စံၣ်ညီၣ်ကွီၢ်
၉ လၢခံ စီၤယရူဘဧၤလး* အဖိခွါ စီၤအဘံၤမ့လ့း+ လဲၤဝဲဆူ အမိၢ်အဒီပုၢ်ဝဲၢ်ခွါတဖၣ် လၢအအိၣ်လၢဝ့ၢ်ၡက့ၣ် အအိၣ်လီၤ. ဒီးစီၤအဘံၤမ့လ့း တဲဘၣ် အဝဲသ့ၣ် ဒီးအဖုအဒူၣ်ဖိထၢဖိ ခဲလၢာ်လၢ ၂ “ဝံသးစူၤ သံကွၢ် ဝ့ၢ်ၡက့ၣ် အပှၤခိၣ်ပှၤနၢ်လၢ ‘မ့ၢ်သုဘၣ်သးလၢ စီၤယရူဘဧၤလး အဖိခွါ အဂၤ ၇၀+ ကပၢသုဧါ မ့တမ့ၢ် ပှၤပိာ်ခွါထဲတဂၤ ကပၢသုဧါ. ဒီးသ့ၣ်နီၣ်ထီၣ်စ့ၢ်ကီးလၢ ယမ့ၢ် သုဘူးသုတံၢ်တက့ၢ်.’”
၃ အဃိ အမိၢ်အဒီပုၢ်ဝဲၢ်ခွါတဖၣ် တဲဘၣ်န့ၢ်အီၤ ဝ့ၢ်ၡက့ၣ် အပှၤခိၣ်ပှၤနၢ်ခဲလၢာ် ဒ်န့ၣ်လီၤ. ဒီးအဝဲသ့ၣ် တဲဝဲလၢ “အဝဲ ကဲပဘူးပတံၢ်မၢၤ” အဃိ အဝဲသ့ၣ် သးဆူၣ်ထီၣ်လၢ ကဆီၣ်ထွဲဝဲ စီၤအဘံၤမ့လ့းန့ၣ်လီၤ. ၄ ဒီးအဝဲသ့ၣ် ဟ့ၣ်အီၤ စ့ညၣ်အဘ့ၣ် ၇၀ လၢအအိၣ်လၢ ဘဧၤလးဘရံး အတၢ်လုၢ်ဟံၣ်အပူၤလီၤ.+ ဝံၤဒီး စီၤအဘံၤမ့လ့း ငါန့ၢ်ဝဲ ပှၤပိာ်ခွါလၢ အတၢ်မၤတအိၣ်ဘၣ် ဒီးအရၢၢ်အစၢၢ်တဖၣ် လၢစ့အံၤ ဒ်သိးအဝဲသ့ၣ် ကပိာ်အခံအဂီၢ်လီၤ. ၅ ဒီးအဝဲလဲၤဝဲလၢ အပၢ်အဟံၣ် လၢဝ့ၢ်ဧိးဖြၤ+ ဒီးမၤသံဝဲ အဒီပုၢ်ဝဲၢ်ခွါတဖၣ်+ လၢအမ့ၢ် စီၤယရူဘဧၤလး အဖိခွါ အဂၤ ၇၀ လၢလၢၢ်တဖျၢၣ် အလိၤလီၤ. ဘၣ်ဆၣ် စီၤယရူဘဧၤလး အဖိခွါ အဆံးကတၢၢ် တဂၤ လၢအမ့ၢ် စီၤယိၤသၣ်န့ၣ် မ့ၢ်လၢအအိၣ်ခူသူၣ်ဝဲအဃိ အဝဲပူၤဖျဲးဝဲ ထဲတဂၤလီၤ.
