖၣ်အခံလီၤ.+ ဒီးအတတီဒီး အကစၢ်ယဟိဝၤယွၤ လၢအသးဒီဖျၢၣ် ဒ်အပၢ်စီၤဒၤဝံး အသိးဘၣ်. ၅ ဒီးစီၤၡလိၤမိၤ ဘါထီၣ်ဝဲ ပှၤစံဒိၣ်ဖိ အကစၢ်မုၣ် နီၢ်ဧၤၡတြိး+ ဒီးမိးလး*+ လၢအမ့ၢ် ပှၤဧၣ်မိၣ်ဖိ အယွၤလၢ အလီၤသးဘၣ်အၢန့ၣ်လီၤ. ၆ စီၤၡလိၤမိၤ မၤတၢ်လၢ ယဟိဝၤယွၤ ထံၣ်ဝဲလၢအအၢ ဒီးအဝဲတဒိကနၣ် ယဟိဝၤယွၤ အကလုၢ်လၢ အသးဒီဖျၢၣ် ဒ်အပၢ်စီၤဒၤဝံး အသိးဘၣ်.+
၇ လၢကစၢၢ်လၢ အအိၣ်လၢ ဝ့ၢ်ယရူၤၡလ့ၣ် အမဲာ်ညါအလိၤန့ၣ် စီၤၡလိၤမိၤ တ့ထီၣ်ဝဲ တၢ်လီၢ်ထီၣ်ထီတဖျၢၣ်လၢ+ ပှၤမိၤအးဖိ အယွၤလၢ အလီၤသးဘၣ်အၢ လၢအမ့ၢ် ကမိၣ်အဂီၢ် ဒီးတၢ်လီၢ်ထီၣ်ထီတဖျၢၣ်လၢ ပှၤဧၣ်မိၣ်ဖိ အယွၤလၢ အလီၤသးဘၣ်အၢ+ လၢအမ့ၢ် မိလးအဂီၢ်လီၤ.+ ၈ အဝဲမၤဝဲဒ်န့ၣ် လၢအမါလၢအမ့ၢ် ကလုာ်အဂၤ ကိးဂၤဒဲးအဂီၢ်လီၤ. အဝဲသ့ၣ် ဒွဲၣ်ခုၣ်ထီၣ် တၢ်လုၢ် ဒီးဟ့ၣ်လုၢ်ထီၣ်တၢ်လၢ အယွၤတဖၣ်အအိၣ်လီၤ.
၉ စီၤၡလိၤမိၤ ထုးယံၤထီၣ်အသးဒီး အံၣ်စရ့လး အကစၢ် ယဟိဝၤယွၤ အဃိ ယဟိဝၤယွၤ သးပှံၢ်ထီၣ်အီၤ ဒိၣ်မးလီၤ.+ လၢညါန့ၣ် ကစၢ်ယွၤ လီၣ်ဖျါထီၣ်အသးလၢ အမဲာ်ညါ ခံဘျီ+ ၁၀ ဒီးဟ့ၣ်ပလီၢ်အီၤ လီၤတံၢ်လီၤဆဲးလၢ အတဘၣ်လဲၤဘါထီၣ် ကစၢ်အဂၤတဖၣ်ဘၣ်.