စံၣ်ညီၣ်ကွီၢ်
၇ ဒီးစီၤယရူဘဧၤလး လၢအမ့ၢ် စီၤကံးဒဧိၣ်+ ဒီးပှၤလၢအအိၣ်ဒီးအီၤ ကိးဂၤဒဲးန့ၣ် ဂဲၤဆၢထၢၣ်ဂီၤဂီၤ ဒီးဆီလီၤအသးလၢ ဃရိး အထံထီၣ်ပၢၢ် အကပၤလီၤ. မ့မ့ၢ် ပှၤမံးဒယၣ်ဖိတဖၣ်န့ၣ် အိၣ်ဝဲလၢ ကလံၤစိးတခီ လၢတၢ်လူၢ်မိၤရံယၤ အခီၣ်ထံး လၢတၢ်တြီၤပူၤလီၤ. ၂ ယဟိဝၤယွၤ တဲဘၣ် စီၤကံးဒဧိၣ်လၢ “ဒ်သိးယကဟ့ၣ်လီၤ ပှၤမံးဒယၣ်ဖိလၢ နပှၤသုးဖိအစုပူၤအဂီၢ် နပှၤသုးဖိ အိၣ်အါတလၢလီၤ.+ အဃိ ပှၤအံၣ်စရ့လးဖိ ကပတြၢၤလီၤဘၣ်ဖုးအသး ဒီးတဲယၤလၢ ‘ယမၤပူၤဖျဲးလီၤ ယသးလၢ ယနီၢ်ကစၢ် အဂံၢ်အဘါလီၤ.’+ ၃ ခဲအံၤ ဝံသးစူၤ ဘိးဘၣ်သ့ၣ်ညါ ပှၤသုးဖိတဖၣ် ဒ်အံၤတက့ၢ်. ‘ပှၤတဂၤဂ့ၤ တဂၤဂ့ၤ လၢအပျံၤတၢ် ဒီးကနိးကစုာ်န့ၣ် ကဘၣ်က့ၤကဒါက့ၤ လၢအဟံၣ်လီၤ.’”+ အဃိ ဒ်သိး ကမၤကွၢ်ဝဲ ပှၤသုးဖိတဖၣ်အဂီၢ် စီၤကံးဒဧိၣ် တဲဝဲတၢ်ကတိၤတဖၣ်န့ၣ်လီၤ. ဒီးပှၤသုးဖိ အဂၤ ၂၂,၀၀၀ က့ၤကဒါက့ၤအဃိ ပှၤသုးဖိအိၣ်တ့ၢ်က့ၤဝဲအဂၤ ၁၀,၀၀၀ လီၤ.
၄ ဒီးယဟိဝၤယွၤတဲ စီၤကံးဒဧိၣ်လၢ “ပှၤသုးဖိ အိၣ်အါတလၢဒံး. အဃိ ဒ်သိး ယကမၤကွၢ်န့ၢ်နၤ အဝဲသ့ၣ်အဂီၢ် မၢအဝဲသ့ၣ် လဲၤလီၤလၢ ထံကျိဖိတက့ၢ်. ဖဲယတဲဘၣ်နၤလၢ ‘ပှၤတဂၤအံၤ ကလဲၤဒီးနၤ’ အခါ အကလဲၤဒီးနၤလီၤ. ဘၣ်ဆၣ်ဖဲယတဲနၤလၢ ‘ပှၤတဂၤအံၤ တလဲၤဒီးနၤဘၣ်’ အခါ အတလဲၤဒီးနၤဘၣ်.” ၅ အဃိ စီၤကံးဒဧိၣ် လဲၤကိးပှၤတဖၣ်န့ၣ် လၢထံကျိဖိ
ဒီးယဟိဝၤယွၤ တဲစီၤကံးဒဧိၣ်လၢ “ပှၤကိးဂၤဒဲးလၢ အလ့ၣ်အီထံလၢအပျ့ၤ ဒ်ထွံၣ်လ့ၣ်အီထံအသိးန့ၣ် နကဘၣ် ပာ်လီၤဆီ အဝဲသ့ၣ်ဒီး ပှၤအဂၤတဖၣ်လၢ အချံးလီၤအခီၣ် ဒီးသကူးလီၤအီထံန့ၣ်လီၤ.” ၆ ဒီးပှၤလၢအဟံးန့ၢ်ထံ လၢအစု ဒီးလ့ၣ်အီဝဲတဖၣ်န့ၣ် အိၣ်ဝဲအဂၤ ၃၀၀ လီၤ. မ့မ့ၢ် ပှၤအဂၤတဖၣ်န့ၣ် ချံးလီၤအခီၣ် ဒီးသကူးလီၤအီထံလီၤ.
