၂ ကွဲးနီၣ်တၢ်
၃၃ ဖဲစီၤမနၤၡ့ၤ+ ကဲထီၣ်စီၤပၤအခါ အသးနံၣ်အိၣ်ဝဲ ၁၂ နံၣ် ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ ၅၅ နံၣ်လီၤ.+
၂ စီၤမနၤၡ့ၤ မၤတၢ်လၢ ယဟိဝၤယွၤ ထံၣ်ဝဲလၢအအၢ ဒီးအဝဲမၤတၢ်လၢ အလီၤသးဘၣ်အၢ ဒ်ပှၤကလုာ်တဖၣ်လၢ ယဟိဝၤယွၤ နီဟးထီၣ်ကွံာ်လၢ အံၣ်စရ့လး အမဲာ်ညါ မၤဝဲအသိးန့ၣ်လီၤ.+ ၃ အဝဲတ့ထီၣ်က့ၤ တၢ်လီၢ်ထီၣ်ထီတဖၣ်လၢ အပၢ်စီၤဃံးစကံယၤ မၤလီၤပှီၢ်ကွံာ်ဝဲ,+ အဝဲတ့ထီၣ် တၢ်လုၢ်လီၢ်တဖၣ် လၢဘဧၤလးအဂီၢ် ဒီးအဝဲတ့ထီၣ် တၢ်စီဆှံအထူၣ်တဖၣ်လီၤ.* ဒီးအဝဲဘူၣ်ထီၣ်ဘါထီၣ်ဝဲ မူခိၣ်အသုးမုၢ်ခဲလၢာ်* ဒီးမၤအဝဲသ့ၣ် အတၢ်လီၤ.+ ၄ စီၤမနၤၡ့ၤ တ့ထီၣ်စ့ၢ်ကီး တၢ်လုၢ်လီၢ်တဖၣ်လၢ ယဟိဝၤယွၤ အဟံၣ်ပူၤလီၤ.+ ဘၣ်ဃးဒီး ဟံၣ်တဖျၢၣ်အံၤ ယဟိဝၤယွၤ တဲပာ်စၢၤဝဲလၢ “လၢဝ့ၢ်ယရူၤၡလ့ၣ် အပူၤန့ၣ် ယမံၤကအိၣ် လီၤစိၤလီၤထီလီၤ.”+ ၅ ဒီးလၢ ယဟိဝၤယွၤ အဟံၣ် အတၢ်ပျီခံဘ့ၣ်အပူၤန့ၣ် အဝဲတ့ထီၣ် တၢ်လုၢ်လီၢ်တဖၣ် လၢမူခိၣ်အသုးမုၢ်တဖၣ် အဂီၢ်လီၤ.+ ၆ ဒီးအဝဲလုၢ်ထီၣ် အဖိခွါတဖၣ် လၢမ့ၣ်အူ+ ဖဲဟံၣ်နိၣ်* အတၢ်တြီၤပူၤလီၤ.+ တကးဒံးဘၣ် အဝဲအူတၢ်သမူတၢ်+ ဒီးဖးဝဲ တၢ်လၢအကမၤအသးလၢ ခါဆူညါ ဒီးပာ်ထီၣ်ဝဲ ပှၤလၢအဆဲးကျိးဒီးပှၤသံ ဒီးပှၤလၢ အဟီဆိပာ်စၢၤတၢ်တဖၣ်လီၤ.+ တၢ်လၢ ယဟိဝၤယွၤ ထံၣ်ဝဲလၢ အအၢန့ၣ် အဝဲမၤဝဲ အါအါဂီၢ်ဂီၢ် ဒီးအမၤဆါ ကစၢ်ယွၤ အသးလီၤ.
