၂ ကွဲးနီၣ်တၢ်
၉ ဒီးၡဘၤဘီမုၢ် အနီၢ်ပၤမုၣ်+ နၢ်ဟူဘၣ်ဝဲ စီၤၡလိၤမိၤ အကစီၣ် အဃိ အဝဲလဲၤလၢ ဝ့ၢ်ယရူၤၡလ့ၣ် ဒ်သိး ကမၤကွၢ်အီၤလၢ တၢ်သံကွၢ်လၢ အကီဒိၣ်မးတဖၣ်လီၤ. အဝဲလဲၤဃုာ်ဒီး အခ့အပှၤအါဂၤ ဒီးကီၤလၤအူး လၢအတီၣ်ဝဲ သ့ၣ်စရံအထုး, ထူ+ ဒီးလၢၢ်လၢ အလုၢ်ဒိၣ်ပှ့ၤဒိၣ်တဖၣ် အါအါဂီၢ်ဂီၢ်လီၤ. အဝဲလဲၤနုာ်လီၤဝဲလၢ စီၤၡလိၤမိၤအအိၣ် ဒီးတဲအီၤ တၢ်လၢအအိၣ်လၢ အသးပူၤ ကိးမံၤဒဲးလီၤ.+ ၂ ဒီးစီၤၡလိၤမိၤ စံးဆၢ နီၢ်ပၤမုၣ် အတၢ်သံကွၢ် ခဲလၢာ်လီၤ. တၢ်လၢအကီတလၢ လၢစီၤၡလိၤမိၤ ကတဲနၢ်ပၢၢ်အီၤန့ၣ် တအိၣ်နီတမံၤဘၣ်.
၃ ဖဲၡဘၤဘီမုၢ် အနီၢ်ပၤမုၣ် ထံၣ်ဘၣ်ဝဲ စီၤၡလိၤမိၤ အတၢ်ကူၣ်သ့,+ ဟံၣ်လၢအတ့ထီၣ်ဝဲ,+ ၄ တၢ်အီၣ်တၢ်အီ လၢအစီၢ်နီၤခိၣ် အဖီခိၣ်,+ အခ့အပှၤတဖၣ် ဆ့ၣ်နီၤဝဲ အကျိၤအကျဲ ဒ်လဲၣ်ဒ်လဲၣ်, ပှၤလၢအဟဲပာ်လီၤ တၢ်အီၣ်လၢ စီၢ်နီၤခိၣ်န့ၣ် မၤတၢ်ဒ်လဲၣ် ဒီးကူကၤဝဲဒ်လဲၣ်ဒ်လဲၣ်, ပှၤလၢအစိာ် တၢ်ထံတၢ်နိတဖၣ် ကူကၤဝဲ ဒ်လဲၣ်ဒ်လဲၣ် ဒီးတၢ်လုၢ်ဒွဲၣ်အူတဖၣ်လၢ အဝဲလုၢ်ထီၣ်လၢ ယဟိဝၤယွၤ အဟံၣ်ထီဘိအခါ+ ၡဘၤဘီမုၢ် အနီၢ်ပၤမုၣ်အသးလီၤကတုၤဝဲ တုၤလၢ အတဲတၢ်မး တထီၣ်လၢၤဘၣ်. ၅ နီၢ်ပၤမုၣ် တဲဘၣ်စီၤပၤလၢ “တၢ်ကစီၣ်လၢ ယနၢ်ဟူဘၣ်လၢ ယထံယကီၢ် ဘၣ်ဃးဒီး နမၤတၢ်ကဲထီၣ်လိၣ်ထီၣ် ဒီးနတၢ်ကူၣ်သ့အဂ့ၢ်န့ၣ် မ့ၢ်ဝဲတီဝဲလီၤ. ၆ ဘၣ်ဆၣ် တချုးလၢ ယဟဲဒံးဘၣ်န့ၣ် ယတနာ် တၢ်ကစီၣ်လၢ ပှၤတဲယၤဘၣ်. ဒီးခဲအံၤ ယထံၣ်လၢ ယနီၢ်ကစၢ်အမဲာ်+ ဒီးတၢ်လၢပှၤတဲယၤန့ၣ် အိၣ်ဒၣ်တစဲးဒံးလီၤ. နီၢ်ကီၢ်န့ၣ် နတၢ်ကူၣ်သ့ အိၣ်အါန့ၢ်ဒံး+ တၢ်လၢပှၤတဲယၤ စၢၢ်တလၢၢ်လီၤ.