+ ဘၣ်ဆၣ် အဝဲတဒိကနၣ် တၢ်လၢ ယဟိဝၤယွၤ မၤလိာ်ပာ်စၢၤအီၤန့ၣ်ဘၣ်. ၁၁ အဃိ ယဟိဝၤယွၤ တဲဘၣ်စီၤၡလိၤမိၤလၢ “ခီဖျိလၢ နမၤဒ်အံၤ ဒီးနတတီဒီး ယတၢ်အၢၣ်လီၤအီလီၤဘၣ် ဒီးနတမၤထွဲ ယတၢ်ဘျၢတဖၣ်လၢ ယမၤလိာ်ပာ်စၢၤနၤဘၣ်အဃိ ယကထုးန့ၢ်ဆူၣ်ကွံာ် ဘီမုၢ်လၢနအိၣ် သပှၢ်တၢၢ် ဒီးယကဟ့ၣ်လီၤ ဘီမုၢ်အံၤလၢ နခ့နပှၤတဂၤဂၤ အအိၣ်လီၤ.+ ၁၂ ဘၣ်ဆၣ် ခီဖျိလၢ နပၢ်စီၤဒၤဝံး အဃိ ဖဲနအိၣ်မူဒံး အဆၢကတီၢ် ယတမၤဒ်န့ၣ်ဘၣ်. လၢတၢ်န့ၣ်အလီၢ် ယကထုးန့ၢ်ဆူၣ်ကွံာ် ဘီမုၢ်လၢ နဖိခွါအစုပူၤလီၤ.+ ၁၃ ဘၣ်ဆၣ် ယတထုးန့ၢ်ဆူၣ်ကွံာ် ဘီမုၢ်ဒီတဘ့ၣ်ဘၣ်.+ ခီဖျိလၢ ယခ့ယပှၤ စီၤဒၤဝံး ဒီးဝ့ၢ်ယရူၤၡလ့ၣ်လၢ ယဃုထၢအီၤအဃိ+ ယကဟ့ၣ်လီၤ ပှၤအဒူၣ်တဒူၣ်လၢ နဖိခွါအအိၣ်လီၤ.”+
၁၄ ဒီးယဟိဝၤယွၤ ဒုးအိၣ်ထီၣ် ပှၤတဂၤလၢ အကထီဒါ စီၤၡလိၤမိၤလီၤ.+ အဝဲမ့ၢ် ပှၤအဒိၣ်ဖိ စီၤဟၤဒး ဒီးမ့ၢ်ဝဲ ပှၤလၢအပၣ်ဃုာ်လၢ ကီၢ်အဒိၣ် အစီၤပၤ အစၢၤအသွဲၣ်တဖၣ် အကျါလီၤ.+ ၁၅ လၢညါ ဖဲစီၤဒၤဝံး ဒုးနၢၤဝဲ ကီၢ်အဒိၣ်အခါ+ သုးခိၣ်ကျၢၢ် စီၤယိၤအာ် လဲၤထီၣ် ဒ်သိးကခူၣ်လီၤကွံာ်ဝဲ ပှၤလၢအသံတဖၣ်လီၤ. ဖဲန့ၣ်အခါ စီၤယိၤအာ် ဂုာ်ကျဲးစၢး မၤသံကွံာ်ဝဲ ပှၤပိာ်ခွါလၢ ကီၢ်အဒိၣ်အပူၤ ကိးဂၤဒဲးလီၤ. ၁၆ (စီၤယိၤအာ် ဒီးအံၣ်စရ့လး အသုးဖိခဲလၢာ် အိၣ်ဝဲဖဲန့ၣ်ဃုလါ တုၤလၢအမၤသံကွံာ် ပှၤပိာ်ခွါလၢ ကီၢ်အဒိၣ်ပူၤ ကိးဂၤဒဲးလီၤ.) ၁၇ ဘၣ်ဆၣ် စီၤဟၤဒး ဒီးအပၢ်အခ့အပှၤတနီၤ လၢအမ့ၢ် ပှၤအဒိၣ်ဖိတဖၣ်န့ၣ် လဲၤဃ့ၢ်ဝဲလၢ ကီၢ်အဲၤကူပတူး