၁ ၡမူၤအ့လး
၂၂ အဃိ စီၤဒၤဝံး ဟးထီၣ်ကွံာ်ဖဲန့ၣ်+ ဒီးလဲၤဃ့ၢ်ပူၤဖျဲးအသးလၢ ဝ့ၢ်ဧဒူးလၣ် အလ့ကိပူၤလီၤ.+ ဖဲအဒီပုၢ်ဝဲၢ်ခွါတဖၣ် ဒီးအပၢ်အဒူၣ်ဖိထၢဖိခဲလၢာ် နၢ်ဟူဝဲအခါ အဝဲသ့ၣ်လဲၤလီၤလၢ အအိၣ်လီၤ. ၂ ဒီးပှၤလၢ အဘၣ်ကီဘၣ်ခဲ, အကမၢ်ထီၣ် ဒီးအသးတမံဘၣ် ကိးဂၤဒဲးန့ၣ် ဟဲပာ်ဖှိၣ်ထီၣ်အသး လၢစီၤဒၤဝံးအအိၣ် ဒီးအဝဲကဲထီၣ် အဝဲသ့ၣ် အခိၣ်လီၤ. အဃိ ပှၤပိာ်ခွါလၢ အအိၣ်ဒီးအီၤန့ၣ် အိၣ်ဝဲ အဂၤ ၄၀၀ လီၤ.
၃ လၢခံ စီၤဒၤဝံး ဟးထီၣ်ဖဲန့ၣ် ဒီးလဲၤဝဲလၢ ဝ့ၢ်မံးစပၤ လၢကီၢ်မိၤအး အပူၤလီၤ. ဒီးအဝဲတဲဘၣ် ကီၢ်မိၤအး+ အစီၤပၤလၢ “ဝံသးစူၤ ဟ့ၣ်အခွဲးလၢ ယမိၢ်ယပၢ် ကဟဲအိၣ်ဒီးသု တုၤလၢယသ့ၣ်ညါ တၢ်လၢကစၢ်ယွၤ ကမၤန့ၢ်ယၤ တက့ၢ်.” ၄ အဃိ စီၤဒၤဝံးပာ်တ့ၢ် အဝဲသ့ၣ်လၢ ကီၢ်မိၤအး အစီၤပၤအအိၣ် ဒီးဖဲစီၤဒၤဝံးအိၣ်လၢ တၢ်အိၣ်သဒၢအလီၢ် ဒီတကတီၢ်ညါအခါ အဝဲသ့ၣ် အိၣ်ဝဲလၢ စီၤပၤအဟီၣ်ကဝီၤ အပူၤလီၤ.+
၅ လၢခံ စီၤကး+ လၢအမ့ၢ် ဝံတဂၤ တဲစီၤဒၤဝံးလၢ “တဘၣ်ဆဲးအိၣ်လၢ တၢ်အိၣ်သဒၢအလီၢ်တဂ့ၤ. ဟးထီၣ်ဖဲန့ၣ် ဒီးလဲၤလၢ ယူဒၤအဟီၣ်ကဝီၤတက့ၢ်.”+ အဃိ စီၤဒၤဝံး ဟးထီၣ်ဖဲန့ၣ် ဒီးလဲၤဝဲလၢ ဃ့ၤရ့းအပှၢ်လၢ်ကျါလီၤ.
၆ စီၤစီလူး နၢ်ဟူဝဲလၢ ပှၤထံၣ်န့ၢ် စီၤဒၤဝံး ဒီးအပှၤလၢအအိၣ်ဒီးအီၤ တဖၣ်လီၤ. ဖဲန့ၣ်အခါ စီၤစီလူး ဆ့ၣ်နီၤဝဲလၢ သ့ၣ်ထးမရ့းအခီၣ်ထံး လၢတၢ်လီၢ်ထီၣ်ထီ ဖဲဝ့ၢ်ကံဘဧၤ+ ဒီးအအိၣ်ဒီး ဘီတဘ့ၣ်လၢ အစုပူၤလီၤ. ဒီးအခ့အပှၤတဖၣ် ဆီလီၤသး ဝးတရံးအီၤလီၤ. ၇ စီၤစီလူး တဲဘၣ် အခ့အပှၤ လၢအဆီလီၤသး ဝးတရံးအီၤတဖၣ်လၢ “သုဝဲ ပှၤဘံၣ်ယၤမံၣ်ဖိသ့ၣ်ဧၢ, ဝံသးစူၤ ကနၣ်လၢအံၤ. မ့ၢ်စီၤယံးၡဲအဖိခွါ+ ကဟ့ၣ်စ့ၢ်ကီး သုခဲလၢာ်လၢ ပျီဒီးစပံးကျီးတဖၣ် ဒ်ယဟ့ၣ်သုအသိးဧါ. မ့ၢ်အကပာ်ထီၣ် သုခဲလၢာ်လၢ သုးဖိတကထိအခိၣ် ဒီးသုးဖိတကယၤအခိၣ်ဧါ.+ ၈ သုကူၣ်အၢယၤ ကိးဂၤဒဲးလီၤ. ဖဲယဖိခွါ မၤတၢ်အၢၣ်လီၤအီလီၤဒီး စီၤယံးၡဲအဖိခွါအခါ+ သုတတဲဘၣ်ယၤ နီတဂၤဘၣ်. ယဖိခွါ ဟ့ၣ်သဆၣ်ထီၣ် ယခ့ယပှၤတဂၤန့ၣ်လၢ အကအိၣ်ခိးခူသူၣ်ယၤ ဒီးဒုးယၤ ဒ်သိးဒီးအမၤဝဲခဲအံၤ သနာ်က့ သုတသးကညီၤယၤ ဒီးသုတတဲဘၣ်ယၤ နီတဂၤဘၣ်.”