၇ တၢ်ဂီၤလၢ အဝဲစိးပျၤထီၣ်ဝဲန့ၣ် အဝဲပာ်လီၤဝဲလၢ ယွၤလၢအမ့ၢ်အတီတဂၤ အတၢ်လုၢ်ဟံၣ်ပူၤလီၤ.+ ဘၣ်ဃးဒီး ဟံၣ်တဖျၢၣ်အံၤ ကစၢ်ယွၤ တဲပာ်စၢၤ စီၤဒၤဝံး ဒီးအဖိခွါ စီၤၡလိၤမိၤ ဒ်အံၤ, “လၢအံၣ်စရ့လး အဒူၣ်တဖၣ် အဟီၣ်ကဝီၤအပူၤ ယဃုထၢထီၣ် ဟံၣ်တဖျၢၣ်အံၤ ဒီးဝ့ၢ်ယရူၤၡလ့ၣ် ဒ်သိးယမံၤ ကအိၣ်ဖဲန့ၣ် ထီဘိအဂီၢ်လီၤ.+ ၈ ဒီးအံၣ်စရ့လး အပှၤဂီၢ်မုၢ် မ့ၢ်မၤထွဲ ယခ့ယပှၤ စီၤမိၤၡ့ အတၢ်သိၣ်တၢ်သီခဲလၢာ် လၢအမ့ၢ် တၢ်ဘျၢတဖၣ် ဒီးတၢ်သိၣ်တၢ်သီခဲလၢာ် လၢယဟ့ၣ်ပာ်စၢၤ အဝဲသ့ၣ် ခီဖျိ စီၤမိၤၡ့န့ၣ် ယတနီဟးထီၣ် အဝဲသ့ၣ်လၢ ကီၢ်တဘ့ၣ်လၢ ယဟ့ၣ်လီၤပာ်စၢၤ အဝဲသ့ၣ် အမိၢ်ပၢ်ဖံဖု လၢပျၢၤတဖၣ်န့ၣ် နီတဘျီလၢၤဘၣ်.” ၉ စီၤမနၤၡ့ၤ ဆဲးဆှၢကမၣ် ပှၤလၢအအိၣ်လၢ ယူဒၤဒီးဝ့ၢ်ယရူၤၡလ့ၣ်အပူၤ ဒီးအဆီၣ်ထွဲ အဝဲသ့ၣ်လၢ ကမၤတၢ်အၢ နးန့ၢ်ဒံး ပှၤကလုာ်တဖၣ်လၢ ယဟိဝၤယွၤ မၤဟးဂီၤကွံာ်လၢ ပှၤအံၣ်စရ့လးဖိ အမဲာ်ညါန့ၣ်လီၤ.+
၁၀ ယဟိဝၤယွၤ တဲတၢ်ဒီး စီၤမနၤၡ့ၤ ဒီးအပှၤဂီၢ်မုၢ်တလီၢ်လီၢ် ဘၣ်ဆၣ် အဝဲသ့ၣ် တဒိကနၣ်အီၤဘၣ်.+ ၁၁ အဃိ ယဟိဝၤယွၤ ဒုးဟဲဝဲ ကီၢ်အၤၡူၢ်အစီၤပၤ အသုးခိၣ်တဖၣ်လၢ ကလဲၤနုာ်လီၤဒုး အဝဲသ့ၣ် အဂီၢ်လီၤ. ဒီးအဝဲသ့ၣ် ဖီၣ်န့ၢ် စီၤမနၤၡ့ၤလၢ တခွဲကနၣ်* ဒီးစၢဃာ်အီၤလၢ ထးသွဲတိၢ်ဘီတဖၣ် ဒီးက့ၤကိးအီၤလၢ ကီၢ်ဘၤဘူၤလိၣ်လီၤ. ၁၂ ဖဲစီၤမနၤၡ့ၤ ဘၣ်ကိၢ်ဘၣ်ဂီၤအခါ အဝဲဃ့ကညး အကစၢ် ယဟိဝၤယွၤ လၢတၢ်သးကညီၤအဂီၢ် ဒီးလၢ အမိၢ်ပၢ်ဖံဖု လၢပျၢၤတဖၣ် အကစၢ်ယွၤ အမဲာ်ညါန့ၣ် အဝဲဆီၣ်လီၤအသး