စံၣ်ညီၣ်ကွီၢ်
၂ ဒီးယဟိဝၤယွၤ အမူခိၣ်ကလူး+ လဲၤတၢ်လၢ ဝ့ၢ်ကံးလကၤလး+ ဆူဘိးကံၣ် ဒီးတဲဝဲလၢ “ယဒုးဟးထီၣ်ကွံာ်သုလၢ ကီၢ်အဲၤကူပတူးအပူၤ ဒီးယဆှၢသုလၢ ကီၢ်တဘ့ၣ်လၢ ယအၢၣ်လီၤ သုမိၢ်ပၢ်ဖံဖု လၢပျၢၤတဖၣ်လီၤ.+ တကးဒံးဘၣ် ယတဲလၢ ‘ယတၢ်အၢၣ်လီၤအီလီၤဒီးသုန့ၣ် ယတမၤဟးဂီၤအီၤ နီတဘျီဘၣ်.+ ၂ မ့မ့ၢ်သုန့ၣ် သုတဘၣ် မၤတၢ်အၢၣ်လီၤအီလီၤ ဒီးပှၤလၢအအိၣ်လၢ ကီၢ်အံၤအပူၤဘၣ်.+ ဒီးသုကဘၣ် မၤလီၤပှီၢ်ကွံာ် အဝဲသ့ၣ် အတၢ်လုၢ်လီၢ်တဖၣ်လီၤ.’+ ဘၣ်ဆၣ် သုတဒိကနၣ် ယကလုၢ်ဘၣ်.+ ဘၣ်မနုၤအဃိ သုဘၣ်မၤဒ်န့ၣ်လဲၣ်. ၃ အဃိ ယတဲစ့ၢ်ကီးလၢ ‘ယတနီဟးထီၣ်ကွံာ် ပှၤအိၣ်လၢ ကီၢ်ပူၤတဖၣ် လၢသုမဲာ်ညါဘၣ်.+ ဒီးအဝဲသ့ၣ် ကကဲထီၣ် ပျံၤသကွီၤလၢသုဂီၢ်+ ဒီးအဝဲသ့ၣ် အယွၤတဖၣ် ကထုးယံၤထီၣ်သု ဒီးယၤလီၤ.’”+
၄ ယဟိဝၤယွၤ အမူခိၣ်ကလူး တဲဘၣ် ပှၤအံၣ်စရ့လးဖိခဲလၢာ် လၢတၢ်ကတိၤ သ့ၣ်တဖၣ်အံၤ ဝံၤဒီး ပှၤဂီၢ်မုၢ် ဟီၣ်ကိးပသူထီၣ်ဝဲ ဖးဒိၣ်လီၤ. ၅ အဃိ အဝဲသ့ၣ် ကိးန့ၢ်ဝဲ တၢ်လီၢ်အဝဲန့ၣ်အမံၤလၢ ဘိးကံၣ်* ဒီးအဝဲသ့ၣ် လုၢ်ထီၣ်တၢ် လၢယဟိဝၤယွၤအအိၣ် ဖဲန့ၣ်လီၤ.
