ယိၤၡူ
၂ စီၤနိၣ်အဖိခွါ စီၤယိၤၡူန့ၣ် ဆှၢလီၤခူသူၣ်ဝဲ ပိာ်ခွါခံဂၤ ဒ်ပှၤကွၢ်ဟုၣ်တၢ်ဖိအသိး ဖဲအဝဲသ့ၣ်အိၣ်လၢ ၡံးတံၣ်အခါန့ၣ်လီၤ.+ စီၤယိၤၡူတဲဘၣ်အဝဲသ့ၣ်လၢ “လဲၤကွၢ်ဟုၣ် ကီၢ်အတၢ်အိၣ်သး လီၤဆီဒၣ်တၢ် ဝ့ၢ်ယရံၤဃိ အတၢ်လီၢ်န့ၣ်တက့ၢ်.” အဃိ အဝဲသ့ၣ်လဲၤ ဒီးလဲၤနုာ်လီၤဝဲလၢ နီၢ်ရၤဃး+ လၢအမ့ၢ် ပိာ်မုၣ်လၢ အဆါလီၤအီၣ်သးတဂၤအဟံၣ် ဒီးအဝဲသ့ၣ်အိၣ်ဝဲဖဲန့ၣ်လီၤ. ၂ ပှၤတဲဘၣ် ဝ့ၢ်ယရံၤဃိအစီၤပၤလၢ “တဟါအံၤ ပှၤအံၣ်စရ့လးဖိတဖၣ် ဟဲဝဲဖဲအံၤ ဒ်သိးကကွၢ်ဟုၣ် ထံကီၢ်န့ၣ်လီၤ.” ၃ အဃိ ဝ့ၢ်ယရံၤဃိအစီၤပၤ မၢလီၤပှၤပိာ်ခွါတနီၤ ဒ်သိးကတဲဘၣ် နီၢ်ရၤဃးလၢ “ပိာ်ခွါလၢအအိၣ်လၢ နဟံၣ်ပူၤန့ၣ် ဟဲကိးထီၣ် အဝဲသ့ၣ်တက့ၢ်. အဝဲသ့ၣ်န့ၣ် မ့ၢ်ပှၤလၢ အဟဲကွၢ်ဟုၣ် ထံကီၢ်ဒီတဘ့ၣ်လီၤ.”
၄ ဘၣ်ဆၣ် နီၢ်ရၤဃးပာ်ခူသူၣ်ဝဲ ပိာ်ခွါ ခံဂၤန့ၣ်လီၤ. ဝံၤဒီးအဝဲတဲဝဲ “မ့ၢ်, ပိာ်ခွါဟဲလၢယအိၣ်. ဘၣ်ဆၣ် အဝဲသ့ၣ်ဟဲဖဲလဲၣ်န့ၣ် ယတသ့ၣ်ညါဘၣ်. ၅ ဖဲတၢ်ခံးလီၤဒီး တချုးလၢ ပှၤကးပံး ဝ့ၢ်အတြဲၤဒံးဘၣ်အခါ အဝဲသ့ၣ်ဟးထီၣ်ဝဲလီၤ. အဝဲသ့ၣ်လဲၤဖဲလဲၣ်န့ၣ် ယတသ့ၣ်ညါဘၣ်. ဘၣ်ဆၣ် သုမ့ၢ်လဲၤလူၤအဝဲသ့ၣ် ချ့ချ့န့ၣ် သုကချုးန့ၢ်အဝဲသ့ၣ်လီၤ.” ၆ (သနာ်က့ နီၢ်ရၤဃး လဲၤကိးထီၣ်အဝဲသ့ၣ်လၢ ဟံၣ်ခိၣ် ဒီးပာ်ခူသူၣ်အဝဲသ့ၣ်လၢ ခီမၤအဘိတဖၣ်* အကျါလီၤ.) ၇ ဒီးဖဲပှၤလူၤတၢ်ဖိတဖၣ် ဟးထီၣ်အခါ ဝ့ၢ်အတြဲၤန့ၣ် ဘၣ်တၢ်ကးပံးကွံာ်အီၤ တဘျီဃီလီၤ. အဝဲသ့ၣ်လဲၤလူၤဝဲ ပှၤအံၣ်စရ့လးဖိ အပှၤကွၢ်ဟုၣ်တၢ်တဖၣ်လၢ ကျဲလၢအလဲၤဆူ ထံကျိယၢ်ဒ့ၣ် အထံဒီၣ်အလီၢ်တဖၣ်လီၤ.+