+ ၇ နပှၤဂီၢ်မုၢ် ဒီးနခ့နပှၤတဖၣ်လၢ အမၤတၢ်လၢ နမဲာ်ညါထီဘိ ဒီးနၢ်ဟူဘၣ် နတၢ်ကူၣ်သ့န့ၣ် ကသးခုဝဲလီၤ. ၈ နကစၢ် ယဟိဝၤယွၤ လၢအဘၣ်သူၣ်ဘၣ်သးနၤ ဒီးပာ်ထီၣ်နၤလၢ အလီၢ်ပစိာ် ဒ်စီၤပၤလၢ နကစၢ် ယဟိဝၤယွၤအဂီၢ်န့ၣ် မ်အဘၣ် တၢ်စံးထီၣ်ပတြၢၤအီၤတက့ၢ်. ခီဖျိလၢ နကစၢ်ယွၤ အဲၣ်ပှၤအံၣ်စရ့လးဖိ+ ဒီးအဲၣ်ဒိးလၢ အဝဲသ့ၣ် ကအိၣ်ဂၢၢ်ဆိးကျၢၤဝဲ လီၤထူလီၤယိာ်အဃိ အဝဲပာ်ထီၣ်နၤလၢ စီၤပၤ ဒ်သိးနကစံၣ်ညီၣ်တၢ် တီတီလိၤလိၤ ဒီးပၢတၢ်လၢ တၢ်တီတၢ်လိၤအပူၤလီၤ.”
၉ ဒီးနီၢ်ပၤမုၣ်န့ၣ် ဟ့ၣ်စီၤပၤလၢ ထူ+ အတၤလၣ်* ၁၂၀, သ့ၣ်စရံအထုး အါအါဂီၢ်ဂီၢ် ဒီးလၢၢ်လၢ အလုၢ်ဒိၣ်ပှ့ၤဒိၣ်တဖၣ်လီၤ. လၢခံ ပှၤတဟဲစိာ် သ့ၣ်စရံအထုး အါထဲသိးဒီး ၡဘၤဘီမုၢ် အနီၢ်ပၤမုၣ် ဟဲစိာ်န့ၢ် စီၤပၤၡလိၤမိၤ နီတဘျီလၢၤဘၣ်.+
၁၀ တကးဒံးဘၣ် စီၤဃံရၣ် အခ့အပှၤဒီး စီၤၡလိၤမိၤ အခ့အပှၤလၢ အဟဲက့ၤတီၣ်ထူလၢ အအိၣ်လၢ အိဖ့ၢ်န့ၣ်+ တီၣ်ဃုာ်စ့ၢ်ကီးဝဲ သ့ၣ်အလၤမူး အသ့ၣ်ဘၣ် လၢအအိၣ်လၢ အိဖ့ၢ် ဒီးလၢၢ်လၢ အလုၢ်ဒိၣ်ပှ့ၤဒိၣ်တဖၣ်လီၤ.+ ၁၁ ယဟိဝၤယွၤ အဟံၣ်ဃီသွါတဖၣ်,+ စီၤပၤအဟံၣ်ဃီသွါတဖၣ်,+ တနၢ်တဖၣ် ဒီးသီတူၢ်တဖၣ် လၢပှၤသးဝံၣ်တၢ်ဖိတဖၣ်+ အဂီၢ်န့ၣ် စီၤပၤတ့ဝဲလၢ သ့ၣ်အလၤမူး အသ့ၣ်ဘၣ်တဖၣ်လီၤ. လၢယူဒၤအဟီၣ်ကဝီၤပူၤန့ၣ် ပှၤတထံၣ် သ့ၣ်အလၤမူး အသ့ၣ်ဘၣ်တဖၣ်ဒ်အံၤ နီတဘျီဒံးဘၣ်.