၉ ပှၤအဒိၣ်ဖိ စီၤဒိအ့း+ လၢအအိၣ်ဒီး တၢ်စိတၢ်ကမီၤ လၢစီၤစီလူးအခ့အပှၤ လၢအအိၣ်ဖဲန့ၣ်တဖၣ် အဖီခိၣ်န့ၣ် တဲဆၢဝဲလၢ+ “ယထံၣ် စီၤယံးၡဲအဖိခွါ လဲၤလၢ စီၤအဃံးတူာ်အဖိခွါ စီၤအဃံၤမ့လ့း+ အအိၣ်လၢ ဝ့ၢ်နိၤဘးလီၤ. ၁၀ ဒီးစီၤအဃံၤမ့လ့း သံကွၢ်န့ၢ်တၢ်လၢ စီၤဒၤဝံးအဂီၢ် လၢယဟိဝၤယွၤအအိၣ် ဒီးအဟ့ၣ်လီၤ စီၤဒၤဝံး တၢ်အီၣ်တဖၣ်လီၤ. တကးဒံးဘၣ် အဟ့ၣ်စ့ၢ်ကီးအီၤ ပှၤဖလ့ၡသးဖိ စီၤကၤလယး အနးလီၤ.”+ ၁၁ တဘျီဃီန့ၣ် စီၤပၤ မၢပှၤလဲၤကိးန့ၢ် စီၤအဃံးတူာ်အဖိခွါ ပှၤလုၢ်တၢ်ဒိၣ် စီၤအဃံၤမ့လ့း ဒီးအပၢ်အဒူၣ်ဖိထၢဖိခဲလၢာ် လၢအမ့ၢ်ပှၤလုၢ်တၢ်ဒိၣ် လၢအအိၣ်လၢ ဝ့ၢ်နိၤဘးအပူၤလီၤ. အဃိ အဝဲသ့ၣ်ခဲလၢာ် ဟဲလၢ စီၤပၤအအိၣ်လီၤ.
၁၂ စီၤစီလူး တဲဝဲလၢ “စီၤအဃံးတူာ် အဖိခွါဧၢ, ဝံသးစူၤ ကနၣ်လၢအံၤ.” ဒီးစီၤအဃံၤမ့လ့း တဲဆၢက့ၤလၢ “မ့ၢ်ကစၢ်.” ၁၃ စီၤစီလူး တဲအီၤလၢ “ဘၣ်မနုၤအဃိ သုဝဲဒီး စီၤယံးၡဲအဖိခွါ ကူၣ်အၢယၤလဲၣ်. နဟ့ၣ်လီၤအီၤကိၣ် ဒီးနးတဘ့ၣ် ဒီးနသံကွၢ်န့ၢ်တၢ်လၢအဂီၢ် လၢကစၢ်ယွၤအအိၣ်န့ၣ် မ့ၢ်အဘၣ်မနုၤလဲၣ်. အဝဲထီဒါယၤ ဒီးအအိၣ်ခိးခူသူၣ်ယၤ ဒ်သိးဒီးအမၤဝဲခဲအံၤလီၤ.” ၁၄ ဒီးစီၤအဃံၤမ့လ့း တဲဆၢစီၤပၤလၢ “လၢနခ့နပှၤ ခဲလၢာ်အကျါ ပှၤလၢနနာ်န့ၢ်အီၤသ့ ထဲသိးဒီး စီၤဒၤဝံး အိၣ်တဂၤဂၤဧါ.+ စီၤဒၤဝံး မ့ၢ်နမာ်+ ဒီးပှၤလၢအဒီသဒၢ နသးသမူအခိၣ် ဒီးပှၤလၢအအိၣ် လၢနဟံၣ်ပူၤန့ၣ် ပာ်ကဲအီၤဒိၣ်မးလီၤ.+ ၁၅ ယသံကွၢ်န့ၢ်တၢ်လၢ စီၤဒၤဝံးအဂီၢ် လၢကစၢ်ယွၤအအိၣ် တဘျီအံၤန့ၣ် မ့ၢ်အကဲအဆိကတၢၢ် တဘျီဧါ.+ ယကကူၣ်ထီၣ်ဖးလီၤတၢ် ဒ်နတဲအသိးန့ၣ် လ့ၤတက့ၤတမ့ၢ်ဘၣ်. တၢ်ဂ့ၢ်သ့ၣ်တဖၣ်အံၤန့ၣ် ယတသ့ၣ်ညါ နီတစဲးဘၣ် အဃိ နတဘၣ်ဆိကမိၣ်ကမၣ်ယၤဒီး ယပၢ်အဒူၣ်ဖိထၢဖိတဂ့ၤ.”+