၆ ဝံၤဒီး ဝ့ၢ်ၡက့ၣ်အခိၣ်အနၢ်တဖၣ် ဒီးပှၤမံးလိၤဖိတဖၣ် ပာ်ဖှိၣ်ထီၣ်အသးလၢ သ့ၣ်ဖးဒိၣ်တထူၣ်အကပၤ ဘူးဒီး တၢ်အထူၣ်လၢ အအိၣ်လၢ ဝ့ၢ်ၡက့ၣ်အပူၤ ဒီးအဝဲသ့ၣ် ပာ်ထီၣ် စီၤအဘံၤမ့လ့း လၢစီၤပၤလီၤ.+
၇ ဖဲပှၤက့ၤတဲဘၣ် စီၤယိၤသၣ်အခါ အဝဲလဲၤတဘျီဃီလၢ ကစၢၢ်ကရံးစံၣ်+ ဒီးဆၢထၢၣ်ဝဲလၢ အဒီခိၣ်လီၤ. ဒီးအတဲထီၣ်ဝဲလၢ အကလုၢ်ဒိၣ်ဒိၣ်လၢ “ဝ့ၢ်ၡက့ၣ် အခိၣ်အနၢ်သ့ၣ်ဧၢ, ဒိကနၣ်ယၤ ဒီးကစၢ်ယွၤ ကဒိကနၣ်သုလီၤ.
၈ “ဘၣ်တဘျီ သ့ၣ်ထူၣ်တဖၣ် လဲၤတၢ်ဒ်သိး ကပာ်ထီၣ်* စီၤပၤတဂၤလၢ အဝဲသ့ၣ် အဖီခိၣ်လီၤ. အဃိ အဝဲသ့ၣ်တဲဘၣ် သ့ၣ်စၤယံးတထူၣ်လၢ ‘ပၢပှၤတက့ၢ်.’+ ၉ ဘၣ်ဆၣ် သ့ၣ်စၤယံးတထူၣ် တဲဘၣ် သ့ၣ်ထူၣ်တဖၣ်အံၤလၢ ‘မ့ၢ်ယကဘၣ် ပတုာ်ထုးထီၣ်ယသိ လၢအကဲထီၣ် တၢ်လၤကပီၤ လၢကစၢ်ယွၤဒီး ပှၤဟီၣ်ခိၣ်ဖိတဖၣ်အဂီၢ် ဒီးလဲၤပၢတၢ်* လၢသ့ၣ်ထူၣ်အဂၤတဖၣ် အဖီခိၣ်ဧါ.’ ၁၀ အဃိ သ့ၣ်ထူၣ်တဖၣ်အံၤ တဲဘၣ် ချၢၣ်ဒၢထူၣ်လၢ ‘ဟဲပၢပှၤတက့ၢ်.’ ၁၁ ဘၣ်ဆၣ် ချၢၣ်ဒၢထူၣ် တဲဘၣ် သ့ၣ်ထူၣ်တဖၣ်အံၤလၢ ‘မ့ၢ်ယကဘၣ် ပတုာ်ထုးထီၣ် ယသူယသၣ် လၢအဆၢတဖၣ် ဒီးလဲၤပၢတၢ် လၢသ့ၣ်ထူၣ်အဂၤတဖၣ် အဖီခိၣ်ဧါ.’ ၁၂ ဝံၤဒီးသ့ၣ်ထူၣ်တဖၣ်အံၤ တဲဘၣ် စပံးမုၢ်လၢ ‘ဟဲပၢပှၤတက့ၢ်.’ ၁၃ ဘၣ်ဆၣ် စပံးမုၢ် တဲဆၢက့ၤ သ့ၣ်ထူၣ်တဖၣ်အံၤလၢ ‘မ့ၢ်ယကဘၣ် ပတုာ်ထုးထီၣ် ယစပံးထံလၢ အမၤသးခု ကစၢ်ယွၤ ဒီးပှၤဟီၣ်ခိၣ်ဖိအသး ဒီးလဲၤပၢတၢ်လၢ သ့ၣ်ထူၣ်တဖၣ် အဖီခိၣ်ဧါ.’ ၁၄ လၢခံကတၢၢ်န့ၣ် သ့ၣ်ထူၣ်လၢအဂၤခဲလၢာ် တဲဘၣ် သ့ၣ်တၤဆှုၣ်လၢ ‘ဟဲပၢပှၤတက့ၢ်.’+ ၁၅ ဒီးသ့ၣ်တၤဆှုၣ် တဲဘၣ် သ့ၣ်ထူၣ်တဖၣ်အံၤလၢ ‘သုမ့ၢ်ကပာ်ထီၣ်ယၤလၢ သုစီၤပၤနီၢ်ကီၢ်ကီၢ်န့ၣ် ဟဲအိၣ်ကဒုလၢ ယကဒုဖီလာ်တက့ၢ်. သုမ့ၢ်တမၤ ဒ်န့ၣ်ဘၣ်န့ၣ် မ်မ့ၣ်အူဟဲထီၣ်လၢ ယပူၤ ဒီးအီၣ်ကွံာ် လဘၤနိၣ် အသ့ၣ်ဆှိအ့ရ့း တဖၣ်န့ၣ်တက့ၢ်.’
