ယိၤၡူ
၁၀ ဝ့ၢ်ယရူၤၡလ့ၣ် အစီၤပၤအဒိၤနံစ့ဒ့း နၢ်ဟူဝဲလၢ စီၤယိၤၡူ မၤန့ၢ်ဝ့ၢ်ဂဲ ဒီးမၤဟးဂီၤ ဝ့ၢ်ဂဲ ဒီးအစီၤပၤ+ ဒ်အမၤ ဝ့ၢ်ယရံၤဃိ ဒီးအစီၤပၤအသိးလီၤ.+ ဒီးအဝဲနၢ်ဟူဘၣ်စ့ၢ်ကီးဝဲလၢ ပှၤကံးဘိၣ်ဖိ မၤတၢ်ဃူတၢ်ဖိး ဒီးပှၤအံၣ်စရ့လးဖိ+ ဒီးအိၣ်လၢ အဝဲသ့ၣ်အကျါလီၤ. ဖဲန့ၣ်အခါ ၂ အဝဲပျံၤတၢ်ဒိၣ်မး+ မ့ၢ်လၢ ဝ့ၢ်ကံးဘိၣ်န့ၣ် လီၤဂာ်ဒ်သိးဒီး ဝ့ၢ်ဖးဒိၣ်တဖျၢၣ်လၢ စီၤပၤပၢဝဲန့ၣ်လီၤ. ဝ့ၢ်အံၤဒိၣ်န့ၢ်ဒံး ဝ့ၢ်ဂဲ+ ဒီးအသုးဖိတဖၣ်န့ၣ် မ့ၢ်ပှၤဒူပှၤဃိၤ ကိးဂၤဒဲးလီၤ. ၃ အဃိ ဝ့ၢ်ယရူၤၡလ့ၣ် အစီၤပၤအဒိၤနံစ့ဒ့း ဆှၢလီၤဝဲ တၢ်ကစီၣ်ဆူ ဝ့ၢ်ဃ့ဘြိၣ် အစီၤပၤဟိဟၣ်,+ ဝ့ၢ်ယၢ်မူသး အစီၤပၤပံးရၣ်, ဝ့ၢ်လၤကံၣ် အစီၤပၤယၤဖံ ဒီးဝ့ၢ်ဧ့းကလိၣ် အစီၤပၤဒဘံၢ်+ အအိၣ် ဒီးတဲဝဲလၢ ၄ “ပှၤကံးဘိၣ်ဖိတဖၣ်န့ၣ် မၤတၢ်ဃူတၢ်ဖိးဒီး စီၤယိၤၡူ ဒီးပှၤအံၣ်စရ့လးဖိတဖၣ်လံ. အဃိ ဟဲမၤစၢၤယၤ ဒီးမ်ပလဲၤဒုးသကိး ပှၤကံးဘိၣ်ဖိတဖၣ်တက့ၢ်.”+ ၅ အဃိ ပှၤအမိၢ်ဖိ+ အစီၤပၤ ယဲၢ်ဂၤလၢအမ့ၢ် ဝ့ၢ်ယရူၤၡလ့ၣ် အစီၤပၤ, ဝ့ၢ်ဃ့ဘြိၣ် အစီၤပၤ, ဝ့ၢ်ယၢ်မူသး အစီၤပၤ, ဝ့ၢ်လၤကံၣ် အစီၤပၤ ဒီးဝ့ၢ်ဧ့းကလိၣ်အစီၤပၤ ဒီးအဝဲသ့ၣ် အပှၤသုးမုၢ်သံၣ်ဘိတဖၣ်န့ၣ် ပာ်ဖှိၣ်ထီၣ်အသး ဒီးလဲၤထီၣ်ဆီလီၤအသး ဒီးကဝီၤဝဲ ဝ့ၢ်ကံးဘိၣ် ဒ်သိးကဒုးဝဲဝ့ၢ်အံၤလီၤ.