၇ ယဟိဝၤယွၤ တဲဘၣ် စီၤကံးဒဧိၣ်လၢ “ယကမၤပူၤဖျဲးနၤ ဃုာ်ဒီး ပှၤသုးဖိ အဂၤ ၃၀၀ လၢအအီထံလၢ အစုညါသးပူၤလီၤ. ဒီးယကဟ့ၣ်လီၤ ပှၤမံးဒယၣ်ဖိ လၢနစုပူၤလီၤ.+ မ့မ့ၢ်ပှၤသုးဖိ လၢအဂၤတဖၣ်န့ၣ် ဒုးက့ၤကဒါ အဝဲသ့ၣ်လၢ အဟံၣ်တက့ၢ်.” ၈ အဃိ ပှၤသုးဖိ အဂၤ ၃၀၀ န့ၣ်ဟံးန့ၢ် တၢ်အီၣ်တၢ်အီ ဒီးကွဲၤတဖၣ်လၢ ပှၤသုးဖိအဂၤတဖၣ်အအိၣ် ဝံၤဒီး စီၤကံးဒဧိၣ် ဒုးက့ၤဝဲသုးဖိလၢ အဂၤတဖၣ်အံၤ ကိးဂၤဒဲး ဒီးပှၤသုးဖိ အိၣ်တ့ၢ်ဒီးအီၤ ထဲအဂၤ ၃၀၀ လီၤ. ဒီးမံးဒယၣ်အသုးဖိ အဒဲကဝီၤ အိၣ်ဝဲလၢ တၢ်တြီၤပူၤ လၢအဝဲသ့ၣ် အဖီလာ်တခီလီၤ.+
၉ ဖဲတၢ်တနၤန့ၣ် ယဟိဝၤယွၤ တဲဘၣ် စီၤကံးဒဧိၣ်လၢ “မ့ၢ်လၢ ယဟ့ၣ်လီၤ ပှၤမံးဒယၣ်ဖိ လၢနစုပူၤလံအဃိ ဂဲၤဆၢထၢၣ် ဒီးလဲၤလီၤဒုး ဒုၣ်ဒါအဒဲကဝီၤတက့ၢ်.+ ၁၀ ဘၣ်ဆၣ် နလဲၤဒုး အဝဲသ့ၣ် မ့ၢ်တဘူၣ်ဘၣ်န့ၣ် လဲၤလီၤဃုာ်ဒီး နခ့နပှၤ စီၤဖူရါ ၁၁ ဒီးဖဲနနၢ်ဟူတၢ်လၢ အဝဲသ့ၣ် တဲဝဲတဖၣ် ဝံၤအလီၢ်ခံ နကအိၣ်ဒီး တၢ်သးဒူ ဒ်သိးနကလဲၤဒုး ဒုၣ်ဒါအဒဲကဝီၤအဂီၢ်လီၤ.” အဃိ စီၤကံးဒဧိၣ် ဒီးအခ့အပှၤ စီၤဖူရါ လဲၤလီၤဘူးဒီး ဒုၣ်ဒါ အဒဲကဝီၤလီၤ.
၁၂ ပှၤမံးဒယၣ်ဖိ, ပှၤဧမၤလ့းဖိ ဒီးပှၤမုၢ်ထီၣ်ဖိတဖၣ်+ ဆီလီၤအသး လၢတၢ်တြီၤပူၤ အါဝဲဒ်ဒွဲၣ်တဖၣ်အသိး ဒီးအကီၤလၤအူးတဖၣ် အါဝဲဒ်သိးဒီး မဲးလၢ ပီၣ်လဲၣ်ကၢၢ်နံၤ တုၤဒၣ်လဲာ် ပှၤဂံၢ်အီၤတဘၣ်ဘၣ်လီၤ.