၆ ဒီးဖဲစီၤယိၤၡူ ပျဲက့ၤ ပှၤဂီၢ်မုၢ်အခါ ပှၤအံၣ်စရ့လးဖိ တဂၤစုာ်စုာ် လဲၤဝဲလၢ အတၢ်န့ၢ်သါအအိၣ် ဒ်သိးအကမၤန့ၢ် အတၢ်လီၢ်တၢ်ကျဲအဂီၢ်လီၤ.+ ၇ စီၤယိၤၡူ ဒီးပှၤသူၣ်က့သးပှၢ်တဖၣ် လၢအဆဲးအိၣ်မူဒံး လၢစီၤယိၤၡူအလီၢ်ခံ လၢအထံၣ်ဘၣ် တၢ်လၢအဒိၣ်အမုၢ်ခဲလၢာ်လၢ ယဟိဝၤယွၤ မၤဝဲ လၢပှၤအံၣ်စရ့လးဖိ အဂီၢ်န့ၣ် ဖဲအဝဲသ့ၣ် အိၣ်မူဒံး အဆၢကတီၢ် ပှၤအံၣ်စရ့လးဖိ ဆဲးဘူၣ်ထီၣ်ဘါထီၣ် ယဟိဝၤယွၤလီၤ.+ ၈ ဒီးစီၤနိၣ်အဖိခွါ လၢအမ့ၢ် ယဟိဝၤယွၤ အခ့အပှၤ စီၤယိၤၡူန့ၣ် သံဝဲဖဲ အသးနံၣ်အိၣ် ၁၁၀ န့ၣ်လီၤ.+ ၉ အဃိ ပှၤခူၣ်လီၤကွံာ်အီၤလၢ အတၢ်န့ၢ်သါ အဟီၣ်ကဝီၤ ဖဲဝ့ၢ်တံးမနးစ့ရၤ+ လၢအအိၣ်လၢ အ့ဖရဲၣ် အကစၢၢ်ကလိကျါ လၢကစၢၢ်ကၤဧၣ် အကလံၤစိးတခီန့ၣ်လီၤ.+ ၁၀ လၢခံ ပှၤတစိၤအံၤ ကိးဂၤဒဲးန့ၣ် ဘၣ်တၢ်ပာ်ဖှိၣ်အီၤ ဃုာ်ဒီး အမိၢ်ပၢ်ဖံဖု လၢပျၢၤတဖၣ်လီၤ.* ဒီးပှၤလၢခံတစိၤန့ၣ် တသ့ၣ်ညါ ယဟိဝၤယွၤဘၣ်. ဒီးတသ့ၣ်ညါစ့ၢ်ကီး တၢ်လၢ ကစၢ်ယွၤ မၤတ့ၢ်ဝဲလၢ ပှၤအံၣ်စရ့လးဖိ အဂီၢ်ဘၣ်.
၁၁ အဃိ တၢ်လၢ ယဟိဝၤယွၤ ထံၣ်ဝဲလၢအအၢန့ၣ် ပှၤအံၣ်စရ့လးဖိ မၤဝဲ ဒီးအဝဲသ့ၣ် ဘူၣ်ထီၣ်ဘါထီၣ်ဝဲ ဘဧၤလး အတၢ်ဂီၤတၢ်ဖှီၣ်တဖၣ်လီၤ.+ ၁၂ ဒီးအဝဲသ့ၣ် ပာ်တ့ၢ်ကွံာ် အမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤ လၢအဒုးဟးထီၣ်ကွံာ် အဝဲသ့ၣ် လၢကီၢ်အဲၤကူပတူး အပူၤလီၤ.+ ဒီးပှၤလၢအအိၣ်ဝးတရံး အဝဲသ့ၣ်န့ၣ် အိၣ်ဒီးယွၤအဂၤတဖၣ် ဒီးအဝဲသ့ၣ် ပိာ်ဝဲ ယွၤအဂၤတဖၣ်အံၤအခံ,+ ဘူၣ်ထီၣ်ဘါထီၣ်ဝဲ ယွၤတဖၣ်အံၤ ဒီးအဝဲသ့ၣ် မၤဆါ ယဟိဝၤယွၤအသးလီၤ.+ ၁၃ အဝဲသ့ၣ် ပာ်တ့ၢ်ကွံာ် ယဟိဝၤယွၤ ဒီးဘူၣ်ထီၣ်ဘါထီၣ်ဝဲ ဘဧၤလး ဒီးဧၤၡတြိး တၢ်ဂီၤတၢ်ဖှီၣ်တဖၣ်လီၤ.