ယိၤၡူ
၆ ခီဖျိလၢ ပှၤအံၣ်စရ့လးဖိအဃိ ခဲအံၤန့ၣ် ဝ့ၢ်ယရံၤဃိ ဘၣ်တၢ်ကးပံးဃာ်အီၤ ဃံးဃံးလီၤ. ပှၤနုာ်လီၤဟးထီၣ် တန့ၢ်နီတဂၤဘၣ်.+
၂ ဒီးယဟိဝၤယွၤ တဲဘၣ်စီၤယိၤၡူလၢ “နထံၣ်ဧါ, ယဟ့ၣ်လီၤ ဝ့ၢ်ယရံၤဃိ ဒီးအစီၤပၤ ဒီးအသုးဖိလၢ အဂံၢ်ဆူၣ်ဘါဆူၣ်တဖၣ် လၢနစုပူၤလံ.+ ၃ သုဝဲပှၤသုးဖိခဲလၢာ်န့ၣ် ကဘၣ်ဟးတရံးဝဲ ဝ့ၢ်န့ၣ်လီၤ. ဒီးသုကဘၣ်မၤဒ်န့ၣ် ဃုသီလီၤ. ၄ မၢပှၤလုၢ်တၢ်ဒိၣ်နွံဂၤ စိာ်ဒီးကွဲၤနွံဖျၢၣ် လၢတလါစီဆှံ အမဲာ်ညါတက့ၢ်. ဘၣ်ဆၣ် လၢနွံသီတသီန့ၣ် သုကဘၣ် ဟးတရံးဝ့ၢ် နွံဘျီ ဒီးပှၤလုၢ်တၢ်ဒိၣ်တဖၣ် ကဘၣ်အူထီၣ်ကွဲၤလီၤ.*+ ၅ ဖဲသုနၢ်ဟူ ကွဲၤသီၣ်ထီၣ် တဘျီဃီန့ၣ် ပှၤသုးဖိခဲလၢာ် ကဘၣ်ကိးပသူထီၣ် လၢတၢ်ဒုးအတၢ်ကိးပသူထီၣ် ဖးဒိၣ်လီၤ. ဖဲန့ၣ်ဝ့ၢ်ဒူၣ် ကလီၤပှီၢ်ဝဲ+ ဒီးပှၤသုးဖိခဲလၢာ် ကဘၣ်လဲၤနုာ်လီၤဝဲ လိၤလိၤလၢ ဝ့ၢ်အပူၤလီၤ.”
၆ အဃိ စီၤနိၣ်အဖိခွါ စီၤယိၤၡူ ကိးဖှိၣ်ဝဲ ပှၤလုၢ်တၢ်ဒိၣ်တဖၣ် ဒီးတဲအဝဲသ့ၣ်လၢ “ဟံးထီၣ် တၢ်အၢၣ်လီၤအီလီၤ အတလါ ဒီးပှၤလုၢ်တၢ်ဒိၣ်နွံဂၤ ကဘၣ်စိာ်ကွဲၤနွံဖျၢၣ် လၢယဟိဝၤယွၤ အတလါစီဆှံ အမဲာ်ညါလီၤ.”+ ၇ ဒီးစီၤယိၤၡူတဲဘၣ် ပှၤသုးဖိတဖၣ်လၢ “လဲၤထီၣ်ဒီး ဟးတရံးဝ့ၢ်န့ၣ်တက့ၢ်. ဒီးပှၤသုးဖိတဖၣ်+ ကဘၣ်လဲၤဆိလၢ ယဟိဝၤယွၤ အတလါစီဆှံ အမဲာ်ညါလီၤ.” ၈ ဒ်စီၤယိၤၡူ တဲဘၣ်ပှၤသုးဖိတဖၣ်အသိး ပှၤလုၢ်တၢ်ဒိၣ်နွံဂၤလၢ အစိာ်ကွဲၤနွံဖျၢၣ်လၢ ယဟိဝၤယွၤ အမဲာ်ညါန့ၣ် လဲၤလၢတၢ်မဲာ်ညါ ဒီးအူထီၣ်ကွဲၤလီၤ. ဒီးပှၤလဲၤယိး ယဟိဝၤယွၤ အတၢ်အၢၣ်လီၤအီလီၤ အတလါ လၢအဝဲသ့ၣ် အလီၢ်ခံလီၤ. ၉ ဒီးပှၤသုးဖိတဖၣ်န့ၣ် လဲၤဝဲလၢ ပှၤလုၢ်တၢ်ဒိၣ်တဖၣ် လၢအအူကွဲၤအမဲာ်ညါ ဒီးဖဲပှၤဆဲးအူကွဲၤအခါ ပှၤသုးဖိအဂၤတဖၣ်န့ၣ် ပိာ်ဝဲပှၤလၢအယိး တလါစီဆှံအခံလီၤ.