၆ အဃိ ပှၤကံးဘိၣ်ဖိတဖၣ် ဆှၢလီၤတၢ်ကစီၣ်ဆူ စီၤယိၤၡူ လၢအအိၣ်လၢ ဝ့ၢ်ကံးလကၤလးအပူၤလီၤ.+ ဒီးတဲဝဲလၢ “ပှၤအမိၢ်ဖိ အစီၤပၤခဲလၢာ် လၢအအိၣ်လၢ ကစၢၢ်ကလိကျါန့ၣ် ပာ်ဖှိၣ်ထီၣ်အသး ဒ်သိးကဒုးပှၤအဂီၢ်လံ. ပာ်တ့ၢ်ကွံာ် ပဝဲလၢအမ့ၢ် နကုၢ်နပှၤတဖၣ်အံၤတဂ့ၤ.+ ဟဲမ့ၢ်ချ့, ဟဲမၤပူၤဖျဲးပှၤဒီး ဟဲမၤစၢၤပှၤတက့ၢ်.” ၇ အဃိ စီၤယိၤၡူ, အပှၤသုးဖိ ဒီးပှၤဒူပှၤဃိၤခဲလၢာ် ဟးထီၣ်ဝဲလၢ ဝ့ၢ်ကံးလကၤလးလီၤ.+
၈ ဒီးယဟိဝၤယွၤ တဲဘၣ်စီၤယိၤၡူလၢ “ယဟ့ၣ်လီၤအဝဲသ့ၣ်လၢ နစုပူၤလံ.+ တဘၣ်ပျံၤအဝဲသ့ၣ်တဂ့ၤ.+ အဝဲသ့ၣ် မၤနၤတနၢၤ နီတဂၤဘၣ်.”+ ၉ စီၤယိၤၡူ ဒီးအသုးမုၢ်သံၣ်ဘိတဖၣ် လဲၤဝဲဒီတနၤကျၢၤ ဒီးလဲၤနုာ်လီၤ ဒုးအဝဲသ့ၣ်သတူၢ်ကလာ်လီၤ. ၁၀ ယဟိဝၤယွၤ မၤဘံဘူအဝဲသ့ၣ်အခိၣ်နူာ် လၢပှၤအံၣ်စရ့လးဖိ အမဲာ်ညါ+ ဒီးပှၤအံၣ်စရ့လးဖိ မၤသံအဝဲသ့ၣ်အါဂၤ လၢဝ့ၢ်ကံးဘိၣ် ဒီးဆဲးလူၤအဝဲသ့ၣ် လၢကျဲလၢ အလဲၤထီၣ်ဆူ ဝ့ၢ်ဘ့ၤသဃိရိၣ် ဒီးကျီသံအဝဲသ့ၣ် တုၤလီၤလၢ ဝ့ၢ်ဧစ့ကၤ ဒီးဝ့ၢ်မးက့ဒၤန့ၣ်လီၤ. ၁၁ ဖဲအဝဲသ့ၣ် ဃ့ၢ်ကွံာ်လၢ ပှၤအံၣ်စရ့လးဖိ အမဲာ်ညါအခါ အဝဲသ့ၣ် လဲၤဃ့ၢ်လီၤဝဲဆူ ဝ့ၢ်ဘ့ၤသဃိရိၣ်လီၤ. ဖဲန့ၣ်အခါ ယဟိဝၤယွၤ ဒုးလီၤဝဲ သူၣ်ဖးဒိၣ်တဖၣ်လၢ အဝဲသ့ၣ်အလိၤ တုၤလၢ ဝ့ၢ်ဧစ့ကၤအဃိ အဝဲသ့ၣ်သံဝဲလီၤ. ဒီးပှၤလၢအသံလၢ သူၣ်အဃိန့ၣ် အိၣ်အါန့ၢ်ဒံး ပှၤလၢအသံလၢ ပှၤအံၣ်စရ့လးဖိတဖၣ် အနးဒံးလီၤ.
