၂ ကရံၣ်သူး
၈ ဒီပုၢ်ဝဲၢ်သ့ၣ်ဧၢ, ပအဲၣ်ဒိးလၢ သုကသ့ၣ်ညါ ဘၣ်ဃးဒီး တၢ်သးကညီၤ ဒိၣ်ဒိၣ်မုၢ်မုၢ်လၢ ကစၢ်ယွၤ ပာ်ဖျါထီၣ်ဝဲလၢ ကီၢ်မၤက့းဒနံ အတၢ်အိၣ်ဖှိၣ်တဖၣ် အဖီခိၣ်လီၤ.+ ၂ အဝဲသ့ၣ်ထံၣ်ဘၣ် တၢ်မၤကွၢ်ဖးဒိၣ် ဒီးပှၤမၤနးမၤဖှီၣ် အဝဲသ့ၣ်လီၤ. ဖဲန့ၣ်အဆၢကတီၢ် အဝဲသ့ၣ် ဖှီၣ်ဝဲယာ်ဝဲဒိၣ်မး သနာ်က့ အဝဲသ့ၣ်မၤဘူၣ်လီၤတၢ်လၢ တၢ်သးခုဖးဒိၣ်အပူၤ အဃိ ပာ်ဖျါထီၣ်ဝဲလၢ အဝဲသ့ၣ်မ့ၢ် ပှၤလၢ အဟ့ၣ်တၢ်ညီမးလီၤ. ၃ အဝဲသ့ၣ် ဟ့ၣ်တၢ်ဒ် တၢ်လၢအအိၣ်ဒီး အဝဲသ့ၣ်အသိး+ တကးဒံးဘၣ် ယအုၣ်ယသးလၢ အဝဲသ့ၣ် ဟ့ၣ်တၢ်အါန့ၢ်ဒံး တၢ်လၢအအိၣ်ဒီး အဝဲသ့ၣ်လီၤ.+ ၄ ဒီးလၢတၢ်သးအိၣ်အပူၤ အဝဲသ့ၣ် ဃ့ကညး ပှၤဆူၣ်ဆူၣ် ဒ်သိးအဝဲသ့ၣ်စ့ၢ်ကီး ကန့ၢ်ဘၣ် တၢ်ခွဲးတၢ်ယာ်လၢ ကမၤဘူၣ်လီၤတၢ် ဒီးကဟ့ၣ်မၤစၢၤ ပှၤစီဆှံတဖၣ်လၢ တၢ်သူၣ်အိၣ်သးအိၣ်အပူၤလီၤ.+ ၅ အဝဲသ့ၣ် မၤဝဲအါန့ၢ်ဒံး တၢ်လၢပမုၢ်လၢ်လီၤ. ဒ်ကစၢ်ယွၤ အတၢ်ဘၣ်သးအသိး အဆိကတၢၢ်န့ၣ် အဝဲသ့ၣ် ဟ့ၣ်လီၤအသးလၢ ကစၢ်အဂီၢ် ဝံၤဒီး လၢပဂီၢ်လီၤ. ၆ စီၤတံတူး+ စးထီၣ်မၤတ့ၢ်ဝဲ တၢ်မၤတခါအံၤ လၢသုကျါလံအဃိ ပဟ့ၣ်ဂံၢ်ဟ့ၣ်ဂံၢ်ဘါအီၤ ဒ်သိး အကဆဲးမၤဝဲ တုၤအဝံၤ ဒီးထၢဖှိၣ်တၢ်မၤဘူၣ်လၢ သုဟ့ၣ်လီၤလၢ တၢ်သူၣ်အိၣ်သးအိၣ် အပူၤလီၤ. ၇ တၢ်ခဲလၢာ်အိၣ်ဒီးသု အါအါဂီၢ်ဂီၢ် ဒ်သိးဒီး တၢ်နာ်, တၢ်သ့တၢ်ဘၣ်လၢ ကတဲတၢ်, တၢ်သ့ၣ်ညါနၢ်ပၢၢ်, တၢ်သူၣ်ဆူၣ်သးဆူၣ် ဒီးသုအဲၣ်ပှၤဂၤ ဒ်ပအဲၣ်သုအသိးလီၤ. ဒ်န့ၣ်အသိး မ်သုဟ့ၣ်စ့ၢ်ကီးတၢ် အါအါဂီၢ်ဂီၢ်လၢ တၢ်သူၣ်အိၣ်သးအိၣ် အပူၤတက့ၢ်.+
၈ ယတဲဒ်အံၤန့ၣ် တမ့ၢ်လၢ ယဟ့ၣ်လီၤသု တၢ်ကလုၢ်ဘၣ်. မ့ၢ်ဒ်သိး ယကဒုးသ့ၣ်ညါသု ဘၣ်ဃးဒီးပှၤဂၤ အတၢ်သူၣ်အိၣ်သးအိၣ် ဒီးဒ်သိး ယကမၤကွၢ်လၢ မ့ၢ်သုအိၣ်ဒီးတၢ်အဲၣ်တၢ်ကွံ အနီၢ်ကီၢ်ဧါ. ၉ သုသ့ၣ်ညါ ဘၣ်ဃးဒီး ပကစၢ်ယ့ၣ်ၡူးခရံာ် အတၢ်သးကညီၤ ဒိၣ်ဒိၣ်မုၢ်မုၢ်အဂ့ၢ်လီၤ. အဝဲမ့ၢ်ပှၤလၢ အထူးအတီၤ ဘၣ်ဆၣ် အဝဲကဲထီၣ် ပှၤဖှီၣ်ပှၤယာ်လၢသုဂီၢ်+ ဒ်သိး သုကထူးထီၣ်တီၤထီၣ် ခီဖျိ အတၢ်ဖှီၣ်တၢ်ယာ် အဃိလီၤ.