၁၀ စီၤယိၤၡူ မၤလိာ်ဝဲ ပှၤသုးဖိတဖၣ်လၢ “တဘၣ်ကိးပသူထီၣ်တဂ့ၤ ဒီးတဘၣ်မၤသီၣ် သုကလုၢ်တဂ့ၤ. တၢ်ကတိၤတဖျၢၣ်ဒၣ်လဲာ် တဘၣ်ဟဲထီၣ်လၢ သုကိာ်ပူၤဘၣ်. ဘၣ်ဆၣ် မုၢ်တနံၤလၢ ယတဲသုလၢ ‘ကိးပသူထီၣ်’ န့ၣ်ကိးပသူထီၣ်တက့ၢ်.” ၁၁ စီၤယိၤၡူမၢ ပှၤလဲၤယိး ယဟိဝၤယွၤ အတလါစီဆှံ ဒီးဟးတရံးဝ့ၢ်လီၤ. ဒီးဟးတရံးဝဲ ဝးတဝီဝံၤဒီး အဝဲသ့ၣ် က့ၤလၢဒဲကဝီၤ ဒီးမံဝဲဖဲန့ၣ်လီၤ.
၁၂ လၢခံတဂီၤန့ၣ် စီၤယိၤၡူ ဂဲၤထၢၣ်ဂီၤဂီၤ ဒီးပှၤလုၢ်တၢ်ဒိၣ်တဖၣ် ဟံးထီၣ်ဝဲ ယဟိဝၤယွၤ အတလါစီဆှံလီၤ.+ ၁၃ မ့မ့ၢ် ပှၤလုၢ်တၢ်ဒိၣ်နွံဂၤ လၢအစိာ်ဝဲ ကွဲၤနွံဖျၢၣ်န့ၣ် ဟးဝဲလၢ ယဟိဝၤယွၤ အတလါစီဆှံ အမဲာ်ညါ ဒီးဆဲးအူဝဲကွဲၤန့ၣ်လီၤ. ဒီးဖဲပှၤဆဲးအူကွဲၤအခါ ပှၤသုးဖိတဖၣ်န့ၣ် ဟးဝဲလၢ ပှၤလုၢ်တၢ်ဒိၣ်တဖၣ် အမဲာ်ညါ ဒီးပှၤသုးဖိအဂၤတဖၣ်န့ၣ် ပိာ်ဝဲပှၤလၢအယိး ယဟိဝၤယွၤ အတလါစီဆှံ အခံလီၤ. ၁၄ လၢခံသီတသီန့ၣ် အဝဲသ့ၣ် ဟးတရံးကဒီး ဝ့ၢ်တဝီ ဝံၤဒီးအဝဲသ့ၣ် က့ၤကဒါက့ၤလၢ ဒဲကဝီၤလီၤ. ဒီးအဝဲသ့ၣ် မၤဝဲဒ်န့ၣ် ဃုသီလီၤ.+
၁၅ လၢနွံသီတသီန့ၣ် အဝဲသ့ၣ် ဂဲၤထၢၣ်ဂီၤဂီၤ ဒီးဖဲတၢ်ကပီၤထီၣ် တဘျီဃီန့ၣ် အဝဲသ့ၣ် ဟးတရံးဝဲဝ့ၢ် ဒ်အဝဲသ့ၣ် မၤဝဲလၢညါအသိးလီၤ. ဘၣ်ဆၣ် ဖဲတၢ်တသီန့ၣ် အဝဲသ့ၣ် ဟးတရံးဝဲ ဝ့ၢ်နွံဝီန့ၣ်လီၤ.+ ၁၆ ဒီးဖဲအဝဲသ့ၣ် ဟးတရံးဝဲဝ့ၢ် နွံဝီတဝီအခါ ပှၤလုၢ်တၢ်ဒိၣ်တဖၣ် အူထီၣ်ကွဲၤ ဒီးစီၤယိၤၡူတဲဘၣ် ပှၤသုးဖိတဖၣ်လၢ “ယဟိဝၤယွၤ ဟ့ၣ်လီၤဝ့ၢ်လၢသုစုပူၤလံအဃိ ကိးပသူထီၣ်တက့ၢ်.