၂ ကွဲးနီၣ်တၢ်
၁၉ လၢခံ ယူဒၤအစီၤပၤ ယဟိၤၡၤဖး က့ၤတုၤဝဲလၢအဟံၣ် လၢဝ့ၢ်ယရူၤၡလ့ၣ်အပူၤ ပူၤပူၤဖျဲးဖျဲးလီၤ.+ ၂ ဒီးပှၤထံၣ် တၢ်ထံၣ်လၢညါခီ စီၤဃနၤနံ+ အဖိခွါ စီၤယ့ၤဟူ+ လဲၤထံၣ်လိာ်သး ဒီးစီၤပၤယဟိၤၡၤဖး ဒီးတဲအီၤလၢ “နမၤစၢၤ ပှၤအၢပှၤသီ+ ဒီးနအဲၣ်ပှၤလၢ အသးဟ့ ယဟိဝၤယွၤန့ၣ် နဆိကမိၣ် မ့ၢ်အဘၣ်ဧါ.+ ခီဖျိလၢ နမၤဒ်အံၤအဃိ ယဟိဝၤယွၤ သးပှံၢ်ထီၣ်နၤလံ. ၃ သနာ်က့ မ့ၢ်လၢနမၤလီၤမၢ်ကွံာ် တၢ်စီဆှံအထူၣ်* လၢကီၢ်ပူၤ ဒီးနပာ်လီၤနသးလၢ နကဃုယွၤလၢ အမ့ၢ်အတီတဂၤအဃိ+ ကစၢ်ယွၤ ထံၣ်တၢ်ဂ့ၤလၢ အအိၣ်လၢနသးပူၤလီၤ.”+
၄ စီၤယဟိၤၡၤဖး ဆဲးအိၣ်ဝဲလၢ ဝ့ၢ်ယရူၤၡလ့ၣ်အပူၤလီၤ. ဒီးအဝဲလဲၤကဒီးဝဲလၢ ပှၤဂီၢ်မုၢ်အကျါ စးထီၣ်လၢ ဘ့ၢ်ၡဘၤ တုၤလၢ အ့ဖရဲၣ် ကစၢၢ်ကလိကျါ+ ဒ်သိးကမၤစၢၤအဝဲသ့ၣ်လၢ ကဟဲက့ၤကဒါက့ၤလၢ အမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤ အအိၣ်အဂီၢ်လီၤ.+ ၅ ဒီးလၢယူဒၤဘီမုၢ်အပူၤ လၢဝ့ၢ်တဖၣ်လၢအအိၣ်ဒီး အဒူၣ်လၢအကျၢၤ တဝ့ၢ်ဘၣ်တဝ့ၢ်အပူၤန့ၣ် အဝဲပာ်ထီၣ်စ့ၢ်ကီး စံၣ်ညီၣ်ကွီၢ်တဖၣ်လီၤ.+ ၆ ဒီးအဝဲတဲဘၣ် စံၣ်ညီၣ်ကွီၢ်တဖၣ်လၢ “သုတစံၣ်ညီၣ်တၢ်လၢ ပှၤဟီၣ်ခိၣ်ဖိတဖၣ် အခၢၣ်စးဘၣ်. ဘၣ်ဆၣ် သုစံၣ်ညီၣ်တၢ်လၢ ယဟိဝၤယွၤ အခၢၣ်စးအဃိ သုမၤတၢ်ဒ်လဲၣ်ဒ်လဲၣ်န့ၣ် ပလီၢ်သုသးတက့ၢ်. ဒီးဖဲသုစံၣ်ညီၣ်တၢ်အခါ အဝဲအိၣ်ဒီးသုလီၤ.+ ၇ စးထီၣ်လၢခဲအံၤန့ၣ် သုကဘၣ်အိၣ်ဒီး တၢ်ပျံၤယဟိဝၤယွၤလီၤ.+ တၢ်စံၣ်ညီၣ် တတီတလိၤဘၣ်မ့ၢ်ဂ့ၤ,+ တၢ်ကွၢ်မဲာ်ပှၤကညီမ့ၢ်ဂ့ၤ,+ တၢ်ထီးကျိၣ်ထီးစ့မ့ၢ်ဂ့ၤ+ ပကစၢ် ယဟိဝၤယွၤ တတူၢ်လိာ်ဝဲဘၣ်အဃိ သုကဘၣ်မၤတၢ် လီၤတံၢ်လီၤဆဲးလီၤ.”