၁၂ ဖဲမုၢ်တနံၤလၢ ယဟိဝၤယွၤ မၤနၢၤကွံာ် ပှၤအမိၢ်ဖိလၢ ပှၤအံၣ်စရ့လးဖိ အမဲာ်ညါန့ၣ် စီၤယိၤၡူတဲတၢ်ဒီး ယဟိဝၤယွၤ လၢပှၤအံၣ်စရ့လးဖိတဖၣ် အမဲာ်ညါ ဒီးတဲဝဲလၢ
“မုၢ်ဧၢ, အိၣ်ပတုာ်လၢ+ ဝ့ၢ်ကံးဘိၣ် အဖီခိၣ်+
ဒီးလါဧၢ, အိၣ်ပတုာ်လၢ အးယၤလိၣ် အကစၢၢ်ကဆူး အဖီခိၣ်တက့ၢ်.”
၁၃ အဃိ မုၢ်န့ၣ် အိၣ်ပတုာ် ဒီးလါန့ၣ် တသုးအသးဘၣ် တုၤလၢ ပှၤအံၣ်စရ့လးဖိ မၤနၢၤကွံာ် အဒုၣ်အဒါတဖၣ်လီၤ. တၢ်ဂ့ၢ်အံၤ ကွဲးအသးလၢ လံာ်ယၤၡၣ်အပူၤ တမ့ၢ်ဘၣ်ဧါ.+ မုၢ်န့ၣ် အိၣ်ပတုာ်လၢ မူခိၣ်အခၢၣ်သး ဒီးမုၢ်တလီၤနုာ်ဘၣ် ဒီတနံၤညါလီၤ. ၁၄ ဒီးမုၢ်နံၤလၢ ယဟိဝၤယွၤ ဒိကနၣ် ပှၤဟီၣ်ခိၣ်ဖိ အကလုၢ်ဒ်အံၤန့ၣ်+ လၢအပူၤကွံာ် တအိၣ်ဘၣ် ဒီးလၢခံစ့ၢ်ကီး တအိၣ်နီတဘျီဘၣ်. ဒီးယဟိဝၤယွၤ ဒုးတၢ်လၢ ပှၤအံၣ်စရ့လးဖိတဖၣ် အဂီၢ်လီၤ.+
၁၅ ဝံၤဒီး စီၤယိၤၡူ ဒီးအံၣ်စရ့လး အသုးဖိခဲလၢာ် က့ၤကဒါက့ၤလၢ အဝဲသ့ၣ်အဒဲ လၢဝ့ၢ်ကံးလကၤလးန့ၣ်လီၤ.+
၁၆ ဘၣ်ဆၣ် စီၤပၤယဲၢ်ဂၤန့ၣ် လဲၤဃ့ၢ်အိၣ်ခူသူၣ်ပာ်စၢၤလၢ ဝ့ၢ်မးက့ဒၤ အလ့ကိပူၤလီၤ.+ ၁၇ ဒီးပှၤတဲဘၣ် စီၤယိၤၡူလၢ “ပှၤထံၣ်လၢ စီၤပၤယဲၢ်ဂၤ လဲၤအိၣ်ခူသူၣ်လၢ ဝ့ၢ်မးက့ဒၤ အလ့ကိပူၤလီၤ.”+ ၁၈ အဃိ စီၤယိၤၡူ တဲဝဲလၢ “တလ့ၣ်လၢၢ်ဖးဒိၣ်တဖၣ်လၢ လ့ခိၣ်ထိး ဒီးမၢပှၤအိၣ်ခိးတၢ် ဖဲန့ၣ်တက့ၢ်. ၁၉ ဘၣ်ဆၣ် မ့မ့ၢ်သုဝဲတဖၣ်န့ၣ် ဆဲးလူၤသုဒုၣ်သုဒါ ဒီးကျီသံကွံာ် အဝဲသ့ၣ်တက့ၢ်.+ ယဟိဝၤယွၤ ဟ့ၣ်လီၤအဝဲသ့ၣ်လၢ သုစုပူၤလံအဃိ တဘၣ်ပျဲ အဝဲသ့ၣ် နုာ်လီၤလၢ အဝ့ၢ်တဖၣ်အပူၤတဂ့ၤ.”
