ဧ့စြၤ
၅ ဝံဃးကဲ+ ဒီးစီၤဧံးဒိၤ+ အလံၤခွါ ဝံစကၤရယၤန့ၣ်+ တဲတၢ်ဒ်ဝံအသိးလၢ ကစၢ်ယွၤအမံၤအပူၤလၢ ပှၤယူဒၤဖိတဖၣ်လၢ အအိၣ်လၢ ယူဒၤဟီၣ်ကဝီၤ ဒီးဝ့ၢ်ယရူၤၡလ့ၣ်အပူၤလီၤ. ဒီးအံၣ်စရ့လး အကစၢ်ယွၤ အိၣ်ဒီး ပှၤယူဒၤဖိတဖၣ်အံၤလီၤ. ၂ ဖဲန့ၣ်အဆၢကတီၢ် စီၤၡၤလတံၤအ့လး အဖိခွါ စီၤစရူဘၤဘ့လး+ ဒီးစီၤယိၤစါဒး အဖိခွါ စီၤယ့ၤၡူန့ၣ်+ စးထီၣ်တ့ထီၣ်က့ၤဝဲ ကစၢ်ယွၤအဟံၣ်+ လၢယရူၤၡလ့ၣ်လီၤ. ဒီးကစၢ်ယွၤ အဝံတဖၣ် အိၣ်ဒီးအဝဲသ့ၣ် ဒီးဆီၣ်ထွဲမၤစၢၤ အဝဲသ့ၣ်လီၤ.+ ၃ ဖဲန့ၣ်အခါ ပဒိၣ်ဖးဒိၣ် စီၤတးနဲလၢ အပၢဟီၣ်ကဝီၤ လၢထံကျိ* အဝၢ်ဘးခီ ဒီးစီၤၡသၢ်ဘိစနဲၤ ဒီးအသကိးလၢ အဂၤတဖၣ် ဟဲသံကွၢ်အဝဲသ့ၣ်လၢ “မတဂၤ မၢသုသူၣ်ထီၣ် ဟံၣ်တဖျၢၣ်အံၤ ဒီးမၤဝံၤ တၢ်မၤအံၤလဲၣ်.” ၄ ဒီးအဝဲသ့ၣ် သံကွၢ်ဝဲလၢ “ပှၤလၢ အတ့ထီၣ်က့ၤ တၢ်သူၣ်ထီၣ်တဖျၢၣ်အံၤန့ၣ် အဝဲသ့ၣ် အမံၤဒ်လဲၣ်.” ၅ ဘၣ်ဆၣ် ကစၢ်ယွၤ ကွၢ်ထွဲဝဲ ပှၤယူဒၤဖိ အပှၤသူၣ်က့သးပှၢ်တဖၣ်လီၤ.+ ဒီးပှၤသ့ၣ်တဖၣ်န့ၣ် တမၤပတုာ် အဝဲသ့ၣ်ဘၣ် မ့ၢ်လၢ ပှၤသ့ၣ်တဖၣ်န့ၣ် အဲၣ်ဒိးဆှၢဆိ တၢ်ဂ့ၢ်တၢ်ကျိၤလၢ စီၤဒၤရယါဝ့ၣ်အအိၣ် ဒီးအိၣ်ခိးဝဲ ဒ်သိး ကန့ၢ်ဘၣ် လံာ်ပရၢလၢ အပာ်ဖျါထီၣ် စီၤပၤ အတၢ်စံးဆၢ အဃိလီၤ.
