၁ စီၤပၤ

၃ စီၤၡလိၤမိၤ ဖျီသးဒီး ကီၢ်အဲၤကူပတူး အစီၤပၤ ဖၤရိၤ အဖိမုၣ်အဃိ+ အဝဲကဲထီၣ်​ စီၤပၤဖၤရိၤ အမာ်လီၤ. ဝံၤဒီး အဝဲဟဲက့ၤကိးအီၤလၢ စီၤဒၤဝံးအဝ့ၢ်+ ဒီးဒုးအိၣ်အီၤဖဲန့ၣ်​ တုၤလၢအသူၣ်ထီၣ်​ အဟံၣ်,+ ယဟိဝၤယွၤ အဟံၣ်+ ဒီးယရူၤၡလ့ၣ်​ အဝ့ၢ်ဒူၣ်ဝးဝး ဝံၤဝဲတစုလီၤ.+ ၂ ဖဲန့ၣ်အဆၢကတီၢ် ပှၤသူၣ်ထီၣ်​ ဟံၣ်လၢ ယဟိဝၤယွၤ အမံၤအဂီၢ် တဝံၤဒံးဘၣ်အဃိ+ ပှၤဂီၢ်မုၢ် လုၢ်ထီၣ်ဒံးတၢ်လၢ တၢ်လီၢ်ထီၣ်ထီတဖၣ်လီၤ.+ ၃ ဒီးစီၤၡလိၤမိၤ ဆဲးအဲၣ်​ ယဟိဝၤယွၤ ဒီးပာ်ဖျါထီၣ်ဝဲ ခီဖျိလၢ အအိၣ်မူပိာ်ထွဲ တၢ်သိၣ်တၢ်သီတဖၣ်လၢ အပၢ်စီၤဒၤဝံး ဟ့ၣ်လီၤဝဲန့ၣ်လီၤ. ဘၣ်ဆၣ်သနာ်က့ အဝဲဟ့ၣ်လုၢ်ထီၣ်​ တၢ်လုၢ်ဒီး ဒွဲၣ်အူထီၣ်​ တၢ်လုၢ်တဖၣ်​ လၢတၢ်လီၢ်ထီၣ်ထီတဖၣ်လီၤ.+

၄ ဝ့ၢ်ကံးဘိၣ်န့ၣ်​ မ့ၢ်တၢ်လီၢ်ထီၣ်ထီလၢ အမံၤဟူသၣ်ဖျါ ဒိၣ်ကတၢၢ်အဃိ စီၤပၤၡလိၤမိၤ လဲၤဝဲဖဲန့ၣ်​ ဒ်သိး ကဟ့ၣ်လုၢ်ထီၣ်တၢ်အဂီၢ်လီၤ.+ ဒီးစီၤၡလိၤမိၤ ဟ့ၣ်လုၢ်ထီၣ်ဝဲ တၢ်လုၢ်ဒွဲၣ်အူ အခါ ၁,၀၀၀ လၢတၢ်လုၢ်လီၢ် အဝဲန့ၣ်​ အဖီခိၣ်လီၤ.+ ၅ လၢဝ့ၢ်ကံးဘိၣ်အပူၤန့ၣ်​ ယဟိဝၤယွၤ လီၣ်ဖျါထီၣ်အသးလၢ စီၤၡလိၤမိၤအအိၣ်​ လၢတၢ်မံမီၢ်အပူၤလၢ မုၢ်နၤခီ ဒီးကစၢ်ယွၤ တဲအီၤလၢ “ဃ့ယၤတၢ်လၢ နလီကီတက့ၢ်.”+ ၆ ဖဲန့ၣ်​ စီၤၡလိၤမိၤ တဲဝဲလၢ “နခ့နပှၤ ယပၢ်စီၤဒၤဝံး လဲၤတၢ်လၢနမဲာ်ညါ လၢတၢ်သးတီအပူၤ, လၢတၢ်တီတၢ်လိၤအပူၤ ဒီးလၢတၢ်သူၣ်ဘျၢ သးဘျၢအပူၤအဃိ နပာ်ဖျါထီၣ်​ တၢ်အဲၣ်လၢ အတီလၢ အဖီခိၣ်ဒိၣ်မးလီၤ. ဒီးနဆဲးပာ်ဖျါထီၣ်​ တၢ်အဲၣ်လၢအတီ လၢအဖီခိၣ်ဒိၣ်မး တုၤလၢ မုၢ်မဆါတနံၤအံၤ ခီဖျိလၢ နဟ့ၣ်လီၤအီၤ ဖိခွါတဂၤလၢ အကဆ့ၣ်နီၤလၢ အလီၢ်ပစိာ် အဖီခိၣ်လီၤ.+ ၇ ကစၢ် ယဟိဝၤယွၤဧၢ, ယကဲဒံး ပှၤသးစၢ်တဂၤ ဒီးယတၢ်လဲၤခီဖျိ တအိၣ်ဘၣ်​ သနာ်က့ နဒုးကဲထီၣ်ယၤ လၢစီၤပၤ လၢယပၢ်စီၤဒၤဝံး အလီၢ်လီၤ.+ ၈ ယဘၣ်ပၢ ပှၤဂီၢ်မုၢ်လၢ နဃုထၢအီၤ+ လၢအနီၣ်ဂံၢ်အါဝဲ တုၤဒၣ်လဲာ် ပှၤဂံၢ်အီၤတဘၣ်ဘၣ်တဖၣ်လီၤ. ၉ နပှၤဂီၢ်မုၢ်လၢ အအိၣ်ဝဲ အါအါဂီၢ်ဂီၢ်န့ၣ်​ မတဂၤ စံၣ်ညီၣ်န့ၢ်တၢ်လၢ အဝဲသ့ၣ်အဂီၢ်+ ကသ့တဂၤလဲၣ်. အဃိ ဟ့ၣ်ယၤ* သးလၢ အအိၣ်ဒီးတၢ်ဒိကနၣ်​ ဒ်သိးယကစံၣ်ညီၣ်န့ၢ်တၢ်လၢ နပှၤဂီၢ်မုၢ် ဒီးနီၤဖး တၢ်ဂ့ၤ ဒီးတၢ်အၢ အဂီၢ်တက့ၢ်.”+