၁၆ “အဃိန့ၣ် မ့ၢ်သုပာ်ထီၣ် စီၤအဘံၤမ့လ့းလၢ စီၤပၤ+ လၢတၢ်သူၣ်ဘျၢသးဘျၢ ဒီးတၢ်သူၣ်တီသးလိၤအပူၤဧါ. မ့ၢ်သုပာ်ဖျါထီၣ် တၢ်သူၣ်ဂ့ၤသးဝါလၢ စီၤယရူဘဧၤလး ဒီးအဟံၣ်ဖိဃီဖိ အဖီခိၣ်ဧါ. ဒီးမ့ၢ်သုရ့အီၤ ဒ်သုကြၢးရ့အီၤအသိးဧါ. ၁၇ ဒ်သိး ယပၢ်ကမၤထူၣ်ဖျဲးထီၣ် သုလၢ ပှၤမံးဒယၣ်ဖိအစုပူၤအဂီၢ်+ အဝဲတူၢ်သံအသးဘူၣ်ဝဲအဃိ အဒုးတၢ် လၢသုဂီၢ်လီၤ.+ ၁၈ တနံၤအံၤန့ၣ် သုထီဒါ ယပၢ်အဟံၣ်ဖိဃီဖိ ဒီးမၤသံကွံာ် အဖိခွါအဂၤ ၇၀ လၢလၢၢ်တဖျၢၣ် အလိၤလီၤ.+ ဝံၤဒီး အကုၢ်ပိာ်မုၣ် အဖိခွါလၢအမ့ၢ် စီၤအဘံၤမ့လ့းန့ၣ်+ မ့ၢ်လၢအကဲဝဲ သုဘူးသုတံၢ် အဃိ သုပာ်ထီၣ်အီၤ လၢစီၤပၤ လၢဝ့ၢ်ၡက့ၣ် အခိၣ်အနၢ်တဖၣ် အဖီခိၣ်လီၤ. ၁၉ အဃိ တနံၤအံၤ သုမ့ၢ်မၤဘၣ်ဒ်အံၤ ခီဖျိလၢ သုပာ်ဖျါထီၣ် တၢ်သူၣ်ဘျၢသးဘျၢ ဒီးတၢ်သူၣ်တီသးလိၤလၢ စီၤယရူဘဧၤလး ဒီးအဟံၣ်ဖိဃီဖိအဖီခိၣ်န့ၣ် သုကဘၣ် သးခုလၢ စီၤအဘံၤမ့လ့းအဃိ ဒီးအဝဲစ့ၢ်ကီး ကသးခု လၢသုဃိလီၤ. ၂၀ ဘၣ်ဆၣ် သုမ့ၢ်တမၤအီၤ ဒ်န့ၣ်ဘၣ်န့ၣ် မ်မ့ၣ်အူဟဲထီၣ်လၢ စီၤအဘံၤမ့လ့းအပူၤ ဒီးအီၣ်ကွံာ် ဝ့ၢ်ၡက့ၣ်အခိၣ်အနၢ်တဖၣ် ဒီးပှၤမံးလိၤဖိတဖၣ်+ ဒီးမ်မ့ၣ်အူ ဟဲထီၣ်လၢ ဝ့ၢ်ၡက့ၣ် အခိၣ်အနၢ်တဖၣ် ဒီးပှၤမံးလိၤဖိတဖၣ် အပူၤ ဒီးအီၣ်ကွံာ် စီၤအဘံၤမ့လ့းတက့ၢ်.”+
၂၁ ဒီးမ့ၢ်လၢ စီၤယိၤသၣ်ပျံၤဝဲ+ အဒီပုၢ်ဝဲၢ်ခွါ စီၤအဘံၤမ့လ့းအဃိ အဝဲဃ့ၢ်ပူၤဖျဲးအသး လၢဘ့ၢ် ဒီးအိၣ်ဝဲဖဲန့ၣ်လီၤ.