၂၀ စီၤယိၤၡူ ဒီးပှၤအံၣ်စရ့လးဖိတဖၣ် မၤသံကွံာ် အဝဲသ့ၣ်အါအါဂီၢ်ဂီၢ် တုၤလၢ အဝဲသ့ၣ် ဘူးကလၢာ်ညါလီၤ. ဘၣ်ဆၣ် အဝဲသ့ၣ်တနီၤ ဃ့ၢ်ပူၤဖျဲးအသး ဒီးနုာ်လီၤလၢ ဝ့ၢ်တဖၣ်လၢ အအိၣ်ဒီး အဒူၣ်လၢအကျၢၤအပူၤလီၤ. ၂၁ ဒီးပှၤသုးဖိခဲလၢာ် ဟဲက့ၤဝဲလၢ စီၤယိၤၡူအအိၣ် လၢဒဲကဝီၤ လၢဝ့ၢ်မးက့ဒၤန့ၣ် ပူၤပူၤဖျဲးဖျဲးလီၤ. ဒီးပှၤတဲတၢ်လၢ အထီဒါ ပှၤအံၣ်စရ့လးဖိ တဘူၣ်နီတဂၤဘၣ်. ၂၂ ဒီးစီၤယိၤၡူ တဲဝဲလၢ “အိးထီၣ်ကွံာ် လ့ခိၣ်ထိး ဒီးဟဲကိးထီၣ် စီၤပၤယဲၢ်ဂၤန့ၣ် လၢယအိၣ်တက့ၢ်.” ၂၃ အဃိ စီၤပၤယဲၢ်ဂၤလၢ အအိၣ်လၢ လ့ကိပူၤန့ၣ် ပှၤဟဲကိးဃီၤ အဝဲသ့ၣ်ဆူ စီၤယိၤၡူ အအိၣ်လီၤ. စီၤပၤတဖၣ်အံၤမ့ၢ်ဝဲ ဝ့ၢ်ယရူၤၡလ့ၣ် အစီၤပၤ, ဝ့ၢ်ဃ့ဘြိၣ် အစီၤပၤ, ဝ့ၢ်ယၢ်မူသး အစီၤပၤ, ဝ့ၢ်လၤကံၣ် အစီၤပၤ ဒီးဝ့ၢ်ဧ့းကလိၣ် အစီၤပၤလီၤ.+ ၂၄ ဖဲအဝဲသ့ၣ် ဟဲက့ၤကိး စီၤပၤတဖၣ်အံၤလၢ စီၤယိၤၡူအအိၣ်အခါ စီၤယိၤၡူကိးဖှိၣ် ပှၤအံၣ်စရ့လးဖိ ပိာ်ခွါခဲလၢာ်လီၤ. ဒီးစီၤယိၤၡူတဲ သုးခိၣ်တဖၣ်လၢ အလဲၤပိာ်တ့ၢ်အခံလၢ “ဟဲထီၣ်လၢ တၢ်မဲာ်ညါ. ယီၢ်လီၤ စီၤပၤတဖၣ်အံၤ အကိာ်ကျၢၢ်ခံတက့ၢ်.” အဃိ အဝဲသ့ၣ် ဟဲထီၣ်လၢ တၢ်မဲာ်ညါ ဒီးယီၢ်လီၤအခီၣ်လၢ စီၤပၤတဖၣ်အံၤ အကိာ်ကျၢၢ်ခံလီၤ.+ ၂၅ ဝံၤဒီးစီၤယိၤၡူ တဲအဝဲသ့ၣ်လၢ “သုဒုၣ်သုဒါလၢ သုဒုးအီၤခဲလၢာ်န့ၣ် ယဟိဝၤယွၤ ကမၤအဝဲသ့ၣ် ဒ်အံၤလီၤ.+ အဃိ တဘၣ်ပျံၤတၢ်တဂ့ၤ,+ ပာ်ဆူၣ်သုသး ဒီးအိၣ်ဒီး တၢ်သူၣ်ဒူသးဒူတက့ၢ်.”