၈ လၢဝ့ၢ်ယရူၤၡလ့ၣ်အပူၤစ့ၢ်ကီး စီၤယဟိၤၡၤဖး ပာ်ထီၣ် ပှၤလ့ၤဝံဖိ ဒီးပှၤလုၢ်တၢ်ဒိၣ်တနီၤ ဒီးပှၤအံၣ်စရ့လးဖိ အဒူၣ်ဖိထၢဖိ အခိၣ်အနၢ်တနီၤ ဒ်စံၣ်ညီၣ်ကွီၢ်တဖၣ်လၢ ယဟိဝၤယွၤအဂီၢ်လီၤ. ဒီးအဝဲသ့ၣ် ဘၣ်မၤဘၣ်ဂီၢ်က့ၤ* တၢ်ဂ့ၢ်ကီတဖၣ်လၢ အဘၣ်ထွဲဒီး တၢ်မူးတၢ်ရၢ်တကပၤ လၢပှၤလၢအအိၣ်လၢ ဝ့ၢ်ယရူၤၡလ့ၣ် အပူၤတဖၣ်အဂီၢ်လီၤ.+ ၉ အဝဲမၤလိာ် အဝဲသ့ၣ်လၢ “သုကဘၣ်မၤ သုမူဒါတဖၣ်လၢ တၢ်ပျံၤယဟိဝၤယွၤအပူၤ, တၢ်သးတီအပူၤ ဒီးလၢသုသူၣ်ဒီဖျၢၣ်သးဒီဖျၢၣ်လီၤ. ၁၀ ဖဲသုဒီပုၢ်ဝဲၢ်တဖၣ်လၢ အအိၣ်လၢ ဝ့ၢ်အဂၤတဖၣ်အပူၤ ဟဲတီၣ်ဖျါထီၣ် တၢ်ဂ့ၢ်ကီလၢ အဘၣ်ထွဲဒီး တၢ်မၤသံပှၤကညီ+ မ့တမ့ၢ် တၢ်သံကွၢ်လၢ အဘၣ်ဃးဒီး တၢ်သိၣ်တၢ်သီ, တၢ်မၤလိာ်, တၢ်ဘျၢ မ့တမ့ၢ် တၢ်စံၣ်ညီၣ်တဖၣ် အခါန့ၣ် သုကဘၣ် ဟ့ၣ်ပလီၢ်စ့ၢ်ကီး အဝဲသ့ၣ် ဒ်သိးအဝဲသ့ၣ် အတၢ်ကမၣ် သုတထီၣ်ဒီး ယဟိဝၤယွၤ တဂ့ၤအဂီၢ်လီၤ. သုမ့ၢ်တမၤ ဒ်န့ၣ်ဘၣ်န့ၣ် ယွၤကသးဒိၣ်ထီၣ်သု ဒီးသုဒီပုၢ်ဝဲၢ်တဖၣ်အံၤလီၤ. အဃိ ဒ်သိးသုတၢ်ကမၣ် သုတအိၣ်တဂ့ၤအဂီၢ် သုကဘၣ်မၤ ဒ်န့ၣ်လီၤ. ၁၁ ပှၤလုၢ်တၢ်ဒိၣ်အခိၣ် စီၤအမၤရယၤ အိၣ်လၢသုကျါဖဲအံၤလီၤ. အဝဲမ့ၢ် သုခိၣ်လၢ အတီခိၣ်ရိၤမဲတၢ်လၢ တၢ်ဂ့ၢ်ခဲလၢာ်လၢ အဘၣ်ဃးဒီး ယဟိဝၤယွၤန့ၣ်လီၤ.+ စီၤယံးၡမၤဧ့လး အဖိခွါ စီၤစဘၤဒယၤန့ၣ် မ့ၢ်ဝဲ ယူဒၤ အဒူၣ်အခိၣ်လၢ အတီခိၣ်ရိၤမဲတၢ်လၢ တၢ်ဂ့ၢ်ကိးမံၤဒဲးလၢ အဘၣ်ဃးဒီး စီၤပၤလီၤ. ဒီးပှၤလ့ၤဝံဖိတဖၣ် ကမၤစၢၤသုလီၤ. အဃိ ပာ်ဆူၣ်သုသး ဒီးမၤတၢ် ဒီးမ်ယဟိဝၤယွၤ အိၣ်ဒီးပှၤလၢ အမၤတၢ်ဂ့ၤတဖၣ်တက့ၢ်.”+