၆ အဝဲအံၤ မ့ၢ်ဝဲ လံာ်ပရၢတဘ့ၣ်လၢ ပဒိၣ်ဖးဒိၣ် စီၤတးနဲလၢ အပၢဟီၣ်ကဝီၤလၢ ထံကျိဝၢ်ဘးခီ ဒီးစီၤၡသၢ်ဘိစနဲၤ ဒီးအသကိးတဖၣ် လၢအမ့ၢ် ပဒိၣ်ပပှၢ်လၢ အဆံးတဖၣ်လၢ အပၢတၢ်လၢ ထံကျိဝၢ်ဘးခီန့ၣ် ဆှၢလီၤဝဲဆူ စီၤပၤဒၤရယါဝ့ၣ် အအိၣ်လီၤ. ၇ အဝဲသ့ၣ် တီၣ်ဖျါထီၣ် တၢ်ဂ့ၢ်တၢ်ကျိၤလၢ အအိၣ် ဒီးကွဲးဝဲလၢ
“ဆူ စီၤပၤဒၤရယါဝ့ၣ်,
“မ်တၢ်မုာ်တၢ်ခုၣ် အိၣ်ဒီးနၤတက့ၢ်. ၈ ပကွဲးဒုးသ့ၣ်ညါ စီၤပၤလၢ ပလဲၤလၢ ကစၢ်ယွၤ လၢအဒိၣ်အထီတဂၤအဟံၣ် လၢယူဒၤ အကီၢ်ရ့ၣ်အပူၤလီၤ. ပှၤစးထီၣ်တ့ထီၣ်က့ၤ ဟံၣ်တဖျၢၣ်အံၤလၢ လၢၢ်ဖးဒိၣ်တဖၣ်လံ ဒီးပှၤထီထီၣ် သ့ၣ်ဘၣ်တဖၣ်လၢ တၢ်ဒူၣ်တဖၣ် အလိၤလံ. အဝဲသ့ၣ် မၤတၢ်လၢ တၢ်သူၣ်ဆူၣ်သးဆူၣ်အပူၤ ဒီးခီဖျိလၢ အဝဲသ့ၣ် အတၢ်ဂုာ်ကျဲးစၢး အဃိ တၢ်မၤတခါအံၤ လဲၤထီၣ်လဲၤထီ ကွ့ၢ်ကွ့ၢ်လီၤ. ၉ ဒီးပသံကွၢ် အဝဲသ့ၣ် အပှၤသူၣ်က့သးပှၢ်တဖၣ်လၢ ‘မတဂၤ မၢသုသူၣ်ထီၣ် ဟံၣ်တဖျၢၣ်အံၤ ဒီးမၤဝံၤ တၢ်မၤအံၤလဲၣ်.’+ ၁၀ ပသံကွၢ်စ့ၢ်ကီး အဝဲသ့ၣ်အမံၤ ဒ်သိး ပကကွဲးဒုးသ့ၣ်ညါနၤလၢ ပှၤလၢအတီခိၣ်ရိၤမဲ တၢ်မၤအံၤန့ၣ် မ့ၢ်မတၤတဖၣ်လဲၣ်န့ၣ်လီၤ.
၁၁ “အဝဲသ့ၣ် တဲဆၢက့ၤပှၤလၢ ‘ပမ့ၢ် မူခိၣ်ဒီးဟီၣ်ခိၣ် အကစၢ်ယွၤ အခ့အပှၤတဖၣ်လီၤ. ဒီးပသူၣ်ထီၣ်က့ၤ ဟံၣ်လၢ အံၣ်စရ့လး အစီၤပၤဖးဒိၣ်တဂၤ သူၣ်ထီၣ်ဝဲလၢ အပူၤကွံာ် အနံၣ်အါမးလီၤ.+ ၁၂ ပမိၢ်ပၢ်ဖံဖု လၢပျၢၤတဖၣ်န့ၣ် မၤသးဒိၣ်ထီၣ် မူခိၣ်အကစၢ်အသးလီၤ.