၂၂ ဒီးစီၤအဘံၤမ့လ့း ပၢဝဲ ပှၤအံၣ်စရ့လးဖိ သၢနံၣ်လီၤ. ၂၃ ဒီးကစၢ်ယွၤ ပျဲဝဲလၢ တၢ်သးဟ့ ကဟဲအိၣ်ထီၣ်လၢ စီၤအဘံၤမ့လ့း ဒီးဝ့ၢ်ၡက့ၣ် အခိၣ်အနၢ်တဖၣ် အဘၢၣ်စၢၤလီၤ. ဒီးပှၤခိၣ်ပှၤနၢ်တဖၣ်အံၤ ထီဒါက့ၤ စီၤအဘံၤမ့လ့း ၂၄ ဒ်သိး တၢ်ကဟ့ၣ်ကၣ်က့ၤတၢ်လၢ စီၤယရူဘဧၤလး အဖိခွါအဂၤ ၇၀ လၢအဘၣ် တၢ်မၤသံအီၤအဂီၢ်, ဒ်သိး တၢ်ကမၤဆၢက့ၤ စီၤအဘံၤမ့လ့း ဒီးဝ့ၢ်ၡက့ၣ် အခိၣ်အနၢ်တဖၣ် လၢအလူလီၤဂၢ်လီၤ စီၤအဘံၤမ့လ့း အဒီပုၢ်ဝဲၢ်ခွါတဖၣ် အသွံၣ်အဂီၢ်လီၤ.+ စီၤအဘံၤမ့လ့း မ့ၢ်ပှၤလၢ အမၤသံအဝဲသ့ၣ် ဒီးဝ့ၢ်ၡက့ၣ် အခိၣ်အနၢ်တဖၣ် မၤစၢၤအီၤလီၤ. ၂၅ အဃိ ဝ့ၢ်ၡက့ၣ် အခိၣ်အနၢ်တဖၣ် မၢပှၤအိၣ်ခိးခူသူၣ် စီၤအဘံၤမ့လ့း လၢကစၢၢ်ခိၣ် ဒီးပှၤကိးဂၤဒဲးလၢ အလဲၤဘၣ်ကျဲလၢအဝဲသ့ၣ် အအိၣ်န့ၣ် အဝဲသ့ၣ်တမျာ်ဝဲလီၤ. လၢခံ ပှၤတဲဘၣ် စီၤအဘံၤမ့လ့း လၢတၢ်ဂ့ၢ်တခါအံၤလီၤ.
၂၆ ဒီးစီၤကၤလး ဒီးအဒီပုၢ်ဝဲၢ်ခွါတဖၣ် ဟဲအိၣ်ဝဲလၢ ဝ့ၢ်ၡက့ၣ်လီၤ.+ စီၤကၤလး အပၢ်မ့ၢ်ဝဲ စီၤဧ့ဘ့းလီၤ. ဒီးဝ့ၢ်ၡက့ၣ် အခိၣ်အနၢ်တဖၣ် မုၢ်လၢ်ဝဲလၢ စီၤကၤလး ကမၤစၢၤ အဝဲသ့ၣ်န့ၣ်လီၤ. ၂၇ ဒီးအဝဲသ့ၣ် ဟးထီၣ်လၢဝ့ၢ်ချၢ ဒီးထၢဖှိၣ်ဝဲ စပံးသၣ်လၢ အစပံးကျီး ဒီးယီၢ်ဝဲ ဒ်သိးကတ့ဝဲစပံးထံအဂီၢ် ဒီးမၤဝဲမူးပွဲလီၤ. ဝံၤဒီး အဝဲသ့ၣ် လဲၤနုာ်ဝဲလၢ အယွၤအဟံၣ်+ ဒီးအီၣ်တၢ်အီတၢ် ဒီးဆိၣ်အၢဝဲ စီၤအဘံၤမ့လ့းလီၤ. ၂၈ ဒီးစီၤဧ့ဘ့းအဖိခွါ စီၤကၤလး တဲဝဲလၢ “စီၤယရူဘဧၤလးအဖိခွါ+ စီၤအဘံၤမ့လ့းန့ၣ် ကဲမတဂၤလဲၣ် ဒီးအပဒိၣ် စီၤစဘူလး လၢဝ့ၢ်ၡက့ၣ်န့ၣ် ကဲမတဂၤလဲၣ်. ဘၣ်မနုၤအဃိ ပဘၣ်ဒိးပၢပသးလၢ အဝဲသ့ၣ်အဖီလာ်လဲၣ်. ပကဘၣ် ဒိးပၢပသးလၢ စီၤၡက့ၣ်အပၢ် စီၤဃမိၢ်အဖိအလံၤတဖၣ် အဖီလာ်သၢၤ. ပဘၣ်ဒိးပၢပသးလၢ စီၤအဘံၤမ့လ့းအဖီလာ် ဘၣ်လီၣ်. ၂၉ ဒီးပှၤလၢအအိၣ်လၢ ဝ့ၢ်ၡက့ၣ်အပူၤ မ့ၢ်ပိာ်ယခံန့ၣ် ယကသုးကွံာ် စီၤအဘံၤမ့လ့း လၢအတၢ်ပၢအလီၢ်လီၤ.” ဒီးစီၤကၤလးတဲ စီၤအဘံၤမ့လ့းလၢ “မၤအါထီၣ် နသုးမုၢ်သံၣ်ဘိ ဒီးဟဲဒုးယၤတက့ၢ်.”
၃၀ ဖဲဝ့ၢ်ၡက့ၣ်အပဒိၣ် စီၤစဘူလး နၢ်ဟူဝဲ စီၤဧ့ဘ့းအဖိခွါ စီၤကၤလး အတၢ်ကတိၤအခါ အဝဲသးပှံၢ်ထီၣ်တၢ်လီၤ. ၃၁ အဃိ အဝဲဆှၢလီၤခူသူၣ်ဝဲ ပှၤစိာ်တၢ်ကစီၣ်ဖိတဖၣ်လၢ စီၤအဘံၤမ့လ့းအအိၣ် ဒ်သိးကတဲဝဲလၢ “ခဲအံၤ စီၤဧ့ဘ့းအဖိခွါ စီၤကၤလး ဒီးအဒီပုၢ်ဝဲၢ်တဖၣ် အိၣ်လၢဝ့ၢ်ၡက့ၣ်လီၤ. ဒီးအဝဲသ့ၣ် ဆီၣ်ထွဲထီၣ်ဝဲ ပှၤဝ့ၢ်ဖိတဖၣ်အခံလၢ ကထီဒါနၤလီၤ. ၃၂ အဃိ ဟဲထီၣ်ဒီး နပှၤသုးဖိတဖၣ် လၢမုၢ်နၤခီ ဒီးအိၣ်ခိးခူသူၣ်တၢ်လၢ ဝ့ၢ်အချၢ တက့ၢ်. ၃၃ ဒီးနဘၣ်ဂဲၤဆၢထၢၣ်ဂီၤဂီၤ ဒီးဖဲမုၢ်ဟဲထီၣ်အခါန့ၣ် နဘၣ်လဲၤဒုးဝ့ၢ် တဘျီဃီလီၤ. ဒီးဖဲစီၤကၤလး ဒီးအပှၤသုးဖိတဖၣ် ဟဲဒုးနၤအခါ ဒ်သိးနမၤအီၤ ကနၢၤအဂီၢ် ကွၢ်လၢနမၤသ့န့ၣ် မၤဟီ.”