အပူၤလီၤ. ဖဲန့ၣ်အခါ စီၤဟၤဒး မ့ၢ်ဝဲ ဖိသၣ်ပိာ်ခွါဒံးလီၤ. ၁၈ အဝဲသ့ၣ် ဟးထီၣ်လၢ မံးဒယၣ် ဒီးလဲၤတုၤလၢ ပၤရၣ်လီၤ. အဝဲသ့ၣ် လဲၤကိးဃုာ်ဒီး ပှၤပိာ်ခွါလၢ ပၤရၣ်+ ဒီးလဲၤတုၤလၢ ကီၢ်အဲၤကူပတူး လၢစီၤပၤဖၤရိၤ အအိၣ်လီၤ. စီၤပၤဖၤရိၤ ဟ့ၣ်လီၤအီၤ ဟံၣ်တဖျၢၣ်, ရဲၣ်ကျဲၤဝဲ ဒ်သိးအကန့ၢ်ဘၣ် တၢ်အီၣ် ဒီးဟ့ၣ်လီၤအီၤ ဟီၣ်ခိၣ်လီၢ်လီၤ. ၁၉ စီၤပၤဖၤရိၤ ဘၣ်သူၣ်ဘၣ်သးဝဲ စီၤဟၤဒး ဒိၣ်မးအဃိ အဝဲဒုးဖျီ စီၤဟၤဒးဒီး အမါအဒီပုၢ်ဝဲၢ်မုၣ်လီၤ. စီၤပၤဖၤရိၤ အမါန့ၣ် မ့ၢ်ဝဲ နီၢ်ပၤမုၣ်* နီၢ်တၤပါန့ၤလီၤ. ၂၀ လၢခံ နီၢ်တၤပါန့ၤ အဒီပုၢ်ဝဲၢ်မုၣ် အိၣ်ဖျဲၣ်ထီၣ်န့ၢ် စီၤဟၤဒးလၢ အဖိခွါတဂၤ ဒီးအမံၤမ့ၢ်ဝဲ စီၤကနူဘးလီၤ. ဒီးနီၢ်တၤပါန့ၤ ကွၢ်လုၢ်ဒိၣ်ထီၣ်အီၤလၢ ဖၤရိၤအဟံၣ်ပူၤ လၢဖၤရိၤ အဖိခွါတဖၣ် အကျါလီၤ.
၂၁ စီၤဟၤဒး အိၣ်လၢ ကီၢ်အဲၤကူပတူးအပူၤ ဒီးနၢ်ဟူဝဲလၢ စီၤဒၤဝံး သံဝဲဒ် အမိၢ်ပၢ်ဖံဖု လၢပျၢၤတဖၣ်+ အသိးလံ ဒီးသုးခိၣ်ကျၢၢ် စီၤယိၤအာ် စ့ၢ်ကီးသံလံ.+ အဃိ စီၤဟၤဒး တဲဘၣ်ဖၤရိၤလၢ “ပျဲက့ၤယၤလၢ ယထံယကီၢ်မီၤ.” ၂၂ ဘၣ်ဆၣ် ဖၤရိၤတဲအီၤလၢ “ဘၣ်မနုၤအဃိ နအဲၣ်ဒိးက့ၤလၢ နနီၢ်ကစၢ် အထံကီၢ်လဲၣ်. ဖဲနအိၣ်ဒီးယၤအခါ တၢ်လၢအတယၢ လၢနဂီၢ်ဘၣ်န့ၣ် အိၣ်တမံၤမံၤဧါ.” ဒီးအဝဲ တဲဆၢဝဲလၢ “တအိၣ်နီတမံၤဘၣ်. ဘၣ်ဆၣ် ဝံသးစူၤ ပျဲယက့ၤမီၤ.”