+ ၁၄ ဖဲန့ၣ်န့ၣ် မ့ၢ်လၢ ယဟိဝၤယွၤ သးပှံၢ်ထီၣ် ပှၤအံၣ်စရ့လးဖိအဃိ အဝဲဟ့ၣ်လီၤကွံာ် အဝဲသ့ၣ်လၢ ပှၤတမျာ်တၢ်အစုပူၤ ဒီးပှၤတဖၣ်အံၤ တမျာ်ပှၤအံၣ်စရ့လးဖိလီၤ.+ ဒီးကစၢ်ယွၤ ဟ့ၣ်လီၤကွံာ်* အဝဲသ့ၣ်လၢ အဒုၣ်အဒါတဖၣ် အစုပူၤ+ ဒီးအဝဲသ့ၣ်တြီဆၢ အဒုၣ်အဒါတဖၣ် တန့ၢ်လၢၤဘၣ်.+ ၁၅ ဒ်ယဟိဝၤယွၤ တဲပာ်စၢၤ ဒီးယဟိဝၤယွၤ အၢၣ်လီၤပာ်စၢၤ အဝဲသ့ၣ်အသိး+ ဖဲအဝဲသ့ၣ် လဲၤတပူၤဂ့ၤ တပူၤဂ့ၤန့ၣ် ယဟိဝၤယွၤ အစုထီဒါ အဝဲသ့ၣ် ဒီးဒုးထံၣ်အဝဲသ့ၣ်လၢ တၢ်ကီတၢ်ခဲလီၤ.+ အဃိ အဝဲသ့ၣ် ဘၣ်ကိၢ်ဘၣ်ဂီၤ ဖးဒိၣ်လီၤ.+ ၁၆ အဃိ ယဟိဝၤယွၤ ဃုထၢထီၣ်န့ၢ် အဝဲသ့ၣ်လၢ စံၣ်ညီၣ်ကွီၢ်တဖၣ် ဒ်သိးကမၤပူၤဖျဲး အဝဲသ့ၣ် လၢပှၤတမျာ်တၢ် အစုပူၤအဂီၢ်လီၤ.+
၁၇ ဘၣ်ဆၣ် ပှၤစံၣ်ညီၣ်ကွီၢ်တဖၣ် အကလုၢ်ဒၣ်လဲာ် အဝဲသ့ၣ် တဒိကနၣ်ဝဲဘၣ်. ဒီးဒ်ပိာ်မုၣ်ဆါလီၤအီၣ်သးအသိး အဝဲသ့ၣ် ဟ့ၣ်လီၤအသးလၢ ယွၤလၢအကမၣ်တဖၣ် အအိၣ် ဒီးဘူၣ်ထီၣ်ဘါထီၣ် ယွၤတဖၣ်အံၤလီၤ. အဝဲသ့ၣ် အမိၢ်ပၢ်ဖံဖု လၢပျၢၤတဖၣ် ဒိကနၣ် ယဟိဝၤယွၤ အတၢ်မၤလိာ်တဖၣ် ဘၣ်ဆၣ် မ့မ့ၢ် အဝဲသ့ၣ်န့ၣ် တမၤဝဲဒ်န့ၣ်ဘၣ်.+ အဝဲသ့ၣ် ဃၣ်ကွံာ်အသး ချ့ချ့ ဒီးတလဲၤတၢ်ဒ် အမိၢ်ပၢ်ဖံဖု လၢပျၢၤတဖၣ် လဲၤဝဲအသိးဘၣ်. ၁၈ ဒီးခီဖျိလၢ ပှၤဆီၣ်တံၢ်မၤနၢၤအဝဲသ့ၣ် ဒီးမၤအၢမၤနးအဝဲသ့ၣ်အဃိ+ အဝဲသ့ၣ် ကအုကစွါလီၤ. ဒီးယဟိဝၤယွၤ သးကညီၤဘၣ်အဝဲသ့ၣ်အဃိ+ ဖဲယဟိဝၤယွၤ ဃုထၢထီၣ် ပှၤစံၣ်ညီၣ်ကွီၢ် လၢအဝဲသ့ၣ်အဂီၢ်+ တဘျီဂ့ၤ တဘျီဂ့ၤအခါ ယဟိဝၤယွၤ အိၣ်ဒီး ပှၤစံၣ်ညီၣ်ကွီၢ်အံၤလီၤ. ဒီးဖဲပှၤစံၣ်ညီၣ်ကွီၢ်အံၤ အိၣ်မူအဆၢကတီၢ်န့ၣ် ကစၢ်ယွၤ မၤထူၣ်ဖျဲးထီၣ် အဝဲသ့ၣ်လၢ အဒုၣ်အဒါတဖၣ် အစုပူၤလီၤ.