+ ၁၇ ဝ့ၢ်ဒီး တၢ်အိၣ်လၢအပူၤ ခဲလၢာ်န့ၣ် ပှၤကဘၣ်မၤဟးဂီၤလီၤ.+ ဒီးတၢ်သ့ၣ်တဖၣ်အံၤခဲလၢာ်န့ၣ် မ့ၢ်ဝဲ ယဟိဝၤယွၤ အတၢ်လီၤ. မ့မ့ၢ်နီၢ်ရၤဃး+ လၢအမ့ၢ် ပိာ်မုၣ်လၢ အဆါလီၤအီၣ်သးတဂၤန့ၣ် ပာ်ခူသူၣ်ဝဲ ပှၤကွၢ်ဟုၣ်တၢ် လၢပဆှၢလီၤအီၤတဖၣ် အဃိ ပာ်မူအီၤ ဒီးပှၤလၢအအိၣ်လၢ အဟံၣ်ပူၤခဲလၢာ်တက့ၢ်.+ ၁၈ ဘၣ်ဆၣ် တၢ်လၢ ပှၤကဘၣ်မၤဟးဂီၤအီၤ+ တမံၤဂ့ၤတမံၤဂ့ၤန့ၣ် ဒ်သိးသုသု တသးကွံအီၤတဂ့ၤ ဒီးဟံးန့ၢ်အီၤတဂ့ၤအဂီၢ် အိၣ်ယံၤဒီးအီၤတက့ၢ်.+ သုမ့ၢ်ဟံးန့ၢ်အီၤန့ၣ် အံၣ်စရ့လး အဒဲကဝီၤ ကဘၣ်တၢ်မၤဟးဂီၤအီၤ ဒီးသုကဒုးအိၣ်ထီၣ် တၢ်ကီတၢ်ခဲလၢ အဝဲသ့ၣ်အဂီၢ်လီၤ.+ ၁၉ မ့မ့ၢ် ထူ, စ့, တိၢ်ဘီ ဒီးထးခဲလၢာ်န့ၣ် မ့ၢ်တၢ်စီဆှံလၢ ယဟိဝၤယွၤ အဂီၢ်လီၤ.+ တၢ်သ့ၣ်တဖၣ်အံၤ ကဘၣ်တၢ်ပာ်အီၤလၢ တၢ်လုၢ်ဒိၣ်ပှ့ၤဒိၣ်အလီၢ်လၢ ယဟိဝၤယွၤ အဟံၣ်ပူၤလီၤ.”+
၂၀ ဒီးဖဲ ပှၤအူထီၣ်ကွဲၤအခါ ပှၤသုးဖိတဖၣ် ကိးပသူထီၣ်လီၤ.+ ဒီးဖဲ ပှၤသုးဖိတဖၣ် နၢ်ဟူကွဲၤသီၣ် ဒီးကိးပသူထီၣ်လၢ တၢ်ဒုး အတၢ်ကိးပသူထီၣ် ဖးဒိၣ်အခါ ဝ့ၢ်ဒူၣ်လီၤပှီၢ်ကွံာ်ဝဲ+ ဝံၤဒီး ပှၤသုးဖိတဖၣ် လဲၤထီၣ်လိၤလိၤ လၢဝ့ၢ်ပူၤ ဒီးမၤန့ၢ်ဝဲဝ့ၢ်လီၤ. ၂၁ တၢ်အိၣ်လၢဝ့ၢ်ပူၤခဲလၢာ် လၢအမ့ၢ် ပှၤပိာ်မုၣ်မ့ၢ်ဂ့ၤ, ပှၤပိာ်ခွါမ့ၢ်ဂ့ၤ, ပှၤသးစၢ်မ့ၢ်ဂ့ၤ, ပှၤသးပှၢ်မ့ၢ်ဂ့ၤ, ကျီၢ်ဖါမ့ၢ်ဂ့ၤ, သိမ့ၢ်ဂ့ၤ ဒီးကသ့ၣ်ယီၤမ့ၢ်ဂ့ၤ အဝဲသ့ၣ် မၤဟးဂီၤကွံာ်ဝဲလၢနး ခဲလၢာ်လီၤ.+