၂၃ ဒီးကစၢ်ယွၤ ဒုးအိၣ်ထီၣ် ပှၤအဂၤတဂၤလၢ အကထီဒါ စီၤၡလိၤမိၤလီၤ.+ အဝဲမ့ၢ် စီၤအလံဒၤ အဖိခွါ စီၤရစိၣ်လၢ အဃ့ၢ်ထီၣ်ကွံာ်လၢ အကစၢ် လၢအမ့ၢ် စိဘၤအဘီမုၢ် အစီၤပၤ ဟးဒးဧ့စ့ၢ် အအိၣ်လီၤ.+ ၂၄ လၢညါ ဖဲစီၤဒၤဝံး ဒုးနၢၤဝဲ ပှၤပိာ်ခွါလၢ အအိၣ်လၢ စိဘၤဘီမုၢ်အပူၤအခါ+ စီၤရစိၣ်မ့ၢ်ပှၤလၢ အကိးဖှိၣ်ထီၣ်ဝဲ ပှၤပိာ်ခွါတဖၣ် ဒီးအကဲထီၣ်ဝဲ ပှၤသုးဖိတဖုအခိၣ်လီၤ. အဃိ အဝဲသ့ၣ်လဲၤလၢ ဝ့ၢ်ဒၤမ့ၤစ့း+ ဒီးအိၣ်ဝဲဖဲန့ၣ် ဒီးပၢတၢ်လၢ ဝ့ၢ်ဒၤမ့ၤစ့းအပူၤလီၤ. ၂၅ ဖဲစီၤၡလိၤမိၤ ပၢတၢ် အဆၢကတီၢ် စီၤရစိၣ် ထီဒါအံၣ်စရ့လး ဒီးမၤကီမၤခဲ အံၣ်စရ့လး ဒ်စီၤဟၤဒး မၤတ့ၢ်ဝဲအသိးလီၤ. ဒီးဖဲအဝဲပၢ ကီၢ်စူၤရံအခါ အဝဲသးဟ့ အံၣ်စရ့လး ဒိၣ်မးလီၤ.
၂၆ ပှၤအဂၤတဂၤလၢ အထီဒါ စီၤၡလိၤမိၤန့ၣ်+ မ့ၢ်ဝဲ စီၤၡလိၤမိၤ အခ့အပှၤ+ ပှၤအ့ဖရဲၣ်ဖိ စီၤယၤရၤဘၣ်လၢ+ အဟဲလၢ စရ့ဒၤလီၤ. စီၤယၤရၤဘၣ် အပၢ်မ့ၢ်ဝဲ စီၤနဘး ဒီးအမိၢ်မ့ၢ်ဝဲ နီၢ်စရူၤဧၤ လၢအမ့ၢ် မုၣ်ကမဲတဂၤလီၤ. ၂၇ စီၤယၤရၤဘၣ် ထီဒါက့ၤ စီၤပၤခီဖျိလၢ တၢ်ဂ့ၢ်လၢ အဘၣ်တၢ်ပာ်ဖျါအီၤလၢ လာ်အံၤအဃိလီၤ. လၢညါန့ၣ် စီၤၡလိၤမိၤ တ့ထီၣ်တၢ်လူၢ်*+ ဒီးတ့ဝံၤက့ၤ အပၢ်စီၤဒၤဝံး အဝ့ၢ်ဒူၣ်လီၤ.+ ၂၈ ဒီးစီၤယၤရၤဘၣ် တဂၤအံၤ မ့ၢ်ပှၤသးစၢ်တဂၤလၢ အမၤတၢ်သ့ဂ့ၤဂ့ၤလီၤ. ဖဲစီၤၡလိၤမိၤ ထံၣ်ဘၣ်ဝဲလၢ အဝဲမ့ၢ် ပှၤလၢအမၤတၢ်ဆူၣ်မးအခါ စီၤၡလိၤမိၤ ဒုးကဲထီၣ်အီၤလၢ ပှၤလၢအကွၢ်ထွဲ+ ပှၤလၢအဘၣ် တၢ်မၢဆူၣ်အီၤလၢ ကမၤတၢ်မၤအဂီၢ် လၢစီၤယိၤသး အဒူၣ်ကျါလီၤ. ၂၉ ဖဲန့ၣ်အခါ စီၤယၤရၤဘၣ် ဟးထီၣ်ဝဲလၢ ဝ့ၢ်ယရူၤၡလ့ၣ် ဒီးဝံအဃံယၤ လၢအမ့ၢ် ပှၤၡံလိၤဖိန့ၣ် ထံၣ်လိာ်သးဒီးအီၤ လၢကျဲလီၤ. ဝံအဃံယၤန့ၣ်+ သိးဝဲဒီး တၢ်ကူတၢ်ကၤအသီ ဒီးအဝဲသ့ၣ်အိၣ်လၢ ပျီပူၤ ထဲခံဂၤလီၤ. ၃၀ ဒီးဝံအဃံယၤ ဖီၣ်လီၤဝဲ အဆ့ကၤလၢ အသိးဝဲတဘ့ၣ်န့ၣ် ဒီးထုးဖှီညာ်ဝဲ ၁၂ က့လီၤ. ၃၁ ဒီးအဝဲတဲဘၣ် စီၤယၤရၤဘၣ်လၢ
“ဟံးန့ၢ် အက့တဆံတက့ၢ်. အံၣ်စရ့လး အကစၢ် ယဟိဝၤယွၤ တဲဝဲလၢ ‘ဒ်န့ၣ်အသိး ယကထုးန့ၢ်ဆူၣ်ကွံာ် ဘီမုၢ်လၢ စီၤၡလိၤမိၤ အစုပူၤ ဒီးယကဟ့ၣ်လီၤနၤ ပှၤအဒူၣ်တဆံလီၤ.+ ၃၂ ဘၣ်ဆၣ် ခီဖျိလၢ ယခ့ယပှၤ စီၤဒၤဝံး+ ဒီးဝ့ၢ်ယရူၤၡလ့ၣ်လၢ ယဃုထၢထီၣ်အီၤ လၢအံၣ်စရ့လး အဒူၣ်ခဲလၢာ်အကျါအဃိ+ ပှၤအဒူၣ်တဒူၣ်န့ၣ် ကမ့ၢ်ဒံး စီၤၡလိၤမိၤအတၢ်လီၤ.+ ၃၃ ယကမၤဒ်န့ၣ် မ့ၢ်လၢ အဝဲသ့ၣ် ပာ်တ့ၢ်ကွံာ်ယၤ+ ဒီးလဲၤဘါထီၣ် ပှၤစံဒိၣ်ဖိ အကစၢ်မုၣ် နီၢ်ဧၤၡတြိး, ပှၤမိၤအးဖိ အယွၤ ကမိၣ်, ပှၤဧၣ်မိၣ်ဖိ အယွၤ မိးလး ဒီးအဝဲသ့ၣ် တမၤယတၢ်ဘၣ်သး ဒီးတအိၣ်မူမၤထွဲ တၢ်လၢယထံၣ်လၢ အဂ့ၤဘၣ် ဒီးတမၤထွဲ ယတၢ်ဘျၢတဖၣ် ဒီးယတၢ်သိၣ်တၢ်သီတဖၣ် ဒ်အပၢ်စီၤဒၤဝံး အသိးဘၣ်အဃိလီၤ. ၃၄ ဘၣ်ဆၣ် ယတထုးထီၣ်ကွံာ် ဘီမုၢ်ဒီတဘ့ၣ်လၢ အစုပူၤဘၣ်. ဒီးလၢအတၢ်အိၣ်မူ ဒီတစိၤညါန့ၣ် ယကပာ်အီၤဒ် ပှၤအခိၣ်တဂၤအသိး ခီဖျိလၢ ယခ့ယပှၤ စီၤဒၤဝံးလၢ ယဃုထၢထီၣ်အီၤန့ၣ်+ အိၣ်မူမၤထွဲ ယတၢ်မၤလိာ်တဖၣ် ဒီးယတၢ်ဘျၢတဖၣ် အဃိလီၤ. ၃၅ ဘၣ်ဆၣ် ယကထုးထီၣ်ကွံာ် တၢ်ပၢအလီၢ် လၢစီၤၡလိၤမိၤ အဖိခွါအစုပူၤ ဒီးဟ့ၣ်လီၤနၤ ပှၤအဒူၣ်တဆံလီၤ.