၁၀ ဘၣ်ဃးဒီးတၢ်ဂ့ၢ်အံၤ ယကပာ်ဖျါထီၣ် ယတၢ်ထံၣ်လီၤ.+ လၢအပူၤကွံာ်တနံၣ်န့ၣ် သုစးထီၣ်ထၢတၢ်မၤဘူၣ် တကးဒံးဘၣ် သုပာ်ဖျါထီၣ် လၢသုသးအိၣ်မၤအီၤ အနီၢ်ကီၢ်လီၤ. သုမ့ၢ်မၤအီၤ တုၤအဝံၤန့ၣ် အဘျုးကအိၣ်လၢ သုဂီၢ်လီၤ. ၁၁ အဃိ မၤဝံၤက့ၤတၢ်လၢ သုစးထီၣ်မၤအီၤ န့ၣ်တက့ၢ်. ဒီးဖဲသုဟ့ၣ်တၢ် ဒ်တၢ်အိၣ်ဒီးသုအသိးအခါ အကပာ်ဖျါထီၣ်ဝဲလၢ သုသးအိၣ်ဟ့ၣ်တၢ်လီၤ. ၁၂ ပှၤမ့ၢ်ဟ့ၣ်တၢ်လၢ တၢ်သူၣ်အိၣ်သးအိၣ်န့ၣ် ကစၢ်ယွၤ ဘၣ်သူၣ်ဘၣ်သးဝဲ သပှၢ်တၢၢ်လီၤ. ကစၢ်ယွၤမုၢ်လၢ်ဝဲလၢ ပှၤကဟ့ၣ်တၢ် ဒ်တၢ်လၢအအိၣ်ဒီး အဝဲသ့ၣ်အသိးလီၤ.+ အတမုၢ်လၢ်ဝဲလၢ ပှၤကဟ့ၣ်တၢ် အါန့ၢ်ဒံး တၢ်လၢအအိၣ်ဒီး အဝဲသ့ၣ်ဘၣ်. ၁၃ ယတအဲၣ်ဒိးလၢ အကညီဝဲလၢ ပှၤဂၤအဂီၢ် ဒီးကီဝဲလၢသုဂီၢ်ဘၣ်. ၁၄ ဘၣ်ဆၣ် ဆၢကတီၢ်ခဲအံၤ သုတၢ်အိၣ်အါအဃိ အကမၤလၢပှဲၤန့ၢ် အဝဲသ့ၣ် အတၢ်လိၣ်ဘၣ်တဖၣ်လီၤ. ဒီးခီဖျိလၢ သုကမၤဒ်န့ၣ်အဃိ တၢ်လၢအအိၣ်ဒီး အဝဲသ့ၣ်အါအါန့ၣ် ကမၤလၢပှဲၤန့ၢ် သုတၢ်လိၣ်ဘၣ်တဖၣ်လီၤ. ဒီးပှၤခံခီယၢ်ခီအံၤ အတၢ်ဝံတၢ်ယိး ကဘၣ်ဂီၢ်လိာ်က့ၤအသးလီၤ. ၁၅ ဒ်တၢ်ကွဲးအသး အိၣ်ဝဲအသိး “ပှၤလၢ အတၢ်အိၣ်အါန့ၣ် အတၢ်တအိၣ် အါတလၢဘၣ်. ဒီးပှၤလၢ အတၢ်အိၣ်စှၤန့ၣ် အတၢ်တအိၣ် စှၤတလၢဘၣ်.”+
၁၆ ကစၢ်ယွၤ ဟ့ၣ်လီၤ စီၤတံတူးလၢ သးလၢ အဘၣ်ယိၣ်တၢ်လၢသုဂီၢ် ဒ်ပဘၣ်ယိၣ်တၢ်လၢ သုဂီၢ်အသိးအဃိ ပစံးဘျုးဘၣ် ကစၢ်ယွၤလီၤ.