+ အဃိ ကစၢ်ယွၤ ဟ့ၣ်လီၤကွံာ် အဝဲသ့ၣ်လၢ ဘၤဘူၤလိၣ် အစီၤပၤ နဘူၤကးန့စၢ်+ လၢအမ့ၢ် ပှၤက့ၤစ့းဖိ အစုပူၤလီၤ. ဒီးစီၤပၤတဂၤန့ၣ် မၤဟးဂီၤကွံာ် ဟံၣ်တဖျၢၣ်အံၤ+ ဒီးက့ၤဖီၣ်အဝဲသ့ၣ် ဆူဘၤဘူၤလိၣ်လီၤ.+ ၁၃ ဖဲစီၤပၤကိရ့ၣ် ပၢဝဲဘၤဘူၤလိၣ် အဆိကတၢၢ် တနံၣ်န့ၣ် စီၤပၤကိရ့ၣ် ဟ့ၣ်လီၤ တၢ်ကလုၢ်လၢ ပှၤကသူၣ်ထီၣ်က့ၤ ကစၢ်ယွၤ အဟံၣ်လီၤ.+ ၁၄ ဒီးကစၢ်ယွၤ အဟံၣ် အတၢ်ပီးတၢ်လီတဖၣ်လၢ ပှၤတ့အီၤလၢ ထူဒီးစ့ လၢစီၤနဘူၤကးန့စၢ် ဟဲက့ၤစိာ်ဝဲလၢ ယရူၤၡလ့ၣ် အတၢ်လုၢ်ဟံၣ် ဒီးပာ်ဝဲလၢ ဘၤဘူၤလိၣ် အတၢ်လုၢ်ဟံၣ်န့ၣ် စီၤပၤကိရ့ၣ် ထုးထီၣ်က့ၤဝဲလီၤ.+ ဒီးပှၤဟ့ၣ်လီၤ တၢ်သ့ၣ်တဖၣ်န့ၣ်လၢ စီၤၡ့ၡဘးစၢ်* အစုပူၤလီၤ.+ စီၤၡ့ၡဘးစၢ်န့ၣ် မ့ၢ်ပှၤလၢ စီၤပၤကိရ့ၣ် ပာ်ထီၣ်အီၤလၢ ပဒိၣ်ဖးဒိၣ်လီၤ.+ ၁၅ စီၤကိရ့ၣ် တဲအီၤလၢ “ဟံးန့ၢ် တၢ်ပီးတၢ်လီတဖၣ်အံၤ ဒီးက့ၤပာ်အီၤလၢ ယရူၤၡလ့ၣ် အတၢ်လုၢ်ဟံၣ် ဒီးတ့ထီၣ်က့ၤ ကစၢ်ယွၤအဟံၣ် ဖဲအလီၢ်လီၢ်တက့ၢ်.”+ ၁၆ အဃိ စီၤၡ့ၡဘးစၢ် ဟဲက့ၤဆီလီၤ ကစၢ်ယွၤ အဟံၣ်အခီၣ်ထံး+ လၢဝ့ၢ်ယရူၤၡလ့ၣ်လီၤ. ဒီးပှၤသူၣ်ထီၣ်အီၤ တုၤလၢခဲအံၤ ဘၣ်ဆၣ် တဝံၤဒံးဘၣ်.’+
၁၇ “အဃိ ခဲအံၤ မ့ၢ်ဘၣ်စီၤပၤအသးန့ၣ် မၢပှၤဃုကွၢ်တၢ်လၢ စီၤပၤ အတၢ်လုၢ်ဒိၣ်ပှ့ၤဒိၣ် အလီၢ်လၢ ဘၤဘူၤလိၣ်အပူၤ ဒ်သိး ကသ့ၣ်ညါဝဲလၢ မ့ၢ်စီၤပၤကိရ့ၣ် ဟ့ၣ်လီၤတၢ်ကလုၢ်လၢ ပှၤကဘၣ်က့ၤသူၣ်ထီၣ်က့ၤ ကစၢ်ယွၤ အဟံၣ်လၢ ဝ့ၢ်ယရူၤၡလ့ၣ်အပူၤဧါ တဟ့ၣ်လီၤဘၣ်ဧါ န့ၣ်တက့ၢ်.+ ဝံၤဒီး ဘၣ်ဃးဒီး တၢ်ဂ့ၢ်တခါအံၤန့ၣ် မ်စီၤပၤ ဆှၢလီၤန့ၢ်ပှၤ အတၢ်ဆၢတဲာ်တက့ၢ်.”