၂၂ ပိာ်ခွါခံဂၤလၢ အလဲၤကွၢ်ဟုၣ်ကီၢ်န့ၣ် စီၤယိၤၡူတဲဘၣ် အဝဲသ့ၣ်လၢ “လဲၤနုာ်လီၤလၢ ပိာ်မုၣ်လၢ အဆါလီၤအီၣ်သးတဂၤန့ၣ် အဟံၣ် ဒီးဟဲကိးထီၣ်အီၤ ဒီးပှၤအိၣ်လၢ အဟံၣ်ပူၤခဲလၢာ် ဒ်သုအၢၣ်လီၤပာ်စၢၤအီၤ အသိးန့ၣ်တက့ၢ်.”+ ၂၃ ဒီးပှၤပိာ်ခွါသးစၢ်လၢ အလဲၤကွၢ်ဟုၣ်တၢ်န့ၣ် လဲၤနုာ်လီၤဒီး ဟဲက့ၤကိးထီၣ်ဝဲ နီၢ်ရၤဃး ဃုာ်ဒီး အမိၢ်, အပၢ်, အဒီပုၢ်ဝဲၢ်ခွါတဖၣ် ဒီးပှၤလၢအအိၣ်လၢ အဟံၣ်ပူၤခဲလၢာ်လီၤ. အဝဲသ့ၣ် ဟဲက့ၤကိး နီၢ်ရၤဃး အဒူၣ်ဖိထၢဖိခဲလၢာ်+ ဒီးဟဲက့ၤကိး အဝဲသ့ၣ်လၢ ပှၤအံၣ်စရ့လးဖိ အဒဲကဝီၤချၢ ပူၤပူၤဖျဲးဖျဲးလီၤ.
၂၄ ဝံၤဒီးအဝဲသ့ၣ် ဒွဲၣ်အူထီၣ်ဝ့ၢ် ဒီးတၢ်အိၣ်လၢအပူၤခဲလၢာ် လၢမ့ၣ်အူလီၤ. မ့မ့ၢ် ထူ, စ့, တိၢ်ဘီ ဒီးထးန့ၣ် အဝဲသ့ၣ်လဲၤပာ်ဝဲလၢ တၢ်လုၢ်ဒိၣ်ပှ့ၤဒိၣ်အလီၢ်လၢ ယဟိဝၤယွၤ အဟံၣ်ပူၤလီၤ.+ ၂၅ စီၤယိၤၡူ ပာ်မူဝဲထဲ နီၢ်ရၤဃး လၢအမ့ၢ်ပိာ်မုၣ် လၢအဆါလီၤအီၣ်သးတဂၤ ဒီးအပၢ်အဒူၣ်ဖိထၢဖိ ဒီးပှၤအိၣ်လၢ အဟံၣ်ပူၤခဲလၢာ်လီၤ.+ ခီဖျိလၢ နီၢ်ရၤဃး ပာ်ခူသူၣ်ဝဲ ပှၤလၢအကွၢ်ဟုၣ်ဝ့ၢ်ယရံၤဃိလၢ စီၤယိၤၡူ ဆှၢလီၤဝဲအဃိ+ အဝဲအိၣ်မူဘၣ်ဝဲလၢ ပှၤအံၣ်စရ့လးဖိအကျါ တုၤလၢ မုၢ်မဆါတနံၤအံၤလီၤ.+
၂၆ ဖဲန့ၣ်အခါ စီၤယိၤၡူ မၤဝဲတၢ်အၢၣ်လီၤ ဒ်အံၤလီၤ. “ပှၤတဂၤလၢ အသူၣ်ထီၣ်ကဒါက့ၤ ဝ့ၢ်ယရံၤဃိန့ၣ် မ်အဘၣ်တၢ်ဆိၣ်အၢလၢ ယဟိဝၤယွၤ အမဲာ်ညါတက့ၢ်. ဖဲအဝဲသူၣ်ထီၣ် ဝ့ၢ်အခီၣ်ထံးအခါ မ်အဘၣ်တူၢ်ၡူကွံာ် အဖိဝဲၢ်ကိတက့ၢ်. ဒီးဖဲအဝဲသူၣ်ထီၣ် ဝ့ၢ်အတြဲၤတဖၣ်အခါ မ်အဘၣ်တူၢ်ၡူကွံာ် အဖိသဒါတက့ၢ်.”+
၂၇ ဒီးယဟိဝၤယွၤ အိၣ်ဒီးစီၤယိၤၡူ+ ဒီးအမံၤဟူသၣ်ဖျါလၢ ဟီၣ်ခိၣ်ဒီဘ့ၣ်ညါလီၤ.+