၂၆ ဒီးစီၤယိၤၡူ ကျီသံကွံာ်အဝဲသ့ၣ် ဒီးပျၤထီၣ်အဝဲသ့ၣ်လၢ သ့ၣ်တၢၣ် ယဲၢ်တၢၣ်အလိၤလီၤ. ဒီးအဝဲသ့ၣ် ဘၣ်တၢ်ပျၤထီဃာ်အီၤလၢ သ့ၣ်တၢၣ်အလိၤ တုၤလီၤလၢ ဟါလီၤခီန့ၣ်လီၤ. ၂၇ ဖဲမုၢ်လီၤနုာ်အခါ စီၤယိၤၡူ ဟ့ၣ်လီၤတၢ်ကလုၢ်လၢ ပှၤကထုးလီၤကွံာ် အဝဲသ့ၣ်လၢ သ့ၣ်တၢၣ်အလိၤ+ ဒီးကွံာ်လီၤအဝဲသ့ၣ်လၢ လ့ကိပူၤ ဖဲအဝဲသ့ၣ် လဲၤအိၣ်ခူသူၣ်ဝဲ အလီၢ်န့ၣ်လီၤ. ဝံၤဒီးပှၤလဲၤသုးဝဲ လၢၢ်ဖးဒိၣ်တဖၣ်လၢ လ့အခိၣ်ထိး ဒီးလၢၢ်တဖၣ်န့ၣ် အိၣ်ဝဲဖဲန့ၣ် တုၤလၢ မုၢ်မဆါတနံၤအံၤလီၤ.
၂၈ ဖဲနံၤအဝဲန့ၣ် စီၤယိၤၡူ မၤန့ၢ် ဝ့ၢ်မးက့ဒၤ+ ဒီးကျီသံကွံာ် ပှၤခဲလၢာ်လၢ နးလီၤ. အဝဲမၤဟးဂီၤကွံာ်ဝဲ ဝ့ၢ်အစီၤပၤ ဒီးပှၤလၢအအိၣ်လၢ ဝ့ၢ်ပူၤကိးဂၤဒဲး ဒီးတပာ်မူအဝဲသ့ၣ် နီတဂၤဘၣ်.+ စီၤယိၤၡူ မၤဝဲဝ့ၢ်မးက့ဒၤ အစီၤပၤ+ ဒ်အမၤဝဲ ဝ့ၢ်ယရံၤဃိ အစီၤပၤအသိးလီၤ.
၂၉ ဝံၤဒီးစီၤယိၤၡူ ဒီးအံၣ်စရ့လးအသုးဖိ ခဲလၢာ် ဟးထီၣ်လၢ ဝ့ၢ်မးက့ဒၤ ဒီးလဲၤဝဲဆူ ဝ့ၢ်လံးဘနၤ ဒီးဒုးဝဲ ဝ့ၢ်အံၤလီၤ.+ ၃၀ ယဟိဝၤယွၤ ဟ့ၣ်လီၤစ့ၢ်ကီး ဝ့ၢ်လံးဘနၤ ဒီးအစီၤပၤ+ လၢပှၤအံၣ်စရ့လးဖိ အစုပူၤလီၤ. အဝဲသ့ၣ် ဒုးဝဲဝ့ၢ်အံၤ ဒီးကျီကွံာ်ဝဲ ပှၤအိၣ်လၢ ဝ့ၢ်ပူၤခဲလၢာ်လၢနး ဒီးတပာ်မူအဝဲသ့ၣ် နီတဂၤဘၣ်. ဒီးအဝဲသ့ၣ်မၤဝဲ ဝ့ၢ်လံးဘနၤ အစီၤပၤ ဒ်အမၤဝဲ ဝ့ၢ်ယရံၤဃိ အစီၤပၤအသိးလီၤ.+