ဒိၣ်မးလီၤ. ၁၃ စီၤမနၤၡ့ၤ ဆဲးဃ့ထုကဖၣ်လၢ ကစၢ်ယွၤအအိၣ် ဒီးအတၢ်ဃ့ကညးန့ၣ် ထုးန့ၢ် ကစၢ်ယွၤအသး ဒီးကစၢ်ယွၤ ဒိကနၣ် အတၢ်ဃ့လၢ တၢ်သးကညီၤ အဂီၢ်လီၤ. ကစၢ်ယွၤ ဒုးက့ၤအီၤလၢ ဝ့ၢ်ယရူၤၡလ့ၣ် ဒီးဟ့ၣ်ကဒါက့ၤအီၤလၢ အဘီမုၢ်တၢ်ပၢလီၤ.+ ဖဲန့ၣ်အခါ စီၤမနၤၡ့ၤ သ့ၣ်ညါထီၣ်ဝဲလၢ ယဟိဝၤယွၤ မ့ၢ်ယွၤလၢ အမ့ၢ်အတီတဂၤလီၤ.+
၁၄ လၢခံ စီၤမနၤၡ့ၤ တ့ထီၣ် တၢ်ဒူၣ်ဖးထီတခါ လၢစီၤဒၤဝံး အဝ့ၢ်ချၢလီၤ.+ အဝဲတ့ထီၣ်ဝဲ စးထီၣ်လၢ ကံဃိၣ်အထံထီၣ်ပၢၢ်+ လၢအအိၣ်လၢတၢ်တြီၤ အမုၢ်နုာ်တပၤ တုၤလၢ ညၣ်တြဲၤ+ ဒီးတ့ဝးတရံးဝဲ တုၤလၢ တၢ်လူၢ်ဧိၤဖ့လးလီၤ.+ တကးဒံးဘၣ် လၢယူဒၤအဝ့ၢ်တဖၣ် လၢအအိၣ်ဒီး အဒူၣ်လၢအကျၢၤအပူၤန့ၣ် အဝဲပာ်ထီၣ် သုးခိၣ်တဖၣ်လီၤ. ၁၅ ဒီးပှၤထံဂၤကီၢ်ဂၤဖိ အယွၤတဖၣ် ဒီးအတၢ်ဂီၤတၢ်ဖှီၣ်တခါလၢ အအိၣ်လၢ ယဟိဝၤယွၤ အဟံၣ်ပူၤ+ ဒီးတၢ်လုၢ်လီၢ်တဖၣ်လၢ အတ့ထီၣ်ပာ်စၢၤဝဲလၢ ကစၢၢ်လၢ ယဟိဝၤယွၤအဟံၣ် အိၣ်ဝဲလၢအလိၤ+ ဒီးလၢဝ့ၢ်ယရူၤၡလ့ၣ်အပူၤန့ၣ် အဝဲ မၢပှၤလဲၤတၢၤကွံာ်လၢ ဝ့ၢ်ချၢလီၤ. ၁၆ ဒီးအဝဲဘှီဂ့ၤထီၣ်စ့ၢ်ကီး ယဟိဝၤယွၤ အတၢ်လုၢ်လီၢ်+ ဒီးလုၢ်ထီၣ်ဝဲ တၢ်လုၢ်အိၣ်ဃူအိၣ်ဖိးတဖၣ်+ ဒီးတၢ်လုၢ်စံးဘျုးစံးဖှိၣ်က့ၤတဖၣ် လၢတၢ်လုၢ်လီၢ်အဖီခိၣ်လီၤ.+ ဒီးအဝဲမၢ ယူဒၤအပှၤဂီၢ်မုၢ်လၢ ကဘူၣ်ထီၣ်ဘါထီၣ် အံၣ်စရ့လး အကစၢ် ယဟိဝၤယွၤလီၤ. ၁၇ ဒီးပှၤဂီၢ်မုၢ် လုၢ်ထီၣ်တၢ်ထဲလၢ အဝဲသ့ၣ်အကစၢ် ယဟိဝၤယွၤအအိၣ် သနာ်က့ အဝဲသ့ၣ်လုၢ်ထီၣ်တၢ်ဒ်အံၤလၢ တၢ်လီၢ်ထီၣ်ထီတဖၣ်အဖီခိၣ်လီၤ.