၃၄ အဃိ စီၤအဘံၤမ့လ့း ဒီးအပှၤသုးဖိခဲလၢာ် ဟးထီၣ်လၢ မုၢ်နၤခီလီၤ. ဒီးအဝဲသ့ၣ် နီၤဖးလီၤအသးလွံၢ်ဖု ဒီးအိၣ်ခိးခူသူၣ်တၢ် လၢဝ့ၢ်ၡက့ၣ် အချၢလီၤ. ၃၅ ဒီးဖဲ* စီၤဧ့ဘ့းအဖိခွါ စီၤကၤလး လဲၤဆၢထၢၣ်လၢ ဝ့ၢ်အတြဲၤခိၣ်ထိးအခါ စီၤအဘံၤမ့လ့း ဒီးအပှၤသုးဖိတဖၣ် ဟးထီၣ်လၢ အအိၣ်ခိးခူသူၣ်တၢ် အလီၢ်လီၤ. ၃၆ ဖဲစီၤကၤလး ထံၣ်ဝဲ ပှၤသုးဖိတဖၣ်အခါ အတဲဘၣ် စီၤစဘူလးလၢ “ကွၢ်လၢန့ၣ်, ပှၤဟဲလီၤလၢ ကစၢၢ်ဒီခိၣ်အလိၤမၢၤ.” ဘၣ်ဆၣ် စီၤစဘူလး တဲအီၤလၢ “တၢ်လၢနထံၣ်န့ၣ် ကဲဝဲကစၢၢ်အကဒု လၢအလီၤဂာ် ဒ်သိးပှၤကညီလီၤ.”
၃၇ လၢခံ စီၤကၤလး တဲဝဲလၢ “ကွၢ်တထံၣ်, ပှၤဟဲလီၤတုၤလၢ တၢ်ခၢၣ်သးလံ. ဒီးပှၤလၢအဂၤတဖုန့ၣ် ဟဲထီၣ်ကျဲလၢ သ့ၣ်ဖးဒိၣ် မဧိနနံတခီ.” ၃၈ စီၤစဘူလး တဲက့ၤအီၤလၢ “နကပာ်ကဖၢလၢနသးဒံးဧါ, မ့ၢ်နကတဲဒံးလၢ ‘စီၤအဘံၤမ့လ့းန့ၣ် ကဲမတဂၤလဲၣ်, ဘၣ်မနုၤအဃိ ပဘၣ်ဒိးပၢပသးလၢ အဝဲသ့ၣ် အဖီလာ်လဲၣ်’ န့ၣ်ဧါ.+ ပှၤတဖၣ်အံၤ မ့ၢ်ပှၤလၢ နဆိကမိၣ်ဆံးအီၤ တမ့ၢ်ဧီၤ. လဲၤထီၣ်ခဲအံၤမီၤ. လဲၤဒုးအဝဲသ့ၣ်သၢၤ.”
၃၉ အဃိ စီၤကၤလး လဲၤထီၣ်ဒီး တီခိၣ်ရိၤမဲဝဲ ဝ့ၢ်ၡက့ၣ် အခိၣ်အနၢ်တဖၣ် ဒ်သိးကလဲၤဒုး စီၤအဘံၤမ့လ့းအဂီၢ်လီၤ. ၄၀ ဒီးစီၤကၤလး ဃ့ၢ်ကွံာ်ဝဲ အဃိ စီၤအဘံၤမ့လ့း လူၤအီၤလီၤ. ဒီးလၢကျဲ ပၢၢ်တုၤလၢ ဝ့ၢ်အတြဲၤခိၣ်ထိးန့ၣ် ပှၤသံဝဲအါမးလီၤ.