၁၀ တၢ်လၢ စီၤၡလိၤမိၤ ဃ့ဝဲန့ၣ်​ ယဟိဝၤယွၤ ဘၣ်သူၣ်ဘၣ်သးဝဲ ဒိၣ်မးလီၤ.+ ၁၁ ဒီးကစၢ်ယွၤ တဲအီၤလၢ “မ့ၢ်လၢနဃ့ တၢ်သ့ၣ်ညါနၢ်ပၢၢ် ဒ်သိးနကစံၣ်ညီၣ်န့ၢ်တၢ် ဘၣ်ဃးဒီး တၢ်ဂ့ၢ်ကီတဖၣ်​ ဒီးနတဃ့လၢ နသးသမူ ကထီအဂီၢ်မ့ၢ်ဂ့ၤ, တၢ်ထူးတၢ်တီၤမ့ၢ်ဂ့ၤ ဒီးလၢနဒုၣ်နဒါတဖၣ်​ ကသံအဂီၢ်ဘၣ်အဃိ+ ၁၂ ယကမၤ ဒ်နဃ့အသိးလီၤ.+ ယကဟ့ၣ်နၤ သးလၢအကူၣ်တၢ်သ့ ဒီးအသ့ၣ်ညါနၢ်ပၢၢ်တၢ်လီၤ.+ လၢတၢ်န့ၣ်အဃိ လၢညါမ့ၢ်ဂ့ၤ လၢခံမ့ၢ်ဂ့ၤ ပှၤလၢအက ဒ်သိးဒီးနၤ တအိၣ်နီတဂၤလၢၤဘၣ်.+ ၁၃ တကးဒံးဘၣ်​ တၢ်ထူးတၢ်တီၤ ဒီးတၢ်လၤကပီၤလၢ+ နတဃ့ယၤဘၣ်န့ၣ်​ ယကဟ့ၣ်လီၤနၤ စ့ၢ်ကီးလီၤ.+ အဃိ လၢနတၢ်အိၣ်မူ ဒီတစိၤန့ၣ်​ စီၤပၤလၢအက ဒ်သိးဒီးနၤ တအိၣ်နီတဂၤဘၣ်.+ ၁၄ ဒီးနမ့ၢ် မၤယတၢ်ဘၣ်သး ခီဖျိ အိၣ်မူမၤထွဲ ယတၢ်ဘျၢ ဒီးယတၢ်မၤလိာ်တဖၣ်​ ဒ်နပၢ်စီၤဒၤဝံးအသိးန့ၣ်+ ယကမၤထီထီၣ်​ နသးသမူလီၤ.”+