၁၂ စီၤပၤၡလိၤမိၤ ဟ့ၣ်ဝဲ ၡဘၤဘီမုၢ် အနီၢ်ပၤမုၣ် ကယဲၢ်တၢ်လၢ နီၢ်ပၤမုၣ်လီကီဝဲဒီး ဃ့ဝဲတဖၣ်လီၤ. အဝဲဟ့ၣ်နီၢ်ပၤမုၣ် အါန့ၢ်ဒံး တၢ်လၢနီၢ်ပၤမုၣ် ဟဲစိာ်န့ၢ်အီၤလီၤ. ဝံၤဒီးနီၢ်ပၤမုၣ် ဒီးအခ့အပှၤတဖၣ် က့ၤကဒါက့ၤလၢ အထံအကီၢ်လီၤ.+
၁၃ ဒီးလၢတနံၣ်အတီၢ်ပူၤ ထူလၢပှၤဟဲစိာ်လၢ စီၤၡလိၤမိၤအအိၣ်န့ၣ် အတယၢၢ်အိၣ်ဝဲ အတၤလၣ် ၆၆၆ လီၤ.+ ၁၄ တကးဒံးဘၣ် စီၤၡလိၤမိၤဒိးန့ၢ်ဘၣ် တၢ်ခိတၢ်သွဲလၢ ပှၤပနံာ်တၢ်ကၤတၢ်ဖိအအိၣ်, ဧ့ရးအစီၤပၤ ခဲလၢာ်အအိၣ် ဒီးကီၢ်အပဒိၣ်ဖးဒိၣ်တဖၣ်အအိၣ်လီၤ. ပှၤတဖၣ်အံၤ ဟဲစိာ်န့ၢ်အီၤ ထူဒီးစ့ညၣ်လီၤ.+
၁၅ စီၤပၤၡလိၤမိၤ တ့ထီၣ်ဝဲ ကတီၤဖးဒိၣ် အဘ့ၣ် ၂၀၀ လၢထူလၢ အဘၣ်တၢ်ဃါဃုာ်အီၤဒီး ထးအဂၤတကလုာ်လီၤ.+ ဒီးကတီၤ တဘ့ၣ်ဘၣ်တဘ့ၣ်န့ၣ် အဝဲကျးဝဲဒီး ထူလၢ အဘၣ်တၢ်ဃါဃုာ်အီၤဒီး ထးအဂၤတကလုာ် အိၣ်ဝဲ ၡက့လး* ၆၀၀ န့ၣ်လီၤ.+ ၁၆ ဒီးအဝဲတ့ထီၣ် ကတီၤဖိ အဘ့ၣ် ၃၀၀ လၢထူလၢ အဘၣ်တၢ်ဃါဃုာ်အီၤဒီး ထးအဂၤတကလုာ်လီၤ. ဒီးကတီၤဖိ တဘ့ၣ်ဘၣ်တဘ့ၣ်န့ၣ် အဝဲကျးဝဲဒီးထူ အိၣ်ဝဲ သၢမနါလီၤ.* ဒီးစီၤပၤပာ်ဝဲ ကတီၤတဖၣ်န့ၣ် လၢလဘၤနိၣ်ပှၢ် အဟံၣ်ပူၤလီၤ.+
၁၇ စီၤပၤ တ့ထီၣ်စ့ၢ်ကီး လီၢ်ပစိာ်ဖးဒိၣ်လၢ ကဆီမဲ ဒီးကျးဝဲဒီး ထူစီလီၤ.+ ၁၈ စီၤပၤအလီၢ်ပစိာ်န့ၣ် အဃီသွါ အိၣ်ဝဲ ဃုသွါ ဒီးအိၣ်ဝဲဒီး ခီၣ်ယီၢ်လီၢ်ထူ လၢအဘုးတာ်လိာ်သး ဒီးလီၢ်ပစိာ်လီၤ. ဒီးလၢလီၢ်ဆ့ၣ်နီၤအလိၤန့ၣ် အိၣ်ဒီးတၢ်ပာ်လီၤစုအလီၢ် ခံကပၤလၢာ် ဒီးခ့ယုၢ်အဂီၤခံဒု+ ဆၢထၢၣ်ဝဲဘူးဒီး တၢ်ပာ်လီၤစုအလီၢ် တကပၤတဒု တကပၤတဒုလီၤ. ၁၉ ခ့ယုၢ်အဂီၤ ၁၂ ဒု+ ဆၢထၢၣ်ဝဲလၢ ဃီသွါ ဃုသွါအလိၤ အဃိ လၢဃီသွါ တသွါစုာ်စုာ်အလိၤန့ၣ် ခ့ယုၢ်အိၣ်ဝဲခံဒု, တကပၤတဒု တကပၤတဒုလီၤ. ဒီးဘီမုၢ်လၢအဂၤလၢ အတ့ထီၣ်တၢ်ဒ်အံၤန့ၣ် တအိၣ်နီတခါဘၣ်. ၂၀ စီၤပၤၡလိၤမိၤ အထံအီခွးခဲလၢာ်န့ၣ် ဘၣ်တၢ်တ့အီၤလၢထူ ဒီးတၢ်ပီးတၢ်လီ ခဲလၢာ်လၢ အအိၣ်လၢ လဘၤနိၣ်ပှၢ် အဟံၣ်ပူၤန့ၣ် ဘၣ်တၢ်တ့အီၤလၢ ထူစီလီၤ. ဖဲစီၤၡလိၤမိၤ ပၢတၢ်အဆၢကတီၢ်န့ၣ် ပှၤတပာ်စ့ညၣ် လၢတၢ်နီတမံၤဘၣ် အဃိ ပှၤတတ့ထီၣ်တၢ်လၢ စ့ညၣ် နီတမံၤဘၣ်.+ ၂၁ စီၤပၤ အကဘီတဖၣ်လဲၤဆူ တၢ်ၡံၣ်+ ဃုာ်ဒီး စီၤဃံရၣ် အခ့အပှၤတဖၣ်လီၤ.+ ကဘီတဖၣ်အံၤလၢ အလဲၤဝဲလၢ တၢ်ၡံၣ်န့ၣ် ဟဲက့ၤတီၣ်ဝဲ ထူ, စ့ညၣ်, ကဆီမဲ,+ တၤယုာ် ဒီးထိၣ်ပှာ်တဖၣ် သၢနံၣ်တဘျီလီၤ.
၂၂ ဒီးစီၤပၤၡလိၤမိၤ အတၢ်ကူၣ်သ့ ဒီးအတၢ်ထူးတၢ်တီၤ အိၣ်အါန့ၢ်ဒံး စီၤပၤအဂၤလၢ ဟီၣ်ခိၣ်ချၢ ကိးဂၤဒဲးလီၤ.+ ၂၃ ဒီးစီၤပၤခဲလၢာ်လၢ ဟီၣ်ခိၣ်ချၢ အဲၣ်ဒိးထံၣ်လိာ်သးဒီး စီၤၡလိၤမိၤ ဒ်သိးကနၢ်ဟူဘၣ် စီၤၡလိၤမိၤ အတၢ်ကူၣ်သ့လၢ ယွၤလၢအမ့ၢ်အတီတဂၤ ဟ့ၣ်အီၤန့ၣ်လီၤ.+ ၂၄ ပှၤတဂၤဂ့ၤ တဂၤဂ့ၤ လၢအဟဲန့ၣ် ဟဲစိာ်ဝဲ တၢ်ဟ့ၣ်တမံၤမံၤ ဒ်သိးဒီး တၢ်ဖိတၢ်လံၤလၢ အဘၣ်တၢ်တ့အီၤလၢ စ့ညၣ်, တၢ်ဖိတၢ်လံၤလၢ ဘၣ်တၢ်တ့အီၤလၢထူ, တၢ်ကူတၢ်ကၤတဖၣ်,+ တၢ်စုကဝဲၤ, သ့ၣ်စရံအထုး, ကသ့ၣ်တဖၣ် ဒီးကသ့ၣ်ယီၤတဖၣ်လီၤ.