၄၁ ဒီးစီၤအဘံၤမ့လ့း က့ၤအိၣ်ဝဲလၢ အရူမၤန့ၣ်လီၤ. ဒီးစီၤစဘူလး+ နီဟးထီၣ်ကွံာ် စီၤကၤလး ဒီးစီၤကၤလး အဒီပုၢ်ဝဲၢ်တဖၣ် လၢဝ့ၢ်ၡက့ၣ်အပူၤလီၤ. ၄၂ လၢခံတနံၤန့ၣ် ပှၤလၢအအိၣ်လၢ ဝ့ၢ်ပူၤတဖၣ် ဟးထီၣ်လၢဝ့ၢ်ချၢလီၤ. အဃိ ပှၤတဲဘၣ် စီၤအဘံၤမ့လ့းလီၤ. ၄၃ ဒီးစီၤအဘံၤမ့လ့း ကိးန့ၢ်ဝဲ အပှၤသုးဖိ, နီၤဖးလီၤအဝဲသ့ၣ် သၢဖု ဒီးအဝဲသ့ၣ် အိၣ်ခိးခူသူၣ်တၢ် လၢပျီပူၤလီၤ. ဖဲစီၤအဘံၤမ့လ့း ထံၣ်ဝဲ ပှၤဝ့ၢ်ဖိ ဟးထီၣ်လၢ ဝ့ၢ်ချၢအခါ အဝဲဒုးအဝဲသ့ၣ် ဒီးကျီသံကွံာ် အဝဲသ့ၣ်လီၤ. ၄၄ စီၤအဘံၤမ့လ့း ဒီးအပှၤသုးဖိအဖုလၢ အအိၣ်ဒီးအီၤတဖၣ်န့ၣ် လဲၤထီၣ်ချ့ချ့ ဒီးဆီလီၤ အသးလၢ ဝ့ၢ်အတြဲၤခိၣ်ထိးလီၤ. ဖဲန့ၣ်အခါ ပှၤခံဖု ဒုးပှၤလၢအအိၣ်ဝဲလၢ ပျီပူၤကိးဂၤဒဲး ဒီးကျီသံကွံာ် အဝဲသ့ၣ်လီၤ. ၄၅ စီၤအဘံၤမ့လ့း ဒုးဝဲဝ့ၢ် ဒီတနံၤကျၢၤ ဒီးမၤန့ၢ်ဝဲဝ့ၢ်လီၤ. အဝဲမၤသံကွံာ်ဝဲ ပှၤအိၣ်လၢဝ့ၢ်ပူၤ ဒီးအဝဲ မၤလီၤပှီၢ်ကွံာ်ဝ့ၢ်+ ဒီးဖှံဝဲဝ့ၢ် ဒီးအံသၣ်လီၤ.
၄၆ ဖဲဝ့ၢ်ၡက့ၣ်အတၢးထီ အခိၣ်အနၢ်တဖၣ် နၢ်ဟူတၢ်ဂ့ၢ်အံၤအခါ တဘျီဃီန့ၣ် အဝဲသ့ၣ် လဲၤဝဲလၢ ဘရံး* အတၢ်လုၢ်ဟံၣ် အတၢ်အိၣ်ခူသူၣ် အလီၢ်န့ၣ်လီၤ.+ ၄၇ ဒီးဖဲပှၤတဲဘၣ် စီၤအဘံၤမ့လ့းလၢ ဝ့ၢ်ၡက့ၣ်အတၢးထီ အခိၣ်အနၢ်ခဲလၢာ် ပာ်ဖှိၣ်ထီၣ်အသး တပူၤဃီအခါ ၄၈ စီၤအဘံၤမ့လ့း ဒီးပှၤလၢအအိၣ်ဒီးအီၤခဲလၢာ် လဲၤထီၣ်လၢ ကစၢၢ်စးလမိၣ်လီၤ. စီၤအဘံၤမ့လ့း လဲၤစိာ်ဒီး ကွါတဘ့ၣ် ဒီးကျီန့ၢ်ဝဲ သ့ၣ်အဒ့ ဒီးယိးထီၣ်ဝဲလၢ အဖံဘၣ်ခိၣ်လီၤ. ဒီးအဝဲတဲဘၣ် ပှၤလၢအအိၣ်ဒီးအီၤတဖၣ်လၢ “တၢ်လၢသုထံၣ်ယမၤန့ၣ် မၤဒ်န့ၣ်မ့ၢ်ချ့သၢၤ.” ၄၉ အဃိ ပှၤကိးဂၤဒဲး ကျီန့ၢ်သ့ၣ်ဒ့တဖၣ် ဒီးလဲၤပိာ် စီၤအဘံၤမ့လ့းအခံလီၤ. ဒီးအဝဲသ့ၣ် ပာ်လီၤသ့ၣ်ဒ့တဖၣ် လၢတၢ်အိၣ်ခူသူၣ် အလီၢ်အဖီခိၣ် ဒီးဒွဲၣ်အူထီၣ်အီၤလီၤ. အဃိ ပှၤလၢအဘၣ်ဃးဒီး ဝ့ၢ်ၡက့ၣ်အတၢးထီန့ၣ် သံဝဲကိးဂၤဒဲး, ပိာ်မုၣ်ဒီးပိာ်ခွါ ခဲလၢာ်ခဲဆ့ အဂၤ ၁,၀၀၀ လီၤ.