၈ တချုးလၢ ပှၤကွၢ်ဟုၣ်တၢ်တဖၣ် မံဒံးဘၣ်အခါ နီၢ်ရၤဃး ဟဲထီၣ်လၢ အဝဲသ့ၣ်အအိၣ် လၢဟံၣ်ခိၣ်လီၤ. ၉ နီၢ်ရၤဃး တဲအဝဲသ့ၣ်လၢ “ယသ့ၣ်ညါလၢ ယဟိဝၤယွၤ ကဟ့ၣ်လီၤသုထံကီၢ်+ အဃိတၢ်ပျံၤတၢ်ဖုး လီၤဘၣ်ပှၤဒိၣ်မး.+ ဒီးပှၤထံဖိကီၢ်ဖိခဲလၢာ် သးဟးဂီၤ,+ ၁၀ မ့ၢ်လၢ ပနၢ်ဟူဘၣ်လၢ ဖဲသုဟးထီၣ်လၢ အဲၤကူပတူးအပူၤအခါ+ ယဟိဝၤယွၤ မၤလီၤသံးပီၣ်လဲၣ်ဂီၤအထံ လၢသုမဲာ်ညါ ဒ်လဲၣ်န့ၣ်လီၤ. ဒီးပနၢ်ဟူဘၣ်စ့ၢ်ကီးလၢ သုမၤဟးဂီၤ ပှၤအမိၢ်ဖိ အစီၤပၤခံဂၤလၢအမ့ၢ် စီၤစံဃိၣ်+ ဒီးစီၤဧိာ်+ လၢထံကျိယၢ်ဒ့ၣ် အဝၢ်ဘးခီတကပၤ* အဂ့ၢ်န့ၣ်လီၤ. ၁၁ ဒီးဖဲပနၢ်ဟူဘၣ် တၢ်ဂ့ၢ်အံၤအခါ ပသးဘူးကလီၤတဲာ်ညါ. ဒီးမ့ၢ်လၢသုကစၢ် ယဟိဝၤယွၤန့ၣ် မ့ၢ်ကစၢ်ယွၤလၢ မူခိၣ်ဒီးဟီၣ်ခိၣ် အဖီခိၣ်အဃိ ပှၤကိးဂၤဒဲး ပျံၤတၢ်ဖုးတၢ်လၢသုဃိလီၤ.+ ၁၂ ယပာ်ဖျါထီၣ် တၢ်အဲၣ်လၢအတီလၢ သုဖီခိၣ်အဃိ ဝံသးစူၤ အၢၣ်လီၤယၤလၢ ယဟိဝၤယွၤအမဲာ်ညါလၢ သုကပာ်ဖျါထီၣ် တၢ်အဲၣ်လၢအတီလၢ ယပၢ်အဒူၣ်ဖိထၢဖိ အဖီခိၣ်န့ၣ်တက့ၢ်. ဒီးသုကဘၣ်ဟ့ၣ်ယၤ တၢ်ပနီၣ်တမံၤလၢ သုကတီဒီး သုတၢ်အၢၣ်လီၤန့ၣ်လီၤ. ၁၃ သုကဘၣ်ပာ်မူ ယမိၢ်, ယပၢ်, ယဒီပုၢ်ဝဲၢ်မုၣ်တဖၣ်, ယဒီပုၢ်ဝဲၢ်ခွါတဖၣ် ဒီးပှၤလၢအိၣ်ဒီးအဝဲသ့ၣ်ခဲလၢာ် ဒီးသုကဘၣ်မၤပူၤဖျဲးပှၤ လၢတၢ်သံလီၤ.”+
၁၄ ဒီးပိာ်ခွါတဖၣ်န့ၣ် တဲအီၤလၢ “ပမ့ၢ်တမၤဒ်ပတဲအသိးဘၣ်န့ၣ် မ်ကစၢ်ယွၤ ဟံးထီၣ်ကွံာ် ပသးသမူတက့ၢ်. နမ့ၢ်တတဲဖျါထီၣ် ဘၣ်ဃးဒီး ပတၢ်ရဲၣ်တၢ်ကျဲၤဘၣ်န့ၣ် ဖဲယဟိဝၤယွၤ ဟ့ၣ်လီၤပှၤထံကီၢ်အခါ ပကပာ်ဖျါထီၣ် တၢ်အဲၣ်လၢအတီ လၢနဖီခိၣ် ဒီးပကတီဒီး ပတၢ်ကတိၤလီၤ.” ၁၅ ဒီးနီၢ်ရၤဃးအဟံၣ်န့ၣ် အိၣ်လၢဝ့ၢ်ခိၣ်ဒူ အကပၤလၢ အအဲၣ်ဒိးတဲဝဲ အဝဲအိၣ်ဝဲဆိးဝဲလၢ ဝ့ၢ်ခိၣ်ဒူန့ၣ်လီၤ. အဝဲစဲၤလီၤပျံၤလၢ ပဲတြီဖိ ဒီးဒုးစံၣ်လီၤဝဲ အံၣ်စရ့လး အပှၤကွၢ်ဟုၣ်တၢ်ဖိ ဖဲန့ၣ်လီၤ.+ ၁၆ ဝံၤဒီးနီၢ်ရၤဃး တဲအဝဲသ့ၣ်လၢ “ဒ်သိး ပှၤလၢအလူၤဃုသုတဖၣ်န့ၣ် ဃုသုသုတဘၣ်တဂ့ၤအဂီၢ် လဲၤအိၣ်ခူသူၣ်လၢ ကစၢၢ်ကျါ သၢသီတက့ၢ်. ဒီးဖဲအဝဲသ့ၣ် ဟဲက့ၤကဒါက့ၤလၢ ဝ့ၢ်ပူၤအခါ သုက့ၤသ့ဝဲလီၤ.”