၁၈ မ့မ့ၢ် စီၤမနၤၡ့ၤ အဂ့ၢ်လၢအဂၤတဖၣ်, အတၢ်ထုကဖၣ် လၢအကစၢ်ယွၤအအိၣ် ဒီးပှၤထံၣ်တၢ်ထံၣ်လၢညါခီတဖၣ် အတၢ်ကတိၤတဖၣ် လၢအဝဲသ့ၣ် တဲဘၣ်အီၤ လၢအံၣ်စရ့လး အကစၢ် ယဟိဝၤယွၤ အမံၤန့ၣ် ဘၣ်တၢ်ကွဲးလီၤအီၤလၢ အံၣ်စရ့လး အစီၤပၤ တၢ်စံၣ်စိၤတဲစိၤ အလံာ်ပူၤလီၤ. ၁၉ တၢ်ဂ့ၢ်လၢ အဘၣ်ဃးဒီး စီၤမနၤၡ့ၤ အတၢ်ထုကဖၣ်+ ဒီးကစၢ်ယွၤ စံးဆၢက့ၤ အတၢ်ထုကဖၣ် ဒ်လဲၣ်အဂ့ၢ်, စီၤမနၤၡ့ၤ အတၢ်ဒဲးဘးခဲလၢာ်, အသးတတီဘၣ် ဒ်လဲၣ်အဂ့ၢ်,+ တချုးလၢ အဆီၣ်လီၤအသးဒံးဘၣ်အခါ အတ့ထီၣ် တၢ်လီၢ်ထီၣ်ထီတဖၣ် လၢတၢ်လီၢ်ဖဲလဲၣ်ဒီး အဆီလီၤ တၢ်စီဆှံအထူၣ်+ ဒီးတၢ်ဂီၤတၢ်ဖှီၣ်တဖၣ် လၢတၢ်လီၢ်ဖဲလဲၣ်န့ၣ် ဘၣ်တၢ်ကွဲးလီၤအီၤလၢ အပှၤထံၣ်တၢ်ထံၣ်လၢညါခီတဖၣ် အတၢ်ကွဲးနီၣ်ကွဲးဃါ အပူၤလီၤ. ၂၀ ဒီးစီၤမနၤၡ့ၤ သံဝဲဒ် အမိၢ်ပၢ်ဖံဖု လၢပျၢၤတဖၣ်အသိး ဒီးပှၤခူၣ်လီၤကွံာ်အီၤ ဖဲအဟံၣ်ကပၤလီၤ. ဒီးအဖိခွါ စီၤအၤမိၣ် ကဲထီၣ်က့ၤ စီၤပၤလၢအလီၢ်လီၤ.+
၂၁ ဖဲစီၤအၤမိၣ်+ ကဲထီၣ်စီၤပၤအခါ အသးနံၣ်အိၣ်ဝဲ ၂၂ နံၣ် ဒီးအဝဲပၢဘၣ်တၢ် လၢဝ့ၢ်ယရူၤၡလ့ၣ်အပူၤ ခံနံၣ်လီၤ.+ ၂၂ စီၤအၤမိၣ် ဆဲးမၤတၢ်လၢ ယဟိဝၤယွၤ ထံၣ်ဝဲလၢအအၢ ဒ်အပၢ် စီၤမနၤၡ့ၤ မၤတ့ၢ်ဝဲအသိးလီၤ.+ ဒီးစီၤအၤမိၣ် လုၢ်ထီၣ်တၢ်လၢ တၢ်ဂီၤတၢ်ဖှီၣ်ခဲလၢာ်လၢ အပၢ်စီၤမနၤၡ့ၤ တ့ထီၣ်ပာ်စၢၤဝဲ+ အအိၣ် ဒီးအဝဲဆဲး ဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ်တဖၣ်န့ၣ်လီၤ. ၂၃ စီၤအၤမိၣ် တဆီၣ်လီၤသးလၢ ယဟိဝၤယွၤ အမဲာ်ညါ+ ဒ်အပၢ် စီၤမနၤၡ့ၤ ဆီၣ်လီၤအသးအသိးဘၣ်.+ လၢတၢ်န့ၣ်အလီၢ် စီၤအၤမိၣ် မၤအါထီၣ်ဝဲ အတၢ်ဒဲးဘးလီၤ. ၂၄ လၢခံ အခ့အပှၤတဖၣ် ကူၣ်အၢအီၤ+ ဒီးမၤသံကွံာ်အီၤလၢ အနီၢ်ကစၢ် အဟံၣ်ပူၤလီၤ. ၂၅ ဒီးပှၤလၢ အကူၣ်အၢ စီၤပၤအၤမိၣ်န့ၣ် ပှၤထံဖိကီၢ်ဖိတဖၣ် မၤသံကွံာ် အဝဲသ့ၣ်လီၤ.+ ဒီးအဝဲသ့ၣ် ပာ်ထီၣ်က့ၤ စီၤအၤမိၣ် အဖိခွါ စီၤယိၤၡံယၤ+ လၢစီၤပၤလီၤ.