၂ ကွဲးနီၣ်တၢ်
၁၀ စီၤရဃၤဘၣ် လဲၤဝဲလၢ ဝ့ၢ်ၡက့ၣ်+ မ့ၢ်လၢ ပှၤအံၣ်စရ့လးဖိခဲလၢာ် လဲၤဝဲတုၤလၢ ဝ့ၢ်ၡက့ၣ် ဒ်သိးကပာ်ထီၣ်အီၤလၢ စီၤပၤအဃိလီၤ.+ ၂ ဖဲစီၤနဘး အဖိခွါ စီၤယၤရၤဘၣ်+ နၢ်ဟူတၢ်ကစီၣ် တခါအံၤအခါ (ဖဲန့ၣ်အခါ စီၤယၤရၤဘၣ် အိၣ်ဒံးလၢ ကီၢ်အဲၤကူပတူး ခီဖျိလၢ အဃ့ၢ်ပူၤဖျဲးတ့ၢ်အသးလၢ စီၤပၤၡလိၤမိၤအအိၣ်)+ အဝဲအိၣ်လၢ ကီၢ်အဲၤကူပတူး ဒီးဟဲက့ၤဝဲလီၤ. ၃ ဒီးပှၤအံၣ်စရ့လးဖိ မၢပှၤလဲၤကိးန့ၢ် စီၤယၤရၤဘၣ်လီၤ. ဒီးစီၤယၤရၤဘၣ် ဒီးပှၤအံၣ်စရ့လးဖိ ခဲလၢာ် လဲၤဝဲလၢ စီၤရဃၤဘၣ် အအိၣ်ဒီး တဲအီၤလၢ ၄ “နပၢ်ဒုးဝံပှၤ တၢ်ဝံတၢ်ယိး လၢအဃၢလီၤ.+ ဘၣ်ဆၣ် နမ့ၢ်မၤညီထီၣ် ဒီးမၤဖှံလီၤ တၢ်ဝံတၢ်ယိးလၢ နပၢ်ဒုးဝံပှၤန့ၣ် ပကမၤနတၢ်လီၤ.”
၅ ဒီးစီၤရဃၤဘၣ် တဲအဝဲသ့ၣ်လၢ “အိၣ်ခိးသၢသီဒီး ဟဲကဒါက့ၤလၢယအိၣ်.” အဃိ ပှၤဂီၢ်မုၢ် က့ၤဝဲလီၤ.+ ၆ ဒီးစီၤပၤရဃၤဘၣ် သံကွၢ်ဝဲ ပှၤသူၣ်က့သးပှၢ်တဖၣ်လၢ အမၤအပၢ် စီၤၡလိၤမိၤအတၢ် ဖဲစီၤၡလိၤမိၤ အိၣ်မူဒံး အဆၢကတီၢ်လၢ “ဒ်သိး ယကစံးဆၢက့ၤ ပှၤဂီၢ်မုၢ်တဖၣ်န့ၣ်အဂီၢ် သုကဟ့ၣ်ကူၣ်ယၤ ဒ်လဲၣ်.” ၇ ဒီးအဝဲသ့ၣ် တဲဆၢက့ၤအီၤလၢ “နမ့ၢ်မၤဂ့ၤတၢ်လၢ ပှၤဂီၢ်မုၢ်တဖၣ်န့ၣ် အဖီခိၣ်, မၤမုာ်အဝဲသ့ၣ်အသး ဒီးစံးဆၢက့ၤ အဝဲသ့ၣ် မုာ်မုာ်န့ၣ် အဝဲသ့ၣ် ကကဲနခ့နပှၤ ထီဘိလီၤ.”
၈ ဘၣ်ဆၣ် အဝဲ တတူၢ်လိာ် ပှၤသူၣ်က့သးပှၢ်တဖၣ် အတၢ်ဟ့ၣ်ကူၣ်ဘၣ်. ဒီးအဝဲသံကွၢ် ပိာ်ခွါသးစၢ်တဖၣ်လၢ အဒိၣ်ထီၣ်ဒီးအီၤ ဒ်သိးသိး ဒီးခဲအံၤ အဝဲသ့ၣ် ကဲဝဲ အပှၤမၤစၢၤတၢ်တဖၣ်လီၤ.+ ၉ စီၤရဃၤဘၣ် တဲအဝဲသ့ၣ်လၢ “ပှၤဂီၢ်မုၢ်တဖၣ် တဲယၤလၢ ‘မၤဖှံလီၤ တၢ်ဝံတၢ်ယိးလၢ နပၢ်ဒုးဝံဒုးယိးပှၤမီၤ.’ အဃိ ပကဘၣ် တဲဆၢက့ၤ အဝဲသ့ၣ် ဒ်လဲၣ်န့ၣ် ဟ့ၣ်ကူၣ်ယၤတက့ၢ်.” ၁၀ ပိာ်ခွါသးစၢ်တဖၣ်လၢ အဒိၣ်ထီၣ်ဒီးအီၤ ဒ်သိးသိးန့ၣ် တဲအီၤလၢ “ပှၤတဲနၤလၢ ‘နပၢ်မၤဃၢ ပတၢ်ဝံတၢ်ယိး ဘၣ်ဆၣ် မ့မ့ၢ်နၤန့ၣ် နကဘၣ် မၤဖှံလီၤအီၤ လၢပဂီၢ်လီၤ.’ နကဘၣ်တဲက့ၤ အဝဲသ့ၣ်ဒ်အံၤ, ‘ယကမၢဆူၣ်သု နးန့ၢ်ဒံး ယပၢ်လီၤ.* ၁၁ ယပၢ် ဒုးဝံဒုးယိးသု တၢ်ဝံတၢ်ယိး လၢအဃၢ ဘၣ်ဆၣ် မ့မ့ၢ်ယၤန့ၣ် ယကမၤဃၢထီၣ် သုတၢ်ဝံတၢ်ယိးလီၤ. ယပၢ် သိၣ်ဃီၣ်သုလၢ နီၣ်ဖျ့ ဘၣ်ဆၣ် မ့မ့ၢ်ယၤန့ၣ် ယကသိၣ်ဃီၣ်သုလၢ နီၣ်ဖျ့လၢ အနးန့ၢ်ဒံး ယပၢ် အနီၣ်ဖျ့လီၤ.’”
၁၂ ဒ်စီၤပၤရဃၤဘၣ် တဲပာ်စၢၤဝဲလၢ “အိၣ်ခိးသၢသီဒီး ဟဲကဒါက့ၤလၢယအိၣ်” အသိး လၢသၢသီတသီန့ၣ် စီၤယၤရၤဘၣ် ဒီးပှၤဂီၢ်မုၢ် ခဲလၢာ် ဟဲက့ၤလၢအအိၣ်လီၤ.+ ၁၃ ဘၣ်ဆၣ် စီၤပၤ တဲဆၢက့ၤ အဝဲသ့ၣ် ဆူၣ်ဆူၣ်ကိၤကိၤလီၤ. ဒီးစီၤပၤရဃၤဘၣ် တတူၢ်လိာ် ပှၤသူၣ်က့သးပှၢ်တဖၣ် အတၢ်ဟ့ၣ်ကူၣ်ဘၣ်. ၁၄ ဒ်ပှၤပိာ်ခွါ သးစၢ်တဖၣ်ဟ့ၣ်ကူၣ်အီၤအသိး အတဲအဝဲသ့ၣ်လၢ “ယက ဒုးဝံဒုးယိးသု တၢ်ဝံတၢ်ယိး လၢအဃၢဒိၣ်ထီၣ် ဒီးယကမၤဃၢထီၣ်အီၤလီၤ. ယပၢ် သိၣ်ဃီၣ်သုလၢ နီၣ်ဖျ့ ဘၣ်ဆၣ် မ့မ့ၢ်ယၤန့ၣ် ယကသိၣ်ဃီၣ်သုလၢ နီၣ်ဖျ့လၢ အနးန့ၢ်ဒံး ယပၢ် အနီၣ်ဖျ့လီၤ.” ၁၅ အဃိ စီၤပၤ တဒိကနၣ် ပှၤဂီၢ်မုၢ်ဘၣ်. နီၢ်ကီၢ်န့ၣ် ယွၤလၢအမ့ၢ်အတီ+ လၢအမ့ၢ် ယဟိဝၤယွၤ ဒုးကဲထီၣ် တၢ်မၤအသးတဖၣ်အံၤ ဒ်သိးကမၤလၢထီၣ်ပှဲၤထီၣ် အတၢ်ကတိၤလၢ အတဲဝဲ စီၤနဘးအဖိခွါ စီၤယၤရၤဘၣ် ခီဖျိလၢ ပှၤၡံလိၤဖိ စီၤအဃံယၤလီၤ.+
၁၆ စီၤပၤ တကနၣ်ဃုာ် ပှၤအံၣ်စရ့လးဖိတဖၣ်ဘၣ်. အဃိ ပှၤဂီၢ်မုၢ်တဲဆၢ စီၤပၤလၢ “မ့ၢ်ပဘၣ်ဃးဒီး စီၤဒၤဝံး ဒ်လဲၣ်. တမ့ၢ်လၢ ပကန့ၢ်သါဘၣ်တၢ် ဃုာ်ဒီးစီၤယံးၡဲ အဖိခွါတဂၤအံၤ နီတမံၤဘၣ်. ပှၤအံၣ်စရ့လးဖိသ့ၣ်ဧၢ, လဲၤသုဝဲတဂၤစုာ်စုာ်လၢ သုယွၤတဖၣ်အအိၣ်တက့ၢ်. စီၤဒၤဝံး အစၢၤအသွဲၣ်တဖၣ်ဧၢ, ကွၢ်ထွဲလီၤက့ၤ သုနီၢ်ကစၢ်တက့ၢ်.”+ ဒီးပှၤအံၣ်စရ့လးဖိ ခဲလၢာ် က့ၤဝဲလၢ အနီၢ်ကစၢ်အဟံၣ်လီၤ.+
၁၇ ဘၣ်ဆၣ် စီၤရဃၤဘၣ် ဆဲးပၢဝဲ ပှၤအံၣ်စရ့လးဖိလၢ အအိၣ်လၢ ယူဒၤ အဝ့ၢ်တဖၣ်လီၤ.+
၁၈ လၢခံ စီၤပၤရဃၤဘၣ် ဆှၢလီၤ စီၤဟဒိၣ်ရၣ်+ လၢအမ့ၢ်ပှၤလၢ အတီခိၣ်ရိၤမဲ ပှၤလၢအဘၣ် တၢ်မၢဆူၣ်အီၤလၢ ကမၤတၢ်မၤတဖၣ် ဘၣ်ဆၣ် ပှၤအံၣ်စရ့လးဖိ ကွံာ်သံအီၤလၢ လၢၢ်လီၤ. စီၤပၤရဃၤဘၣ် ဒိးထီၣ် အလ့ၣ်ကဟၣ် ဒီးဃ့ၢ်ထီၣ်ကွံာ် လၢဝ့ၢ်ယရူၤၡလ့ၣ်လီၤ.+ ၁၉ စးထီၣ်ဖဲန့ၣ် ပှၤအံၣ်စရ့လးဖိတဖၣ် ထီဒါ စီၤဒၤဝံး အစၢၤအသွဲၣ် တုၤလၢ မုၢ်မဆါတနံၤအံၤလီၤ.