၅၀ ဝံၤဒီး စီၤအဘံၤမ့လ့း လဲၤဝဲလၢ ဝ့ၢ်တ့ဘ့းလီၤ. ဒီးအဝဲ ဆီလီၤအသး ဝးတရံးဝဲ ဝ့ၢ်တ့ဘ့း ဒီးမၤန့ၢ်ဝဲဝ့ၢ်လီၤ. ၅၁ ဒီးလၢဝ့ၢ်အခၢၣ်သးန့ၣ် တၢးလၢအကျၢၤ အိၣ်ဝဲတဖျၢၣ်လီၤ. ဒီးပှၤပိာ်မုၣ်, ပှၤပိာ်ခွါ ဒီးဝ့ၢ်အခိၣ်အနၢ်တဖၣ် လဲၤဃ့ၢ်နုာ်ဝဲ လၢအပူၤလီၤ. အဝဲသ့ၣ် ပံးဃာ်တြဲၤ ဒီးလဲၤထီၣ်လၢ တၢးအခိၣ်ဒုးလီၤ. ၅၂ ဒီးစီၤအဘံၤမ့လ့း လဲၤဝဲလၢတၢး ဒ်သိး အကမၤဟးဂီၤအီၤအဂီၢ်လီၤ. ဒီးဒ်သိး ကဒွဲၣ်အူထီၣ်ကွံာ် တၢးအဂီၢ် အဝဲလဲၤဝဲ တုၤလၢ တၢးအတြဲၤခိၣ်ထိးလီၤ. ၅၃ ဘၣ်ဆၣ် ပိာ်မုၣ်တဂၤ တၢၤလီၤဝဲ ဆၢၣ်ဂူာ်လၢၢ် လၢစီၤအဘံၤမ့လ့း အခိၣ်ဒီး အခိၣ်သၣ်ဃံ သဘှံးဝဲလီၤ.+ ၅၄ အဃိ စီၤအဘံၤမ့လ့း ကိးန့ၢ်ဝဲ အခ့အပှၤတဂၤ လၢအစိာ် အတၢ်စုကဝဲၤ ဒီးတဲဘၣ်အီၤလၢ “ဒ်သိး ပှၤသုတတဲလၢ ပိာ်မုၣ်တဂၤ မၤသံယၤတဂ့ၤအဂီၢ် ထုးထီၣ်နနး ဒီးမၤသံကွံာ်ယၤသၢၤ.” အဃိ အခ့အပှၤ တဂၤန့ၣ် ဆဲးအီၤလၢနး ဒီးအသံကွံာ်ဝဲလီၤ.
၅၅ ဖဲပှၤအံၣ်စရ့လးဖိတဖၣ် ထံၣ်လၢ စီၤအဘံၤမ့လ့း သံဝဲအခါ အဝဲသ့ၣ် က့ၤကဒါက့ၤ လၢအဟံၣ် ကိးဂၤဒဲးလီၤ. ၅၆ မ့ၢ်လၢ စီၤအဘံၤမ့လ့း မၤတၢ်အၢလၢ အပၢ်အဖီခိၣ် ခီဖျိအမၤသံဝဲ အဒီပုၢ်ဝဲၢ်ခွါ အဂၤ ၇၀ အဃိ ကစၢ်ယွၤ ဟ့ၣ်ကၣ်က့ၤအီၤလီၤ.+ ၅၇ ဒီးတၢ်အၢတၢ်သီ လၢပှၤပိာ်ခွါ လၢအအိၣ်လၢ ဝ့ၢ်ၡက့ၣ် မၤဝဲခဲလၢာ်န့ၣ် ကစၢ်ယွၤ ဟ့ၣ်ကၣ်က့ၤအဝဲသ့ၣ်လီၤ. အဃိ စီၤယရူဘဧၤလးအဖိခွါ+ စီၤယိၤသၣ်+ အတၢ်ဆိၣ်အၢန့ၣ် ဟဲဘၣ် အဝဲသ့ၣ်လီၤ.