၁၇ အံၣ်စရ့လး အပှၤကွၢ်ဟုၣ်တၢ်ဖိတဖၣ် တဲအီၤလၢ “ပကမၤလၢပှဲၤ တၢ်အၢၣ်လီၤလၢ နမၢပအၢၣ်လီၤအံၤ ဒီးပကပူၤဖျဲးဒီးတၢ်ကမၣ်လီၤ.+ ၁၈ ဘၣ်ဆၣ် ဖဲပဟဲနုာ်လီၤလၢ ကီၢ်အံၤအပူၤအခါ ပျံၤဂီၤဂီၤလၢ နကသူအီၤလၢ ကစဲၤလီၤပှၤ တဘိအံၤန့ၣ် နကဘၣ်စၢဃာ်အီၤလၢ နပဲတြီဖိန့ၣ်လီၤ. ဒီးနမိၢ်, နပၢ်, နဒီပုၢ်ဝဲၢ်တဖၣ် ဒီးနပၢ်အပှၤဒူၣ်ဖိထၢဖိ ခဲလၢာ်န့ၣ် နကဘၣ်ကိးဖှိၣ်အဝဲသ့ၣ်လၢ နဟံၣ်ပူၤလီၤ.+ ၁၉ ဘၣ်ဆၣ် ပှၤမ့ၢ်ဟးထီၣ်လၢ နဟံၣ်အချၢတဂၤဂၤန့ၣ် အကသံ ဒီးမ့ၢ်ဒၣ်အနီၢ်ကစၢ် အတၢ်ကမၣ်လီၤ. မ့မ့ၢ် ပှၤလၢအအိၣ်တ့ၢ်ဒီးနၤလၢ နဟံၣ်ပူၤတဂၤဂၤ မ့ၢ်ဘၣ်ဒိန့ၣ် အသွံၣ်တပူၤဒီးပခိၣ်ဘၣ်. ၂၀ ဘၣ်ဆၣ် နမ့ၢ်တဲဘၣ်ပှၤဂၤ ဘၣ်ဃးဒီး ပတၢ်ရဲၣ်တၢ်ကျဲၤန့ၣ်+ တၢ်အၢၣ်လီၤလၢ နမၢပအၢၣ်လီၤအံၤ ပမ့ၢ်တမၤလၢပှဲၤအီၤဘၣ် သနာ်က့ ပတၢ်ကမၣ်တအိၣ်ဘၣ်.” ၂၁ နီၢ်ရၤဃး က့ၤတဲဆၢဝဲလၢ “မ်တၢ်မၤအသးဒ် သုတဲအသိးတက့ၢ်.”
ဝံၤဒီးနီၢ်ရၤဃး ပျဲက့ၤအဝဲသ့ၣ် ဒီးအဝဲသ့ၣ်က့ၤဝဲလီၤ. ဖဲန့ၣ်ဝံၤအလီၢ်ခံ နီၢ်ရၤဃး စၢထီၣ်ဝဲ ပျံၤဂီၤဂီၤတဘိလၢ ပဲတြီဖိန့ၣ်လီၤ. ၂၂ ဒီးအဝဲသ့ၣ်ဟးထီၣ်ကွံာ် ဒီးလဲၤအိၣ်ဝဲလၢ ကစၢၢ်ကျါသၢသီ တုၤလၢပှၤလၢ အလူၤဃုအဝဲသ့ၣ်တဖၣ် ဟဲက့ၤဝဲလၢ ဝ့ၢ်ပူၤတစုလီၤ. ပှၤလူၤဃုတၢ်တဖၣ် လူၤဃုအဝဲသ့ၣ်လၢ ကျဲကိးဘိဒဲး ဘၣ်ဆၣ် တထံၣ်အဝဲသ့ၣ်ဘၣ်. ၂၃ ဒီးပှၤကွၢ်ဟုၣ်တၢ်ခံဂၤန့ၣ် ဟဲက့ၤလီၤဝဲလၢ ကစၢၢ်ခိၣ် ဒီးခီဂာ်ဝဲထံကျိ ဝံၤဒီးဟဲက့ၤဝဲလၢ စီၤနိၣ်အဖိခွါ စီၤယိၤၡူ အအိၣ်န့ၣ်လီၤ. အဝဲသ့ၣ်တဲဘၣ် စီၤယိၤၡူလၢ တၢ်ကဲထီၣ်အသးဒီး အဝဲသ့ၣ်ခဲလၢာ်န့ၣ်လီၤ. ၂၄ ဝံၤဒီးအဝဲသ့ၣ်တဲ စီၤယိၤၡူလၢ “ယဟိဝၤယွၤ ဟ့ၣ်လီၤ ထံကီၢ်ဒီတဘ့ၣ်လၢ ပစုပူၤလံ.+ ပှၤထံဖိကီၢ်ဖိခဲလၢာ် ပျံၤပှၤဒိၣ်မးလီၤ.”+