၃၁ လၢခံစီၤယိၤၡူ ဒီးအံၣ်စရ့လးအသုးဖိ ခဲလၢာ် ဟးထီၣ်လၢ ဝ့ၢ်လံးဘနၤ ဒီးလဲၤဝဲဆူ ဝ့ၢ်လၤကံၣ်လီၤ.+ အဝဲသ့ၣ် ဆီလီၤအဒဲဖဲန့ၣ် ဒီးဒုးဝဲ ဝ့ၢ်အံၤလီၤ. ၃၂ ယဟိဝၤယွၤ ဟ့ၣ်လီၤ ဝ့ၢ်လၤကံၣ်လၢ ပှၤအံၣ်စရ့လးဖိအစုပူၤ ဒီးအဝဲသ့ၣ် မၤန့ၢ်ဝဲဝ့ၢ်ဖဲ ခံသီတသီန့ၣ်လီၤ. အဝဲသ့ၣ် ဒုးဝဲဝ့ၢ်အံၤ ဒီးကျီကွံာ်ဝဲ ပှၤအိၣ်လၢ ဝ့ၢ်ပူၤခဲလၢာ်လၢနး+ ဒ်အဝဲသ့ၣ်မၤဝဲ ဝ့ၢ်လံးဘနၤအသိးလီၤ.
၃၃ ဒီးဝ့ၢ်က့စ့ၢ် အစီၤပၤဟိရၣ်န့ၣ်+ လဲၤထီၣ်မၤစၢၤတၢ်လၢ ဝ့ၢ်လၤကံၣ်လီၤ. ဘၣ်ဆၣ် စီၤယိၤၡူ ကျီကွံာ် စီၤပၤဟိရၣ် ဒီးအသုးဖိခဲလၢာ် ဒီးအဝဲသ့ၣ် တပူၤဖျဲးနီတဂၤဘၣ်.
၃၄ ဝံၤဒီးစီၤယိၤၡူ ဒီးအံၣ်စရ့လးအသုးဖိ ခဲလၢာ် ဟးထီၣ်လၢ ဝ့ၢ်လၤကံၣ် ဒီးလဲၤဝဲဆူ ဝ့ၢ်ဧ့းကလိၣ်လီၤ.+ အဝဲသ့ၣ်ဆီလီၤအဒဲဖဲန့ၣ် ဒီးဒုးဝဲ ဝ့ၢ်အံၤလီၤ. ၃၅ ဒီးတနံၤဃီန့ၣ် အဝဲသ့ၣ် မၤန့ၢ်ဝဲဝ့ၢ် ဒီးကျီကွံာ်ဝဲ ပှၤဝ့ၢ်ဖိလၢ နးလီၤ. ဖဲနံၤအဝဲန့ၣ် အဝဲသ့ၣ်မၤဟးဂီၤကွံာ် ပှၤလၢဝ့ၢ်ပူၤကိးဂၤဒဲး ဒ်အမၤ ဝ့ၢ်လၤကံၣ်အသိးလီၤ.+
၃၆ ဝံၤဒီးစီၤယိၤၡူ ဒီးအံၣ်စရ့လး အသုးဖိခဲလၢာ် ဟးထီၣ်လၢ ဝ့ၢ်ဧ့းကလိၣ် ဒီးလဲၤဝဲဆူ ဝ့ၢ်ဃ့ဘြိၣ်+ ဒီးဒုးဝဲဝ့ၢ်အံၤလီၤ. ၃၇ အဝဲသ့ၣ် မၤန့ၢ်ဝ့ၢ် ဒီးကျီကွံာ်ဝဲ ပှၤဝ့ၢ်ဖိ, ဝ့ၢ်အစီၤပၤ, ဝ့ၢ်ဖိတဖၣ် ဒီးပှၤခဲလၢာ်လၢ အအိၣ်လၢအပူၤ လၢနးလီၤ. ဒီးတပာ်မူ အဝဲသ့ၣ်နီတဂၤဘၣ်. ဒ်စီၤယိၤၡူ မၤဝဲဝ့ၢ်ဧ့းကလိၣ်အသိး အဝဲမၤဟးဂီၤဝဲ ဝ့ၢ်အံၤ ဒီးပှၤအိၣ်လၢအပူၤခဲလၢာ် ဒ်န့ၣ်လီၤ.