+ ၁၇ ခီဖျိလၢ အဝဲတူၢ်လိာ် ပတၢ်ဟ့ၣ်ဂံၢ်ဟ့ၣ်ဘါ ဒီးအသးဆူၣ်လၢ ကမၤထွဲဝဲဒ် ပမၢအီၤအသိးအဃိ အနီၢ်ကစၢ်သးအိၣ် လဲၤလၢသုအိၣ်လီၤ. ၁၈ ပဆှၢလီၤအီၤဃုာ်ဒီး ဒီပုၢ်ဝဲၢ်ခွါတဂၤလၢ အဘၣ်တၢ်ပတြၢၤအီၤလၢ တၢ်အိၣ်ဖှိၣ်ကိးဖုဒဲး ခီဖျိ အတၢ်မၤလၢ အဘၣ်ထွဲလိာ်သးဒီး တၢ်သးခုကစီၣ် အဃိလီၤ. ၁၉ တကးဒံးဘၣ် တၢ်အိၣ်ဖှိၣ်တဖၣ် ပာ်ထီၣ်အီၤ ဒ်သိး အကလဲၤဃုာ်တၢ်ဒီးပှၤ ဖဲပလဲၤဟ့ၣ်နီၤလီၤ တၢ်ဟ့ၣ်တခါအံၤ အဆၢကတီၢ်လီၤ. ပကဟ့ၣ်နီၤလီၤ တၢ်ဟ့ၣ်တခါအံၤ လၢကစၢ် အလၤကပီၤအဂီၢ် ဒီးဒ်သိး ကပာ်ဖျါထီၣ်လၢ ပသးအိၣ်မၤစၢၤတၢ်လီၤ. ၂၀ ဒီးပမၤဒ်န့ၣ်အဃိ ဘၣ်ဃးဒီး တိၢ်မၤဘူၣ်အါအါဂီၢ်ဂီၢ် လၢပကဘၣ် ဟ့ၣ်နီၤလီၤအီၤအံၤန့ၣ် ပှၤပာ်ဒ့ၣ်ပာ်ကမၣ်ပှၤ အလီၢ်တအိၣ်ဘၣ်.+ ၂၁ ပ ‘ဂုာ်ကျဲးစၢးမၤတၢ် တီတီလိၤလိၤလၢ တၢ်ခဲလၢာ်အပူၤ လၢယဟိဝၤယွၤ* အမဲာ်ညါ တကးဒံးဘၣ် လၢပှၤဟီၣ်ခိၣ်ဖိ အမဲာ်ညါစ့ၢ်ကီးလီၤ.’+
၂၂ ဒီးပကဆှၢလီၤ ပဒီပုၢ်ဝဲၢ်ခွါ အဂၤတဂၤဃုာ်ဒီး အဝဲသ့ၣ်လီၤ. ဒီပုၢ်ဝဲၢ်ခွါတဂၤအံၤ ပမၤကွၢ်အီၤအါဘျီ ဒီးပထံၣ်ဘၣ်လၢ အဝဲ ဂုာ်ကျဲးစၢးဆူၣ်ဆူၣ် လၢတၢ်အါမံၤအပူၤလီၤ. ဒီးခဲအံၤ မ့ၢ်လၢအဝဲနာ်သု သပှၢ်တၢၢ်အဃိ အဝဲကဂုာ်ကျဲးစၢး အါန့ၢ်အန့ၣ်လီၤ. ၂၃ ဘၣ်ဆၣ် တၢ်သံကွၢ်ဘၣ်ဃးဒီး စီၤတံတူး မ့ၢ်အိၣ်ထီၣ် တမံၤမံၤန့ၣ် တဲအဝဲသ့ၣ်လၢ အဝဲမ့ၢ်ယသကိး ဒီးပှၤလၢ အမၤသကိးတၢ်ဒီးယၤ လၢသုဘျုးအဂီၢ်တက့ၢ်. ဒီးတၢ်သံကွၢ် ဘၣ်ဃးဒီး ပဒီပုၢ်ဝဲၢ်ခွါတဖၣ်အံၤ မ့ၢ်အိၣ်ထီၣ်န့ၣ် တဲအဝဲသ့ၣ်လၢ ပဒီပုၢ်ဝဲၢ်ခွါတဖၣ်အံၤ မ့ၢ်တၢ်မၢဖိလၢ တၢ်အိၣ်ဖှိၣ်ဆှၢလီၤဝဲ ဒီးအဝဲသ့ၣ်ကဲထီၣ် တၢ်လၤကပီၤလၢ ခရံာ်အဂီၢ်လီၤ. ၂၄ အဃိ ပာ်ဖျါထီၣ် တၢ်အုၣ်အသးလၢ သုအဲၣ်အဝဲသ့ၣ်တက့ၢ်.+ ဒီးပာ်ဖျါထီၣ်န့ၢ် တၢ်အိၣ်ဖှိၣ်တဖၣ်လၢ ဘၣ်မနုၤအဃိ ပပာ်ကဖၢလၢပသးလၢ သုဃိလဲၣ်န့ၣ်တက့ၢ်.