+ ၁၃ စီၤကံးဒဧိၣ် လဲၤလီၤဝဲလီၤ. ဒီးပှၤသုးဖိတဂၤ တဲဘၣ် အသကိးလၢ အတၢ်မံမီၢ် ဒီးတဲဝဲလၢ “ယမံမီၢ်ဘၣ်လၢ ကိၣ်ဘုမုယီၤတလိၣ် လီၤတလ့ၣ်လၢ ပှၤမံးဒယၣ်ဖိ အဒဲကဝီၤလီၤ.+ ဒီးကိၣ်တလိၣ်န့ၣ် လီၤတလ့ၣ်ဘၣ်ဝဲဒဲတဖျၢၣ် ဒီးဒဲတဖျၢၣ်န့ၣ် ဖျီးခိၣ်ခံလီၤလာ်ဝဲ ဒီးလီၤပှီၢ်ကွံာ်ဝဲ ဘံၣ်သလၣ်လီၤ.” ၁၄ ဒီးအသကိးတဲအီၤလၢ “တၢ်တခါအံၤ အဘၣ်ထွဲဒီး ပှၤအံၣ်စရ့လးဖိ စီၤယိးအၣ်အဖိခွါ စီၤကံးဒဧိၣ်+ အနးတဘ့ၣ်န့ၣ် လီၤတံၢ်လံ. ကစၢ်ယွၤဟ့ၣ်လီၤ ပှၤမံးဒယၣ်ဖိ ဒီးသုးမုၢ်ဒီတဖု လၢစီၤကံးဒဧိၣ် အစုပူၤလံ.”+
၁၅ ဖဲစီၤကံးဒဧိၣ် နၢ်ဟူဘၣ် ပှၤသုးဖိအံၤ တဲဖျါထီၣ် တၢ်မံမီၢ် ဒီးနၢ်ဟူဘၣ်ဝဲ တၢ်မံမီၢ်အခီပညီအခါ+ စီၤကံးဒဧိၣ် ထိၣ်လီၤပှီၤအသး လၢကစၢ်ယွၤ အမဲာ်ညါလီၤ. ဝံၤဒီး စီၤကံးဒဧိၣ် က့ၤကဒါက့ၤလၢ ပှၤအံၣ်စရ့လးဖိ အဒဲကဝီၤ ဒီးတဲဝဲလၢ “မ့ၢ်လၢ ယဟိဝၤယွၤ ဟ့ၣ်လီၤ ပှၤမံးဒယၣ်ဖိ အဒဲကဝီၤလၢ သုစုပူၤလံအဃိ ဂဲၤဆၢထၢၣ်တက့ၢ်.” ၁၆ ဒီးပှၤအဂၤ ၃၀၀ န့ၣ်အဝဲနီၤဖးလီၤဝဲ သၢဖု ဒီးဟ့ၣ်လီၤအဝဲသ့ၣ် ကိးဂၤဒဲးလၢကွဲၤ+ ဒီးကိဖးဒိၣ် ဒီးဆှိတဖၣ် အိၣ်လၢ ကိဖးဒိၣ်အပူၤလီၤ. ၁၇ ဒီးစီၤကံးဒဧိၣ် တဲအဝဲသ့ၣ်လၢ “ကွၢ်ယၤ ဒီးမၤပိာ်ယခံ လီၤတံၢ်လီၤဆဲးတက့ၢ်. ဖဲယလဲၤလီၤ ဘူးဒီး ဒုၣ်ဒါ အဒဲကဝီၤအခါ သုကဘၣ်မၤ ဒ်ယမၤအသိးလီၤ. ၁၈ ဖဲယၤ ဒီးပှၤလၢအအိၣ်ဒီးယၤတဖၣ် အူထီၣ်ကွဲၤအခါ သုဝဲစ့ၢ်ကီး သုကဘၣ် အူထီၣ်ကွဲၤ လၢဒဲကဝီၤအဃၢၤဝးဝး ဒီးကိးပသူထီၣ်လၢ ‘လၢယဟိဝၤယွၤ ဒီးစီၤကံးဒဧိၣ်အဂီၢ်’ လီၤ.”