၁၉ ဘၣ်ဆၣ် ဖဲပှၤစံၣ်ညီၣ်ကွီၢ်တဂၤန့ၣ် သံအခါ အဝဲသ့ၣ် မၤကဒါက့ၤဝဲ ဒ်အလီၢ်လီၢ် ဒီးမၤတၢ်အၢတၢ်သီ အါန့ၢ်ဒံး အမိၢ်ပၢ်ဖံဖု လၢပျၢၤတဖၣ် ခီဖျိလၢ အဝဲသ့ၣ် ဘူၣ်ထီၣ်ဘါထီၣ် ယွၤလၢအဂၤတဖၣ် အဃိလီၤ.+ အဝဲသ့ၣ် တပာ်တ့ၢ် တၢ်လၢအမၤဝဲတဖၣ်ဘၣ် ဒီးအဝဲသ့ၣ် အခိၣ်ကိၤဒံးလီၤ. ၂၀ ဒီးယဟိဝၤယွၤ သးပှံၢ်ထီၣ် ပှၤအံၣ်စရ့လးဖိ+ ဒီးတဲဝဲလၢ “ပှၤတကလုာ်အံၤ တမၤထွဲ ဒ်ယတၢ်အၢၣ်လီၤအီလီၤ+ လၢယမၤလိာ်ပာ်စၢၤ အမိၢ်ပၢ်ဖံဖု လၢပျၢၤတဖၣ်အသိးဘၣ် ဒီးအဝဲသ့ၣ် တဒိကနၣ်ယၤဘၣ်.+ ၂၁ အဃိ ပှၤကလုာ်တဖၣ်လၢ အအိၣ်တ့ၢ်ဒံးလၢ ကီၢ်ပူၤ ဖဲစီၤယိၤၡူ သံဝံၤအလီၢ်ခံန့ၣ် ယတနီဟးထီၣ်ကွံာ် အဝဲသ့ၣ်လၢ ပှၤအံၣ်စရ့လးဖိအမဲာ်ညါ နီတကလုာ်ဘၣ်.+ ၂၂ ယကမၤဒ်အံၤန့ၣ် မ့ၢ်ဒ်သိး ယကမၤကွၢ် ပှၤအံၣ်စရ့လးဖိလၢ မ့ၢ်အဝဲသ့ၣ် ကပိာ်ကျဲလၢ ယဲဒၣ် ယဟိဝၤယွၤ ဒုးနဲၣ်+အဝဲသ့ၣ် ဒ်အမိၢ်ပၢ်ဖံဖု လၢပျၢၤတဖၣ် ပိာ်ဝဲအသိး ဧါန့ၣ်လီၤ.” ၂၃ အဃိ ယဟိဝၤယွၤ ပျဲဝဲလၢ ပှၤကလုာ်တဖၣ်အံၤ ကဆဲးအိၣ်ဒံးဝဲလၢ အဝဲသ့ၣ်အကျါ ဒီးတနီဟးထီၣ်ကွံာ် ပှၤကလုာ်တဖၣ်အံၤ ချ့ချ့ဘၣ်. ဒီးအဝဲ တဟ့ၣ်လီၤ အဝဲသ့ၣ်လၢ စီၤယိၤၡူအစုပူၤဘၣ်.