၃၈ လၢခံကတၢၢ်န့ၣ် စီၤယိၤၡူ ဒီးအံၣ်စရ့လး အသုးဖိခဲလၢာ် ဃၣ်ဃီၤအသးလၢ ဝ့ၢ်ဒဘံၢ်အအိၣ်+ ဒီးဒုးဝဲဝ့ၢ်အံၤလီၤ. ၃၉ စီၤယိၤၡူ မၤန့ၢ်ဝ့ၢ်, ဝ့ၢ်အစီၤပၤ ဒီးဝ့ၢ်ဖိတဖၣ်ခဲလၢာ်လီၤ. အဝဲသ့ၣ်ကျီကွံာ် ပှၤဝ့ၢ်ဖိခဲလၢာ်လၢနး ဒီးမၤဟးဂီၤကွံာ် ပှၤလၢအအိၣ်လၢ ဝ့ၢ်ပူၤခဲလၢာ်+ ဒီးတပာ်မူအဝဲသ့ၣ်နီတဂၤဘၣ်.+ ဒ်စီၤယိၤၡူ မၤဝဲဝ့ၢ်ဃ့ဘြိၣ်, ဝ့ၢ်လံးဘနၤ ဒီးအစီၤပၤအသိး အဝဲမၤဝဲ ဝ့ၢ်ဒဘံၢ် ဒီးအစီၤပၤ ဒ်န့ၣ်လီၤ.
၄၀ စီၤယိၤၡူ မၤနၢၤကွံာ်ဝဲ တၢ်လီၢ်ခဲလၢာ် လၢအအိၣ်လၢ ကစၢၢ်ကလိကျါ, နဲကဲၤ, ၡ့ဖလၣ်+ ဒီးလၢတၢ်လီၤဘံတဖၣ် အလိၤလီၤ. ဒီးအဝဲမၤနၢၤဝဲ တၢ်လီၢ်တဖၣ်အံၤ အစီၤပၤခဲလၢာ် ဒီးတပာ်မူအဝဲသ့ၣ် နီတဂၤဘၣ်. အဝဲမၤဟးဂီၤကွံာ် ပှၤခဲလၢာ်*+ ဒ်အံၣ်စရ့လး အကစၢ် ယဟိဝၤယွၤ မၤလိာ်ပာ်စၢၤဝဲ အသိးလီၤ.+ ၄၁ စီၤယိၤၡူ မၤန့ၢ်တၢ်လီၢ်တဖၣ် စးထီၣ်လၢ ကၤဒ့ၣ်ဘၢ်န့+ တုၤလီၤလၢ ဂါစၤ,+ ကိၡ့ၣ်အတၢ်လီၢ်ခဲလၢာ်+ ဒီးတုၤလၢ ဝ့ၢ်ကံးဘိၣ်န့ၣ်လီၤ.+ ၄၂ စီၤယိၤၡူ မၤနၢၤစီၤပၤတဖၣ်အံၤခဲလၢာ် ဒီးမၤန့ၢ်အဝဲသ့ၣ် အထံကီၢ် လၢတၢ်ဆၢကတီၢ် တကတီၢ်ဃီ မ့ၢ်လၢ အံၣ်စရ့လး အကစၢ်ယဟိဝၤယွၤ ဒုးတၢ်လၢ အံၣ်စရ့လးအဂီၢ် အဃိလီၤ.+ ၄၃ ဝံၤဒီးစီၤယိၤၡူ ဒီးအံၣ်စရ့လး အသုးဖိခဲလၢာ် က့ၤကဒါက့ၤလၢ အဝဲသ့ၣ် အဒဲကဝီၤလၢ ဝ့ၢ်ကံးလကၤလးန့ၣ်လီၤ.+