+ ၃၆ ဒီးဒ်သိး ယခ့ယပှၤ စီၤဒၤဝံး အမ့ၣ်အူဒၢ ကအိၣ်လၢ ယမဲာ်ညါထီဘိ လၢဝ့ၢ်ယရူၤၡလ့ၣ်+ လၢအမ့ၢ် ဝ့ၢ်တဖျၢၣ်လၢ ယဃုထၢထီၣ်အီၤ လၢယမံၤအဂီၢ်န့ၣ် ယကဟ့ၣ်လီၤ စီၤၡလိၤမိၤ အဖိခွါလၢ ပှၤအဒူၣ်တဒူၣ်လီၤ. ၃၇ ယကပာ်ထီၣ်နၤ ဒီးနကပၢဘၣ် တၢ်ခဲလၢာ်လၢ နအဲၣ်ဒိးပၢ ဒီးနကကဲထီၣ် စီၤပၤလၢ အံၣ်စရ့လး အဖီခိၣ်လီၤ. ၃၈ ဒီးနမ့ၢ်မၤထွဲ တၢ်လၢယမၤလိာ်နၤ ခဲလၢာ် ဒီးအိၣ်မူဒ် ယတၢ်ဘၣ်သး ဒီးမၤတၢ်လၢ အဂ့ၤလၢယမဲာ်ညါ ခီဖျိ နအိၣ်မူမၤထွဲ ယတၢ်ဘျၢ ဒီးယတၢ်မၤလိာ်တဖၣ် ဒ်ယခ့ယပှၤ စီၤဒၤဝံးအသိးန့ၣ်+ ယကအိၣ်ဒီးနၤ စ့ၢ်ကီးလီၤ. နစၢၤနသွဲၣ် ကပၢတၢ် ဖးယံာ်ဒ် စီၤဒၤဝံး အစၢၤအသွဲၣ်အသိး+ ဒီးယကဒုးပၢနၤလၢ အံၣ်စရ့လးအဖီခိၣ်လီၤ. ၃၉ ခီဖျိလၢ အဝဲသ့ၣ် မၤတၢ်လၢ အတဂ့ၤဘၣ်အဃိ ယကမၤမဲာ်ဆှး စီၤဒၤဝံးအစၢၤအသွဲၣ်လီၤ.+ ဘၣ်ဆၣ် ယတမၤဒ်န့ၣ် ထီဘိဘၣ်.’”+
၄၀ အဃိ စီၤၡလိၤမိၤ ဂုာ်ကျဲးစၢး မၤသံစီၤယၤရၤဘၣ် ဘၣ်ဆၣ် စီၤယၤရၤဘၣ် ဃ့ၢ်ပူၤဖျဲးအသး ဒီးလဲၤဝဲလၢ ကီၢ်အဲၤကူပတူးအပူၤ လၢအဲၤကူပတူးအစီၤပၤ+ ၡံၡးအအိၣ်လီၤ.+ ဒီးစီၤယၤရၤဘၣ် အိၣ်ဝဲလၢ ကီၢ်အဲၤကူပတူးအပူၤ တုၤလၢ စီၤၡလိၤမိၤ သံဝဲန့ၣ်လီၤ.
၄၁ မ့မ့ၢ်စီၤၡလိၤမိၤ အဂ့ၢ်လၢအဂၤတဖၣ်, တၢ်လၢအမၤဝဲခဲလၢာ် ဒီးအတၢ်ကူၣ်သ့တဖၣ် အဂ့ၢ်န့ၣ် ဘၣ်တၢ်ကွဲးလီၤအီၤလၢ စီၤၡလိၤမိၤ အတၢ်စံၣ်စိၤတဲစိၤ အလံာ်ပူၤလီၤ.+ ၄၂ စီၤၡလိၤမိၤ ပၢတၢ်လၢ ဝ့ၢ်ယရူၤၡလ့ၣ်အပူၤ လၢအံၣ်စရ့လးခဲလၢာ် အဖီခိၣ်န့ၣ် အိၣ်ဝဲအနံၣ် ၄၀ လီၤ. ၄၃ ဒီးစီၤၡလိၤမိၤ သံဒ် အမိၢ်ပၢ်ဖံဖု လၢပျၢၤတဖၣ် အသိး ဒီးပှၤခူၣ်လီၤကွံာ်အီၤလၢ အပၢ်စီၤဒၤဝံး အဝ့ၢ်ပူၤလီၤ. ဒီးအဖိခွါ စီၤရဃၤဘၣ်+ ကဲထီၣ်စီၤပၤလၢ အလီၢ်လီၤ.