* ဒီးအဝဲသ့ၣ်မၤဝဲဒ်အံၤ တနံၣ်ဘၣ်တနံၣ်လီၤ. ၂၅ စီၤၡလိၤမိၤ အိၣ်ဒီး ကသ့ၣ်အဒၢးအဖျၢၣ် ၄,၀၀၀ လၢအကသ့ၣ်တဖၣ် ဒီးလ့ၣ်ကဟၣ်တဖၣ်အဂီၢ် ဒီးကသ့ၣ်အဒု* ၁၂,၀၀၀ လီၤ.+ ဒီးအဝဲပာ်ဝဲလၢ လ့ၣ်ကဟၣ်အဝ့ၢ်တဖၣ် ဒီးလၢဝ့ၢ်ယရူၤၡလ့ၣ်အပူၤ ဘူးဒီးစီၤပၤလီၤ.+ ၂၆ စီၤၡလိၤမိၤ ပၢဘၣ်ဝဲ စီၤပၤခဲလၢာ် စးထီၣ်လၢ ထံကျိ* တုၤလီၤလၢ ပှၤဖလ့ၡသးဖိ အကီၢ် ဒီးတုၤလၢ အဲၤကူပတူး အကီၢ်ဆၢလီၤ.+ ၂၇ လၢဝ့ၢ်ယရူၤၡလ့ၣ် အပူၤန့ၣ် စ့ညၣ်တဖၣ် အိၣ်ဝဲအါအါဂီၢ်ဂီၢ် ဒ်လၢၢ်တဖၣ်အသိး ဒီးသ့ၣ်ဆှိအ့ရ့း အိၣ်ဝဲအါအါဂီၢ်ဂီၢ် ဒ်သိးဝံာ်ဒၢ အထူၣ်တဖၣ် လၢၡ့ဖလၣ် အပူၤအသိးလီၤ.+ ၂၈ ဒီးကသ့ၣ်တဖၣ်လၢ အအိၣ်လၢ ကီၢ်အဲၤကူပတူး+ ဒီးထံကီၢ်အဂၤခဲလၢာ်န့ၣ် ပှၤဟဲစိာ်ဝဲလၢ စီၤၡလိၤမိၤ အအိၣ်လီၤ.
၂၉ မ့မ့ၢ် စီၤၡလိၤမိၤအဂ့ၢ်လၢ အဂၤတဖၣ်+ စးထီၣ်လၢ အခီၣ်ထံးတုၤလၢ အကတၢၢ်န့ၣ် ဘၣ်တၢ်ကွဲးလီၤအီၤလၢ ဝံနၤသၣ် အတၢ်ကွဲးနီၣ်ကွဲးဃါအပူၤ,+ လၢပှၤၡံလိၤဖိ စီၤအဃံယၤ အတၢ်စံးပာ်အပူၤ+ ဒီးလၢ တၢ်ကွဲးနီၣ်ကွဲးဃါလၢ အဘၣ်ဃးဒီး ဝံဧံးဒိၤ အတၢ်ထံၣ်လၢညါခီတဖၣ်လီၤ.+ ဝံဧံးဒိၤ မ့ၢ်ပှၤတဂၤလၢ အထံၣ် တၢ်ထံၣ်လၢညါခီတဖၣ် လၢအဘၣ်ဃးဒီး စီၤနဘးအဖိခွါ စီၤယၤရၤဘၣ်န့ၣ်လီၤ.+ ၃၀ စီၤၡလိၤမိၤ ပၢတၢ်လၢ ဝ့ၢ်ယရူၤၡလ့ၣ်အပူၤ လၢအံၣ်စရ့လးခဲလၢာ် အဖီခိၣ်န့ၣ် အိၣ်ဝဲအနံၣ် ၄၀ လီၤ. ၃၁ ဒီးစီၤၡလိၤမိၤ သံဒ် အမိၢ်ပၢ်ဖံဖု လၢပျၢၤတဖၣ် အသိး ဒီးပှၤခူၣ်လီၤကွံာ်အီၤလၢ အပၢ်စီၤဒၤဝံး အဝ့ၢ်ပူၤလီၤ.+ ဒီးအဖိခွါ စီၤရဃၤဘၣ် ကဲထီၣ်စီၤပၤလၢ အလီၢ်လီၤ.+