၁၅ ဖဲစီၤၡလိၤမိၤ မံပၢၢ်ထီၣ်အခါ အဝဲသ့ၣ်ညါဘၣ်ဝဲလၢ အကဲတၢ်မံမီၢ်လီၤ. ဒီးအဝဲလဲၤလၢ ဝ့ၢ်ယရူၤၡလ့ၣ်​ ဒီးဆၢထၢၣ်လၢ ယဟိဝၤယွၤ အတၢ်အၢၣ်လီၤအီလီၤ အတလါ အမဲာ်ညါ ဒီးအဝဲလုၢ်ထီၣ်​ တၢ်လုၢ်ဒွဲၣ်အူ ဒီးတၢ်လုၢ်အိၣ်ဃူအိၣ်ဖိးတဖၣ်+ ဒီးအဝဲမၤ တၢ်အီၣ်တၢ်အီအမူးလၢ အခ့အပှၤခဲလၢာ် အဂီၢ်လီၤ.

၁၆ ဒီးပိာ်မုၣ်ဆါလီၤအီၣ်သးခံဂၤ ဟဲဆၢထၢၣ်လၢ စီၤပၤအမဲာ်ညါလီၤ. ၁၇ ဒီးပိာ်မုၣ်​ အဆိကတၢၢ်တဂၤန့ၣ်​ တဲဝဲလၢ “ကစၢ်စီၤပၤဧၢ, ယၤဒီးပိာ်မုၣ်တဂၤအံၤ ပအိၣ်ဟံၣ်တဖျၢၣ်ဃီလီၤ. ဒီးဖဲယအိၣ်ဖျဲၣ်ထီၣ်​ ယဖိခွါအခါ အဝဲအိၣ်လၢ ယကပၤလီၤ. ၁၈ ဖဲယအိၣ်ဖျဲၣ်ထီၣ်အီၤ ဝံၤသၢသီတသီန့ၣ်​ ပိာ်မုၣ်တဂၤအံၤ အိၣ်ဖျဲၣ်ထီၣ်​ အဖိခွါစ့ၢ်ကီးလီၤ. ဒီးလၢဟံၣ်ပူၤန့ၣ်​ ပအိၣ်ထဲခံဂၤလီၤ. ပှၤတအိၣ်ဒီးပှၤ နီတဂၤဘၣ်. ၁၉ လၢမုၢ်နၤခီန့ၣ်​ ပိာ်မုၣ်တဂၤအံၤ မံကျံၤဘၣ်​ အဖိခွါအဃိ အဖိခွါ သံဝဲလီၤ. ၂၀ အဃိ လၢဖးဖီမုၢ် ဖဲယမံအခါန့ၣ်​ အဝဲဂဲၤဆၢထၢၣ်​ ဒီးဟဲဟံးန့ၢ်ယဖိခွါ လၢအအိၣ်လၢယကပၤ ဒီးအဖိခွါလၢ အသံတဂၤန့ၣ်​ ပုာ်မံနီၤဝဲလၢ ယစုဒုၣ်လိၤလီၤ. ဒီးမ့မ့ၢ် ယဖိခွါန့ၣ်​ အက့ၤပုာ်မံနီၤဝဲလၢ အစုဒုၣ်လိၤလီၤ. ၂၁ ဒီးလၢဂီၤခီ ဖဲယပၢၢ်ထီၣ်​ ဒ်သိးယကဒုးအီနုၢ် ယဖိခွါအခါ ယထံၣ်လၢ ယဖိခွါသံလံ. ဘၣ်ဆၣ်​ ဖဲယကွၢ်ထံအီၤ လီၤတံၢ်လီၤဆဲးအခါ ယသ့ၣ်ညါဘၣ်လၢ ဖိသၣ်န့ၣ်​ တမ့ၢ် ယဖိခွါလၢ ယအိၣ်ဖျဲၣ်ထီၣ်အီၤ တဂၤန့ၣ်ဘၣ်.” ၂၂ ဘၣ်ဆၣ်​ ပိာ်မုၣ်အဝဲတဂၤ တဲဝဲလၢ “တမ့ၢ်ဘၣ်, ယဖိန့ၣ်​ လၢအမူတဂၤ ဒီးနဖိန့ၣ်​ လၢအသံတဂၤဟီ.” ဒီးပိာ်မုၣ်လၢ အဆိကတၢၢ်တဂၤန့ၣ်​ တဲဝဲလၢ “တမ့ၢ်ဘၣ်, နဖိန့ၣ်​ လၢအသံတဂၤ ဒီးယဖိန့ၣ်​ လၢအမူတဂၤဟီ.” ဒီးအဝဲသ့ၣ်​ တဲအါလိာ်သးလၢ စီၤပၤအမဲာ်ညါ ဒ်န့ၣ်လီၤ.