၁၆ ဘၣ်ဆၣ် စီၤပၤ တဲဝဲလၢ “စီၤအဃံၤမ့လ့းဧၢ, နၤ ဒီးနပၢ်အဒူၣ်ဖိထၢဖိ ခဲလၢာ်န့ၣ်+ ကသံသပှၢ်တၢၢ်လီၤ.”+ ၁၇ ဒီးစီၤပၤ တဲဘၣ် ပှၤလၢအဒီသဒၢ အသးသမူလၢ အဆီလီၤသး ဝးတရံးအီၤတဖၣ်လၢ “မ့ၢ်လၢ ယဟိဝၤယွၤ အပှၤလုၢ်တၢ်ဒိၣ်တဖၣ် အိၣ်ဃူ စီၤဒၤဝံးအဃိ လဲၤမၤသံအဝဲသ့ၣ် တထံၣ်. စီၤဒၤဝံးမ့ၢ်ပှၤလၢ အဃ့ၢ်ပူၤဖျဲးအသးန့ၣ် အဝဲသ့ၣ် သ့ၣ်ညါဝဲလံ သနာ်က့ အဝဲသ့ၣ် တတဲဘၣ်ယၤဘၣ်.” ဘၣ်ဆၣ် စီၤပၤ အခ့အပှၤတဖၣ် တအဲၣ်ဒိး ယၤထီၣ်အစု ဒ်သိး ကမၤသံကွံာ် ယဟိဝၤယွၤ အပှၤလုၢ်တၢ်ဒိၣ်တဖၣ်ဘၣ်. ၁၈ အဃိ စီၤပၤတဲဘၣ် စီၤဒိအ့းလၢ+ “လဲၤနၤန့ၣ် ဒီးမၤသံကွံာ် ပှၤလုၢ်တၢ်ဒိၣ်တဖၣ်န့ၣ်.” တဘျီဃီန့ၣ် ပှၤအဒိၣ်ဖိ+ စီၤဒိအ့း လဲၤမၤသံကွံာ်ဝဲ ပှၤလုၢ်တၢ်ဒိၣ်တဖၣ်လီၤ. ဖဲတၢ်တနံၤန့ၣ် အဝဲမၤသံဝဲ ပှၤပိာ်ခွါ ၈၅ ဂၤလၢအကၤဝဲ အ့ဖိးလၢ အညၣ်ဂ့ၤန့ၣ်လီၤ.+ ၁၉ ဒီးအလဲၤဒုးစ့ၢ်ကီး ပှၤလုၢ်တၢ်ဒိၣ်တဖၣ် အဝ့ၢ်နိၤဘးလီၤ.+ ဒီးအမၤသံကွံာ်ဝဲ ပှၤပိာ်ခွါ, ပှၤပိာ်မုၣ်, ဖိသၣ်, ဖိသၣ်အီနုၢ်, ကျီၢ်ဖါ, ကသ့ၣ်ယီၤ ဒီးသိ လၢနးလီၤ.
၂၀ ဘၣ်ဆၣ် စီၤအဃံၤမ့လ့း အဖိခွါ လၢအမံၤမ့ၢ် စီၤအ့ဘယၤသၢ်န့ၣ်+ ဃ့ၢ်ပူၤဖျဲးအသး ဒီးလဲၤဃ့ၢ်ပိာ်ဝဲ စီၤဒၤဝံးအခံလီၤ. စီၤအဃံၤမ့လ့း အပၢ်မ့ၢ်ဝဲ စီၤအဃံးတူာ်လီၤ. ၂၁ ဒီးစီၤအ့ဘယၤသၢ် တဲဘၣ် စီၤဒၤဝံးလၢ “စီၤစီလူး မၤသံကွံာ် ယဟိဝၤယွၤ အပှၤလုၢ်တၢ်ဒိၣ်တဖၣ်လံ.” ၂၂ ဒီးစီၤဒၤဝံး တဲစီၤအ့ဘယၤသၢ်လၢ “တၢ်တနံၤန့ၣ် ပှၤအဒိၣ်ဖိ စီၤဒိအ့းအိၣ်ဝဲဖဲန့ၣ် ဒီးယသ့ၣ်ညါလၢ+ အဝဲကတဲဘၣ် စီၤစီလူး သပှၢ်တၢၢ်လီၤ. နပၢ်အဒူၣ်ဖိထၢဖိလၢ အသံကိးဂၤဒဲးန့ၣ် သံဝဲခီဖျိလၢ ယဃိလီၤ. ၂၃ ဆဲးအိၣ်ဒီးယၤ ဒီးပှၤတဂၤဂ့ၤ တဂၤဂ့ၤ မ့ၢ်ဃုမၤသံနၤန့ၣ် မ့ၢ်ဒၣ်အဃု မၤသံယၤလီၤ. နကအိၣ်လၢ ယတၢ်ကဟုကယာ် အဖီလာ်လီၤ.”+