၁၉ စီၤကံးဒဧိၣ် ဒီးပှၤအဂၤ ၁၀၀ လၢအလဲၤတၢ်ဒီးအီၤန့ၣ် လဲၤတုၤလၢ ဒုၣ်ဒါအဒဲကဝီၤ တချုးလၢဖးဖီမုၢ်* ဖဲပှၤခိးတၢ်ဖိတဖၣ် ဆီတလဲအမူဒါ ဝံၤသီသီအခါန့ၣ်လီၤ. ဒီးအဝဲသ့ၣ် အူထီၣ်ကွဲၤ+ ဒီးမၤသ့ၣ်ဖး ကိဖးဒိၣ်တဖၣ်လၢ အစိာ်ဝဲလၢအစုလီၤ.+ ၂၀ အဃိ ပှၤသၢဖုန့ၣ် အူထီၣ်ကွဲၤ ဒီးမၤသ့ၣ်ဖး ကိဖးဒိၣ်တဖၣ်လီၤ. ဒီးအဝဲသ့ၣ် စိာ်ဝဲဆှိလၢ အစုစ့ၣ် ဒီးအူထီၣ်ကွဲၤလၢ အအိၣ်လၢ အစုထွဲ ဒီးကိးပသူထီၣ်လၢ “ယဟိဝၤယွၤ ဒီးစီၤကံးဒဧိၣ်အတၢ်ဒုး” လီၤ. ၂၁ ဖဲန့ၣ်အခါ ပှၤသုးဖိတဂၤစုာ်စုာ် ဆၢထၢၣ်လၢ အနီၢ်ကစၢ်အလီၢ် ဒီးဆၢထၢၣ်ဝးတရံးဝဲ ဒုၣ်ဒါအဒဲကဝီၤလီၤ. ဒီးပှၤအိၣ်လၢ ဒဲကဝီၤပူၤ ခဲလၢာ်န့ၣ် ဃ့ၢ်ကွံာ်ဝဲ ဒီးကိးပသူဝဲလီၤ.+ ၂၂ ဒီးပှၤအဂၤ ၃၀၀ န့ၣ်ဆဲးအူဝဲ အကွဲၤလီၤ. ဒီးယဟိဝၤယွၤ မၤဝဲဒ်သိး ပှၤကိးဂၤဒဲးလၢ အအိၣ်လၢ ဒဲကဝီၤပူၤ ကဒုးလိာ်က့ၤအသး ကဒဲကဒဲလီၤ.+ ဒီးဒုၣ်ဒါ ဃ့ၢ်ဝဲတုၤလၢ ဘ့ၤသၡံးတၤ, လၢစ့ၤရ့း ဒီးပၢၢ်တုၤလၢ အၤဘ့လးမဃိလး+ အဃၢၤ လၢအဘူးဒီး တးဘးန့ၣ်လီၤ.
၂၃ ဒီးပှၤကိးန့ၢ် အံၣ်စရ့လးအသုးဖိ လၢအအိၣ်လၢ နးသၤလံအဒူၣ်, အၤၡ့ၢ်အဒူၣ် ဒီးသုးဖိခဲလၢာ်လၢ အအိၣ်လၢ မနၤၡ့ၤအဒူၣ်လီၤ.+ ဒီးအဝဲသ့ၣ် လူၤဝဲ ပှၤမံးဒယၣ်ဖိလီၤ. ၂၄ ဒီးစီၤကံးဒဧိၣ် ဆှၢလီၤ ပှၤစိာ်တၢ်ကစီၣ်ဖိတဖၣ် သကုၤဆးဒးလၢ အ့ဖရဲၣ် အကစၢၢ်ကလိကျါ ဒီးတဲဝဲလၢ “လဲၤလီၤဒုး ပှၤမံးဒယၣ်ဖိတဖၣ် ဒီးလဲၤလၢ ဘ့ၤသဘါရၤ ဒီးလၢထံကျိယၢ်ဒ့ၣ် ဒီးဆီလီၤဆိပာ်စၢၤ ပှၤသုးဖိလၢ ထံဒီၣ်အလီၢ်တဖၣ်လၢ ပှၤခီဂာ်အီၤသ့တက့ၢ်.” အဃိ ပှၤအ့ဖရဲၣ်ဖိတဖၣ် ပာ်ဖှိၣ်ထီၣ်အသး ဒီးလဲၤဆီလီၤပာ်စၢၤပှၤသုးဖိ ဖဲထံဒီၣ်အလီၢ်တဖၣ်လၢ ဘ့ၤသဘါရၤ ဒီးလၢထံကျိယၢ်ဒ့ၣ်လီၤ. ၂၅ အဝဲသ့ၣ် ဖီၣ်န့ၢ်စ့ၢ်ကီး ပှၤမံးဒယၣ်ဖိ အခိၣ်အနၢ်ခံဂၤ လၢအမ့ၢ် စီၤဧိရ့ာ် ဒီးစီၤစအ့ာ်လီၤ. ဒီးအဝဲသ့ၣ် မၤသံဝဲ စီၤဧိရ့ာ်လၢ လၢၢ်ဧိရ့ာ်အဖီခိၣ်+ ဒီးမၤသံဝဲ စီၤစအ့ာ် ဖဲစအ့ာ် အစပံးထံကျိးလီၤ. အဝဲသ့ၣ် ဆဲးလူၤဝဲ ပှၤမံးဒယၣ်ဖိ+ ဒီးဟဲက့ၤစိာ်ဝဲ စီၤဧိရ့ာ် ဒီးစီၤစအ့ာ် အခိၣ်သၣ်ဃံ လၢစီၤကံးဒဧိၣ်အအိၣ် ဖဲတၢ်လီၢ်လၢ အဘူးဒီး ထံကျိယၢ်ဒ့ၣ်န့ၣ်လီၤ.