၂၃ လၢခံ စီၤပၤတဲဝဲလၢ “လၢအံၤတဂၤ တဲဝဲလၢ ‘ယဖိခွါန့ၣ်​ လၢအမူတဂၤ ဒီးအဖိခွါန့ၣ်​ လၢအသံတဂၤ’ ဒီးအဝဲတဂၤ တဲဝဲလၢ ‘တမ့ၢ်ဘၣ်, နဖိခွါန့ၣ်​ လၢအသံတဂၤ ဒီးယဖိခွါန့ၣ်​ လၢအမူတဂၤဟီ.’” ၂၄ ဒီးစီၤပၤ တဲဝဲလၢ “ဟဲစိာ်န့ၢ်ယၤ နးတဘ့ၣ်.” အဃိ ပှၤဟဲစိာ်န့ၢ် စီၤပၤလၢ နးတဘ့ၣ်လီၤ. ၂၅ ဒီးစီၤပၤတဲဝဲလၢ “ကျီလီၤဖိသၣ်လၢ အမူတဂၤန့ၣ်​ ခံကူာ် ဒီးဟ့ၣ်လီၤအဝဲသ့ၣ်​ တဂၤတကူာ် တဂၤတကူာ်တက့ၢ်.” ၂၆ တဘျီဃီန့ၣ်​ ပိာ်မုၣ်လၢ အဖိခွါ မူဒံးဝဲတဂၤန့ၣ်​ သးကညီၤဘၣ်​ အဖိခွါအဃိ အဝဲဃ့ကညး စီၤပၤလီၤ. ဒီးအတဲဝဲလၢ “ကစၢ်စီၤပၤဧၢ, ဝံသးစူၤ တဘၣ်မၤသံ ဖိသၣ်န့ၣ်တဂ့ၤ. ဟ့ၣ်လီၤအီၤ ဖိသၣ်လၢ အမူတဂၤန့ၣ်ဟီ.” ဘၣ်ဆၣ်​ ပိာ်မုၣ်​ အဝဲတဂၤန့ၣ်​ တဲဝဲလၢ “ဖိသၣ်တဂၤအံၤ တကဲပတၢ် နီတဂၤလၢၤဘၣ်, ကျီကွံာ်အီၤ ခံကူာ်ဟီ.” ၂၇ ဒီးစီၤပၤ တဲဆၢက့ၤဝဲလၢ “တဘၣ်မၤသံ ဖိသၣ်တဂ့ၤ. ဟ့ၣ်လီၤ ဖိသၣ်လၢ ပိာ်မုၣ်​ အဆိကတၢၢ်တဂၤန့ၣ်​ အအိၣ်တက့ၢ်. အဝဲမ့ၢ် ဖိသၣ်န့ၣ်​ အမိၢ်လီၤ.”

၂၈ အဃိ ပှၤအံၣ်စရ့လးဖိခဲလၢာ် နၢ်ဟူဝဲ ဘၣ်ဃးဒီး စီၤပၤ အတၢ်စံၣ်ညီၣ်ဆၢတဲာ် တဘျီအံၤလီၤ.+ ဒီးခီဖျိလၢ အဝဲသ့ၣ်​ ထံၣ်ဘၣ်ဝဲလၢ ကစၢ်ယွၤ ဟ့ၣ်လီၤအီၤ တၢ်ကူၣ်သ့ ဒ်သိး အကစံၣ်ညီၣ်န့ၢ်တၢ်လၢ ပှၤဂၤအဂီၢ်အဃိ အဝဲသ့ၣ်​ ယူးယီၣ်ပာ်ကဲ စီၤပၤလီၤ.+